Dhormdutancho Itihas 26:1-32
26 Magir Agripan Pauluk mhunnttlem: “Tuka tuji chuk na mhunn dakhounk jem sangonk zai tem sangonk zata.” Tednam Paulun aplo hat voir kelo ani ulounk suru kelem:
2 “Raza Agripa, Judevamnim mhojer ghatlolea soglea aropam vixim mhaka aiz tujea mukhar mhoji chuk na mhunn dakhounk, ulounk mellʼllem mhunn mhaka khub khuxi bhogta.
3 Judevanchea riti-rivazam vixim ani tanchea vad-vivadam vixim tuka ekdom bore bhaxen khobor asa. Tea pasot, tunvem mhojem pasiensan aikon gheunchem mhunn hanv tujea lagim vinoti kortam.
4 “Hanv tornnatto aslom tednam thaun mhojea lokam modem ani Jeruzalemant ravtalom tednam pasun, hanv mhojem jivit koso jielom tem tea soglea Judevank khobor asa,
5 je mhaka poilim thaun vollkhotale. Tankam zai zalear te hea vixim govai diunk xoktat, ki hanv ek Farizev aslom ani Farizev bhokti kortale tea pormonnem hanv her Judevam poros khub koddok toren riti-rivazo pallttalom.
6 Devan amchea purvozank kelʼli bhasaunni amkam bhorvonso dita. Punn atam tea bhorvonxeak lagon aiz neai-sobhent mhojer kes chalu asa.
7 Amchim 12 kullam hich bhasaunni purnn zaunchi mhunn bhorvonso dovrun asat ani taka lagon dis ani rat Devachi khub urben povitr seva kortat. Ani Raza, heach bhorvonxeak lagon Judevamnim mhojer arop ghatleat.
8 “Dev meloleank jivont korta hem patieunk tumkam kotthin kiteak lagta?
9 Eka vellar, Nazaretkar Jezuchea nanvacho zata titlo virodh korunkuch zai oxem hanv-ui somzotalom.
10 Ani hanvem Jeruzalemant oxench kelem. Hanvem mukhel iadnikam koddlean odhikar gheun, zaitea xisank* bondkhonnint ghatle. Ani tancher mornnachem formonn marchea vixim uloitale tednam, hanv-ui maniotai ditalom.
11 Tannim tancho bhavarth soddun diuncho mhunn hanvem tanchea soglea sobha-ghoramnim vochon, zaite pavtti tankam bhorpur tras dile. Hanv tancher itlo ragar aslom ki hanv dusrea xaramnim vochon pasun tankam dhumallo diunk laglom.
12 “Oxem kortana ek pavtt hanv mukhel iadnikam koddlean odhikar ani porvangi gheun Damaskak voitalom.
13 Tednam Raza, donparchea vellar mollbar thaun uzvadd porzollʼllo, zo uzvadd suria poros chodd porzollit aslo. To uzvadd mhojer ani mhojea sangata choltale tanchea charui vatten porzollʼllo.
14 Tednam ami sogle zomnir poddle ani hanvem ek avaz aikolo zo Hebrev bhaxent oxem mhunnttalo: ‘Saulu, Saulu, tum mhaka dhumallo kiteak dita? Hea toren mhozo virodh korun* tum tukach tras korun gheta.’
15 Punn hanvem mhunnttlem: ‘Tum konn, Somia?’ Ani Somian mhunnttlem: ‘Hanv Jezu, zaka tum dhumallo dita.
16 Tunvem mhoje vixim jeo vostu polloileat ani jeo vostu hanv tuka fuddarak dakhoitolom tanchi govai diunk mhozo sevok ani sakxi mhunn nemunk hanvem tuka dorxon dilam. Tor atam utth ani tujea paim-ar ubo rav.
17 Hanv tuka hea raxttrant ani dusrea raxttramnim dhaddttam ani tea raxttram thaun hanv tuji rakhonn kortolom.
18 Tanche dolle ugddunk, tankam kallkhantlean uzvaddak haddunk ani tankam Soitanachea odhikarantlim kaddun Devachea odhikarant haddunk hanv tuka dhaddttam. Oxe toren, mhojer bhavarth dovrun tankam tanchea patkanchem bhogsonnem mellttolem ani povitr zalʼlea lokam modem* daiz mellttolem.’
19 “Taka lagon Raza Agripa, sorga voilea dorxona thaun mhaka ji adnea mellʼlloli ti hanvem moddunk na.
20 Tannim poschatap korcho ani poschatap kela mhunn dakhoitat toslim kamam korun Deva lagim porot ieunchem mhunn hanvem poilim Damaskak ani uprant Jeruzalemant ani Judeiachea akʼkhea vattarant ani toxench dusrea raxttrank pasun sondex dilo.
21 Heach pasot Devmondirant Judevamnim mhaka dhorlo ani jivexim marpacho proitn kelo.
22 Punn, Dev mhaka adar korit asa dekhun, aiz poriant hanv lhanank toxem vhoddank sakx di-it asam. Ani Provadeanchea Pustokant* toxench Moizesan fuddem kitem ghoddttolem mhunn adinch sanglolem tachea bhair hanv dusrem kainch sangonaslom.
23 Tem mhunnttlear, Krist dukh sostolo ani taka meloleam modlo Dev poilo jivont kortolo. To fokot heach raxttrak nhoi punn dusrea raxttrank pasun porgott korun uzvadd ditolo.”
24 Paulu apli kainch chuk na mhunn dakhounk uloita astanach, Festusan mottʼttean mhunnttlem: “Paulu! Tum toklen suttla, chodd xiklolean tum piso zala!”
25 Punn Paulun mhunnttlem: “Manadik Festusa, hanv piso zaunk na. Hanv khorem tench sangtam ani sarko chintunuch uloitam.
26 Khorem mhunnttlear, jea raza mukhar hanv heo vostu ukteponnim uloitam to svota heo vostu bore bhaxen zannam. Hantuntli khoinchich vost tachea thaun lipon uronk na mhunn mhaka purnn khatri asa, karonn heo vostu khoinchea-i konnxeak ghoddonk na.
27 Agripa Raza, tum Provadeanchea Pustokant jem boroilam tacher visvas dovorta? Tum visvas dovorta mhunn hanv zannam.”
28 Punn Agripan Pauluk mhunnttlem: “Tum thoddeach vella bhitor mhaka Kristanv kortolo.”
29 Tednam Paulun mhunnttlem: “Deva lagim hanv itlench magtam ki thoddea vella bhitor vo chodd vella bhitor, tunch nhoi punn aiz mhojem aikotat te sogle lok mhojea bhaxen zaunche, punn fokot te sanklleamnim bandlole asche nhoi.”
30 Tednam raza utthlo ani toxench razpal, Bernis ani tanchea borabor boson aslole munis utthon ube ravle.
31 Punn thoim thaun voitana, te eka-mekak mhunnonk lagle: “Hea munxak mornnachi khast vo bondkhonn favo zai sarkem tannem kainch korunk na.”
32 Tednam Agripan Festusak mhunnttlem: “Hea munxan Somraza* lagim neai magonk vinoti korunk nasli zalear taka soddunk zatalo.”
Footnotes
^ Utran utor, “povitr lokank.”
^ Utran utor, “lokhnnache boddiek khontt marun.”
^ Vo “mhojea pasot kuxin kaddlolea lokam modem.”
^ Grik bhaxent Cae′sar.
