Dhormdutancho Itihas 8:1-40
8 Istevak jivexim marun uddounk, Saulun pasun maniotai dilʼli.
Tea disa thaun Jeruzalemache sobhek zaito dhumallo sosunk poddlo. Apostlank soddun, urlole sogle xis Judeiant ani Samariechea vattaramnim ximpoddle.
2 Punn Devachi bhirant aslole thodde munis Istevak purunk gheun gele, ani te tachea pasot khub roddle.
3 Saulu sobhek sotaunk laglo. To ghoran-ghor vochon dadleank ani bailank voddit bhair haddttalo ani bondkhonnint ghaltalo.
4 Punn ximpoddlole te xis jea-jea zagear gele thoim te Devachea utrachi bori khobor porgottit ravle.
5 Filip nanvacho xis Samaria xarant* gelo ani thoim to Krista vixim porgott korunk laglo.
6 Soglea lokamnim Filip sangtalo tacher dhean dilem, tachem mon lavun aikolem ani tannem kelʼlim vizmitam polloilim.
7 Thoim noxtte dut boslole zaite lok asle, te noxtte dut mottʼttean bob marun tanche voile bhair soron voitale. Tea bhair, zaite ar zaun dhorlole ani longdde lok pasun bore zale.
8 Taka lagon, akʼkhea xarantle lok khub khuxal zale.
9 Samaria xarant Simanv nanvacho ek munis aslo. To, lok ojap zata tosle jadu kortalo ani apunn ek vhodd munis mhunn dakhoitalo.
10 Lhanam thaun vhodd, sogle lok tachem dhean diun aikotale ani mhunnttale: “Hea munxa bhitor Devachi Xokti asa, Mha-xokti asa.”
11 Zaite tempa thaun, lok ojap zata tosle jadu tannem tankam korun dakhoilʼle. Taka lagon, te lok tacher dhean ditale.
12 Punn Devachea Rajea vixim ani Jezu Kristachea nanva vixim bori khobor sangtalo tea Filipacher tannim visvas dovorlo tednam, zaitea dadleamnim ani bailamnim bautizm ghetlo.
13 Simanvan pasun visvas dovorlo, ani bautizm ghetlea uprant to Filipa sangata ravonk laglo. Filip kortalo teo khunna ani vhoddlim-vhoddlim vizmitam polloun to ojap zatalo.
14 Samariechea lokamnim Devachem utor manun ghetlam mhunn Jeruzalemant aslolea apostlamnim aikolem tednam, tannim Pedru ani Juanvak tanche lagim dhaddle.
15 Tannim thoim vochon tankam povitr xokti mellom mhunn magnnem kelem.
16 Karonn tancher konnancheruch azun povitr xokti ieunk nasli. Tannim fokot Somia Jezuchea nanvan bautizm ghetlolo.
17 Tor Pedru ani Juanvan tancher hat dovorle ani tankam povitr xokti mellonk lagli.
18 Apostl hat dovortana povitr xokti melltta ti polloun, Simanvan tankam poixe dita mhunn sanglem,
19 ani mhunnttlem: “Hanv konnancherui hat dovorta tednam tankam povitr xokti mellttoli, oslo odhikar mhaka-i diat.”
20 Punn Pedrun taka mhunnttlem: “Tujea chandicho tujea sangata nas zaum, karonn Devachem funkott dennem tum poixeamnim gheunk xokta oxem tunvem chintlem.
21 Punn hea sevent tuzo kainch bhag na ani tuka kosloch vantto na, karonn Devachea nodre mukhar tujem kalliz promannik na.
22 Taka lagon tujem hem vaittponn soddun poschatap kor, ani tujea kallzant ailolea hea vaitt chintpak lagon zata zalear tuka bhogsonnem di mhunn Jehova* lagim vinovnni kor.
23 Karonn tujem kalliz vikan* bhorlam ani tum vaittponnacho gulam zala oxem mhaka dista.”
24 Tednam Simanvan taka mhunnttlem: “Tumi mhunnttloli khoinchich vost mhojer iena zaunk upkar korun mhojea pasot Jehova* lagim vinovnni korat.”
25 Hea toren, Pedru ani Juanv soglea vattaramnim bore bhaxen govai diun ani Jehovachem* utor sangon zalea uprant Jeruzalemant vochonk bhair sorle. Vatter te Samariechea zaitea ganvamnim bori khobor porgottit gele.
26 Punn Jehovachea* dutan Filipak mhunnttlem: “Utth ani dokxinne vatten Jeruzalema thaun Gaza voita tea rostean voch.” (Hea rostea voilean konn vochonaslo.)
27 Hem aikon Filip utthlo ani vochonk bhair sorlo. Vatter taka Ethiopiecho ek odhikari mellʼllo. Hea odhikareak Ethiopiechi ranni Kandakechea dorbarant ek vhodd podvi asli, ani taka tichea theveancho dekhrekh korpi mhunn nemlolo. To Devachi bhokti korunk Jeruzalemant gelʼlo,
28 ani atam to thoim thaun porot ietalo. To aplea rothar boson mott’ttea avazan Izaias provadeachem pustok vachtalo.
29 Tednam povitr xokten Filipak mhunnttlem: “Chol tea rotha lagim voch.”
30 Filip tea rotha sangata dhanvonk laglo ani tannem to odhikari Izaias provadeachem pustok vachta tem aikolem. Tor tannem taka vicharlem: “Tum vachta tem tuka somzota?”
31 Tannem mhunnttlem: “Konnem-i mhaka hachi somzonni dilea bogor hanv koso somzotolom?” Uprant tannem Filipak rothar choddon aplea sangata bos mhunn vinoti keli.
32 Devachea utrantlo to ho bhag vachtalo: “Eka menddrak marunk vhortat toso taka haddlo, ani ek menddro apli lhonv tasta tachea mukhar ogi ravta toxem tannem aplem tondd ugddunk na.
33 Tacho opman zatalo tednam taka neai mellonk na. To konn ani khoim thaun ailo tem konn sangtolo? Karonn prithume voilean tachem jivit kaddun ghetlem.”
34 Tednam odhikarean Filipak mhunnttlem: “Upkar korun, mhaka sang, ho provadi konnam vixim uloita? Aplea vixim vo anik konnam vixim?”
35 Tednam Filipan ulounk suru kelem. Devachea utrantlea hea versa thaun suru korun tannem Jezu vixim bori khobor sangli.
36 Rostea voilean voita astana, te eka oslea zagear pavle zoim udok aslem. Tor odhikarean mhunnttlem: “Polloi! Hanga udok asa; tor atam bautizm gheunk mhaka kitem addkholl asa?”
37 *——
38 Odhikarean roth thamboilo, ani te dogui udkant denvle. Thoim Filipan taka bautizm dilo.
39 Te udkantlean bhair ailea uprant, Jehovachi* povitr xokti Filipak rokddich dusre koddem gheun geli. Ani odhikari taka porot pollounk xoklona, punn to khuxal zaun aplea vatten gelo.
40 Uprant Filip Ashdodant pavlo. Sezaria pavom poriant to soglea vattaramnim ani xaramnim bori khobor porgott korit ravlo.
