Dhormdutancho Itihas 11:1-30
11 Videxi lokamnim Devachem utor manun ghetlem tem Judeiantlea apostlamnim ani bhavamnim aikolem.
2 Taka lagon, Pedru Jeruzalemant ailo tednam sunot korunkuch zai oxem mhunnttale te lok tache vixim vaitt ulounk* lagle.
3 Tannim mhunnttlem: “Tum sunot korunk na toslea lokanchea ghora gelo ani tanchea borabor jevlo.”
4 Tednam Pedrun tankam survatek thaun kitem-kitem ghoddlem tem soglem somzailem. Tannem mhunnttlem:
5 “Jopa xarant hanv magnnem kortalom tednam hanvem ek dorxon polloilem. Ek vhoddlea chadra bhaxen kitem tori* mollba voilean sokol denvtana hanvem polloilem. Taka charui konnxeak dhorun prithumer denvoitale ani tem sarkem mhojea lagim ailem.
6 Hanvem bariksannen polloilem tednam tantunt, prithume voilim soglea torechim char paim-anchim zonvaram, pott goxtton cholpi pranni ani mollba voilim suknnim aslim.
7 Teach borabor, mhaka ek avaz pasun aikonk ailo: ‘Pedru utth, hankam katrun kha!’
8 Punn hanvem mhunnttlem: ‘Na Somia, na, hanvem kednanch koslich oxuddh ani mhelli vost mhojea tonddant ghalunk na.’
9 Magir dusrea pavtti, mollba voilean teach avazan mhaka mhunnttlem: ‘Devan xudʼdh keleat tea vostunk tum mhelleo mhunnpachem bond kor.’
10 Oxench tisre pavtti ghoddlem, ani uprant soglem mollbar ubarun vhelem.
11 Teach vellar, ami ravtale tea ghora mukhar tin munis ieun ube ravle. Tankam Sezaria thaun mhojea lagim dhaddlole.
12 Kainch dubhav dovornastana hanvem tanchea sangata voichem mhunn mhaka povitr xokten sanglem. He sov bhav pasun mhojea borabor aile, ani ami tea munxachea ghora gele.
13 “Tannem amkam sanglem ki tachea ghorant tannim ek devdut ubo aslo to polloilo. Tea devdutan taka mhunnttlem: ‘Jopak munxank dhadd ani Pedru mhunnttat tea Simanvak apoun hadd.
14 To tuka osleo vostu sangtolo jea udexim tuka ani tujea akʼkhea ghorabeak taronn mellonk xoktolem.’
15 Punn hanv ulounk lagtanch, amcher survatek povitr xokti denvloli toxi tancherui denvon aili.
16 Tednam mhaka Somiachim tim utram ugddas ailim. To mhunnttalo: ‘Juanvan udkant bautizm dilo punn tumkam povitr xokten bautizm mellttolo.’
17 Somi Jezu Kristacher ami visvas dovorla dekhun, Devan amkam jem funkott dennem dil’lem tench tankam-i dilem. Tor Devak addaupi* hanv konn?”
18 Hem aikolea uprant, tannim vad-vivad korpacho bond kelo,* ani oxem mhunnon Devachi mhoima keli: “Hacho orth, Devan videxi lokankui jivit mellchem mhunn poschatap korpachi sondhi dilea.”
19 Istevak jivexim marlea uprant te bhavankui dhumallo diunk lagle. Taka lagon, te veg-vegllea zagear ximpoddle zoxem, Finisia, Siprus ani Antiok. Thoim te fokot Judev lokankuch Devachem utor sangtale.
20 Punn, tantuntle thodde je Siprus ani Sirenantle asle te Antiokant aile ani Grik uloupi lokank, Somi Jezu vixim bori khobor sangonk lagle.
21 Tea bhair, Jehovacho* hat tancher aslo, ani khub lokamnim bhavarth dovorlo ani te Somiachea vatten aile.
22 Tanchea vixim Jeruzalemantlea sobhek poriant khobor pavli, ani tannim Barnabasak Antiokak dhaddlo.
23 To thoim pavlo tednam tannem Devachi favo nasloli doia polloili. To khuxal zalo ani tankam sogleank purnn kallzan Somiak visvaxi ravonk dhir diunk laglo.
24 Karonn Barnabas ek boro munis aslo ani povitr xokten ani bhavarthan bhorlolo aslo. Tednam zaito lok Somiacher bhavarth dovrunk laglo.
25 Uprant to Tarsusak gelo ani Saulu mello poriant taka sodhunk laglo.
26 Saulu taka mellʼllo tednam, tannem taka Antiokak haddlo. Uprant akʼkhem ek voros-bhor te tanchea sobhe sangata ektthaim zait ravle ani lokanchea zomeak xikoit ravle. Ani Devachea margdorxona pormonnem Antiokant xisank poilech pavtt Kristanv mhunn nanv poddlem.
27 Tea disamnim thodde provadi Jeruzalema thaun Antiokak aile.
28 Tanchea modlea eka provadeachem nanv Agabus aslem. To ubo ravlo ani povitr xoktechea adaran tannem bhasaunni keli ki akʼkhea sonvsaracher vhodd promannan bhuk poddchi asa. Hi bhuk Klaudiusachea tempar poddli.
29 Tednam Antiokantlea xisamnim Judeiant ravtolea bhavank ap-aplea tanki pormonnem modot dhaddunk tharav ghetlo,
30 ani tannim toxench kelem. Tannim Saulu ani Barnabasa vorvim heo vostu vhoddilank dhaddun dileo.
Footnotes
^ Vo “lok tachea lagim zhogddonk.”
^ Utran utor, “eke torechem aidon.”
^ Vo “Devachea vatter ubo ravonk.”
^ Utran utor, “te vogi zale.”
