Dhormdutancho Itihas 16:1-40
16 Uprant Paulu Derbe ani Listra xarant pavlo. Thoim Timot nanvacho ek xis aslo. Tachi avoi Judev asli ani Somiacher bhavarth dovortali. Punn tacho bapui Grik aslo.
2 Listra ani Ikoniumantle bhav Timotachi khub tokhnnai kortale.
3 Taka lagon, apunn Timotak provas kortana aplea borabor gheun vochonk sodhta mhunn Paulun bhavank sanglem. Tannem taka aplea borabor vhelo ani tachi sunot keli. Karonn thoinchea vattarantle sogle Judev lok Timotacho bapui Grik mhunn zannam asle.
4 Te thoim thaun jea-jea xaramnim gele, thoim tannim Jeruzalemantlea apostlamnim ani vhoddilamnim kitem nirnnoi ghetla to tankam sanglo ani tankam pallunk lailo.
5 Hacho porinnam oso zalo, ki sobhencho bhavarth ghott zait gelo ani disan-dis xisancho ankddo vaddot gelo.
6 Magir te Frijia ani Galasient gele. Karonn Asiant Devachem utor sangonk povitr xokten tankam addaile.
7 Uprant te Misiant pavle tednam tannim Bithiniant vochpacho proitn kelo. Punn Jezun povitr xokte udexim tankam thoim vochonk porvangi diunk na.
8 Taka lagon, te Misia vattarantlean* Troas xarant gele.
9 Uprant ratchea vellar Paulun ek dorxon polloilem. Tantunt Masedoniantlo ek munis ubo ravon taka oxi vinoti kortalo: “Masedoniant ieun amkam modot kor.”
10 Hem dorxon polloilea borabor ami rokddech Masedoniant vochonk bhair sorle. Karonn thoinchea lokank bori khobor sangonk Devan amkam apoileat mhunn ami somzole.
11 Taka lagon, ami Troasant tarvar bosle ani doria vatten nitt Samothras zunvear gele. Ani dusrea disa Niapolis xarant pavle.
12 Thoim thaun ami Filipint gele. Hem Masedoniachem sogleant khas xar aslem. Ani thoim zaite Romi lok ravtale. Ami hea xarant thodde dis ravle.
13 Sabathachea disa ami xarachea darvonttea bhair eka nhoim-chea deger gele. Thoim magnnem korunk ek zago astolo oxem amkam dislem mhunn ami thoim vochon bosle. Ani thoim ektthaim zalʼlea bailank porgott korunk lagle.
14 Thoim Thiatira xarantli Lidia nanvachi ek bail asli. Ti zambllea rongache kopdde viktali. Ti Devachi bhokti korpi bail asli ani Paulu sangta tem dhean diun aikotali. To sangta tea vostuncher visvas dovrunk Jehovan* tichem kalliz purnn toren ugoddlem.
15 Lidia ani tichea ghorabean bautizm ghetlo. Uprant tinnem amkam vinoti korun mhunnttlem: “Hanvem Jehovacher* bhavarth dovorla mhunn tumi khorench mantat zalear mhojea ghorant ieun ravat.” Ani ti amkam apoit ravli dekhun ami tichea sangata gele.
16 Uprant ami magnnem korpachea zagear voitale tednam amkam ek chakorn mellʼlli. Ticher fuddar sangpi ek noxtto dut* boslolo. Ti chakorn fuddar sangtali ani tea udexim tiche dhoni zaite poixe zoddttale.
17 Paulu ani ami jea-jea zagear voitale, thoim-thoim tem cheddum amchea fattlean ietalem ani mottʼttea avazan bob marun mhunnttalem: “He munis Sogleant Vortea Devache sevok zaun asat. Te tumkam taronnachea vattecho sondex porgott kortat.”
18 Tem khub dis meren oxem korit ravlem. Xevottak Pauluk tacho bejar ailo ani fattlean vollon tannem tea chakornicher boslolea noxttea dutak mhunnttlem: “Hanv tuka Jezu Kristachea nanvan hukum ditam, tachea voilo bhair soron voch!” Teach vellar, to tachea voilo bhair soron gelo.
19 Atam, tea chakorni udexim tankam zoddunk mellona hem tea dhoniamnim polloilem tednam tannim Paulu ani Silasak dhorle. Ani tankam voddit bazarant haddun, odhikaream lagim gheun gele.
20 Tannim tankam nogor-odhikaream mukhar ube kele ani mhunnttlem: “He munis amchea xarantlea lokank tras ditat. Te Judev zaun asat,
21 ani te lokank osle riti-rivaz xikoitat je apnnaunk vo pallunk amkam porvangi na. Karonn ami Romi.”
22 Tednam lokancho zomo tanchea add zalo, ani nogor-odhikareamnim Pauluche ani Silasache kopdde pinzle ani tankam danddeamnim marche mhunn hukum dilo.
23 Tankam khub marlea uprant bondkhonnint ghatle. Ani bondkhonnichea odhikareak tancher koddok nodor dovor mhunn hukum dilo.
24 Oslo hukum mellʼlla mhunn, tea bondkhonnichea odhikarean tankam bhitorlea bondkhonnint ghatle ani tanche paim lakddachea khoddeant* ghatle.
25 Punn modle rati, Paulu ani Silas magnnem kortale ani git gaun Devachi vakhannʼnni kortale ani dusre koidi aikotale.
26 Tednam okosmat ek vhoddlo bhuimkamp zalo, jea udexim bondkhonnichi buniad pasun halʼli. Ani teach vellar bondkhonnichim soglim daram uktim zalim ani sogleancheo sanklleo tuntton poddleo.
27 Tednam bondkhonnicho odhikari zago zalo ani bondkhonnichim daram uktim asat tim tannem polloilim. Sogle koidi pollon gele astole oxem chintun tannem apli tolvar kaddli ani to aplo jiv kaddunk sodhtalo.
28 Tednam Paulun taka mottʼttean ulo kelo ani mhunnttlem: “Tuzo jiv kaddinaka, karonn ami sogle hangach asat!”
29 Tednam bondkhonnichea odhikarean dive haddunk laile ani to begin bhitor gelo, ani koddkoddot Pauluchea ani Silasachea paim-am mukhar poddlo.
30 To tankam bhair gheun ailo ani tannem mhunnttlem: “Taronn mellonk hanvem kitem korunk zai tem mhaka sangat.”
31 Tannim mhunnttlem: “Somi Jezucher visvas dovor. Tednam tuka ani tujea akʼkhea ghorabeak taronn mellttolem.”
32 Paulun ani Silasan taka ani tachea akʼkhea ghorabeak Jehovachem* utor sanglem.
33 Bondkhonnicho odhikari ratcheach vellar tankam aplea borabor gheun gelo ani tanche ghave dhuile. Uprant, tannem ani tachea ghorantlea soglea lokamnim rokddoch bautizm ghetlo.
34 To tankam aplea ghora gheun gelo ani tankam jevunk dilem. Tannem aplea akʼkhea ghorabea sangata khuxalkaien vell sarlo karonn atam tannim Devacher bhavarth dovorlolo.
35 Dis zalo tednam nogor-odhikareamnim rakhonndarank oxem sangon dhaddle: “Tea munxank soddat.”
36 Tednam bondkhonnichea odhikarean hem Pauluk ieun sanglem: “Nogor-odhikareamnim thoddea munxank oxem sangon dhaddleat ki tumkam dogainkui soddun diunche. Taka lagon, atam tumi bhair ieiat ani bore korun vochat.”
37 Punn Paulun taka mhunnttlem: “Ami Romi nagrik, tori astana tannim amcho guneanv asa kai na hem pollounchea poilinch* amkam sogleam mukhar mar ghatlo ani amkam bondkhonnint uddoile. Ani atam konnank kollonastana amkam bhair sorun vochat oxem mhunnttat? Na. Ami oxem korchenant! Tannim svota ieun amkam hanga thaun bhair gheun voichem poddttolem.”
38 Rakhonndaramnim hem soglem vochon nogor-odhikareank sanglem. Odhikareamnim te munis Romi nagrik mhunn aikolem tednam te khub bhiele.
39 Taka lagon, te aile ani tankam somzaunk lagle. Ani tankam bhair haddun, tannim hem xar soddun voichem mhunn tanchea lagim vinoti korunk lagle.
40 Punn te bondkhonnintlean bhair sorlea uprant Lidiachea ghora gele. Ani thoim bhavank mellon, tannim tankam dhir dilo ani uprant thoim thaun gele.
