Korintkarank Poili Chitt 4:1-21
4 Lokamnim amkam Kristache chakor* ani Devache povitr guttache sevok mhunn somzochem.
2 Dor eka dhoniak aplo sevok visvaxi aslolo zai.
3 Tumi vo khoinchea-i munxanchea korttan mhoji choukoxi keli zalear mhaka forok poddona. Khorem mhunnttlear, hanv pasun mhoji choukoxi korina.
4 Karonn hanvem kitem-i vaitt kelam oxem mhaka disona. Punn tea pasot, hanv nitivont zaina, mhoji nit kortolo to Jehova* zaun asa.
5 Tea pasot, tharailʼlea vella adim, mhunnche Somi ieum poriant konnanchich vo kiteachich nit korinakat. To kallkhantleo gupit vostu uzvaddant haddttolo ani kallzache hetu dakhoun ditolo, ani uprant dor ekleak Deva koddlean xabaski mellttoli.
6 Bhav-bhoinnimno, hanvem mhojem ani Apolosachem udharonn diun, heo vostu tumchea boreak lagon sangleat. Amchea udharonnantlean tumi ho kaido pallunk xikonk zai. To mhunnttlear: “Boroilʼlem asa tachea bhair vochonakat.” Tumi oxem korit zalear tumi gorvan fulon eklo dusrea poros boro mhunn somzochimnant.
7 Tum dusream poros vhodd mhunn somzonk tujea bhitor oxem kitem asa? Ani tuka mellonk na oxem tujea lagim kitem-i asa? Tuka mellʼllam zalear, mellonk naslolea bhaxen tum kiteak boddai marta?
8 Tumi poilinch dhadoxi zaleant? Tumi poilinch girest zaleant? Tumi amchea bogor raza koxe raz korunk lagleant? Tumi poilinch raza koxe raz korunk suru kelʼlem zalear kitlem borem zaupachem. Amkam-i tumchea borabor raz korunk mellttolem aslem.
9 Mhaka dista ki Devan amkam apostlank, mornnachi xikxa favo aslole munis koxe lekhleat, zankam nattkam zatat tea zagear ekdom nimanne koddem haddttat. Karonn amkam sonvsara mukhar, toxench devdutam mukhar ani lokam mukhar dekhavo koso ube keleat.
10 Krista khatir amkam pixe koxe lekhtat, punn tumi Kristachea ekvottant xannim zaun asat. Ami oskot, punn tumi tor ghott asat. Tumkam man ditat, punn amcho zalear opman kortat.
11 Aiz poriant ami bhukelʼle ani tanelʼle asat, amchea angar goroz title kopdde nant,* amkam mar ghaltat, ani amkam ghor na.
12 Ami amchea hatamnim khub vavr kortat. Amcho opman kortat tednam ami besanv ditat. Amkam dhumallo ditat tednam ami pasiensan tem sostat.
13 Amchem nanv piddʼddear kortat tednam ami xant ravon zobab ditat.* Aiz poriant amkam sonvsaracho kochro ani soglea torecho chikol koxe somzotat.
14 Hanv hem tumkam lojent ghalunk boroina, punn tumi mhojim mogachim bhurgim mhunn hanv tumkam somzaitam.
15 Karonn Kristachea xisam modem 10,000 zann tumchi dekhrekh korpi* mhunn asat astole, tori astana tumche zaite bapui nant. Karonn bore khobre udexim Krist Jezuchea ekvottant, hanv tumcho bapui zalam.
16 Taka lagon, mhoji dekh gheiat mhunn hanv tumchea lagim vinoti kortam.
17 Hea pasot, hanv tumchea lagim Timotak dhaddttam, Somiache sevent to mhozo mogacho ani visvaxi bhurgo zaun asa. Krist Jezuchea seve sombondit asloleo mhojeo vatto to tumchea ugddasak haddttolo. Teoch vatto uzar korun hanv soglea zageancher dor eka sobhent xikoitam.
18 Hanv tumchea lagim porot kednanch ieunchona oxem somzon thoddim zannam gorvan bhorleant.
19 Punn Jehovachi* khuxi asa zalear hanv beginuch tumchea lagim ietolom, ani tednam hanv gorvan bhorleant tanchea utrancher dhean diunchona. Punn tanche lagim Devachi xokti asa vo na tem polloitolom.
20 Karonn Devachem Raj utram vorvim nhoi punn tachea xokte udexim dison ieta.
21 Tumkam kitem zai? Hanv boddi gheun tumchea lagim ieum vo mogan ani xant monan ieum?
Footnotes
^ Vo “Kristachea khala kam korpi.”
^ Utran utor, “ami uktech asat.”
^ Utran utor, “vinoti kortat.”
^ Vo “tumche xikxok.”
