1-2. (a) Efezkarank 6:16-ant sanglolea pormonnem amchea lagim bhavarthacho ek vhodd ddhal kiteak asonk zai? (b) Ami khoinchea prosnanche zobab polloitolim?

TUMCHEA lagim bhavarthacho ek vhodd “ddhal” asa kai? (Efezkarank 6:16 vachat.) Tumchea lagim asa mhunn kainch dubhav na. Zoso ek vhodd ddhal eka munxachea kuddicho choddso bhag rakhta, teach toren tumcho bhavarth hea sonvsarantli onoitiktai, hinvsa, ani Devachea totvam add aslolea soglea vostu thaun tumkam rakhta.

² Punn, ami “nimannea disamnim” jietat, ani amchea bhavarthacho porikxa zait asta. (2 Tim. 3:1) Tor tumcho bhavarthacho ddhal ghott asa vo na tem tumi koxim topasunk xoktat? Ani tumcho bhavarthacho ddhal tumi koso ghott dhorun ravonk xoktat? Hea prosnanche zobab polloum-ia.

3. Soinik aplo ddhal gheun kitem kortale, ani kiteak?

³ Bible kallar, soinik uzar kortale to ddhal bhailean choddxe pavtt chambddeacho astalo. Tea ddhalecher aslole chambdde pidd’ddear zaina zaunk ani tantunt aslolem lokhondd kollmena zaunk soinik tea ddhalek tel laitale. Aplo ddhal pidd’ddear zala mhunn eka soinikak dislem zalear, to rokddoch to ddhal sarko kortalo ani hea toren to fuddlea zhuzak toiar ravtalo. Hem udharonn ami amchea bhavarthak koxem lagu korunk zata?

4. Tumi tumchea bhavarthachea ddhalechi topasnni kiteak korunk zai, ani tumi ti topasnni koxi korunk zai?

⁴ Adlea kallachea soinika sarke, tumi pasun tumchea bhavarthachea ddhalecho sodanch topasnni korunk zai ani ti samballunk zai. Hea toren tumi zhuzak sodanch toiar ravonk xoktat. Kristanv zal’lean, amkam noxttea otmea add zhuzchem poddtta. (Ef. 6:10-12) Tumchea bhavarthacho ddhal tumchea pasot dusreamnim samballunk zaina, to tumich samballunk zai. Tor tumkam ietat tea porikxencho fuddo korunk tumi toiar asat mhunn koxi khatri korunk zata? Poilem, modotik lagon Deva lagim magat. Uprant, Devachem Utor uzar korun Dev tumkam jea toren polloita teach toren tumi tumkam polloiat. (Heb. 4:12) Bible mhunntta: “Sogllea kallzan Devacher visvas dovor, svotache zannvaiecher bhavarth dhorinakai.” (Mho. 3:5, 6) Hem vers motint dovrun, tumi adinch ghetlolea thoddea nirnnoi-a vixim chintat. Udharonnak, tumkam kednam-i poixeanchea unneponnak lagon khub tras zaleat kai? Tea vellar tumkam Hebrevank 13:5 ugddasak ailo astolo, zoim Jehova oso bhas dita: “Hanv tuka kednanch soddcho na ani sanddcho-i na.” Jehova modot kortoloch mhunn tuka hea utramnim khatri mell’lli kai? Toxem zalear, tum tujea bhavarthacho ddhal borea toren samballtta mhunn kollon ieta.

5. Tumi tumchea ddhalechi topasnni kortat tednam tumkam ghoddiek kitem disonk puro?

⁵ Tumcho bhavarth tumi bore bhaxen topastat tednam, tumi ghoddie ojap zaunk puro. Tumkam poilim disonk na tim tumchim unnemponnam tumkam atam dison ieunk puro. Udharonnak, gorje bhair uskevop, khotteo kanneo, ani niraxiponnank lagon tumcho bhavarth pidd’ddear zala astolo. Tumkam toxem ghoddlam zalear, tumi tumcho bhavarth anik pidd’ddear zaina zaunk tumi to koso samballunk zata?

6. Borea torechea uskeanchi thoddim udharonnam diat?

⁶ Thodde toreche uske bore. Udharonnak, Jehovak ani Jezuk khuxal korunk ami usketat. (1 Kor. 7:32) Ami ek gombir patok adarlam zalear, Deva sangata amchi ixttagot porot melloun gheunk ami usketat. (St. 38:18) Toxench, ami amchea kazari sangateak khuxal korunk, amchea familichea sodoxeanchi ani sobhentlea bhav-bhoinnanchi kallji gheunk usketat.—1 Kor. 7:33; 2 Kor. 11:28.

7. Mhonn’nneo 29:25-ant sanglolea pormonnem, ami munxank kiteak bhieunchi goroz na?

⁷ Punn dusrea vatten, gorje bhair uske amcho bhavarth pidd’ddear korunk xoktat. Udharonnak, amkam goroz titlem jevonn ani nhesop astolem kai mhunn ami sodanch chintit ravonk puro. (Mt. 6:31, 32) Hi chinta unni korunk lagon, ami amchem dhean girestkai koxi melloun gheunk zata tacher ghalunk puro. Oxem toren hollu-hollu poixeam pasot amcho mog vaddonk puro. Oxem zaunk ami soddun ditat zalear, Jehovacher amkam aslolo bhavarth unno zatolo ani Jehova sangata amchi ixttagot pidd’ddear zatoli. (Marku 4:19; 1 Tim. 6:10) Vo amkam anik ek torecho gorje bhailo usko zaunk puro—to mhunnttlear, dusrim amchea vixim kitem chint’tat tache vixim chodduch chinta korop. Tednam lok amchim fokannam kortole vo dhumalle haddttole mhunn ami bhieunk lagot, ani hi bhirant Jehovak ami dukhoitolim mhunn amkam aslolea bhirante poros chodd zaunk puro. Hea dhokea thaun amkam samballunk lagon, tea oddchonneak tondd diunk amkam bhavarth ani dhir di mhunn ami Jehova lagim magot ravonk zai.—Mhonn’nneo 29:25 vachat; Lukas 17:5.

8. Konnui amkam khotteo kanneo sangta tednam ami kitem korunk zai?

⁸ Fottincho bapui, Soitan, aplea tabeant asloleank uzar korun Jehova vixim ani amchea bhav-bhoinnam vixim khotteo kanneo sangta. (Juanv 8:44) Udharonnak, dhorm-broxtt korpi lok Jehovachea songottnne add website-icher, TV-cher ani her toren khotteo kanneo ani chukichi mahiti sogleak pavoitat. Heo khotteo kanneo Soitan amcher marta tea “zollte” bannam modem ek zaun asa. (Ef. 6:16) Oslea khottea kannea vixim konnui amchea lagim ulounk suru korta zalear, ami kitem korunk zai? Ami teo nakarunk zai! Kiteak? Karonn amkam Jehovacher bhavarth asa ani amchea bhavancher visvas asa. Khorem mhunnttlear, ami dhorm-broxtt korpi lokam sangata kednanch uloinant. Kosleach karonnak lagon vo kitea-i vixim zaum, ami tanchea sangata bhasabhas korunk vochonant. Khorem mhunnttlear tim kitem sangtat tachea vixim zannam zaunk pasun ami utsukta dakhoinant.

9. Ami nirax zatat tednam amcher koslo probhav poddonk xokta?

⁹ Niraxiponnak lagon amcho bhavarth halonk xokta. Amkam aslolea somosiak lagon ami thodde pavtt nirax zaunk xoktat. Punn ami amchea somosia vixim sodanch chintit ravop sarkem zaunchem na. Ami oxem kortat zalear, Jehovan amkam jeo boreo vostu bhasaileat teo ami visronk xoktat. (Prok. 21:3, 4) Hem niraxiponn amkam itlem oskot korunk xokta ki ami Jehovachi seva korchi bonduch korunk puro. (Mho. 24:10) Punn ami toxem zaunk diunchem nhoi.

10. Eke bhoinnin boroilolea chitti thaun tumi kitem xiktat?

¹⁰ United States-ant aslole eke bhoinnicho ghov khub duent asa. Tacho samball kortana pasun ti bhoinn aplo bhavarth koxi samballtta tem ami polloum-ia. Mukhel ofisak boroilolea eke chittint tinnem oxem sanglem: “Amchi poristhiti kednam-kednam chodduch vaitt zata ani ami nirax zatat, punn amcho bhavarth ghott asa. Amcho bhavarth ghott korunk ani amkam urba diunk Jehova dita tea soglea vostunk pasot hanv tachem khub upkari asa. Amkam tachea sol’leachi ani urbechi khorench goroz asa. Hache vorvim Soitan amchea add haddtta te tras sosunk ani Jehovachi seva korit ravonk amkam modot zata.” Ami niraxiponnacho fuddo korunk xoktat mhunn hea bhoinnichea utrantlean ami xiktat! Koxem? Tumcher ietat te tras Soitana thaun ek porikxa mhunn chintat. Tea vellar tumkam buzvonn diupi Jehova zaun asa mhunn ugddas dovrat. Ani tachea sangata tumchi ixttagot samballunk to dita tea soglea vostuncho valor korat.

11. Amcho bhavarth kitlo ghott asa tem topasunk, ami amkanch khoiche prosn vicharunk zai?

¹¹ Ddhale sarko aslolo tumcho bhavarth ghott korchi goroz asa mhunn tumkam dista kai? Gel’lea thoddea mhoineamnim, gorje bhair uskevop tumi pois kelam kai? Dhorm-broxtt korpi lok sangtat teo kanneo aikop ani tanchea sangata bhasbhas korop tumi nakarlam kai? Ani tumi niraxiponnak tondd diunk pavleant kai? Toxem zalear, tumcho bhavarth ghott asa. Toripunn ami chotrai dhorunk zai, karonn Soitan amchea add her torechim hot’tearam pasun uzar korta. Tantuntlem ek atam ami polloum-ia.

12. Girestkaiechi axa asa zalear ami kitem korunk xoktat?

¹² Ami girestkaiecho mog kortat zalear amcho bhavarth halonk xokta ani ami Jehova pasot chodd korunk pavchimnant. Apostl Paulun mhunnttlem: “Soinikachi seva korunk zannem aplem nanv dilam, to hea jivitachea heram rattimnim kednanch ghusollna, kiteak apnnak soinikache sevek ghetla tea senapotichea hukumank sarkoch aito asun to taka manonk zai.” (2 Tim. 2:4) Khorem mhunnttlear, Romi soinikank veapar dhondeant bhag gheunk porvangi nasli. Eka soinikan veaparant bhag ghetlo zalear kitem zata aslem?

13. Ek soinik veaparachea dhondeant kiteak bhag gheuncho na?

¹³ Chintat, soinikancho ek zomo ak’khi sokall zhuzak lagon toiari korta, punn tantuntlo eklo soinik tanchea modem na. To bazarant jevonn vikta. Sanjechea vellar, te soinik ap-aple angtrann topastat ani apli tolvar paztat vo tolvarek dhar kaddttat. Punn bazarant jevonn vikta to soinik dusrea disachea jevnnak lagon toiari korta. Dusrea disa sokallim, dusman ovchit akromonn kortat. Tea vellar khoincho soinik tea zhuzak toiar astolo ani aplea senapotik khuxal kortolo? Tumi tea zhuzant bhag ghetat zalear, tumi khoinchea soinikachea boglek ravonk sodhtolim—zo konn zhuzak toiar asa vo zo aplea rattavollimnim buddlolo asa?

14. Kristache soinik zal’lean, ami kiteacho valor kortat?

¹⁴ Ami borea soinika sarkim asat. Amcho sogleam-von mhotvacho dhei mhunnttlear—amchea Senapoti, Jehova ani Jezuchea kallzak khuxalkai haddop. Soitanachea sonvsarant amkam jem mellonk xokta tachea poros hem ekdom valorachem. Jehovachi seva korunk toxench amcho bhavarthacho ddhal ani Devan dilolem urlolem angtrann samballunk amchea lagim goroz to vell ani takot asa mhunn ami khatri korun ghetat.

15. Paulun amkam kitea vixim xittkailim, ani kiteak?

¹⁵ Ami sodanch chotrai dovrunk zai! Kiteak? Apostl Paulun xiddkailem, “girest zaunk sodtat tim . . . bhavartha thaun koddsorun” voitolim. (1 Tim. 6:9, 10) ‘Koddsorun vochop’ him utram dakhoitat, ki ami amkam goroz na teo vostu ektthaim korcho proitn kortat zalear amchem dhean sompeponnim halonk xokta. Tednam ami amchea kallzant “nirbudhi ani noxttadik vondovnnio” vaddounk xoktat. Ani heo vonddovnneo hot’tearam koxim uzar korun Soitan amcho bhavarth halouncho proitn korta mhunn ami ugddas dovrunk zai.

16. Marku 10:17-22-ant sanglolea ghoddnne vixim vachlea uprant ami amkanch khoinche prosn vicharunk zai?

¹⁶ Amchea lagim ghoddie zaiteo vostu gheunk poixe asonk puro. Punn ji vost amkam gorjechi nhoi, punn amkam ti zai mhunn gheun dovorlear ami kosli tori chuk kortat kai? Na zait. Punn hea prosna vixim chintun polloiat: Ek vost vikti gheunk amchea lagim poixe asat zalear pasun, ti vost uzar korunk ani samballunk zai titlo vell ani takot amchea lagim asa kai? Tea bhair, amchea lagim asa tea vostuncho ami chodduch mog korunk lagtolim kai? Ani amchea lagim aslolea vostunchea mogak lagon Jezuchem amontronn nakarun Devachea sevent chodd korunk fatti sorlolea tornnattea dadlea sarkim ami zaunk xoktat kai? (Marku 10:17-22 vachat.) Tachea bodlek ek sadem jivit jieunk amcho moladik vell ani xokti tachi khuxi korunk uzar kelear kitlem borem zatolem!

17. Ami kednanch kitem visronk zaina?

¹⁷ Ami dor disa eka zhuzant asat ani tantunt zhuzonk ami toiar asonk zai mhunn ami visronk nozo. (Prok. 12:17) Amkam lagon amchim bhav-bhoinnam amcho bhavarthacho ddhal uklunk xokonant. Ddhale sarko aslolo amcho bhavarth ghott korchi zobabdari amchi svotachi zaun asa.

18. Adlea kallache soinik aplo ddhal kiteak ghott dhortale?

¹⁸ Adlea kallacho ek soinik, dhiran zhuztalo tednam taka man favo zatalo. Punn zor to aplo ddhal nastana ghora ieta zalear, taka tem lojechem zaun aslem. Romi itihaskar Tacitus oso boroita: “Eklo aplo ddhal zhuzachea moidanar sanddun ailo zalear hachea poros ani lojechem kainch na.” Hea eka karonnak lagon soinik aplo ddhal aplea hatant sodanch ghott dhortale.

19. Ami amcho bhavarthacho ddhal koso ghott dhorunk zata?

¹⁹ Ami Kristi mitting-ek sodanch hajir zatat tednam, ani Jehovachea nanva vixim ani tachea Rajea vixim dusreank sangtat tednam ami amcho bhavarthacho ddhal ghott dhortat. (Heb. 10:23-25) Tea bhair, ami magnnem korun Devachem Utor dor disa vachtat ani tantuntle sol’le ani margdorxon amchea soglea kamamnim apnnaitat. (2 Tim. 3:16, 17) Tednam, Soitan amchea add uzar korta tea khoinchea-i hot’tearak sasnachem ies mellchem na. (Iz. 54:17) Amchea “bhavarthacho” vhodd “ddhal” amkam rakhtolo. Ami thir ravon, dhiran amchea bhav-bhoinnam sangata kam kortolim. Oxem korun ami dor disachem zhuz jiktolim tem khorem. Punn tachea poros chodd, Soitan ani tachea pattlavdaram add zhuzon Jezu jikta tednam tachea vatten ravcho vhodd man amkam mellttolo.—Prok. 17:14; 20:10.