Jehovan murti puza korchi nhoi mhunn kaido diunk naslo zalear pasun amchi purnn bhokti fokot takach favo mhunn Jakob zannam aslo. (Sutt. 20:3-5) Tor Jehovan taka Bethel-ant voch mhunn sanglea uprant, Jakoban sogleank tanchea lagim asloleo murteo bhair uddoi mhunn sanglem. Uprant, Jakoban sogleo murteo ani toxench tim ghoddie taviz mhunn ghaltalim tim kanantlim pasun bhair uddoilim. (Ut. 35:1-4) Jakoban kelem tem polloun Jehova khuxal zalo mhunn kainch dubhav na.

Amchea disamnim, ami purnn kallzan fokot Jehovachi bhokti koxi korunk zata? Ek mhunnttlear, murtipuja vo ghaddiponnank zuddloli khoinchi-i vost ami nakarunk zai. Fuddar parkhunk adar korta tosli kosli-i vost amchea lagim asa zalear ami ti bhair uddounk zai. Toxench, monoronjon vinchun kaddttana ami tem bariksannen topasunk zai. Udharonnak, tumi tumkanch vicharat: ‘Bhut, vampire, zombi, vo soimbavorti xokti aslolea munxam vixim hanv pustokam vachtam vo picture-am polloitam kai? Jadu, montr vo xirap ghaltat toslea monoronjonant kainch dhoko na oxem hanv chint’tam kai?’ Jehova dves korta toslea soglea vostum thaun ami khub pois ravonk zai.—St. 97:10.

“DEVCHARACHER ZHUZ KORAT,” HO VIDDEO POLLOIAT ANI SOKOL DILOLEA PROSNACHE ZOBAB DIAT:

• Palesa mhunnttlolea Bible vidhearteachea jivitant kosli oddchonn aili?

• Ghaddiponnam thaun mekllim zaunk ami vhoddilancho adar ghevop xanneponn kiteak zaun asa?

• Jehovachi rakhonn mellonk eklean khoincheo vostu soddun diunk zai?

• Palesan koslem pavl ghetlem?

• Tumi ravtat thoim, devcharacho probhav pois korunk kosleo vatto asat?