Ho Sonvsar Kabar Zatolo Kai?
Ho sonvsar beginuch kabar zatolo mhunn thoddo lok mhunntta tem ghoddie tumi aikolam astolem. Ani Povitr Pustokantui ho sonvsar kabar zatolo mhunn boroilolem asa. (1 Juanv 2:17) Hacho orth, munxakullacho ani hea prithumecho nas zatolo kai?
POVITR PUSTOKA PORMONNEM HACHO ZOBAB NA ZAUN ASA!
Kitem Kabar Zaunchem Na?
MUNXAKULL
Povitr Pustokant Oxem Boroilʼlem Asa: Devan him prithum bexttich rochunk na, punn munxamnim “thoim vosti korunk tannem ti akarlea.”—IZAIAS 45:18.
PRITHUM
Povitr Pustokant Oxem Boroilʼlem Asa: “Ek pinddka veta ani dusri pinddka ieta, punn prithum sodanch toxich urta.”—UPODEXOK 1:4.
HACHO ORTH KITEM: Prithumecho ani munxakullacho kednanch nas zauncho na. Tor, sonvsar kabar zatolo mhunnttlear kitem?
CHITAT: Hozaramnim vorsam poilim prithumer vaittponn khubuch vaddlolem mhunn Povitr Pustok sangta. Tea kallar, lok khubuch vaitt kamam kortale ani “soglleak otʼteachar posorla, hem Devan pollelem.” (Utpoti 6:11) Taka lagon, Devan “tea kallachea sonvsaracho udkache buddten nas” kelo. (2 Pedru 3:6) Devan prithumecho nhoi, punn vaitt lokancho nas kelo. Tea vellar, Noah nanvacho ek boro munis aslo. Dev sangta tem to soglem aikotalo. Tea pasot, Devan taka ani tachea ghorcheank tea buddtte thaun salvar kelim. Tor, Bible-a pormonnem fuddarak ho sonvsar kabar zatolo mhunnttlear, hi prithum nhoi punn vaitt lok kabar zatolo.
Kitem Kabar Zatolem?
DUKH-TRAS ANI VAITTPONN
Povitr Pustokant Oxem Boroilʼlem Asa: “Matso rav noxtte monis nanch zatole; pollexi zalear, atanch hanga aslo to khoim pavlo? Punn Des zatolo khaltea monxancho ani sogllech vatten tankam xantin jieunk melltolem.”—STOTR 37:10, 11.
HACHO ORTH KITEM: Dev vaitt lokancho ani vaittponnacho nas kortolo. Noah-chea disamnim Devan Buddtti dhaddun vaitt lokancho nas kelʼlo. Punn uprant, lok porot vaitt kamam korunk lagle ani sonvsar porot vaittponnan bhorlo. Beginuch, Dev sasnak vaittponn kaddun uddoitolo! To noxttea munxank nanch kortolo. Tea uprant, fokot Devachem aikotat tosle lok prithumer astole. Akʼkhea prithumer ekuch sorkar raj choloitolo mhunn Bible sangta. To sorkar Devacho astolo, zo sorgar thaun raj choloitolo.
CHITAT: Sonvsarantle sorkar Devachea sorkarak tenko ditole kai? Na. Te virodh kortole mhunn Bible sangta. (Stotr 2:2) Devachem Raj munxachea soglea sorkarancho nas kortolem ani tem “sodankal togtolem.” (Daniel 2:44) Punn Devachem Raj hea sorkarancho nas kiteak kortolem?
MUNXACHEA SORKARANCHO XEVOTT
Povitr Pustokant Oxem Boroilʼlem Asa: “Aplim panvlam nitt vatter ghalunk [munxachea] adhin na.”—JEREMIAS 10:23.
HACHO ORTH KITEM: Munxak dusrea munxacher raj cholounk rochunk naslo. Taka lagon, munxacho khoinchoch sorkar lokanche dukh-tras kaddun uddounk xokona.
CHITAT: Eka famad website-ir oxem boroilolem asa: “Zaite sorkar aile ani gele. Punn tantuntlea ekui sorkarachean goribi, bhuk, duensam, buddtti, bhuimkamp, zhuzam ani her torechim hinvsa kaddun uddounk zaunk na.” Teach website-ir fuddem sanglam, “Thodde lok mhunnttat ki sonvsarantle sogle sorkar mellon kam korit zalear, te dukh-tras kaddun uddounk xoktole.” Punn khorem mhunnttlear, te kaddun uddounk xokonant. Karonn tim sorkaram munis choloitat ani munis chuktat. Fokot Devachem Raj akʼkhea sonvsarantle dukh-tras sasnak kabar korunk xokta.
Atam porian ami polloilem toxem, sonvsar kabar zatolo mhunnttlear hea prithume voile vaitt lok ani vaittponn kabar zatolem. Tor, ami bhiepachi goroz na. Tache bodlek, ami khuxal zaunk zai karonn sonvsar boro zatolo. Dev ho sonvsar novo kortolo!
Hem soglem kednam zatolem? Tea vixim ami fuddlea lekhant zannam zatolim.
