Hea urbebhorit porgottnnarank Jehovan xokti dili. Tea vorsa colporteur, vo pioneer-ancho ankddo 225 thaun 350 meren gelo. Ani poile pavtt 8,000-am poros chodd class worker, vo porgottnnaramnim aplo sevecho ripott mukhel ofisak dhaddlo. Jehovan tancher besanv ghatlem ani tanchea sevent tankam khub ies mell’llo.

1920, Mars 21 tarker, Bible Videartheanchem kam manddavoll kortalo to bhav Joseph F. Rutherford hea vixoi-acher uloilo, “Aiz Jietat Te Lak’khamnim Lok Anik Kednanch Morchenant.” Itsa dakhoitoleank hea bhaxonnak ieukar diunk Bible Videartheamnim apleachean zata titlem soglem kelem. Tannim New York-cho vhoddlo theater bhaddeak ghetlo ani 3,20,000 ieukar potrika vanttleo.

Bible Vidertheamnim chintlolea poros chodd lok hajir zale. Tea theater-ant fokot 5,000 lokank bosonk mellttalem. Tor, ailolea anik 7,000 lokank bhitor soronk mellonk na. Hea mittinge vixim The Watch Tower-ant oxem sanglolem, “ontoraxttria Bible Videartheamnim hachea poilim manddavoll kel’lea soglea mittingam modem hea mittingent tankam sogleam-von chodd ies mell’llo.”

Bible Videarthi, “aiz jietat te lak’khamnim lok anik kednanch morchenant” hea vixim porgott’ttat mhunn famad zale. Rajeachi khobor kitlea pois meren porgottunk zai hea vixim Bible Videartheank tea vellar sarki somzonni nasli. Tori astana, tankam ekdom chodd urba asli. Ida Olmstead-an, 1902 hea vorsa thaun, mittingek ieunk suru kelem. Ti mhunntta, “Soglea munxakullak khub besanvam mellttolim mhunn amkam khobor asli. Tor porgottnnent bori khobor lokank sangonk ami fatti soronk nant.”

Sot sogleank pavchea khatir bethel-antle bhav prokaxonam svota chhapunk lagle. Bethel ghorachea laginch 35 Myrtle Avenue, Brooklyn, New York-ant tannim ek building bhaddeak ghetlem ani thoim print kortat toslem ek mexin haddun bosoilem.

Janer 1920-ant, Leo Pelle ani Walter Kessler Bethel seva korunk aile. Tea vella vixim Walter ugddas kaddun oso mhunntta, “Ami thoim pavle tednam printery-chea dekhrekh korpean amkam polloun mhunnttlem, ‘Donparam jevnna poilim tumkam kam korunk ek vor asa’ ani amkam kamak laile. Tannem amkam building-e sokol thaun pustokanchim thoddim boksam haddunk sanglim.”

Dusrea disa kitem zalem tem Leo ugddas korta. To mhunntta: “Poilea malliecheo vontt’tteo dhuvunk amkam sanglem. Hem kam hanvem kelolea soglea kamam modem ekdom mhellem aslem. Punn hem kam faideachem aslem, karonn ami Jehova pasot kam kortale.”

 Thoddeach sumanam bhitor, urbebhorit ap-khuxen vavurpea bhavam udexim The Watch Tower masikechi chhapnni suru zali. Febrer 1, 1920-acho The Watch Tower masikecheo satt hozar kopi building-achea dusrea mallier aslolea printing press-acher chhapleo. Teach vellar, building-achea sokol anik ek printing press bosoilem ani taka Battleship mhunn nanv dilem. Abril 14, 1920-achea, The Golden Age masike thaun suru zaun hea masikechi chhapnni pasun thoim suru zali. Hea ap-khuxen vavurpeanchea kamancher, Jehovan besanv ghatlem mhunn sarkem dison ailem.

Jehovachea visvaxi sevokam modem aslolo ekvott ani tanchem kam khub vaddlem. Punn kotthin vellar, mhunnchem 1917 tem 1919-a modem thoddea Bible Videartheamnim songotton soddlem. Tankam modot korunk kitem korunk zatalem?

Abril 1, 1920-achea The Watch Tower masikent, ho lekh ailo, “Ami Xantin Jieum-ia.” Tea lekhant mogan oxi urba dil’li: “Jehovachem utor pallunk sodhtat tim apnnem poilim keloleo chuki visron Devachea lokam sangata tachem kam korunk portun ektthaim zatolim mhunn amkam khatri asa.”

Hea doiall utrank zaiteamnim kan dilo. Eka kazari zoddpean oxem boroilem: “Gel’lea vorsak ani tachea poros chodd temp ami porgottnnent bhag gheunk na dekhun ami chuklim mhunn amkam kollon ailem. Fuddarak oxem kednanch korchimnant mhunn ami nichov kela.” Portun kam korunk fuddem sorloleank zaitem vavrunk aslem.

Jun 21, 1920-a thaun, “ZG” hem pustok vanttunk Bible Videarthi khub vavurle. Hem pustok, The Finished Mystery * hea pustokachi soft cover kopi asli. 1918-ant hea pustokacher bondhi ghatloli tednam zaiteo kopi urloleo.

 Hem pustok vanttchea kamant fokot pioneer-ankuch nhoi, punn porgottnnarank pasun ieukar dilolo. Eka chittint oxem boroun dhaddlolem, “Sobhent bautizm ghetlolea dor eklean ghoddtta zalear hem pustok vanttchea kamant ap-khuxen vantto gheunk zai. Dor eklean oxem mhunnonk zata: ‘Hem ek kam hanv kortolom’—ZG pustok vantt’ttolo.” Edmund Hooper tea tempa vixim ugddas korta ki tea vanttchea kamant bhag ghetlolean zaiteamnim poile pavtti ghor-ghoramnim porgottnni keli. To fuddem sangta, “Tednam thaun porgottnnechea kamant kitem mellon asa tem ami somzonk lagle. Hem kam ami chintukuch na titlem vanttchem aslem.”

Sonvsarachea poilea zhuza vellar, dusrea desant aslolea Bible Videartheam sangata sompork dovrunk kotthin zal’lem. Tor Bhav Rutherford, hea bhavank urba diunk ani porgottnnechem kam porot manddavoll korunk sodhtalo. Agost 12, 1920-ant, Bhav Rutherford ani char bhav England ani her desank bhett diunk eka lamb tturak gele.

Rutherford-an England-ak bhett dili tednam, Bible Videartheamnim tin odhivexonam ani sogleam lokam pasot 12 mittingenchi manddavoll keli. Hea soglea kariavollimnim, sogle mellon sumar 50,000 lok hajir zale. Tea ttura vixim The Watch Tower masikent oxem sanglolem: “Tea bhette udexim ixttank khub urba mell’lli. Tannim eka-meka sangata vell sarlo ani sangata mellon kam kelem. Taka lagon te khuxal zale.” Paris-ant, Bhav Rutherford hea vixoi-acher portun uloilo, “Aiz Jietat Te Lak’khamnim Lok Anik Kednanch Morchenant.” Tachem bhaxonn suru zalem tednanch ak’khem hol bhorlem ani tinxim lokamnim anik zannam zaunk umed dakhoili.

Fuddlea sumanamnim thodde bhav Athens, Cairo, ani Jerusalem hea zageank bhett diunk gele. Hea zageamnim itsa dakhoitoleank prokaxonnam mellonk Bhav Rutherford-an Jerusalem-achea lagim Ramallah, hea ganvant prokaxonanchem stock dovorlem. Uprant, to Europe-ak portolo ani thoim Central European Ofis suru kelem ani prokaxonam chhapunk manddavoll keli.

Setembr 1920-ant, Bible Videartheamnim The Golden Age hea masikecho No. 27 bhair kaddlo. Hem ek khas masik aslem. Karonn hantunt 1918-ant Bible Videartheank dilolea dhumallea vixim sanglolem. Hem masik chhapunk Battleship, hem printing press dis-rat chalu  aslem. Ani tea udexim hea masikecheo challis lakh kopi chhapleo.

Tem masik vachpeank, Emma Martin-achea kexi vixim kollon ailem. Bhoinn Martin San Bernardino, California-nt pioneer mhunn seva kortali. Mars 17, 1918-ant, ti ani teg bhav, E. Hamm, E. J. Sonnenburg, ani E. A. Stevens, Bible Videartheanchea eka lhan mittingek hajir zale.

Tea mitingent ek munis Bible xikonk ieunk naslo. Tea munxan uprant oxem manun ghetlem, “Tea mittingent vochonk mhaka sorkarachea khala aslolea korttachea mukhel offisan dhaddlo. Tea mittingent Sakxeam add puravo sodhunk hanv gel’lo.” Ani taka to “puravo” mell’llo. To puravo mhunnttlear, The Finished Mystery hea pustokachi ek kopi. Thoddea disa uprant, Bhoinn Martin ani teg bhavank dhorun vhele. Sorkaran bondhi ghatlolem ek pustok lokank vanttun kaido moddlo mhunn tannim tankam dhorlim.

Emma ani her bhav guneanvkari mhunn korttan tharailem ani tankam tin vorsanchi bondkhonn favo zali. Korttan aplo nirnnoi bodolcho mhunn tannim zaite pavtti magnni keli, punn oxem korpacheo sogleo sondheo 1920 May 17 hea tarker kabar zaleo dekhun tankam bondkhonnint ghatlim. Uprant poristhiti sudorli.

Jun 20, 1920-ant, Bhav Rutherford-an tanche onnbhov San Francisco-ntlea odhivexonant sangle. Hea Kristanvam vixim aikon hajir zalolea lokank ojap dislem ani tannim United States-achea raxttrpotik ek telegram dhaddlo. Tannim oxem boroilem: “Mrs. Martin-ak bondkhonnint ghalop ek on’neai . . . Sorkaran apli podvi uzar korun Mrs. Martin-ak fosovop . . . ani ticher kes ghalun bondkhonnint ghalop ek on’neai zaun asa.”

Dusreach disa, Raxttrpoti Woodrow Wilson-an, Bhoinn Martin ani Bhav Hamm, Sonnenburg, ani Stevens hancher asloli xikxa bodol’li. Tancher zal’lo on’neai kabar zalo.

1920-achea xevottak, Bible Videartheank khuxal zaunk zaitim karonnam aslim. Mukhel ofisant choltalem tem kam anik vaddot gelem. Munxachea trasam thaun suttka, Devachem Raj diunk xokta mhunn khorea Kristanvamnim poilim kednanch korunk na titli chodd porgottnni keli. (Mt. 24:14) Fuddlea vorsa 1921-ant, Rajea vixim porgottunk anik vhoddli sondhi mell’lli.