Tesalonikekarank Dusri Chitt 2:1-17
2 Punn, bhav-bhoinnimno, amcho Somi Jezu Krist hajir asa* tea vellar ani tachea sangata ami ektthaim zatole tea vixim ami tumchea lagim vinoti korunk sodhtat ki,
2 Jehovacho* dis ailo mhunn tachea preronnan kollʼllam vo konnem tori tonddan sanglam vo amchea thaun chitt mellʼllea oxem mhunn konnem-i khatren sanglem zalear pasun tumi tumchim monam ghusponk dium nakat vo bhienakat.
3 Konnankuch tumkam koxech toren fosounk dium nakat. Karonn dhorm broxtt zai poriant* ani noxtto munis, mhunnche, nasacho put dison ieum poriant, to dis ieunchona.
4 Ho nasacho put virodh korpi zaun asa, ani dev mhunnttat tea dor eklea poros, ani bhokti kortat* tea dor eka vostu poros apnnak voir kaddtta. Oxe toren to Devachea mondirant boson sogleam mukhar apunn ek dev mhunn dakhoita.
5 Hanv tumchea sangata aslom tednam hem soglem ghoddttolem mhunn hanv tumkam sangtalom tem tumkam ugddas na?
6 Tharailʼlea vellaruch to dixtti poddcho mhunn taka konn addaun asa hem tumi atam zannant.
7 Noxttea munxanchem vaittponn suru zalam ani tem gupit asa hem khorem. Punn jea meren addaun dhorpi vattevoilo kuxik sorona tea meren tem gupit urtolem.
8 Tea uprant, to noxtto munis dison ietolo. Taka Somi Jezu aplea utranchea bollan* nanch kortolo ani apunn hajir asa* mhunn dakhoun diun tacho nas kortolo.
9 Punn noxttea munxachem hajir asop Soitana thaun astolem. To soglea torechim xoktivont kamam ani khotteo khunna ani vizmitam,
10 toxench dor ek torechem vaittponn ani fosoita toslim kamam kortolo. Hea udexim te fostat ani nasa koddem vochot asat. Hich tanchi khast zaun asa. Karonn salvar zaunk tannim sotacho mog korunk na.
11 Tannim fottincher visvas dovorcho mhunn Dev tankam khottea xikounne udexim fosonk soddun dita.
12 Hea vorvim tanchi sogleanchi nit zata. Karonn tannim sotacher visvas dovrunk na, punn tim vaittant khuxal zalim.
13 Punn, bhav-bhoinnimno, tumi jim Jehovachim* mogachim asat, tumchea pasot sodanch Devache upkar attovop amchi zobabdari zaun asa, karonn Devan tumkam survate thaun vinchleant. Tannem aplea povitr xokten tumkam povitr korun ani sotacher tumcho bhavarth asa dekhun, tumkam taronn diunk vinchleant.
14 Amcho Somi Jezu Kristachi mhoima tumkam mellchi mhunn ami porgott kortat tea bore khobre udexim tumkam apoileant.
15 Tor bhav-bhoinnimno, ghott ubim ravat, ani tumkam ami tonddan vo chittim udexim xikoileat teo vostu* pallit ravat.
16 Amchea Somi Jezu Kristan ani amcho mog kela ani aple favo naslole doie udexim amkam sodanch urta tosli bhuzvonn dilea ani bhorvonso dila tea Bapan, mhunnche, Devan
17 tumchea kallzank bhuzvonn dium, ani tumkam sodanch borem tem korunk ani borem tem ulounk ghott korum.
Footnotes
^ Vo “khore bhoktek fatt kori poriant.”
^ Vo “bhokti korunk uzar kortat.”
^ Utran utor, “tonddachea svasan.”
^ Utran utor, “te riti rivaz.”
