May 19, 2022 hea disa, United Nations Security Council, vhodd podvent aslolea 75-am poros chodd odhikaream lagim uloilem tednam tankam kollon ailem ki “COVID-19 piddek lagon ani vatavoronnant bodol zala dekhun, sonvsarbhor jevonn-khann unnem zalam. Punn Ukraine-antlea zhuzak lagon sonvsarbhor bhuk poddchi poristhiti ailea.” Uprant rokddench, The Economist-an oxi khobor dili ki “hem zhuz sonvsarbhor zaitea lokank bhukechea toddier pavoit asa.” Amchea disamnim hea toren bhuk poddttoli mhunn Bible-ant adim fuddench sanglolem. Tea bhair, oslea poristhitincho fuddo korunk pasun tantunt amkam modot melltta.

•    Jezun sanglolem: “Ek raxttr dusrea raxttracher ani ek raj dusrea rajeacher zhuz kortolem . . . bhuk poddttoli.”—Matev 24:7.

•    Prokasovnni pustokant amkam char ghoddesvaram vixim vachunk melltta. Tantuntlo eklo, zhuzank suchit korta. Punn tachea fattlean ieta to anik ek ghoddesvar, bhukek suchit korta. Tem mhunttlear, oslo ek vell jednam jevnna-khannachem unnemponn astolem ani khub poixe diun jevonn viktem gheunk poddttolem. “Hanvem eka kallea ghoddeak polloilo, ani tacher boslolo aslo, tachea hatant ek tagddi asli. Eka tallea sarko avaz mhaka aikonk ailo . . . Tea avazan mhunnttlem, ‘Ek xer bhor gonv zai zalear tumkam akʼkhea disachem pagar diunchem poddttolem! Ani tumkam zonvache tin xer zai zalear pasun tumkam akʼkhea disachem pagar diunchem poddttolem.’”—Prokasovnni 6:5, 6, Contemporary English Version.

 Jevnna-khanna vixim Bible-ant sangloleo bhasaunneo, aichea kallar, tem mhunnttlear Bible-ant sanglolea “nimannea disamnim” purnn zatat. (2 Timotak 3:1) Tor ‘nimannea disam’ vixim, ani Prokasovnni pustokant sanglolea char ghoddesvaram vixim anik zannam zaunk, 1914 Vorsa Thaun Sonvsarachi Poristhiti Bodolʼlea ho video polloiat, ani “The Four Horsemen—Who Are They?” ho lekh vachat.

•    Bible-ant amkam faideak poddttat tosle solʼle mellttat. Hea vorvim amkam kotthin poristhitincho, zoxem mhargai ani jevnnachem unnemponn, hancho pasun fuddo korunk modot zata. “How to Live on Less,” hea lekhant osle thodde solʼle dilʼle asat.

•    Fuddarak poristhiti bori zatoli mhunn Bible amkam bhorvonso dita. Fuddarak oslo vell ietolo jednam “porvotanche tengxe meren subhamponnan desant piktolo dhanno” ani sogleank bhorpur jevonn astolem mhunn Bible-ant bhas dilea. (Stotr 72:16) Tor Bible fuddara vixim koslo bhorvonso dita, ani ami tacher kiteak patieunk zata tea vixim anik zannam zaunk, “A Real Hope for a Better Tomorrow,” ho lekh vachat.