Julay ani Agost 2020 hea vorsa poilech pavtt, sonvsarbhor aslolim bhav-bhoinnam pradexik odhivexonachi kariavoll ekach vellar polloitolim. Hem ghoddom-xem korunk odhivexonachi akʼkhi kariavoll 500 odik bhasamnim bhaxantor korchi poddli. Sangchem mhunnttlear, ho soglo vavr korunk ek voros ani maiz temp lagta. Punn, coronavirus piddek lagon poristhiti bigoddli. Taka lagon, 2020 “Sodanch Khuxal Ravat!” hea Pradexik Odhivexonachi kariavoll bhav-bhoinnank char mhoinea bhitor bhaxantor korchi poddli.

 Jehovachea Sakxeanchea Mukhel Ofisantlea, Bhaxantor Seva khatem ani Global Purchasing khatem hanchea adaran ho vhodd vavr sompounk adar zalo. Bhaxantor Seva khateak kollon ailem ki, hea kamant bhaxantor ttim-ik anik chodd sadhonanchi, khas korun borea quality-chea mike-anchi goroz poddttoli. Global Purchasing khatean 1,000 mike gheun 200 veg-vegllea zageancher pavounk manddavoll keli.

 He sogle mike ekach borabor ghetlolean amkam te sovai mellʼlle. He sogle mike poilim ekach zagear ektthaim korun dovorle ani uprant thoim thaun soglea bhaxantor ofisant pavoile. He mike ekach borabor ghetle dekhun, ek mike-a fattlean sumar 13,000 rupeancho khorch zalo. Hea khorch-ant veg-vegllea zageamnim pavouncho khorch bhi mellon asa. Oxem kelʼlean ek mike amkam 20 ttokʼke sovai mellʼllo.

 Global Purchasing khateak he sogle mike vikte gheupachi ani pavounchi manddavoll 2020 vorsachea Abril ani May mhoineant korchi poddli. Tea vellar, coronavirus piddek lagon chodd-xe veapar-donde bond asle. Tori astana, May mhoino mhunnttlear, soglea bhaxantor ofisant, xakha ofisant ani her zagear he mike pavle.

 Global Purchasing khateant dekhrekh korpi mhunn vavurta to bhav Jay Swinney mhunntta, “Bethel khateantlea bhavamnim veapar kortolea munxam sangata mellon khub borem kam kelem. Jehovachea povitr xoktechea adaranuch ami hem kam unnea vella bhitor sompounk xoklim. Ani toxench bhav-bhoinnamnim ap-khuxen dilʼlea denngeancho bore toren uzar korunk adar zalo.”

 Bhav Nicholas Ahladis, zo Bhaxantor Seva Khatean vavr korta tannem oxem mhunnttlem: “Bhaxantor kortat tim bhav-bhoinnam jim aplea ghora thaun kam kortat tankam he mike mellʼlle tednam tim khub urben bhorlim. Zorui tim aplea ttim-intlea vangddeam thaun pois aslim, torui tim sangata mellon 500 poros odik bhasamnim bhaxonnam, nattkam, ani gitam bhaxantor korunk pavlim.”

 Sonvsarbhor bhav-bhoinnank 2020 “Sodanch Khuxal Ravat”! hea Pradexik Odhivexonacho faido zaunk zaitim kamam korchim aslim. Hatunt bhaxantor kam pasun mellon asa. Tumi donate.pr418.com hachea vorvim ani her ritin udar kallzan denngi dilʼlean heo gorjecheo vostu vikteo gheunk adar zalo.