Dhormdutancho Itihas 3:1-26
3 Pedru ani Juanv donparam sumar tin vorancher* magnneachea vellar Devmondirant voitale.
2 Tednam lok thoim eka munxak gheun ietale zo zolma thaun longddo aslo. Devmondirant voitat tea lokam koddem bhik magonk te taka sodanch Devmondirachea darvonttea lagim bosoitale. Tea darvontteak Sobit Darvontto oxem mhunnttale.
3 Pedru ani Juanv Devmondirant bhitor sortat tem polloun, to tanchea lagim bhik magonk laglo.
4 Tednam Pedrun ani Juanvan tacher nitt nodor marun mhunnttlem: “Amkam polloi.”
5 Taka lagon, apleak tanche koddlean kitem tori mellot kai mhunn to tankam polloit ravlo.
6 Punn Pedrun taka mhunnttlem: “Bhangar ani chandi mhojea koddem na. Punn mhojea koddem jem asa tem hanv tuka ditam. Nazaretkar Jezu Kristachea nanvan hanv tuka sangtam, utth ani chol!”
7 Pedrun tachea uzvea hatak dhorlo ani taka ubo kelo. Teach vellar tea munxache paim bore zale.
8 To uddi marun ubo zalo ani cholonk laglo. To cholot, uddio marit ani Devachi vakhannʼnni korit tanchea borabor Devmondirant bhitor gelo.
9 Soglea lokamnim taka choltana ani Devachi vakhannʼnni kortana polloilo.
10 Devmondirachea Sobit Darvonttea lagim hoch munis boson bhik magtalo mhunn te vollkhole. To cholta tem polloun te khub ojap zale ani samke khuxal zale.
11 To munis azunui Pedru ani Juanvacho hat dhorun aslo tednam sogle lok te asle tea zagear mhunnche, Solomonachi Vatt* mhunnttat tea zagear aile. Hem polloun lok ekdom ojap zale.
12 Pedrun hem polloilem tednam, tannem lokank mhunnttlem: “Izraelachea lokamno, tumi hem polloun itle ojap kiteak zatat ani amkam oxe toren kiteak polloit ravtat? Ami amchea xokten vo ami kelʼlea Devachea bhoktek lagon to cholonk laglo oxem tumkam dista kai?
13 Abrahamachea, Izakachea, Jakobachea ani amchea purvozanchea Devan aplo Sevok Jezuk mhoima dili, zaka tumi dusmananchea hatant dilʼlo. Pilatan taka suttka diunk tharailʼlem, tori astana, tumi taka Pilata mukhar nakarlo.
14 Hoi, tumi tea povitr ani nitivont munxak nakarlo, ani tachea bodlek eka khun korpeak magon ghetlo.
15 Tumi jivit diunk nemlolea Mukhel Fuddareak marun uddoilo. Punn Devan taka meloleantlo jivont kelo, ani hache ami govai zaun asat.
16 Ami tachea nanvacher bhavarth dovortat ani tachea nanvanuch ho munis boro zala, zaka tumi polloitat ani vollkhotat. Ami Jezucher bhavarth dovorla ani tea bhavartha vorvim ho munis purnnponnim tumchea mukhar boro zala.
17 Bhavamno, tumchea odhikaream bhaxen tumi jem kitem kelem tem nokllo astana kelem mhunn hanv zannam.
18 Punn, Krist dukh sostolo mhunn Devan soglea provadeam udexim poilinch bhasailolem tem hea toren tannem purnn kelem.
19 “Poschatap korat ani porot ieiat. Oxem kelolean, to tumchim patkam pusun uddoitolo, ani Jehova* tumkam novean ghottai melltta tosle dis haddttolo.
20 Ani tannem nemlolo Krist, mhunnche Jezuk to dhaddttolo.
21 Sogleo vostu poilim bhaxen porot zaunchea kalla vixim Devan adlea kallar aplea povitr provadeam udexim sanglolem, to kall ieum poriant Jezun sorgar ravop gorjechem asa.
22 Khorem mhunnttlear, Moizesan sanglolem: ‘Tumcho Dev Jehova,* tumchea bhavam modlo mhojea sarko ek provadi tumchea pasot ubo kortolo. Jem kitem to tumkam sangta tem soglem tumi aikat.
23 Zo konn tea Provadeachem aikona, tacho Dev purnn toren nas korun taka lokam modlo kaddun uddoitolo.’
24 Soglea provadeamnim, mhunnche Samuela thaun jitle provadi ieun gele, tea sogleamnim hea disam vixim spoxttponnim sanglolem.
25 Tumi tea provadeanche ani Devan tumchea purvozam sangata kelʼlea korarache put. Devan Abrahamak sanglolem: ‘Tujea sonsti* udexim prithume voilea soglea familink besanvam mellttolim.’
26 Tumkam dor ekleak tumchim noxttim kamam soddunk modot korunk ani besanv diunk, Devan aplea Sevokak nemun sogleant poilim tumche koddem dhaddlo.”
Footnotes
^ Jezu Kristachea disamnim, hem nnovʼvem vor aslem. Ho vell suria udeta tednam thaun meztale.
^ Mhunnche, cholon vochpachi vatt zoim khambe astale.
^ Utran utor, “bie.”
