Dhormdutancho Itihas 6:1-15
6 Tea disamnim xisancho ankddo vaddot voitalo. Tednam Grik bhas uloitale te Judev xis, Hebrev bhas uloitale tea Judev xisam add gunngunnunk lagle. Karonn sodanch jevnnacheo vostu vanttʼttat tednam tanchea vidvancher konn dhean dinasle.
2 Tor tea Bara zannamnim* soglea xisank ektthaim apoun mhunnttlem: “Ami Devachem utor xikounchem soddun jevonn vanttunk laglear sarkem zaunchem na.
3 Tor, bhavamno, tumche modem borem nanv aslolea sat munxank vinchun kaddat, je povitr xokten ani zannvaien bhorlole asat. Tankam hem gorjechem kam korunk ami nemunk zata,
4 ani amkam magnnem korunk ani Devachem utor xikoit ravonk mellttolem.”
5 Hem sogleank manvolem, ani tannim hea munxank vinchun kaddle: Istev, zo bhavarthan ani povitr xokten bhorlolo aslo, toxench Filip, Prokorus, Nikanor, Timon, Parmenas, ani Nikolav. Ho Nikolav Antiok ganvcho aslo ani tannem Judev dhorm apnnailʼlo.
6 Tannim hea satui munxank apostlam lagim haddle, ani apostlamnim magnnem korun tancher aple hat dovorle.
7 Tea pasot, Devachem utor ximpddot gelem ani Jeruzalemant xisancho ankddo-i rokddoch vaddot gelo, ani iadnikanchea eka vhodd zomean bhavarth dovorlo.
8 Istev, Devache kurpen ani xokten bhorlolo aslo, ani lokam modem vhodd vizmitam ani khunna korun dakhoitalo.
9 Punn thodde munis fuddem sorle, je Svotontr Munxanchea Sobha-ghorache vangddi asle. Tanchea borabor Siren, Aleksandria ani thodde Silisia ani Asiantle munis asle. Te Isteva add ube ravon vad-vivad korunk lagle.
10 Punn Istevan zannvaien ani povitr xoktechea modotin tankam zobab dilo. Tachea mukhar tanchem kainch cholona zalem.
11 Tednam tannim konnank kollonastana thoddea munxank oxem mhunnonk fuslaile: “Ami haka Moizesachea ani Devachea add uloitana aikolam.”
12 Tannim lokank, vhoddilank ani xastreank uksaile, ani okosmat sogleamnim vochon Istevak dhorlo ani zobordosten Mha-sobhe* mukhar velo.
13 Uprant, te khottea sakxeank gheun aile. Tea sakxeamnim mhunnttlem: “Ho munis amchea povitr Devmondira add ani Devachea Kaidea* add ulovop bond korina.
14 Udharonnak, ami haka oxem mhunnttana aikolam ki Nazaretkar Jezu Devmondiracho nas kortolo ani Moizesan amkam dileat teo riti-rivazo bodoltolo.”
15 Mha-Sobhent boslolea soglea lokamnim Istevacher nodor marli tednam tankam tachem tondd eka devduta sarkem dislem.
Footnotes
^ Mhunnche, 12 apostl.
