Maria, Raul, Arne ani toxench zaitea zannank Deva lagim magnnem korop ek vhoddlem dennem oxem dista. Magnnea udexim tim Deva lagim uloitat, tache upkar attoitat ani tachea thaun modot magtat. “Devache khuxe pormonnem, ami kitem-i maglear to amchem aikota mhunn amkam tacher purnn khatri asa.”​—1 Juanv 5:14.

Punn thoddea lokank magnnem korun kainch faido na oxem dista. Oxench chintop Steve nanvachea eka munxak aslem. To mhunntta: “Hanv 17 vorsancho aslo tednam mhoje tin ixtt bhair poddle. Eklo accident zaun ani dog zann doriant buddon mele. Tednam hanvem Deva lagim porot-porot vicharlem, ‘Tunvem oxem kiteak zaunk  dilem? Punn mhaka kainch zobab mellonk na.ʼ Hanvem chintlem, Dev aikoch na zalear, magnnem korun kitem faido?” Steve-a bhaxen thoddea lokank aplea magnneacho zobab mellona tednam, tim-ui magnnem korchem soddun ditat.

Thoddea lokank dista, Dev tanchea vixim soglem zannam. Tea pasot tim magnnem korinant. Amchea jivitant kitem cholta, ani amkam kiteachi goroz asa tea vixim Devak sogli khobor asa. Tor tachea lagim magnnem anik kiteak korunk zai, oxem tim mhunnttat.

Thoddea lokamnim aplea jivitant zaiteo chuki keleat dekhun, tim magnnem korunk fattim-fuddem zatat. Jenny nanvachi ek bail mhunntta: “Mhaka khub unnemponn bhogta karonn mhojea lagim zaiteo chuki zaleat. Tea pasot, Dev ghoddie mhojem magnnem aikochona oxem mhaka dista.”

Tumi Deva lagim magnnem kortat kai? Vo magnnem korun kainch faido na oxem tumkam-i dista? Ghoddie tumchea monant magnnem a korchea vixim zaite prosn asot, zoxe:

• Dev khorench amchim magnnim aikota kai?

• Dev thoddim magnnim kiteak aikona?

• Ami koxem magnnem korunk zai?

• Magnnem kelolean amkam kitem faido asa?