Dhormdutancho Itihas 21:1-40
21 Ami zodd kallzan thoim thaun bhair sorle ani tarvar boson amcho provas suru kelo. Ami vell kaddinastana nitt gele ani Kos zunvear pavle. Magir dusrea disa Rodes zunvear aile ani thoim thaun Patarak gele.
2 Magir amkam ek tarum mellʼllem jem nitt doria poltoddi Finisiak voitalem. Tacher boson ami fuddem gele.
3 Vatter amkam Siprus zunvo dislo, zo amchea dave vatten aslo. Taka fattim soddun ami Siriache vatten fuddem vochot ravle ani Tir nanvachea zagear pavtoch tea tarvantlean denvle, karonn thoim tea tarva voilem saman denvoichem aslem.
4 Thoim ami xisank sodhle ani te mellʼllea uprant sat dis poriant tanger ravle. Punn povitr xokten jem kollit kelʼlem taka lagon xis porot-porot Pauluk Jeruzalemant vocho naka mhunn sangonk lagle.
5 Thoim bhett diun zalea uprant, ami amcho provas porot chalu kelo. Punn sogle bhav, bailam ani bhurgeam sangata amkam xarantlean bhair meren pavounk aile. Ami doria deger dimi ghalun magnnem kelem
6 ani voitat mhunn sangon ami tarvar bosle. Ani tim soglim ap-aplea ghora gelim.
7 Magir ami Tira thaun bhair sorle ani doria vatten Tolemais xarant pavle. Thoim ami bhavank mellʼlle ani ek dis tanchea borabor ravle.
8 Dusrea disa ami thoim thaun bhair sorle ani Sezariak pavle. Thoim ami Filip nanvachea porgottnnarachea ghora vochon ravle. Jea sat munxank poilim vinchlole, Filip tanchea modlo eklo aslo.
9 Taka char ankvar dhuvo asleo jeo bhasaunneo kortaleo.
10 Ami thoim zaite dis ravlea uprant, Agabus nanvacho Judeiantlo ek provadi thoim ailo.
11 To amchea lagim ailo ani tannem Pauluchea bhenddacho pottʼtto ghetlo. Ani aple hat-paim bandun tannem mhunnttlem: “Povitr xokti mhunntta, ‘Jea munxacho ho bhenddacho pottʼtto asa taka Judev heach toren Jeruzalemant bandtole ani dusream raxttrantlea lokanchea tabeant ditole.’”
12 Hem aikolem tednam, ami ani thoinche lok pasun Pauluk Jeruzalemant vocho naka mhunn vinoti korunk lagle.
13 Tednam Paulun mhunnttlem: “Tumi roddon-roddon mhozo nichov moddcho proitn kiteak kortat? Hanv tor Somia Jezuchea nanva pasot Jeruzalemant fokot bondkhonnintuch vochonk nhoi punn moronk pasun toiar asam.”
14 To aplem mon bodlunk toiar na tem polloun, ami taka addaupachem bond kelem* ani mhunnttlem: “Jehovache* khuxe pormonnem zaum.”
15 Tea uprant ami provasachi toiari keli ani Jeruzalemak vochonk bhair sorle.
16 Sezariache thodde xis pasun amchea borabor aile. Tannim amkam Siprusachea Manasona koddem vhele, karonn ami tacheach ghora ravpache asle. Ho Manason poilim je xis zalʼle tanchea modlo eklo aslo.
17 Ami Jeruzalemak pavle tednam bhavamnim khuxalkaien amkam ieukar dilo.
18 Punn dusrea disa Paulu amchea borabor Jakobak mellonk gelo. Thoim sogle vhoddil ektthaim zalʼle asle.
19 Tankam mellʼllea uprant videxi lokam modem Devan Pauluchea seve udexim jim kamam kelʼlim tanchea vixim bariksannen tannem tankam sanglem.
20 Hem aikon te Devak mhoima diunk lagle ani tannim Pauluk mhunnttlem: “Paulu amchea bhava, hozaramnim Judev lokamnim bhavarth dovorla, ani te sogle urben Kaido pallttat mhunn tum zannam.
21 Punn tannim tujea vixim oxeo khobro aikoleat ki tum soglea raxttranchea Judev lokank Moizesa udexim dilʼlea Kaidea add vochonk* xikounn dita ani tannim aplea bhurgeanchi sunot korchi nhoi ani xekddeamnim vorsam thaun pallit ailʼleo riti-rivazo pallcheo nhoi mhunn sangta.
22 Tor, atam kitem korum-ia? Tum hanga ailʼlo asa mhunn tankam kollttolench.
23 Taka lagon, ami jem kitem tuka sangtat tem kor: Hanga char munis asat zannim angvonn kelea.
24 Tum hea munxank tujea borabor gheun voch ani riti-rivazam pormonnem tuka-i tanchea borabor xudʼdh kor. Ani tanche kens taspacho khorchui tunch polloun ghe. Tednam ji khobor tannim aikolea ti khori nhoi mhunn, ani tum sarko cholta ani Kaido pasun palltta mhunn sogleank kollon ietolem.
25 Atam bhavarth dovorlolea videxi lokam vixim sangpachem mhunnttlear tannim murti-pujent boxttailʼlea vostum thaun, rogta thaun, gollo damun marlolea zonvaranchea masa thaun,* ani onoitik kuddichea sombonda* thaun pois ravchem mhunn ami amcho nirnnoi tankam chitt boroun dhaddun dila.”
26 Dusrea disa Paulun tea munxank aplea borabor vhele ani Kaidea pormonnem apleak tanchea borabor xudʼdh kelo. Kaidea pormonnem xudʼdh korpache dis kednam somptole ani tanchea modlea dor eklea pasot kednam iodn bhettounk zai tem sangonk to mondirant gelo.
27 Te sat dis sompot aile tednam Asiantlea Judevamnim, Pauluk Devmondirant polloilo, ani tannim soglea lokank uksaun taka dhorlo.
28 Te bob marunk lagle: “Izraelachea munxamno, amkam modot korat! Ho toch munis zaun asa zo sogleank, sogle koddem amchea lokam add, amchea Kaidea add ani hea zagea add xikoita. Titlench nhoi, to Grik munxank pasun Devmondirant gheun aila ani ho povitr zago tannem boxttaila.”
29 Tannim Efezantlea Trofimusak Paulu borabor xarant polloilʼlo dekhun tannim oxem mhunnttlem. Karonn Paulu taka Devmondirant gheun aila oxem tankam dislem.
30 Tednam akʼkhea xarant bovall zalo ani lok ektthaim zaun Devmondira koddem dhanvon aile. Tannim Pauluk dhorlo ani taka voddit Devmondirachea bhair haddlo, ani rokddinch Devmondirachim daram bond kelim.
31 Te taka marun uddounk sodhtale tednam akʼkhea Jeruzalemant bovall zala mhunn Romi polttonnichea senapotik kollon ailem.
32 To rokddoch soinikank ani soinikanchea odhikareank gheun tanchea lagim sokol dhanvon gelo. Judevamnim senapotik ani soinikank polloile tednam Pauluk marpachem bond kelem.
33 Tednam senapotin ieun Pauluk tabeant ghetlo ani taka don sanklleamnim bandcho mhunn hukum dilo. Uprant ho munis konn ani tannem kitem kelam kai mhunn to choukoxi korunk laglo.
34 Tednam zomeantle thodde kitem tori mhunnon, ani dusre anik kitem tori mhunnon bob martale. Punn goddboddak lagon Paulu vixim sarki mahiti mellonk na dekhun tannem taka soinik ravtat tea zagear vhoronk hukum dilo.
35 Punn Paulu panvddeancher pavlo tednam lokancho zomo taka marunk sodhtalo dekhun soinikank taka ubarun vhorcho poddlo.
36 Lokancho zomo oxi bob marit tanchea fattlean ietalo: “Taka marun uddoiat!”
37 Te taka gheun soinik ravtat tea zagear pavche asle tednam Paulun senapotik mhunnttlem: “Hanvem kitem-i ulounk zata?” Tannem mhunnttlem: “Tuka Grik bhas ulounk ieta?
38 Tum toch Ejipttkar nhoi, zannem sorkara add kam kelem ani 4,000 suri gheun aslolea munxank gheun oronnʼnneant* gelo?”
39 Tednam Paulun mhunnttlem: “Khorem mhunnttlear, hanv Silisiantlea Tarsus xarant ravpi ek Judev, ani tem ek lhan xar nhoi. Dekhun mhaka lokam lagim ulounk porvangi di mhunn hanv tujea lagim vinoti kortam.”
40 Tannem porvangi ditoch, Paulu panvddeancher ubo ravlo ani tannem lokank hat dakhoun xant ravonk khunna keli. Soglem xant zalem tednam to Hebrev bhaxen ulounk laglo. Tannem mhunnttlem:
Footnotes
^ Utran utor, “ami vogi ravle.”
^ 21:21 Utran utor, “dhorm broxtt korpachi.”
^ Oslea zonvarachea masa thaun zachem rogot bore toren varounk na.
^ Hem utor choddxe pavtt eka oslea zageak uzar kelam zoim chodd lok ravonant, kainch roinant ani thoim chodd zhaddam ani udokui asona.
