Jezun kel’lem nimannem Pask khub khas aslem. Hem Pask tannem aplea apostlam sangata monounk tharailem, karonn to beginuch morcho aslo. Tor tannem Pedruk ani Juanvak Paskachi toiari korunk dhaddle. Pask zalea uprant, tannem aplea apostlam sangata ani ek khas jevonn kelem. Hea khas jevnnak ami Somiachem Rat-Jevonn mhunnttat jem ami dor vorsa monoitat. (Luk. 22:7-13; pustikechem fuddlem chitr polloiat.) Jezun hea khas disa pasot toiari keli toxi, Mars 27 tarker aslolea Ugddas Disa pasot ami pasun toiari korunk zai. Sobhentlea bhavamnim kariavolli pasot manddavoll kelea astoli, zoxem bhaxonn konn ditolo, unddo ani soro konn toiar kortolo ani her manddavolleo. Tor ami dor eklean Ugddas Disa pasot kitem toiari korunk zata?

Tumchem kalliz ani mon toiar korat. Ugddas Disa pasot, Bible-antlim jim versam dileant tim vachat ani tacher niall korat. Him versam Examining the Scriptures Daily hantunt dil’lim asat. Toxench, New World Translation of the Holy Scriptures-achea appendix B12-ant anik chodd versam ani mahiti dilea. (Abril 2020, Jivit ani Porgottnni Mittingechi Pustika, pasun polloiat.) Tea bhair, kuttumbik bhoktent bolidana vixim bhasabhas korunk tumi Watch Tower Publications Index vo Research Guide for Jehovah’s Witnesses uzar korunk zata.

Dusreank apounnem diat. Amontronn diunk khas porgottnni asta tednam tumi tantunt zata titlo vantto gheiat. Tumi konnak apounnem ditolim tea vixim chitat. Tumi porot bhett kortat tankam, tumchea lagim adim Bible obheas kortalim tankam vo tumchea vollkhicheank ani soireank apounnem diunk zata. Sobhent ieunk bond kelam tankam apounnem diunk vhoddilamnim khatri korunk zai. Tumchea vattarant ravona toslea eka munxak tumi amontronn dilam zalear, to ravta tea vattarant Ugddas Dis khoinchea vellar ani zagear zatolo tea vixim taka sangat. Hi mahiti tumkam jw.org-cher AMCHEA VIXIM hea panar vochun “Ugddasacho Dis” hacher klik kelear mellttoli.

Ami toiari korunk anik kitem korunk zata?