Korintkarank Poili Chitt 9:1-27
9 Hanv svotontr na? Hanv ek apostl nhoi? Hanvem amchea Somi Jezuk pollounk na? Somiache sevent tumi mhojem vavrachem foll nhoi?
2 Dusream pasot hanv ek apostl nhoi zait, torui tumchea pasot hanv ek apostl! Karonn Somiache sevent hanv ek apostl mhunn tumi mhozo xikʼko.
3 Mhoji choukoxi kortat tankam hanv oxe ritin zobab ditolom:
4 Amkam khaunk-pieunk hokʼk* na?
5 Dusre apostl, Somiache bhav ani Kefasa* bhaxen, amkam-i bhavarthant aslole bhoinni lagim kazar zaun, tika amchea borabor vhoronk hokʼk na?
6 Vo fokot Barnabasan ani hanvem kam korun pott bhorchem kai?
7 Oso konnui soinik asa zo apunnuch aplo khorch bhagoun foujent kam korta? Oso konnui munis asa zo drakxancho mollo rovun tachem foll khaina? Vo oso konnui gonvlli asa zo hindd posun tachem ilʼlem pasun dudh piena?
8 Munis chintʼta teoch vostu hanv sangtam kai? Kaido-i* amkam hench xikoina?
9 Karonn Moizesa udexim dilʼlea Kaideant oxem boroilʼlem asa: “Mollnni korta tea boilachem tondd bandchem nhoi.” Dev fokot boilanchi porva korta?
10 Tannem hem amchea pasot borounk naslem? Khorem mhunnttlear, hem tannem amcheach pasot boroilʼlem, karonn zo zot ghalta ani xet molltta tannem apleak tantunt vantto mellttolo mhunn axa dovrunk zai.
11 Ami tumchea modem Devacheo vostu vompleat, tor tachea bodlek tumi amcheo gorzo purnn korunk modot korop chukichem kai?
12 Dusreank tumche koddlean ho adar mellonk hokʼk* asa zalear, amkam tanchea poros chodd hokʼk na? Tori astana, ho hokʼk uzar korun ami tumchea lagim adar magonk na. Tachea bodlek, Kristachi bori khobor porgott korunk koslich addkholl iena zaunk ami soglem sosun ghetat.
13 Devmondirant povitr sevek zuddlolim kamam kortat te Devmondirant mellttat teo vostu khatat, ani vedi lagim seva kortat tankam vedir bhettoilʼlea bolidanacho vantto melltta mhunn tumkam khobor na?
14 Teach toren, bore khobre udexim tanchem pott bhorchem mhunn Somian bori khobor porgott kortoleank adnea dilea.
15 Punn hanvem hantuntlea ekui manddavollicho faido gheunk na. Khorem mhunnttlear, mhojea pasot hem soglem korchem mhunn hanvem hem borounk na. Karonn hachea poros hanv melʼlom zalear chodd borem zaupachem. Boddai marunk mhojea lagim ek karonn asa tem hanv konnankuch kaddun vhoronk diunchom na!
16 Atam hanv zor bori khobor porgott kortam, tor hem mhaka boddai marunk karonn nhoi, karonn bori khobor porgott korop mhoji zobabdari zaun asa. Hanv bori khobor porgott korina zalear mhojer hai!
17 Hanv hem kam mhojea khuxen kortam zalear mhaka inam mellttolo, punn mhaka hem kam korunk khuxi na zalear pasun, hi mhoji zobabdari zaun asa ji mhaka Devan dilea.
18 Tor mhozo inam kitem? Hoch ki hanvem mol ghenastana bori khobor porgott korchi. Oxem kelʼlean bore khobre vixim mhaka zo odhikar* asa to hanv chukiche ritin uzar korchona.
19 Khorem mhunnttlear, hanv konnanchoch chakor nhoi, tori astana zata titlea lokank Somiache vatter haddunk hanv sogleancho chakor zalom.
20 Judevank melloun gheunk hanv Judevam pasot ek Judev zalom. Hanv kaidea khala na, tori astana je kaidea khala asat tankam melloun gheunk, hanv kaidea khala asloleam sarko zalom.
21 Khorem mhunnttlear, hanv Deva mukhar kaidea xivai na, punn Kristachea kaidea khala asa. Punn je kaidea khala nant tankam melloun gheunk, hanv kaidea khala naslolea sarko zalom.
22 Oskotank melloun gheunk hanv oskotam pasot oskot zalom, koxe-i toren mhojean thoddea tori lokank salvar korunk zaunchem mhunn hanv soglea torechea lokam pasot soglem zalom.
23 Mhaka bori khobor dusreank sangonk mellchi mhunn hanv sogleo vostu bore khobre pasot kortam.
24 Dhanvddent bhag gheupi soglech dhanvtat, punn ekleakuch inam melltta mhunn tumkam khobor na? Tor tumkam inam mellttoloch tea toren dhanvat.
25 Khellant bhag gheupi* soglea vostumnim svotacher tabo dovorta. Te piddʼddear zata toslo mukutt melloun gheunk oxem kortat tem khorem. Punn ami, kednanch piddʼddear zaina toslo mukutt melloun gheunk oxem kortat.
26 Taka lagon, hanv dhanvtam tem khobor nastana dhanvona, toxench varear mutti marlolea bhaxen hanv mutti marina.
27 Dusreank porgott kelea uprant, koslea-i karonnak lagon hanvuch Devachi maniotai hogddaina zaunk, hanv mhojea kuddik martam* ani tika gulam korun dovortam.
Footnotes
^ Utran utor, “odhikar.”
^ Haka Pedru pasun mhunnttale.
^ Utran utor, “odhikar.”
^ Vo “hokʼk.”
^ Vo “Dor eklo khellpi.”
^ Vo “kuddik khast laita; kuddi sovem koddok toren vagta.”
