Dhormdutancho Itihas 18:1-28
18 Tea uprant Paulu Athenantlean bhair sorlo ani Korint xarant ailo.
2 Korintant taka Akuila nanvacho ek Judev mellʼllo. Tacho zolm Pontus vattarant zalʼlo ani halinch to apli bail Prisila sangata Italintlean hanga ailʼlo. Karonn somraz Klaudiusan soglea Judevank Rom soddun vochonk hukum dilʼlo. Paulu, Akuila ani Prisilager gelo.
3 Tim ani Paulu ekech torechem kam kortalim dekhun to tanchea ghora ravonk gelo ani tanchea borabor kam korunk laglo. Tim tombu korpachem kam kortalim.
4 Dor sabathachea disa Paulu sobha-ghorant bhaxonn diun* soglea Judev ani Grik lokank, apunn sangta tea vostunchi khatri korun ditalo.
5 Silas ani Timot, Masedoniantlean aile tednam Paulu anikui nettan porgottnni korunk laglo. Judevank govai diun, Jezuch Krist mhunn to purave diun sangonk laglo.
6 Punn te Paulucho virodh korit ravle ani tachea vixim vaitt uloit ravle tednam tannem aple kopdde fafddun mhunnttlem: “Tumchem rogot tumcheach mathear ieum. Hantunt hanv zobabdar na. Atam thaun hanv videxi lokam koddem voitolom.”
7 Magir tannem aplo thoincho* zago bodolʼlo ani Tikus Justus nanvachea munxachea ghora ravonk gelo. To Devachi bhokti korpi munis aslo. Ani tachem ghor sobha-ghorak tenkon aslem.
8 Sobha-ghoracho odhikari Krispus ani tachea akʼkhea ghorabean Paulucho sondex aikolo ani Somiacher bhavarth dovorlo. Korintantlea zaitea lokamnim pasun ho sondex aikon bhavarth dovorlo ani bautizm ghetlo.
9 Itlench nhoi, eke rati Somian Pauluk eka dorxonant mhunnttlem: “Bhienaka, porgott korit rav ani vogi ravonaka.
10 Karonn hanv tujea sangata asam ani konnuch tujer holʼlo korun tuka luksonn korchona. Hea xarant mhoje anik zaite lok asat zankam ektthaim korunk zai.”
11 Tor Paulu dhedd voros meren thoinch ravlo ani tankam Devachem utor xikoit ravlo.
12 Galio Akaiacho Razpal* aslo tea vellar sogle Judev ektthaim zaun Pauluchea add gele ani taka zhoddtti kortat tea zagear gheun gele.
13 Tannim tacher oso arop ghatlo: “Ho munis lokank oxe toren Devachi bhokti korunk uksaita ji kaidea add asa.”
14 Paulu kitem-i ulounchea poilim Galion Judevank sanglem: “Judev lokamno, ho onʼneai-acho vo vhodd opradacho prosn aslo zalear hanv tumchem pasiensan aikotolom aslom.
15 Punn he vad-vivad zor utram, nanvam ani tumcheach kaidea vixim asat zalear tuminch te soddoiat. Karonn oslea vostumnim hanv tumcho neai korpi zaunk sodhina.”
16 Oxem sangon tannim Judevank zhoddtti kortat tea zagea voile dhaddun dile.
17 Uprant tannim sogleamnim sobha-ghoracho odhikari Sostenesak dhorlo ani zhoddtti kortat tea zagea mukhar vhoron taka marunk lagle. Punn Galio hea bangoddint matui meter zaunk na.
18 Tori astana, Paulu thoim thodde dis ravlo ani uprant tannem bhavank voita mhunn sanglem. Magir to Prisila ani Akuila borabor tarvar boson Siriant gelo. Tannem ek angvonn kelʼli dekhun Kenkreiant tannem aple kens katorle.
19 Uprant tim Efezant ailim. Paulu, Prisila ani Akuilak thoinch soddun thoinchea sobha-ghorant gelo ani thoinchea Judevank somzonni diunk laglo.
20 Te taka anik thoddo vell thoinch rav mhunn vinoti korunk lagle punn to thoim ravonk toiar zaunk na.
21 Punn apunn voita mhunn sangon tannem tankam oxem mhunnttlem: “Jehovak* zai zalear hanv tumchea lagim porot ietolom.” Ani to Efeza thaun tarvar boson bhair sorlo,
22 ani Sezaria ailo. Magir thoim thaun to voir* vochon sobhek mellʼllo ani uprant thoinchean Antiokak gelo.
23 Antiokant thoddo vell sarlea uprant to thoim thaun bhair sorlo ani Galasia ani Frijia desant veg-vegllea zagear vochon xisank dhir diunk laglo.
24 Atam Apolos nanvacho ek Judev, zo ganvan Aleksandriacho aslo to Efezant ailo. To ulounk huxar aslo ani taka Devachea Utrachi bori zannvai asli.
25 Hea munxak Jehovachea* vatte vixim xikoilʼlo. To povitr xokten bhorlolo dekhun taka khub urba asli. To Jezu vixim sarki xikounn xikoitalo. Punn taka fokot Juanvan porgott kelʼlea bautizma vixim khobor asli.
26 Apolos sobha-ghorant dhiran ulounk laglo. Prisila ani Akuilan tachem ulovop aikolem tednam tim taka aplea borabor gheun gelim. Ani tannim taka Devache vatte vixim sarki vollokh diun somzailo.
27 Apolos poltoddi Akaiant vochonk sodhtalo dekhun bhavamnim thoinchea xisank, Apolosak mogan ieukar diuncho mhunn chitt boroun kolloilem. Akaiant pavlea uprant jea lokamnim Devachea favo naslolea doiek lagon bhavarth dovorlolo tankam tannem khub adar kelo.
28 Tannem soglea lokam mukhar khub urben Judevanchi xikounn chukichi mhunn dakhoun dili. Toxench tannem Devachea Utrachea adaran, Jezuch Krist mhunn spoxttponnim dakhoilem.
