Odruxttam disan-dis chodd zait asat. Ani ek odruxtt ghoddtta tednam odruxttak sampoddloleank modot korunk, manddavollin ani ektthaim mellon kam korop mhotvachem. Hea pasot, Sonchalon Monddollan dor eka xakha ofisant, Odruxttak Sampoddloleank Modot Korpi Khatem, hachi manddavoll kelea.

Ek odruxtt zalam mhunn hea khateantlea bhavank kolltta tednam tea vattarant aslolea porgottnnarank kosli goroz asa tem zannam zaunk, te rokddech thoinchea sobhentlea vhoddilank sompork kortat. Tea odruxttak lagon ekdom chodd luksonn zalam zalear, ani thoinchea bhav-bhoinnank modotichi goroz asa zalear, modot korchea kamant fuddakar gheunk xakha ofis purte aslolea thoddea bhavank nemta. He bhav ghoddie, tankam thoim ap-khuxen modot korunk bhav-bhoinnanchi goroz asa mhunn sangot, vo tankam thoim zai asloleo umkeoch vostu magot, vo te ghoddie gorjecheo vostu vikteo gheun teo vanttunk xoktat.

Punn ami svota zaun amkam zai toxem kortat tednam ekuch kam don pavtti zaunk pavta, sogloch goddbodd zata ani poixe ani vostuncho ibadd zata. Oxem korchea bodlek, ami songottnnechem margdorxon pallttat tednam zaito faido zaunk pavta.

Odruxttak sampoddloleank modot korchea kamant kitlo khorch zatolo ani kitlea bhav-bhoinnanchi goroz astoli tem xakha somitin nemlolea bhavank khobor asta. Toxench, odruxtt zalam tea vattarantlea odhikareank te sompork korunk xoktat, jea vorvim odruxttak sampoddloleank modot korpachem kam anikui begin zaunk xokta. Tor upkar korun, svota zaun heram koddlean poixe ektthaim korinakat, vo odruxtt zalam thoim gorjecheo vostu dhaddinakat, vo tumkam sanglea bogor odruxtt zalam tea zagear vochonakat.

Ami amchea bhav-bhoinnancho khub mog kortat tem khorem. Ani odruxtt zata tednam ami tankam modot korunk sodhtat. (Heb. 13:16) Tor ami kitem korunk zata? Sogleam-von mhotvachem mhunnttlear, odruxttak sampoddloleam pasot ami magnnem korunk zata. Toxench, tankam modot kortat tea bhav-bhoinnam pasotui ami magonk zata. Tea bhair, ami sonvsarbhorchea kama pasot denngim diunk zatat. Sonchalon Monddollachea margdorxona khala, xakha ofisam, ami ditat tim denngim sogleam-von bore toren koxim uzar korunk zai tem zannant. Ami odruxtt ghoddlam thoim vochon modot korunk sodhtat zalear, ami Local Design/Construction Volunteer Application (DC-50) hem fom bhorunk zata.

BRAZIL-ANT AILʼLI NISONNTTON HADDTTA TOSLI BUDDTTI, HO VIDEO POLLOIAT ANI UPRANT HEA PROSNACHO ZOBAB DIAT:

2020-ant Brazil-ant buddtti ailea uprant, odruxttak sampoddloleank modot korunk Jehovachea Sakxeamnim jem kitem kelem tantuntlem tumkam kitem avoddlem?