Dhormdutancho Itihas 17:1-34
17 Atam te Amfipoli ani Apolonia xarantlean Tesalonika xarant aile. Thoim Judevanchem ek sobha-ghor aslem.
2 Paulu aplea sonvoim-e pormonnem tea sobha-ghorant gelo ani tin sabath meren tannem Judevank Devachea Utrachi somzonni mellonk modot keli.
3 Kristan dukh sosop ani melʼleantlo jivont zavop gorjechem aslem. Hem tannem Devachea utrantlean spoxttponnim somzailem. Uprant tannem mhunnttlem: “Jea Jezu vixim hanv tumkam sangtam, toch ho Krist.”
4 Hacho porinnam oso zalo, ki tantuntlea thoddea lokamnim bhavarth dovorlo ani te Paulu ani Silasa vatten aile. Tea bhair, Devachi bhokti korpi Grik lokanchea eka vhodd zomean pasun bhavarth dovorlo. Tantunt thoddeo famad bailo-i asleo.
5 Punn Judev nattkaien bhorle ani tannim bazarantlea tovnas munxank ektthaim korun ek zomo kelo ani akʼkhea xarant bovall kelo. Te zobordosten Jasonachea ghorant ghusle, karonn te Paulu ani Silasak dhorun zomea mukhar haddunk sodhtale.
6 Punn te tankam mellonk nant dekhun tannim Jason ani thoddea dusrea bhavank dhorle. Ani tankam voddit xarachea odhikaream lagim gheun gele. Te oxe bob marunk lagle: “He munis zannim akʼkho sonvsar voir-sokol kela te hanga-i pavleat.
7 Ani hea Jasonan tankam aplea ghorant asro dila. He munis Somrazachea* kaideam add voitat ani mhunnttat ki ek dusro raza asa, zachem nanv Jezu.”
8 Hem aikon lok ani xarantle odhikari bhiele.
9 Jasona koddlean ani dusream koddlean zaite poixe ghetlea uprant xarantlea odhikareamnim tankam vochonk dilem.
10 Bhavamnim vell kaddinastana, ratiam bhitor Pauluk ani Silasak Bereiant dhaddle. Thoim pavlea uprant te Judevanchea sobha-ghorant gele.
11 Bereiantle lok Tesalonikechea lokam poros uktea monache asle. Karonn tannim utor khub urben manun ghetlem ani tannim aikolam tem khorem asa kai na tem pollounk te dor disak Devachem Utor bariksannen topastale.
12 Tea pasot, tanchea modlea zaitea zannamnim bhavarth dovorlo. Toxench, zaitea manadik Grik bailamnim ani dadleamnim pasun bhavarth dovorlo.
13 Punn Paulu Bereiant Devachem utor porgottʼtta mhunn Tesalonikechea Judevamnim aikolem tednam te thoinchea lokank uksaunk ani tras korunk aile.
14 Tednam bhavamnim rokddoch Pauluk doria deger dhaddlo. Punn Silas ani Timot Bereiantuch ravle.
15 Pauluk pavounk ailʼle bhav taka Athena poriant gheun aile. Tankam porot dhaddttana Paulun tankam Silas ani Timotak zata titlea begin Athenant ieiat mhunn sangonk lailem.
16 Paulu Athenant tanchi vatt polloitalo tednam tannem tem akʼkhem xar murteamnim bhorlolem asa mhunn polloilem ani taka tiddok aili.
17 Dekhun to sobha-ghorant aslolea Judevank, Devachi bhirant dovortolea lokank ani toxench dor disa bazarant mellttolea lokank Devachea utrachi somzonni ditalo.
18 Punn Epikuri* ani Istoiki* totv-gineani lokam modle thodde zann tachea lagim vad-vivad korunk lagle. Thodde mhunnonk lagle: “Ho boddbodd korta to kitem sangonk sodhta?” Ani dusre mhunnonk lagle: “Ho amkam khoinchea tori porkea devam vixim porgott korta.” Paulu Jezu vixim ani melolim jivont zatolim hea vixim bori khobor sangtalo dekhun te oxem mhunnttale.
19 Tor te taka gheun Areopagus gele ani mhunnonk lagle: “Tum xikoita ti novi xikounn kitem ti amkam sangta?
20 Karonn tum sangta teo vostu ami kednanch aikonk na. Hea vostuncho orth kitem tem ami zannam zaunk sodhtat.”
21 Khorem mhunnttlear, Athenache sogle lok ani thoim ravtat te* videxi lok aplim kamam korun urta to vell, kitem-na-kitem novem aikonk ani sangonk sartale.
22 Tednam Paulu Areopagusant ubo ravlo ani oxem mhunnonk laglo:
“Athenachea lokamno, tumi soglea vattamnim dusream poros Devachi chodd bhokti kortat* mhunn hanv polloitam.
23 Udharonnak, hanv hea vatten voitalom ani tumi bhokti kortat teo vostu polloitalom tednam hanvem ek vedi polloili zacher oxem boroilʼlem aslem, ‘Onvollkhi Deva pasot.’ Taka lagon, jea Devachi tumi khobor nastana bhokti kortat, teach Deva vixim hanv tumkam sangtam.
24 Jea Devan akʼkho sonvsar ani tantunt asat teo vostu rochleo, zo sorgacho ani prithumecho Dhoni zaun asa, to munxamnim bandlolea mondirant ravona.
25 Taka kosleach vostunchi goroz na dekhun to munxanchea hatamnim apli seva korun ghena. Karonn toch sogleank jivit, svas ani sogleo vostu dita.
26 Tannem ekach munxa udexim soglim raxttram toiar kelim ani tea raxttrantlea lokank akʼkhea prithumecher ravonk dilem. Tannem tanchea pasot vell tharailo ani ravonk ximo ghatleo.
27 Karonn Devak zai ki lokamnim taka sodhcho ani sanspun-sanspun xevottak to tankam mellcho. Khorem mhunnttlear, Dev amchea modlea konnam thaunuch pois na.
28 Karonn takach lagon ami jivim asat, choltat-bhonvtat ani ostitvant asat. Zoxem tumchea modlea thoddea kovimnim mhunnttlam, ‘Ami tachinch bhurgim.’
29 “Ami Devachim bhurgim dekhun Dev bhangar, chandi ani fatra sarko asa vo munis apunn chintʼta toso ani apli kola uzar korun ghoddtta toslea vostum sarko asa mhunn ami chintunk zaina.
30 Lokamnim nokllo zaun oxem kelem tea kallacher Devan dhean diunk na tem khorem. Punn atam sogleam lokamnim poschatap korcho mhunn to sogleak porgott korta.
31 Karonn akʼkhea sonvsaracho nitivontponnan neai korunk tannem ek dis tharaila. Ani tea pasot tannem eka munxak nemla. Ani soglea munxank hea vixim khatri diunk* lagon Devan tea munxak meloleantlo jivont kela.”
32 Melolim jivont zatolim mhunn tannim aikolem tednam thoddim tachim fokannam korunk lagle. Ani dusre oxem mhunnonk lagle: “Ami hea vixim tujea koddlean dusrea pavtti aikotole.”
33 Tednam Paulu thoim thaun gelo.
34 Punn thodde munis tachea sangata gele ani tannim bhavarth dovorlo. Tanchea modem Areopagus neai-sobhecho Dionizus nanvacho ek neai korpi, Damaris nanvachi ek bail ani tea bhair anik thodde lok asle.
Footnotes
^ Grik bhaxent Cae′sar.
^ Epikuri totv-gineani lok melolim jivont zatolim mhunn visvas dovornasle. Lokamnim te jive asa to thoddoch kall, zata title khuxal ravonk zai, karonn tanchea lagim hem ekuch jivit asa mhunn te xikoitale.
^ Ek zomo zo Zeno nanvachea totv-gineani munxacho pattlav kortalo. Lokamnim monant udʼdhex dovrun jieunk zai ani dukh zaum vo khuxalkai, hacho tancher kainch forok poddonk zaina oxem te sangtale.
^ Vo “ietat te.”
^ Vo “chodd dhormik asat.”
^ Vo “gerentti diunk.”
