Korintkarank Poili Chitt 3:1-23
3 Dekhun bhav-bhoinnimno, hanv Devachem chintop asloleam lagim ulounk xoktam toso tumchea lagim ulounk xoklona. Tachea bodlek, sonvsari* chintop asloleam lagim ani Krista sovem dudh pietolea bhurgeam lagim uloitat toxem mhaka ulounchem poddlem.
2 Hanvem tumkam nibor jevonn diunk na, punn dudh dilem. Karonn tea vellar tumi tem jevonn jevunk xokonaslim. Khorem mhunnttlear, tumi azunui jevunk xokonant,
3 karonn tumi azun poriant sonvsari asat. Tumi dusreancher zollttat ani tumchea modem zhogddim zatat, tor tumi sonvsari lokam bhaxen nant kai ani tanchea bhaxen cholonant kai?
4 Karonn tumchea modlo eklo, “Hanv Paulucho xis,” ani dusro, “Hanv Apolosacho xis,” oxem mhunntta. Tednam tumi sonvsarantlea lokam bhaxen vagonant kai?
5 Apolos konn? Ani Paulu konn? Zoxem Somian dor ekleak seva nemun dilea, ani zanche udexim tumi visvas dovorla, toxe te sevok zaun asat.
6 Hanvem roilem, Apolosan udok ghatlem, punn Dev vaddoit ravlo.
7 Tea pasot, zo roita, vo udok ghalta to nhoi, punn Dev zo vaddoita, to mhotvacho asa.
8 Zo roita ani zo udok ghalta tanchea modem ekvott asa,* punn dor ekleak tachea kamachem inam mellttolem.
9 Ami Deva sangata kam korpi zaun asat. Tumi Dev roita tem xet, ani Dev bandta tem ghor.
10 Devan mhaka ji favo nasloli doia dakhoilea tache udexim hanvem ek onnbhovi bandkam korpea bhaxen buniad ghatli, punn tacher dusro konn bandkam korit asa. Dor eklean apunn buniadir koso bandkam korta tacher dhean diunchem.
11 Karonn khoinchoch munis ghatloli asa ti buniad soddun dusri buniad ghalunk xokona, ani hi buniad Jezu Krist zaun asa.
12 Te buniadir konn bhangar, chandi, ani moladik fator uzar korun, tor anik konn lakudd, vo suklolem tonn uzar korun bandkam korta.
13 Dor eka munxachem kam koslem tem porikxechea disa kollon ietolem,* karonn uzo soglem dakhoun ditolo, ani ujea vorvim dor ekleachem kam koslem tem dison ietolem.
14 Eklean buniadicher kelʼlem bandkam ubem urlem zalear taka inam mellttolo.
15 Punn eklean kelʼlem bandkam zollon gelem zalear taka luksonn zatolem. To salvar zatolo, punn taka koxe bhaxen tori ujeantlean vachoilʼlea sarkem zatolem.
16 Tumi Devachem mondir zaun asat ani Devachi povitr xokti tumchea bhitor ravta hem tumkam khoborna?
17 Konnem-i Devachea mondiracho nas kelo zalear Dev tacho nas kortolo. Karonn Devachem mondir povitr, ani tuminch tem mondir zaun asat.
18 Konnench apleakuch fosounchem nhoi: Tumchea modem konnui apunn hea sonvsarant* zannvaiecho mhunn chintʼta zalear tannem piso zauncho. Tea udexim to zannvaiecho zatolo.
19 Hea sonvsarachi zannvai Devachea nodren pixeponn zaun asa, karonn oxem boroilʼlem asa: “To zannvaiechea munxank tancheach naddbudʼdhen dhorta.”
20 Ani oxem-i boroilʼlem asa: “Zannvaiechea munxanchim chintnam kainch valorachim nant mhunn Jehova* zannam.”
21 Dekhun konnench, munis kitem korta tea vixim boddai marchi nhoi, karonn soglem tumchench zaun asa.
22 Zaum Paulu vo Apolos vo Kefas* vo ho sonvsar vo jivit vo moronn vo aicheo vostu vo ieuncheo asat teo vostu, soglem tumchench zaun asa,
23 ani tumi Kristachim, ani Krist Devacho.
Footnotes
^ Utran utor, “kuddichem.”
^ Vo “tancho ekuch udʼdhex asa.”
^ Utran utor, “ugddapem zatolem.”
^ Haka Pedru pasun mhunnttale.
