Hebrevank Chitt 11:1-40
11 Bhavarth mhunnche bhorvonso dovorleat teo vostu ghoddttoleoch mhunn vatt pollovop, ani pollounk nant teo vostu khorench asat mhunn khatri dovrop.
2 Karonn bhavarthak lagon adlea kalla voilea lokank,* te Devak manvoleat mhunn govai mellʼlli.
3 Bhavarthak lagon sonvsarantleo* sogleo vostu Devan aplea utra udexim rochloleo* mhunn ami somzonk xoktat. Taka lagon, distat teo vostu disonant tea vostum thaun ostitvant aileat.
4 Bhavarthak lagonuch Abelan Devak, Kaina poros vorto iodn bhettoilʼlo. Ani heach bhavarthak lagon Devan tachi bhett manun gheun to nitivont mhunn govai dili. To melo hem khorem, punn tachea bhavartha udexim to aiz pasun uloita.
5 Bhavarthak lagonuch Enokan moronn chakchem nhoi mhunn taka dusrea zagear vhelo, ani to khoinch mellonk na. Karonn Devan taka dusrea zagear vhelʼlo. Punn taka vhorchea poilim to Devak manvololo mhunn taka govai dili.
6 Bhavarth nastana, ek munis Devak manvonkuch xokona, karonn zo tachea lagim ieta tannem Dev khoroch asa,* ani zo konn taka kallzantlean sodhta taka to inam dita mhunn visvas dovrunk zai.
7 Bhavarthak lagonuch Noahn Devachi bhirant dhorun aplo ghorabo salvar korunk ek tarum* bandlem, karonn taka Deva koddlean disonaslolea vostum vixim xittkaunni mellʼlli. Ani teach bhavarthak lagon tannem ho sonvsar guneanvkari mhunn dakhoun dilo ani bhavartha udexim melltta tem nitivontponn tannem daiz mhunn melloun ghetlem.
8 Bhavarthak lagonuch Abrahamak apoilo tednam tannem aikolem, ani taka Deva koddlean daiz mhunn mellcho aslo tea zagear vochonk bhair sorlo. Apunn khoim voita tem taka khobor naslem, tori astana to gelo.
9 Bhavarthak lagonuch to bhasailʼlea desant ek pordexi koso ravlo. Teach bhasaunneche daiji asle, tea Izaka ani Jakoba sangata to tombumnim ravlo.
10 Karonn, to oslea xarachi vatt polloitalo zachi buniad ghott asa, ani zacho rochpi* ani bandpi Dev zaun asa.
11 Bhavarthak lagonuch Sarak bhurgem zolmak haddpachi xokti mellʼlli. Khorem mhunnttlear, bhurgeak zolmak haddpachi tichi pirai zaun gelʼli. Karonn jea Devan tika bhasaunni kelʼli to visvaxi* mhunn tinnem manun ghetlolem.
12 Karonn, zo munis melʼlo koso aslo, tachea udexim sorga voilea noketram bhaxen ani doria dege voilea renve bhaxen mezunk zainant titlim bhurgim zolmak ailim.
13 Hea soglea munxamnim moro poriant bhavarth dovorlo. Khorem mhunnttlear, tankam bhasaunneo purnn zatat teo pollounk mellonk na, tori astana tannim pois thaunuch teo polloileo ani khuxal zale. Toxench, tannim apunn tea desant pordexi ani thoddoch temp ravpi mhunn soglea lokam mukhar sangon dilem.
14 Karonn, oxe toren uloitat tim utsuktaien to zago sodhtat mhunn dakhoun ditat zo tancho svotacho zatolo.
15 Ani zo des tim soddun ailʼlim tacho tim ugddas korit ravlolim zalear tankam thoim porot vochonk sondhi mellttoli asli.
16 Punn atam tim anikui boro zago melloun gheunk sodhtat, zacho sombond sorga lagim asa. Teach pasot, Devak apunn tancho Dev, oxem mhunnonk loz disona, ani tannem tanchea pasot ek xar toiar kelam.
17 Bhavarthak lagonuch porikxa zali tednam Abraham, Izakak iodn koso bhettounchoch aslo. Hoi, zannem khuxalkaien bhasaunneo manun ghetleo to aplea ekleach putak iodn koso bhettounk toiar zalo.
18 Taka oxem sanglolem: “Tuka jea sonsti* vixim bhasailam ti Izaka udexim ietoli,” hem sanglolem astana pasun tannem oxem kelem.
19 Dev tachea putak meloleantlo jivont korunk xokta mhunn taka visvas aslo. Taka tacho put mornnachea chopkeantlo porot mellʼllo. Hem fuddem kitem ghoddpachem aslem tachem ek udharonn zalem.
20 Bhavarthak lagonuch fuddem ghoddchem aslem tea vostum vixim Izakan, Jakob ani Esauak besanv dilem.
21 Bhavarthak lagonuch morcho aslo tednam Jakoban, Juzechea dogui putank besanv dilem, ani aplea boddiecho adar gheun Devachi bhokti keli.
22 Bhavarthak lagonuch morchea adim Juzen, Izrael lok Ejiptta thaun bhair sortole mhunn sanglem, ani aplea haddam vixim* suchounneo* dileo.
23 Bhavarthak lagonuch Moizesachea avoi-bapain to zolmolea uprant tin mhoine poriant taka lipoun dovorlo. Karonn to bhurgo khub sobit aslo mhunn tannim polloilem ani tim razachea hukumak bhieunk nant.
24 Bhavarthak lagonuch vhodd zalea uprant, Moizesan apunn Faraoh-chea dhuvecho put mhunnon gheunk nakarlem.
25 Ani thoddeach disam pasot patkanchem sukh bhogchea bodlek, tannem Devachea lokam sangata dukh sosunk vinchun kaddlem.
26 Devacho makhlolo* zalʼlean opman sosop Ejipttantlea soglea theveam poros vhoddli girestkai mhunn tannem manun ghetlem. Karonn tannem apli nodor inamacher dovorloli.
27 Bhavarthak lagonuch tannem Ejiptt soddun dilem. Punn razachea ragak bhieun tannem oxem korunk na, karonn disona toslea Devak polloit asa tea bhaxen to ghott ravlo.
28 Bhavarthak lagonuch tannem Paskanchi porob keli, ani nas korpi malgoddea putank dukhoina zaunk* tannem darachea kasletticher rogot ximpddailem.
29 Bhavarthak lagonuch sukhe zomnir choltat tea bhaxen cholon tannim Tambddo Doria par kelo. Punn Ejipttkar toxem korunk lagle tednam dorian tankam gillʼlle.
30 Bhavarthak lagonuch Izrael lokamnim Jeriko xarachea bhonvtonni sat dis bhonvddi marli tednam tea xaracheo vontteo kosollʼlleo.
31 Bhavarthak lagonuch Rahab nanvachea xindoll bailecho, adnea pallinant tea lokam sangata nas zaunk na. Karonn lipon choukoxi korunk ailolea munxank tinnem aplea ghorant ieukar dilo.
32 Ani konnam-konnam vixim sangom? Karonn hanv Gideon, Barak, Samson, Jeftha, David, toxench Samuel, ani dusrea provadeam vixim sangonk laglom zalear vell pavchona.
33 Bhavarthak lagonuch tannim rajeam jikon ghetlim, nitivontponn stapon kelem, tankam Deva koddlean bhasaunneo mellʼlleo, tannim xinvachim tonddam bond kelim,
34 ujeache xoktecho tancher kainch porinnam zaunk na, tolvarechea dhare thaun te salvar zale, oskot astana-i xoktivont zale, te bhienastana zhuzle ani akromonn kortolea foujek tannim dhanvddaun ghatli.
35 Bailank tanchim mogachim melolim jivont zaun porot mellʼllim. Punn dusreank khub tras diun marun uddoilim karonn tim dusrea khoinchea-i soddvonnechea adaran suttka melloun gheunk toiar naslim. Tankam melea uprant anik bore toren jivont zaunk zai aslem.
36 Hoi, anik zaitea zannanchim fokannam kelim ani tankam chabkamnim marlim. Hea toren tanchi porikxa zali. Titlench nhoi, tankam sanklleamnim bandlim, ani bondkhonnint ghatlim.
37 Tankam fatrailim, tanchea bhavarthachi porikxa zali, khorvotin tanche don kuddke kele, ani tolvarin tankam marun uddoilim. Tim menddranchi ani bokddeanchi chambddi ghalun bhonvtalim, tim gorjek sampoddlolim aslim, tankam dhumallo sosunk poddlo ani vaitt vagnnukecho fuddo korunk poddlo.
38 Tim itlim borim aslim ki ho sonvsar tankam favo toso naslo. Tim oronnʼnneant,* dongrancher, dholimnim ani prithumechea khanchimnim bhonvtalim.
39 Hea sogleank, tanchea bhavarthak lagon Devan apli maniotai asa mhunn govai dilʼli, punn tannim bhasaunni purnn zata ti pollounk na.
40 Karonn Devan polinch amchea pasot kitem tori anik borem tharaun dovorlam, ani tankam amchea bogor poripurnn korchim nhoi mhunn tannem oxem kelem.
Footnotes
^ Vo “amchea purvozank.”
^ Vo “toiar kelʼleo.”
^ Vo “ostitvant asa.”
^ Utran utor, “boks; pett.” Hem tarum choukoni lamb boks koxem aslem ani pondak sopatt aslem.
^ Vo “toiar korpi.”
^ Vo “bhavarth dovorpa sarko.”
^ Utran utor, “bie.”
^ Vo “apleak purchea vixim.”
^ Vo “adnea.”
^ Vo “Grik bhaxent Krist.”
^ Utran utor, “hat laina zaunk.”
^ Hem utor choddxe pavtt eka oslea zageak uzar kelam zoim chodd lok ravonant, kainch roinant ani thoim chodd zhaddam ani udokui asona.
