Artificial intelligence (AI) mhunnttlear computer adarit choltat teo vostu vo machine-am. Halich sonvsarik fuddari, vidneanik ani technologist hea vixim uloile. Te manun ghetat ki heo vostu faideacheo, toripunn tankam usko asa ki hea vostuncho durupeog pasun zaunk xokta.

•   “AI udexim ami zaitim kamam korunk xoktat ani amchem jivit khub sompem zalʼlem asa . . . Punn teach vellar hantunt zaite dhoke-i asat. Zoxem amchi surokxa, gupit dovrunk zai ti mahiti ani amche thodde nagrikponnache hokʼk dhokeant astat. Toxench, democratic sorkaracher visvas dovrunk amkam kotthin zaunk xokta.”—Kamala Harris, United States-achi vice president, May 4, 2023.

•   “Artificial intelligence munxanche bholaikek khub faideachem asa. Toripunn tanchea jivak ani tankam bhavnik ritin dhoke asunk xoktat. Oxem veg-vegllea desantlea dotoranchea eka zomean ani Dr. Frederik Federspiel hannem fuddakar ghetlolea dotoramnim eka lekhant mhunnttlem. Ho lekh BMJ Global Health hea journal-ant, May 9, 2023-ant ailo. a

•   “AI vorvim lok khotti mahiti ximpddaunk xoktat. Toxench, AI-ak lagon lokank ghoddie fuddarak kamam mellonk kotthin zatolim. Tea bhair, AI-ak lagon lokank mar lagonk xokta mhunn Technology-nt kam kortat tankam usko asa.”—The New York Times, May 1, 2023.

 Zoso vell soron voita lok AI boreak khatir vo vaitta khatir uzar kortat tem sarkem kollon ietolem. Bible hea vixim kitem sangta?

 Munis uzar kortat teo noveo vostu boreak lagonuch uzar zatoleo mhunn kainch guarantee na mhunn Bible dakhoita.

1.  1. Munxanche hetu kitle-i bore asum, punn fuddarak tacho porinnam kitlo vaitt zaunk xokta tem tankam khobor na.

   •   “Jeo vatto kaim zann nitt mhunnon somzotat, Teoch mornnak pavoitat.”—Mhonnʼnneo 14:12.

2.  2. Ek munis jem toiar korta tem dusrim boreak lagon uzar kortolim vo tacho durupeog kortolim tacher tea munxacho kainch tabo urona.

   •   “Hanvem kam korun zoddlem tacho mhaka bilkul upeog na. Karonn, jem kitem hanvem zoddlam, tem hanvem mhojea fattlean ietoleak dovorchem poddtolem. Ani to ghoddiek xannom zait vo piso zait konn zannam? Torui hanvem koxtt korun ani zannvaien, hea sonvsarant jitlem zoddlam, tacho dhoni to zatolo tem sogllem upeog naslolem.”—Upodexok 2:18, 19.

 Him karonnam amkam dakhoun ditat, ki amchea Rochnnara thaun zannvai kitli gorjechi zaun asa.

 Munxam udexim vo munxamnim toiar kelolea vostum udexim prithumecho vo munxancho nas kednanch zaunk diuncho na mhunn amcho Rochnnar bhas dita.

•   “Prithum sodanch toxich urta.”—Upodexok 1:4.

•   “Des zatolo borea monxanchem daiz: thoim tim tthikann kortolim sasnnachea sasnnak!”—Stotr 37:29.

 Xanticho ani surokxit fuddar melloun gheunk Bible-a udexim amcho Rochnnar amkam vatt dakhoita. Hea vixim Bible kitem sangta tem zannam zaunk Inglez bhaxent aslole, “Is There a Reliable Guide to a Secure Future?” ani “A Real Hope for a Better Tomorrow” he lekh vachat.