1. Bible Jehova vixim koslem ek sot sangta?

TUMCHEA katicho rong koslo, tumchem tondd koxem dista, vo tumi barik vo mottim asat tem polloun lokamnim tumchi nit keli zalear tumkam borem distolem kai? Ghoddie na. Tor Jehova fokot amchem bhailem rup polloun nit korina hem zannam zalolean amkam kitlem borem dista! Udharonnak, Samuel Jessichea putank mellonk gelo tednam tannem tankam Jehovachea nodren pollounk na. Jesse-chea puta modlo eklo Israelacho fuddaracho raza zatolo mhunn Jehovan Samuelak sanglolem. Punn to konn mhunn tannem sangonk na. Samuelan Jesse-chea vhoddlea putak, Eliab-ak polloilo tednam tannem mhunnttlem, ‘Dubhavavinn Sorvespora mukhar Tacho makhlolo asa.’ Eliab-achem bhailem rup polloun Jehova taka raza mhunn vinchun kaddttolo mhunn Samuelak dislem. “Punn Sorvesporan Samuelak mhollem: ‘Tachem rup pollenaka, nhoi mhunn tachi unchai, kiteak Hanvem taka nakarla.’” Ami kitem xiktat? Jehova fuddem mhunntta: “Monxam bhaxen Dev pollena; monis bhailem rup polleta, punn Sorvespor kalliz polleta.”—1 Sam. 16:1, 6, 7.

2. Juanv 7:24-ant sanglolea pormonnem, ami eka munxachem bhailem rup polloun kiteak nit korunk zaina? Somzaiat.

² Ami opurnn munxam zal’lean, dusreanchem bhailem rup polloun tanchi nit korchi sonvoim amkam sogleank asa. (Juanv 7:24 polloiat.) Punn ami eka munxak polloitat tednam tachea bhailea rupa thaun ami tachea vixim thoddench zannam zaunk pavtat. Udharonnak, ek huxar ani onnbhovi dotor pasun ek duent munxak polloun tachea vixim thoddench zannam zaunk pavta. Tea munxak poilem koslem duens aslem, atam aslolea duensa vixim taka koxem bhogta, ani taka kitem zata tem tea dotorak pollounk zai zalear tannem to duent munis uloitana kan diun aikonk zai. Tea munxachea kuddi bhitor pollounk to dotor X-ray kaddunk zai mhunn pasun sangonk xokta. To dotor hea  toren, bore bhaxen topasna zalear chukichem vokhod diunk puro. Teach toren, amchim bhav-bhoinnam bhailean koxim distat tem polloilear ami tankam purnn toren somzonk xokonant. Tim bhitorlean koxim asat mhunnche tim khoreanich koslim munxam tem ami zannam zauncho proitn korunk zai. Ami lokanchim kallzam topasunk xokonant dekhun ami Jehova bhaxen lokank kednanch somzonk xokchimnant tem khorem. Punn Jehovachi dekh gheun ami amchean zata titlem korunk zata. Tem koxem?

3. Hea lekhant dil’lea Bible-antlim udharonnam amkam Jehovachi dekh gheunk koxim modot kortat?

³ Jehova aplea bhokti kortolea lokam sangata koso vagta? To tankam kan diun aikota. Tanchi poristhiti ani te kiteak lagon eke toren vagtat tem to monant dovorta. Ani to tankam doia-maia dakhoita. Jonas, Elija, Agar, ani Lot-a sangata Jehova heach toren vaglo. Tanchea vixim atam ami bhasabhas kortana Jehovachi dekh gheun ami amchea bhav-bhoinnam sangata koxi vagonk zata tacher ami dhean dium-ia.

4. Jonas bhorvonso dovrunk zaina toslo vo ovisvaxi munis mhunn amkam kiteak disonk puro?

⁴ Jonasachea poristhiti vixim amkam sogleank khobor na dekhun, to ek bhorvonso dovrunk zaina toslo, vo ovisvaxi munis mhunn amkam disonk puro. Ninevek vochun zhoddttecho sondex diunk Jehovan Jonasak sanglolem. Punn Jehovachem aikonchea bodlek, Jonas eka tarvacher dusrea vatten ‘Deva thaun pollun’ gelo. (Jonas 1:1-3) Tumi Jehovachea zagear aslim zalear, Jonasak anik ek sondhi diupachim? Ghoddie na. Punn, taka anik ek sondhi diunk zai mhunn Jehovak dislem.—Jonas 3:1, 2.

5. Jonas 2:1, 2, 9-ant aslolea Jonasachea utrantlean tumi kitem xiktat?

⁵ Jonas khoreaninch koslo munis aslo tem amkam tannem kelolea magnnea udexim kollon ieta. (Jonas 2:1, 2, 9 vachat.) Tannem Jehovak zaitea pavtti magnnem kelem mhunn amkam kainch dubhav na. Punn tachea eka magnneam vorvim to fokot Devan dilolea kamam thaun pollun gel’lo munis nhoi mhunn dison ieta. To ek khalto, upkari, ani Jehovachi adnea pallunk sodhta toslo munis aslo mhunn tachea utrantlean kollon ieta. Tor Jonasan kel’lea chukicher Jehovan dhean diunk na. Tachea bodlek, tannem tachea magnneak zobab dilo, ani provadeachea kamant taka uzar korit ravlo!

6. Kan diun aikop kiteak gorjechem?

⁶ Dusreanchem ami aikotolim zalear, amkam khaltikai ani pasiens gorjechem. Oxem korunk unneant-unnem tin karonnam asat. Poilem, dusrim chukleant mhunn ami rokddinch  tharaunchim nant. Dusrem, amchea bhav-bhoinnank koxem bogta ani kitea pasot te umkech toren vagtat tem amkam kollttolem, ani ami tanchea sangata chodd doia-maia dakhounk pavtolim. Ani tisrem, ami tankam kan diun aikololean to bhav aplea vixinch kitem tori xikonk pavtolo. Thodde pavtt amkam koxem dista tem ami dusreank sangona zalear amchim bhavnam purnn toren amkam kollchim nant. (Mho. 20:5) Asia-ntlo ek vhoddil oso mhunntta: “Mhaka ugddas asa, ek pavtt hanvem aikonchea poilim ulounchi chuk kel’li. Hanvem eke bhoinnik mittingent ti dita te zobab anik bore toren diupak zai mhunn sanglem. Punn khorem mhunnttlear, tika vachunk ani ek zobab diunk khub kotthin zatalem mhunn mhaka uprant kollon ailem.” Tor eka vhoddilan sol’lo diunchea poilim kan diun aikop kitlem gorjechem!—Mho. 18:13.

7. Jehova Elija sangata koso vaglo tantuntlean tumi kitem xikonk zata?

⁷ Thoddea bhav-bhoinnanchea jivitant adim kitem ghoddlolem taka lagon, vo tanchea sobhavak lagon tankam koxem bhogta tem dusreank sangonk tim fattim sortat. Tor oslea bhav-bhoinnank koxem dista tem, amkam sangonk ami tankam koxi modot korunk xoktat? Elija, Jezebela thaun pollun gel’lo tednam Jehova tachea sangata koso vaglo tem ugddasak haddat. Apleak koxem bhogta tem aplea sorginchea Bapak purnn toren sangonk Elijan zaite dis ghetle. Punn Jehovan taka kan diun aikolem. Uprant, tannem Elijak urba dili ani ek mhotvachem kam pasun dilem. (1 Raz. 19:1-18) Amchea bhav-bhoinnank tankam khoreaninch koxem bhogta tem sangonk thoddo vell lagot, punn tim amchea lagim ulounk suru kortat tednanch tankam khoreaninch koxem bhogta tem amkam kollttolem. Tor ami Jehova bhaxen pasiens dakhoitat zalear, tim amcher bhorvonso dovrunk pavtolim ani aplea kallzant kitem bhogta tem tim amkam sangonk pavtolim. Ani uprant, tim toxem kortat tednam ami tankam kan diun aikonk zai.

8. Utpoti 16:7-13-ant dakhoilea pormonnem, Jehovan Agarak koxi modot keli?

⁸ Saraichi daxi, Agar, Abramachi bail zalea uprant pixeponnan vagli. Agar gorbhest zalea uprant ti bhurgem naslolea Saraiecho opman korpak lagli. Ani Sarai tika tras korunk lagli. Taka lagon Agar tichea thaun pollon geli. (Ut. 16:4-6) Ami opurnn zal’lean, Agar gorvixtt ani tika ti xist favo asli oxem ami chintunk puro. Punn Agara vixim Jehovak toxem disonk na. Tannem aplea eka dutak tichea lagim dhaddlo. Ti dutak mell’lli tednam, tannem tika ticho sobhav bodlunk modot keli ani ticher besanv ghatlem. Jehova apnnak polloita ani apli poristhiti to zannam mhunn Agarak kollon ailem. Taka lagon ti Jehovak ‘apnnak polleta to Dev’ oxem mhunnonk pavli.—Utpoti 16:7-13 vachat.

9. Devan Agarachi poristhiti koxi somzon ghetli?

⁹ Jehovan Agara vixim kitem polloilem? Agarachea jivitant kitem ghoddlolem ani tika kosle tras sosunk poddlole tem soglem Jehova zannam aslo. (Mho. 15:3) Agar Ejiptachi asli ani Hebrevanchea eka familint kam kortali. Apunn ek pordexi mhunn tika kednam-kednam bhogtalem kai? Tika aplea familicho ani aplea ganvcho ugddas ietalo kai? Ti Abramachi dusri bail asli. Thoddea tempak lagon visvaxi dadleank eka von chodd bailo astaleo. Punn ho Devacho ud’dhex naslo. (Mt. 19:4-6) Tor oslea eka ghorabeant nattkai ani dves astaloch mhunn ami sangonk zata. Saraik, Agaran kel’lea opman chukiche aslem mhunn Jehova zannam aslo, tori astana, Jehovan Agarachi bhavnam ani tachi poristhiti somzun ghetli. Ani to tichea sangata doiallaien vaglo.

10. Ami amchea bhav-bhoinnank anik bore toren koxim vollkhonk zata?

¹⁰ Jehovachi dekh gheun ami amchea  bhav-bhoinnank somzon gheuncho proitn korunk zai. Tor tumi tumchea bhav-bhoinnank anik bore toren vollkhon gheiat. Tanchea sangata mitting suru zaunchea poilim ani uprant uloiat, sangata mellon porgottnni korat, ani zata zalear jevnnak apoiat. Oxem kelolean, ek bhoinn chodd uloina oxem tumkam distalem punn ti khoreanich lojetali mhunn tumkam kollon ieunk puro. Ek bhav girestkaiecho axecho mhunn tumi somzotalim, punn to udar kallzacho mhunn tumkam kollon ieunk puro, vo eke familik mittingek ieunk sodanch vogot zata astolo, punn tim ghoddie virodhacho fuddo kortat astolim mhunn tumkam kollon ieunk xokta. (Job 6:29) Ami lokanchea “jivitant ghusunk” proitn korinant tem khorem. (1 Tim. 5:13) Punn, amchea bhav-bhoinnam vixim ani tanchea jivitantlea onnbhova vixim zannam zavop borem. Ani oxem kel’lean tankam anik bore toren somzonk amkam modot zatoli.

11. Vhoddilamnim visvaxi sevokank bore toren kiteak vollkhon gheunk zai?

¹¹ Khas korun vhoddilamnim, jea bhav-bhoinnanchi seva kortat tanchi bori vollokh korun gheunk zai. Sorkittache dekhrekh korpi bhav Arturachem udharonn polloum-ia. Ek bhoinn sodanch vogi astali. Tor, to ani anik ek vhoddil tika bhett diunk gele. Artur mhunntta: “Tichem kazar zalea uprant rokddoch ticho ghov bhair poddlo mhunn amkam kollon ailem. Tika kotthin zalem torui astana, tinnem aplea donui dhuvank Jehovacho mog korunk ani tachi seva korunk modot keli. Ani atam tichi dolleanchi dixtt khubuch unni zal’li, ani ti niraxiponnan buddloli. Torui astana, Jehova pasot ticho mog ani bhavarth ghott aslo. Khorem mhunnttlear, amkam tea bhoinnichea udharonnantlean zaitem xikonk mell’llem.” (Filp. 2:3) Jehova aplea visvaxi sevokank ani tim sonstat tem dukh bore toren vollkhota. To sorkittachi dekhrekh korpi bhav pasun Jehova bhaxen vaglo. (Sutt. 3:7) Devachea visvaxi sevokank borea toren vollkhotat te vhoddil tankam anik bore bhaxen modot korunk xoktat.

12. Yip Yee nanvachea bhoinnin aplea sobhentlea eka bhoinnichi bori vollokh korun ghetlolean tika koso faido zalo?

¹² Zo bhav vo bhoinn tuka rag haddtta tosleanchi tumi anik bore toren vollokh korun ghetlear, tumi ghoddiek tankam kitem bhogta tem tumchea kallzant bhogunk pavtolim. Ek udharonn polloum-ia. Asia-nt ravtoli Yip Yee nanvachi bhoinn oxi mhunntta: “Amchea sobhent sodanch vhoddlean uloita tosli ek bhoinn asa. Survatek tika boreo sonvoim-o nant oxem mhaka dislem. Punn uprant hanvem tichea sangata sevent kam kelem tednam, ti aplea avoi-bapai sangata bazarant nustem viktali mhunn kollon ailem. Tor nustem gheunk  lokank apounk tika vhoddlean bob marchi poddttali.” Yip Yee fuddem mhunntta, “hanv mhojea bhav-bhoinnank bore toren somzotolem zalear, tanchi bori vollokh korun gheunchi goroz asa mhunn hanv xiklem.” Amchea bhav-bhoinnank bore toren vollkhonk proitn korcho poddtta. Tori astana, amchem kalliz sarkem uktem korchem ho Bible-acho sol’lo pallttat tednam ami ‘soglea torechea munxancho’ mog korta tea Jehovachi dekh ghetat.—1 Tim. 2:3, 4; 2 Kor. 6:11-13.

13. Utpoti 19:15, 16-ant dakhoilea pormonnem, Lot fattim-fuddem sortalo tednam dutamnim kitem kelem, ani kiteak?

¹³ Eka gorjechea vellar, Lot-an Jehovachem Utor rokddench pallunk na. Don dut Lot-achea ghora gele, ani taka ani tachea familik Sodomantlean bhair soronk sanglem. Kiteak? Karonn, tannim sanglem: “Hea xaracho ami bhosm korun soddtanv.” (Ut. 19:12, 13) Dusrea disa sokallim, Lot ani tachi famil azun ghora thaun bhair soronk nasli. Tor dutamnim tankam bhair sorat mhunn portun sanglem. Punn, Lot “pattim-fuddem sortalo.” Jehovan sanglam tem Lot korunk sodhinaslo vo to tachea Utrak kan diunk sodhinaslo, oxem ami chintunk xoktat. Punn Jehovan taka soddun diunk na. Jehovak “tache churchure vo doia” disli dekhun dutamnim tanchea hatak dhorun tachea familik xara bhair vheli.—Utpoti 19:15, 16 vachat.

14. Jehovan Lot-ak doia-maia kiteak dakhoili?

¹⁴ Jehovan Lot-ak doia-maia dakhounk zaitim karonnam aslim astolim. Lot-ak xara bhailea lokanchi bhirant asli astoli. Taka lagon, to rokddoch aplea ghorantlean bhair soronk toiar zaunk na. Taka dusri bhirant pasun asli. Don raza Sodomachea lagim aslolea vhallent dhambrachea fonddant poddle, hea vixim ghoddie Lot zannam aslo. (Ut. 14:8-12) Ek ghov ani bapui zal’lean, Lot-ak aplea famili vixim chint’ta asli. Tea bhair, Lot girest aslo. Tor Sodomant taka svotachem ek borem ghor aslem astolem. (Ut. 13:5, 6) Kitem-i zaum, Lot-an rokddench Jehovachem aikonk zai aslem. Punn, Jehovan Lot-achea chukincher dhean diunk na. Bodlek, Jehovan taka “sugunni vo nitivont monis” mhunn lekhlo.—2 Ped. 2:7, 8.

15. Dusreanchi vagnnuk polloun tanchi nit korchea bodlek, ami kitem korunk zai?

 ¹⁵ Dusreanchi vagnnuk polloun, tanchi nit korchea bodlek tim toxim kiteak vaglim tem somzuncho proitn korat. Europe-antlea Veronica nanvachea eke bhoinnin toxench korcho proitn kelo. Ti mhunntta, “ek bhoinn sodanch bejarloli astali. Ti konnakuch lagim soronasli. Thodde pavtt hanv tichea lagim ulounk bhietalem. Punn magir hanvem chintlem, ‘hanv tichea zagear asli zalear mhaka ek ixttinnichi goroz asta asli.’ Tor hanvem tika vochon, ‘tuka koxem dista’ mhunn vicharlem. Tednam apleak koxem dista tem ti sangonk lagli! Atam tika hanv anik bore toren somzonk xoktam.”

16. Dusreank somzonk modot kor mhunn ami Jehova lagim kiteak magonk zai?

¹⁶ Fokot Jehova amkam purnn toren somzonk xokta. (Mho. 15:11) Tor to dusreank jea nodren polloita tea nodren ami dusreank pollounk ani tankam doia-maia koxi dakhounchi hem somzonk tachea lagim modot magat. Dusreank koxem bhogta tem aplea kallzant bhogonk, bhoinn Anzhela-k magnneam vorvim modot zali. Tichea sobhentlea eka bhoinni sangata tichem borem vochonaslem. “Tea bhoinni vixim vaitt uloun tichea thaun pois ravop sompem aslem,” mhunn Anzhela manun gheta. Punn, “tea bhoinnik somzonk mhaka modot kor mhunn hanvem Jehova lagim magnnem kelem,” mhunn tim sangta. Jehovan Anzhela-chem magnnem aikolem kai? Ti fuddem mhunntta: “Ami sangata sevek gelim ani uprant zaitim voram uloilim. Hanvem tichem bore bhaxen aikolem ani atam hanv ticho khub mog kortam, ani tika hanv modot kortolench mhunn tharailam.”

17. Ami kitem korcho nichov korunk zai?

¹⁷ Ami soglea bhav-bhoinnank konvallai dakhounchi goroz asa. Tim soglim Jonas, Elija, Agar, ani Lot-a bhaxen tras sostat. Ani choddxe pavtti bhav-bhoinnam apleacheach chukik lagon trasant poddleant. Khorem mhunnttlear, ek-na-ek vellar ami sogleamnim chuk kelea ani trasant poddlea. Tor dusreanchem sukh-dukh amchem korun gheiat mhunn Jehova amkam sangta tem sarkem asa. (1 Ped. 3:8) Veg-vegllea toreche lok aslolea eka khas familiche ami bhag zaun asat. Ani Jehovachi adnea pallun ami dusreanchem sukh-dukh amchem kortat tednam sonvsarbhor aslolea hea familicho ekvott ami ghott kortat. Tor ami bhav-bhoinnanchem aikon gheum-ia, tankam zannam zaun gheum-ia, ani tankam doia-maia dakhoum-ia.