Dhormdutancho Itihas 4:1-37
4 Te dogui lokam lagim uloitale tednam iadnik, Devmondiracho odhikari ani Saduki* thoim aile.
2 Apostl lokank xikoitale ani ukteponnim Jezu melʼleantlo jivont zala mhunn sangtale* dekhun te ekdom ragar zale.
3 Ani tannim donui apostlank dhorle ani sanz zali dekhun dusro dis zai poriant tankam bondkhonnint dovorle.
4 Punn, jea lokamnim tanchem bhaxonn aikolem tantuntlea zaiteamnim bhavarth dovorlo, ani xisam modem dadleancho ankddo sumar 5,000 meren pavlo.
5 Dusrea disa Judevanche odhikari, vhoddil ani xastri Jeruzalemant ektthaim zale.
6 Tanchea borabor mukhel iadnik Anas, Kaifas, Juanv, Aleksandr ani mukhel iadnikache sogle soire ektthaim zale.
7 Tannim Pedruk ani Juanvak tanchea modem ube korun tankam oso prosn vicharlo: “Tumi konnanchea odhikaran vo konnachea nanvan hem kam kelam?”
8 Tednam povitr xokten bhoron Pedrun tankam mhunnttlem:
“Lokanchea odhikareamno ani vhoddilamno aikat.
9 Eka longddea munxak boro kelo dekhun tumi aichea disa amkam prosn vichartat zalear, ani hea munxak konnem boro kelo mhunn zannam zaunk sodhtat zalear,
10 tumi sogle ani Izraelache sogle lok zannam zaiat ki Nazaretkar Jezu Kristachea nanvan, ho munis boro zala ani tumchea mukhar ubo asa. Hoi, jea Jezuk tumi khambear khillaun marun uddoilo, punn zaka Devan melʼleantlo jivont kelo, tacheach udexim ho munis boro zalo.
11 Hoch to fator, ‘zo bandkam korpeamnim kainch faideacho nhoi mhunn nakarlolo. To atam konnxeacho mukhel fator zala.’
12 Hem-ui zannam zaiat ki amkam dusrea konnancheach vorvim salvar zaunk mellchem na, karonn salvar zaunk sorga khala anik konnanchench nanv Devan munxam modem diunk na.”
13 Pedru ani Juanv koxe ukteponnim* uloitat tem tannim polloilem. Ani te xikop naslole* ani chalte munis mhunn tankam kollon ailem tednam te ekdom ojap zale. Uprant tankam te Jezu Krista borabor astale mhunn kollon ailem.
14 Boro zalʼlo munis, Pedru ani Juanva borabor ubo asa tem polloun, tanchea add ulounk tanche lagim kainch naslem.
15 Tannim tankam Mha-sobhentlea* holantlean bhair vochonk hukum dilo ani uprant te eka-meka lagim uloun,
16 oxem mhunnonk lagle: “Ami hea munxanchem kitem korum-ia? Karonn tanchea vorvim ek vhoddlem vizmit ghoddlam,* jem Jeruzalemant ravtolea soglea lokamnim polloilam, ani ami tem nakarunk zaina.
17 Hi khobor anik lokam modem posorna zaunk atam ami tankam apoun hea nanvan konnancheach lagim, kitench ulounchem nhoi mhunn dhomki dium-ia.”
18 Uprant tannim Juanvak ani Pedruk porot apoile ani tannim Jezuchea nanvan kitench ulounchem nhoi ani xikounchem nhoi mhunn tankam hukum dilo.
19 Punn Pedrun ani Juanvan zobab dilo: “Ami Devachem aikonchem soddun, tumchem aikonchem hem Devachea nodren sarkem zalear tuminch tharaiat.
20 Punn amchean zalear, ami jem kitem polloilam ani aikolam, tea vixim ulounchem bond korunk zaunchem na.”
21 Tannim Pedruk ani Juanvak porot ek pavtt dhomkaile ani tankam suttka dili, karonn tankam khast diunk tanche lagim kainch nimit naslem. Toxench te odhikari lokankui bhietale, karonn sogle lok kitem ghoddlam tem polloun Devak mhoima ditale.
22 Zo munis hea vizmitam* udexim boro zalʼlo tachi pirai 40 vorsam poros chodd asli.
23 Thoim thaun suttlea uprant, Pedru ani Juanv aplea lokam lagim gele. Ani mukhel iadnikamnim ani vhoddilamnim sangloleo sogleo vostu tannim tankam sangleo.
24 Hem aikolea uprant, sogleamnim mellon mottʼttean oxem magnnem kelem:
“Akʼkhea vixvachea Dhonia, tunvem mollob, prithum, doria ani tantunt asat teo sogleo vostu rochleat,
25 ani tunvem povitr xokte udexim amcho purvoz ani tuzo sevok Davidachea tonddantlean oxem mhunnttlem: ‘Raxttram kiteak challvoleant ani lok polkea vostuncher kiteak niall kortat?
26 Prithume voile raza, Jehova* ani tachea makhlolea* add ube zaleat ani odhikari ektthaim ieun tancho virodh kortat.ʼ
27 Ani khoreponnim oxench ghoddlem. Herod* ani Pontius Pilat, videxi raxttrantlea munxam sangata ani Izraelachea lokam sangata hea xarant tunvem makhla, tea tujea sevoka add mhunnche Jezuchea add ube ravle.
28 Tunvem tuje xokten ani khuxen adinch tharailʼlem tem purnn korchem mhunn te ektthaim zale.
29 Jehova,* atam tanchea dhomkaunneank kan di, ani tujea chakrank tujem utor bhienastana sangot ravonk dhir di.
30 Ani tum aplo hat fuddem korun lokank boro korit ravom ani tuzo povitr sevok Jezuchea nanvan khunna ani vizmitam zait ravom.”
31 Ani tannim kallzant thaun vinovnneo korun zalea uprant tim ektthaim zalʼlim to zago halʼlo, ani tim soglim povitr xokten bhorlim ani Devachem utor bhienastana sangot ravlim.
32 Bhavarth dovorlolo tanchem sogleanchem chintop ekuch aslem ani tanchim bhavnam pasun ekuch aslim.* Tanchea modlo eklo pasun aplea lagim asat teo vostu apleo oxem mhunno naslo, punn tim soglim apleo vostu eka-mekak vanttʼttalim.
33 Ani Somi Jezu meloleantlo jivont zala mhunn apostl khub probhav poddtta tea toren govai di-it ravle ani Dev tankam sogleank apli favo nasloli doia bhorpur di-it ravlo.
34 Khorem mhunnttlear, tanche modem gorjek sampoddlolo konnuch naslo, karonn xetam ani ghoram aslolim soglim aplea lagim asa tem vikun mellttat te poixe gheun ietalim
35 ani apostlanchea paim-am lagim dovortalim. Uprant te dor ekleak tanchea gorje pormonnem goroz tem ditale.
36 Ani Juze, zaka apostl Barnabas mhunnttale (tacho orth, “Bhuzvonnecho Put”) to ek Levit aslo, ani ganvan Siprusacho aslo.
37 Tache lagim zomnicho ek kuddko aslo, to tannem viklo ani poixe haddun apostlanchea paim-am lagim dovorle.
Footnotes
^ Vo “Jezuchem udharonn diun melʼleanchem jivontponn porgott kortale. “
^ Vo “bhienastana.”
^ Vo “oxikxit.” Mhunnche tannim rabʼbinchea iskolant xikop gheunk naslem. Tankam vachunk-borounk ienaslem oxem nhoi.
^ Vo “ek vhoddli khunna ghoddlea.”
^ Utran utor, “khunna.”
^ Vo “tachea Mesiasa.”
^ Utran utor, “te ek kallzache ani ek monache asle.” Xobdhkoxant “Jivit” polloi.
