Sonvsarantle fuddari ani ontoraxttria songottnna xanti haddunk xoklim nant. Dusrea Vixv Zhuza thaun aiz meren zhogddim anik chodduch vaddleant. Ani oslea vattarant ravpi sumar 200 kottʼtti lokank hacho porinnam bhogcho poddtta.

 Lok xantin kiteak ravonk xokona? Hea vixim Bible kitem sangta?

1.  1. Lok oslo sobhav dakhoita zaka lagon te xanti korunk pavona. Amchea disamnim “lok aploch mog kortat tosle, poixeancho mog kortat tosle, boddai martat tosle, svotak dusream poros vorte lekhtat tosle, . . . ovisvaxi, . . . koslea-i vixoi-acher kobul zainant tosle, . . . svotacher tabo naslole, ragixtt, . . . dusreanchem aikonant tosle, gorvan fulʼlole” astole mhunn Bible-ant adinch sanglolem.—2 Timotak 3:2-4.

2.  2. Rochnnar Jehova a Devachea modoti bogor aiz munis, zaum to eklo vo dusream sangata mellon, apleo somosia suttaveo korunk xokona. Karonn Bible sangta: “Aplim panvlam nitt vatter ghalunk tanche adhin na.”—Jeremias 10:23.

3.  3. Ho sonvsar xoktivont ani noxttea odhikari Soitanachea khala asa “zo akʼkhea prithumer ravtolea lokank fosoita.” (Prokasovnni 12:9) “Akʼkho sonvsar noxtteachea tabeant asa,” tea mhunnosor zhogddim ani zhuzam astolinch.—1 Juanv 5:19.

 Munis nhoi punn Devuch xanti haddttolo mhunn Bible amkam khatri dita.

•   “Tumche vixim Mhojea monant asa ti ievzonn Hanv zannom; ti ievzonn mhollear xanti diupachi, noxtt haddpachi nhoi; hi ievzonn tumkam bhorvanxean bhorlolo boro fuddar samballun dovorta.”—Jeremias 29:11.

 Dev apli bhasaunni koxi purnn kortolo? “Xanti diupi Dev beginuch Soitanak . . . paim-am khala chiddʼddoitolo.” (Romkarank 16:20) Hem korunk Dev aplea sorginchea sorkarak uzar kortolo zaka Bible-ant “Devachem Raj” mhunnttlam. Hem Raj sonvsarbhor xanti haddttolem. (Lukas 4:43) Tea Rajeacho Raza Jezu Krist hea prithumer raz choloitolo tednam lokank xantin koxem jieunk zai tem xikoitolo.—Izaias 9:6, 7.

•   Anik zannam zaunk “Dev Aplea Rajea Udexim Kitem Kortolo?” ho lekh vachat.