Sonvsarbhor, choddan-chodd lok vegan zaunk lagla.

•   “Veganism ek osle torechi chintpachi ani jiepachi chal zaun asa, zantunt lok jevonn, nhesop vo her koslea-i vostunk lagon zonvarank tras korinant vo tancho upeog korinant.”—The Vegan Society.

 Thoddo lok, tankam fokot zonvaranchi kallji asa heach karonnak lagon nhoi, punn tankam poriavoronn borem aslolem zai, tanchi bholaiki bori asloli zai vo dhormik karonnak vo tanchea patiennek lagon vegan zata.

•   “Her torechea choddxea diet-am poros, veganism vegllem asa. Karonn lok, to aplo dhorm oxem mantat, borem-vaitt vinchun kaddpacho hokʼk mhunn lekhtat, ani sonvsar borea pasot bodlunk dor eka munxan apnnaunk zata tosli ek vatt mhunn chintʼtat.”—Britannica Academic.

 Tor veganism-a vorvim hea sonvsaracheo somosia suttaveo zaunk xoktat kai? Hea vixim Bible kitem sangta?

 Amcho Rochnnar Jehova Dev, a munxank zonvaram poros vortim mhunn lekhta ani tannem munxank zonvarancher odhikar dila mhunn Bible sangta. (Utpoti 1:27, 28) Munxak rochun zaitea vorsam uprant, Devan tankam jevnna pasot zonvarank marunk porvangi dili. (Utpoti 9:3) Punn munxamnim mouje khatir zonvarank jivexim marop vo tanchea sangata vaitt toren vagop Devak matui avoddna.—Mhonnʼnneo 12:10.

 Bible-a pormonnem, mas khaunchem vo na, ho dor ekleacho nirnnoi zaun asa. b Punn jevnna vixim ami zo nirnnoi ghetat, tea vorvim ami Devachea nodren dusream poros chodd valorachim zatat oxem nhoi. (1 Korintkarank 8:8) Tor ami dusreamnim ghetlolea nirnnoi-ak man diunk zai.—Romkarank 14:3.

 Bible dakhoun dita ki ami amchea jivitant kitem vinchun kaddttat tachea adarit sonvsarbhorcheo somosia suttaveo korunk zauncheo nant. Karonn aiz sonvsarbhor rajkaronnachi manddavoll koxi asa, lok koxe vagtat, ani poixeanchi manddavoll koxi asa tich sarki na, ani munis tem bodlunk xokona. Tor Bible sangta:

•   “Vankddem asa tem nittaier ghalunk zaina.”—Upodexok 1:15.

 Amkam aiz sosunk poddttat te sogle tras amcho Rochnnar kaddun uddoitolo. To kitem kortolo tea vixim Bible-ant eke dusrech bhaxen sanglam.

•   “Hanvem ek novem mollob ani ek novi prithum dekhlim. Poilem mollob ani poili prithum nanch zalim, ani somdir-ui nanch zalo.”—Prokasovnni 21:1.

 Hacho orth, Dev “poilem mollob” mhunnttlear, munxakullache sorkar kaddun uddoitolo, ani tachea bodlek, “novem mollob” mhunnttlear aplem sorginchem Raj haddttolo. Ani tachem hem Raj “poili prithum,” mhunnttlear noxttea lokancho nas kortolem, ani “novi prithum,” mhunnttlear ap-khuxen Devachea Rajeak tenko ditat tancher raz choloitolem.

 Fokot Devachea Rajea khala munxam zonvaram sangata xantin jietolim ani prithumecho bore toren samball kortolim.—Izaias 11:6-9.