Dev-bhirantechea avoi-bapaink aplim bhurgim Jehovachim visvaxi sevokam zalolim zai. Oxem zatolem zalear, avoi-bapaimnim lhanponnim thaun aplea bhurgeanchea kallzant Devachi xikvonn rigounk zai. (D.S. 6:7; Mho. 22:6) Hem korunk tankam svotak teag korcho poddttolo kai? Hoi poddttoloch! Punn tanchea teag-a poros chodd, tankam bhorpur besanvam mellttolim mhunn tannim khatri dovrunk zata.—3Ju. 4. Juze ani Marie koddlean avoi-bapaimnim zaitem xikonk zata. Tim “vorsachea-vorsa Pask Utsovak Jerusalea” voitalim. Oxem korunk zaito vavr ani khorch poddlear pasun tannim tem kelem. (Luk. 2:41) Hache voilean, tankam aplea familin Jehova lagim sorlolem chodd gorjechem aslem mhunn kollon ieta. Toxench, aiz avoi-bapaimnim dor ek sondhecho faido gheun aplea bhurgeank aplea utramnim ani udharonnantlean sarki vatt dhorunk modot korunk zata.—St. 127:3-5.

TANNIM DOR EK SONDHI UZAR KELI, HO VIDDEO POLLOI ANI UPRANT SOKOL DILOLEA PROSNANCHE ZOBAB DIAT:

• Jon ani Sharon Schiller aplea bhurgeank vaddoitana pasun Jehovachi seva koxim korit ravonk pavlim?

• Avoi-Bapaimnim aplea bhurgeanchea gorje pormonnem tankam veg-veglli rit apnnaun xikovop, sarki vatt dakhovop ani nittaier haddop kiteak gorjechem?

• Bhurgeamnim aplea bhavarthacher ieta tea porikxek tondd diunk avoi-bapaimnim tankam koxim toiar korunk zata?

• Jehovache songottonnen toiar kelolim khoinchim sadhonam uzar korun tumi tumchea bhurgeank Jehovache ixtt zaunk modot kelea?