Setembr mhoineant, Sasnak Khuxalkaien Jieiat! pustika uzar korun, ami soglea lokam sangata Bible obheas suru korunk khub vavr kortolim. Hea mhoineant porgottnnarank 30 voram sahaiok pioneer seva korunk pasun sondhi mellttoli. Tor ami he khas porgottnnent koso bhag gheunk zata?

• Poili Bhett Kortana: Ulovop suru kortana, ulounchea ritin uloiat ani ulovop chalu dovrat. Aiknnareachi khobor gheiat, tumkam tachi kallji asa mhunn dakhoiat ani uloupachi kola uzar korun uloiat. (Filp. 2:4) Aiknnarea lagim zaite pavtti uloilea uprant, sovkas-sovkas sondhi melltta tednam Devachea Utrantlea eka vixoi-acher uloiat. Ani tim aikonk umed dakhoitat ani hea vixim anik ulounk sodhtat zalear, tankam Bible obheasa vixim sangat. Tumcheo porot bhetto ani aikonk umed dakhoilolea aiknnareank visornakat. Poilim ghoddie, tumchea sangata Bible obheas korunk tim fatti sorlim astolim. Punn atam, hi novi pustika ani Bible obheas korchi hi novi manddavoll tankam ghoddie avddonk xokta. Tumkam ghorant konn mellona zalear, ti pustika thoinch soddinakat. Vo adim aikonk umed dakhounk na tankam chitti boroun hi pustika dhaddinakat. Hea mhoineant, Sobhechi Seva Somiti ghoddie anikui porgottnni mittingo dovrunk xokta.

• Her Vellar Porgottnni Kortana: Tumchi sobha kartt uzar korun porgottnni korta zalear, tumi karttant Sasnak Khuxalkaien Jieiat! pustika dovrunk zata. Ani konnui aikonk umed dakhoita zalear, hea pustike sangata tannim funkott Bible xikonk zata mhunn tumi tankam sangonk zata. Sevechea dekhrekh korpean purtim aslolea thoddea bhav-bhoinnank, veapar-dhondeachea zagear dhaddunk manddavoll korunk zata. Toxench, tumchea sangata kam kortat tim vo tumi sondhi melltta tednam porgottnni kortat tim aikonk umed dakhoitat zalear, tumi tankam Bible obheasa vixim sangonk zata.

Lokank “xis korat” ani “tankam xikoiat” mhunn Jezun amkam adnia dilea. (Mt. 28:19, 20) Tor hea khas porgottnnent, Sasnak Khuxalkaien Jieiat! hem prokaxon uzar korun Jezuchi hi adnea ami pallunk pavtolim mhunn ami anvddetat.