Dhormdutancho Itihas 23:1-35
23 Paulun Mha-sobhecher* nodor marun polloilem, ani mhunnttlem: “Bhavamno, hanvem aichea disa meren Deva mukhar ekdom nitoll ontoskornnan jivit sarlam.”
2 Hem aikon mha-iadnik Ananiasan Pauluchea fuddean ube aslolea lokank tachea tonddar thapott mar mhunn hukum dilo.
3 Tednam Paulun taka mhunnttlem: “Are dhongea,* Dev tuka martolo. Tum Kaidea pormonnem mhozo neai korunk bosla ani tunch Kaidea add vochon mhaka marpacho hukum dita?”
4 Tednam thoim ube aslolea lokamnim mhunnttlem: “Tum Devachea mha-iadnikacho opman korta?”
5 Paulun mhunnttlem: “Bhavamno, to ek mha-iadnik mhunn mhaka khobor nasli. Karonn oxem boroilʼlem asa: ‘Tunvem tujea lokanchea odhikarea add ulounchem nhoi.’”
6 Tanchea modem thodde Saduki ani thodde Farizev asle mhunn Paulu zannam aslo. Taka lagon, tannem mottʼttea avazan Mha-sobhent oxem mhunnttlem: “Bhavamno, hanv ek Farizev ani Farizevancho put. Mhaka melolim jivont zatolim mhunn bhorvonso asa dekhun mhoji zhoddtti zata.”
7 Tannem oxem mhunnttlem tednam Farizevam ani Sadukiam modem vad-vivad zaunk laglo ani sobhent futt poddli.
8 Karonn Saduki mhunnttat ki melole jivont zainant ani devdut asonant,* punn Farizev hem soglem asa mhunn mantat.
9 Taka lagon, thoim khub mottʼtto bovall zalo. Farizevam vatten aslole thodde xastri ube ravle ani oxem mhunnon ragan vad-vivad korunk lagle: “Amkam hea munxa bhitor kainch chuk mellona, tachea lagim khorench devdut uloila* zait—.”
10 Tanche vad-vivad itle vaddle ki Pauluk marun uddoit mhunn senapoti bhielo. Tor, sokol vochon Pauluk soddoiat ani taka soinik ravtat tea zagear gheun vochat mhunn tannem soinikank hukum dilo.
11 Punn teach rati Somi Paulu fuddeant ieun ubo ravlo ani tannem mhunnttlem: “Dhir dhor! Karonn tunvem Jeruzalemant mhojea vixim bore bhaxen sakx dilea toxi Romant pasun diunk zai.”
12 Dis uzvaddlo tednam Judevamnim ek ievzonn korun soput ghetlo ki Pauluk jivexim marchea poilim ami kitem-i khalem vo piele zalear amcher xirap poddum.
13 Tannim ho soput ghetlolo te challisam poros chodd munis asle.
14 Te mukhel iadnik ani vhoddilam koddem gele ani mhunnonk lagle: “Pauluk jivexim marchea poilim ami kitem-i khalem zalear amcher xirap poddom mhunn ami soput ghetla.
15 Tor atam tumi ani Mha-sobha mellon Pauluchi anik bariksannen choukoxi korunk sodhtat mhunn senapotik sangon, taka tumchea lagim haddunk laiat. Punn to hanga pavchea poilinch, taka jivexim marunk ami toiar ravtole.”
16 Te Pauluk lipon marun uddoupachi ievzonn kortat mhunn Pauluchea bhoinnichea cheddean aikolem. Soinik ravtat tea zagear vochon tannem hi khobor Pauluk sangli.
17 Tednam Paulun soinikanchea odhikaream modlea ekleak aplea lagim apoilo ani mhunnttlem: “Hea tornnatteak senapoti lagim gheun voch. To taka kitem tori sangonk sodhta.”
18 Tor to taka senapoti lagim gheun gelo ani mhunnttlem: “Koidi aslolea Paulun mhaka aplea lagim apoilo ani ho tornnatto tuka kitem tori sangonk sodhta dekhun taka tujea lagim gheun voch mhunn sanglem.”
19 Senapotin tea tornnatteachea hatak dhorun taka kuxin vhelo ani vicharlem: “Tum mhaka kitem sangonk sodhta?”
20 Tannem mhunnttlem: “Pauluchi anik bariksannen choukoxi korpachea nimtan taka faleam Mha-sobhe mukhar gheun ieunchem mhunn Judevamnim tuje koddem vinoti korunk tharailam.
21 Punn te sangtat tacher visvas dovornaka. Karonn tanchea modle challisam poros chodd munis taka jivexim marunk lipon bosleat. Ani taka marun uddoi poriant tannim kitem-i khalem vo piele zalear tancher xirap poddom mhunn tannim soput ghetla. Atam te toiar asat ani fokot tum maniotai ditolo mhunn vatt polloitat.”
22 Tea pasot senapotin tea tornnatteak koddok utramnim oxem sangon dhaddlo: “Hem tunvem mhaka kolloilam mhunn konnankuch sangonaka.”
23 Tednam tannem don soinikanchea odhikareank apoile ani tankam sanglem: “Ratchea sumar nnov vorancher* Sezariak vochonk, 200 soinik, 70 ghoddesvar ani bhale gheun aslole 200 soinik toiar dovrat.
24 Toxench, Pauluk, razpal Feliksa koddem bore bhaxen gheun vochonk ghodde toiar dovrat.”
25 Tannem ek chittui boroili. Tantunt tannem oxem boroilem:
26 “Manadik Razpal Feliksak, Klaudius Lisiasacho nomoskar!
27 Hea munxak Judevamnim dhorlolo ani te taka marun uddoupache asle. Punn to Romi nagrik mhunn mhaka kollʼllem tednam hanv rokddoch mhojea soinikank gheun thoim gelo ani taka vachoilo.
28 Judev lok tacher kiteak arop ghaltat hem mhaka zannam zaunk zai aslem dekhun hanv taka Mha-sobhent gheun gelom.
29 Tannim tacher tanchea Kaideak lagon arop ghatla mhunn mhaka kollon ailem. Punn mornnachem formonn mari sarkem vo bondkhonnint ghali sarko tacher kosloch arop na.
30 Hea munxak jivexim marpachi ievzonn kelea mhunn mhaka kollʼllem dekhun, vell kaddinastana hanv taka tujea lagim dhaddttam. Tacher arop ghatla tannim, tujea mukhar ieun tachea add kitem asa tem sangchem mhunn hanvem tankam hukum dila.”
31 Tor, soinikank mellʼllolea hukuma pormonnem te Pauluk gheun ratchea vellaruch Antipatris xarant aile.
32 Dusrea disa, soinikamnim ghoddesvarank Pauluk gheun fuddem vochonk lailem, ani te aplea ravpachea zagear porot aile.
33 Sezariak pavlea uprant ghoddesvaramnim razpalak chitt dili ani Pauluk tachea fuddeant ubo kelo.
34 Chitt vachun Paulu khoincho kai mhunn razpalan vicharlem ani to Silisiantlo mhunn taka kollon ailem.
35 Tannem Pauluk mhunnttlem: “Jea munxamnim tujer arop ghatleat te hanga ietat tednam tum sangonk sodhta tem hanv aikon ghetolom.” Ani uprant taka Herodachea razvaddeant vhoron tacher nodor dovorchi mhunn tannem rakhonndarank hukum dilo.
Footnotes
^ Vo “chuno kaddlolea vontti.”
^ Vo “devdut asonant ani disonant tosle pranni-i asonant.”
^ Vo “devdut vo disona toslo pranni uloila.”
^ Jezu Kristachea disamnim, hem ratchem tisrem vor aslem. Ho vell suria buddtta tednam thaun meztale.
