1. Ami sogleamnim kitem korunk zai?

TUMI duent asat vo thoklolim asat zalear, ek kotthin aslolea dhanvddent tumi dhanvonk khuxi pavtolim kai? Ghoddie na. Punn khore Kristanv eka dhanvddent asat mhunn apostl Paulun sanglolem. (Heb. 12:1) Ani ami soglim tornnattim vo zanttim asum, ghott vo oskot asum, Jehova amkam dita to inam amkam zai zalear ami xevott poriant sosnikaien dhanvot ravonk zai.—Mt. 24:13.

2. 2 Timotak 4:7, 8-ant sanglolea pormonnem, Paulu dhanvdde vixim kiteak ulounk xoktalo?

² Paulu hea dhanvdde vixim ulounk xoktalo karonn tannem xevott poriant dhanvchi asli ti vatt ‘dhanvon kaddloli.’ (2 Timotak 4:7, 8, vachat.) Punn Paulu hanga khas korun koslea eka dhanvdde vixim uloitalo?

3. Paulu khoinchea eka dhanvdde vixim uloitalo?

³ Adlea tempar Gresant choltale te khellantle vixoi uzar korun thodde pavtti Paulu mhotvachim lisanvam xikoitalo. (1 Kor. 9:25-27; 2 Tim. 2:5) Ani zaite pavtti tannem eka Kristanvanchem jivit eka dhanvddek sor kelem. (1 Kor. 9:24; Gal. 2:2; Filp. 2:16) Ek munis Jehovak aplem jivit somorponn korun bautizm gheta tednam, to hea ‘dhanvddent’ bhag gheunk suru korta. (1 Ped. 3:21) Ani Jehova taka sasnachea jivitacho inam dita tednam tachi hi dhanvodd sompta.—Mt. 25:31-34, 46; 2 Tim. 4:8.

4. Hea lekhank ami kitem bhasabhas kortolim?

⁴ Ek lamb dhanvodd dhanvop ani Kristi jivit jievop hanchea modem kitem ek-sarkem asa? Hanchea modem zaitem ek-sarkem asa. Tantuntlea tin vixoi-ancher ami dhean dium-ia. Poilem, ami sarke vatten dhanvonk zai. Dusrem, ti dhanvodd kabar korunk amchem dhean asonk zai. Ani tisrem, dhanvtana ieta tea oddchonneancho ami fuddo korunk zai.

5. Khoinchi vatt ami vinchunk zai, ani kiteak?

⁵ Eka dhanvddent inam mellonk zai zalear manddavoll keloleamnim sanglolea vattenuch dhanvpean dhanvlear taka inam mellttolo. Toxench, amkam sasnachea jivitacho inam mellonk zai zalear ami Jezun dakhoilolea vatten cholonk zai. (Itihas 20:24; 1 Ped. 2:21) Punn Soitan ani tachea vatten choltat tankam, ami Kristache vatten chol’lole naka. Tachea bodlek ‘apnna barabor dhanvlole’ tankam zai. (1 Ped. 4:4) Te amchea jivitachi vatt polloun amchi fokannam kortat ani tanchea jivitachi vatt amchea poros bori ani tantunt svotontrtai asa mhunn sangtat. Punn te sangtat ti fott.—2 Ped. 2:19.

6. Brian-achea udharonnantlean tumi kitem xiktat?

⁶ Soitanachea sonvsaracho probhav poddtta tosle vatten choltat tankam, apnnem vinchun kaddloli vatt apnnank svotontrtai nhoi punn gulamponn dita mhunn beginunch kollon ietolem. (Rom. 6:16) Brian-achem udharonn polloum-ia. Tachea avoi-bapain taka Jezun dakhoilolea jivitachea vatten cholonk modot kel’li. Punn jednam to tornnatto zalo, tednam te vatten chol’lear khorench apleak khuxalkai mellttoli kai mhunn to dubhavunk laglo. Tor, Brian-an Soitanachea dorjeam pormonnem dhanvtat tanchea sangata dhanvonk nirnnoi ghetlo. To sangta: “Hanv anvddetalom ti svotontrtaiek lagon ek dis hea vaitt sonvoim-ant poddttolo mhunn hanvem kednanch chintunk na. Vell sorlo toso hanv gungim vokhdam gheunk laglom, soro pieunk laglom, ani onoitik jivit jieunk laglom. Fuddlea zaitea vorsamnim hanv chodd noxa dita toslim gungim vokhdam gheunk laglom. Ani tancho gulam zalom. Uprant mhojem oslem jivit sarunk hanv gungim vokhdam vikunk laglom.” Xevottak, Brian-an Jehovachea dorjeam pormonnem jieuncho nirnnoi ghetlo. Tannem apli vatt boddol’li ani 2001-ant bautizm ghetlo. To khorench atam khuxal asa, karonn atam to Kristan dakhoilolea vatten cholta. *

7. Matev 7:13, 14 pormonnem, khoinche don roste amchea mukhar dovorleat?

⁷ Sarki vatt vinchun kaddop kitlem gorjechem! ‘Jivitak pavoita’ tea oxir rosteacher dhanvop bond korun ami sogleamnim sonvsarantle choddxe lok dhanvtat tea rund rostear dhanvonk zai mhunn Soitan axeta. To rosto famad ani vochonk sompo. Punn to ‘ghorttonak pavoita.’ (Matev 7:13, 14 vachat.) Sarkea rostear ravonk ani amkam konnem-i fottoina zaunk, ami Jehovacher patieunk zai ani tachem aikonk zai.

8. Ek dhanvpi adllun poddtta tednam to kitem korta?

⁸ Eka lamb dhanvddent addkollna zaunk dhanvpi aplem dhean rosteacher dovortat. Tori  astana, te vangdda dhanvpeak adllun vo tanche pai fonddant poddon te poddonk xoktat. Punn te poddlear pasun porot ube ravon dhanvonk lagtat. Te aplem dhean mukhel zaun jea vostuk lagon te poddle tacher dovrinant, punn ti dhanvodd dhanvon sompounk zai ani inam mellonk zai tacher te dovortat.

9. Ami adllun poddttat zalear ami kitem korunk zai?

⁹ Ami amchea utramnim ani korneamnim chuki korunk xoktat dekhun amchea Kristi dhanvddent ami zaitea pavtti adllun poddonk xoktat vo amchea sangata dhanvpeachea chukik lagon amkam dukh zaunk xokta. Punn hea vixim ami ojap zainant, karonn ami soglim opurnn ani jivitak pavoita tea oxir rostear dhanvot asat. Taka lagon, thodde pavtti ami amche bhav-bhoinnank dukhoitat ani oxe toren ami tankam adollttat. Ami thodde pavtti ‘dusreancher garannem korunk’ xoktat mhunn Paulun sanglem. (Kol. 3:13) Kiteak lagon ami adoll’lleant, tacher dhean diunchea poros fuddarachea inamacher dhean dium-ia. Ami adllun poddlear pasun porot ubim ravon dhanvot ravum-ia. Punn ami rag dhorun bostat zalear vo porot ubim ravon Jehovachi seva korunk nakartat zalear ami amchi dhanvodd sompounchi nant ani amkam inam mellcho na. Tea bhair, oxem kelolean jivitak pavoita tea oxir rostear dhanvonk proitn kortoleank ami ek addkoll zaunk xoktat.

10. Dusreank addkoll zaina zaunk ami kitem korchimnant?

¹⁰ Amchea bhav-bhoinnank “addkoll” zaina zaunk anik ek vatt mhunnttlear ami sodanch amkam zai toxench korchea bodlek, zata tednam tankam zai toxem korunk soddun divop. (Rom. 14:13, 19-21; 1 Kor. 8:9, 13) Haka lagon amchi dhanvodd veglli asa. Karonn eka dhanvdden dhanvpi dusreank fattim ghalun apunnuch poilo inam jikonk sodhta. Te dhanvpi apunn dhanvddent jikonk apleak kitem modot zatli teach vixim te chodd chint’tat. Taka lagon te dusreank dhuklun, apunn fuddem vochonk sodhtat. Punn ami dhanvtat tea dhanvddent ami dusreank fattim ghalun ami fuddem vochonk sodhinant. (Gal. 5:26; 6:4) Amcho dhei mhunnttlear, zata titleank amchea sangata dhanvodd dhanvon sompounk ani jivitacho inam mellon gheunk modot korop. Oxem korun, Paulun Devachea preronnan dil’lo sol’lo ami apnnaunk proitn kortat. Zoim to mhunntta, “ap-aplea faideachem kitem tem polloum nakat, punn dusreank kitem faideak poddttolem tem polloiat.”—Filp. 2:4.

11. Ek dhanvpi kiteacher dhean dovorta, ani kiteak?

 ¹¹ Ek dhanvpi fokot aplea fuddlean aslolea rosteacher dhean dina, punn dhanvodd dhanvon sompoupacher dhean dita. Tea dhanvpeak, dhanvodd khoim sompta to zago ghoddie disona. Punn, to aplem mon dhanvodd sompounk ani inam zoddun gheupacher dovorta. Inam monant dovorlolean taka dhanvodd dhanvon sompounk urba melltta.

12. Jehovan amkam kitem bhorvonso dila?

¹² Ami dhanvtat tea dhanvddent, ami dhanvodd dhanvon sopoili zalear, Jehova Devan amkam doia dakhoun sorgar vo sobit bag zatolea prithumer sasnachem jivit ditoloch mhunn khatri dilea. Fuddarak amchem jivit koxem astolem hea vixim chitunk Bible tea inama vixim vornnon korta. Hea bhorvonxea vixim ami amchea monant ani kallzant chitint ravtat tednam herank ami amkam addkoll zaunk diunchim nant.

13. Eka dhanvpeak mellona tosli khoinchi ek modot amkam melltta?

¹³ Gresant zatale tea khellant dhanvpeank zaitea odchonneancho fuddo korcho poddttalo. Zoxe te thoktale ani tanchem ang dukhtalem. Te fokot apleak mell’llolea proxikxonnan ani tanchea svotachea xoktichea adaranuch tea oddchonneancho fuddo korunk xoktale. Ami-i tea dhanvpeam sarkinch asat, karonn ami dhanvtat tea dhanvddent koxem dhanvchem tea vixim amkam-i proxikxonn melltta. Punn dhanvddent dhanvtat tea dhanvpeam poros amkam anik modot asa. Ti mhunnttlear, amkam Jehova thaun kednanch sompona tosli xokti melltta. Ami Jehovacher patieun ravlear to amkam fokot proxikxonnuch nhoi, punn xokti pasun ditolo mhunn bhasaita.—1 Ped. 5:10.

14. 2 Korintkarank 12:9, 10-ant sanglolim utram amkam oddchonneancho fuddo korunk koxim modot kortat?

¹⁴ Pauluk zaitea oddchonneancho fuddo korcho poddlo. Tacho heramnim opman kelo ani taka dhumallo soscho poddlo, tea bhair taka kednam-kednam apunn oskot asa oxem distalem ani tachea ‘angant romblolea eka kanttea’ sarkea oddchonnecho taka fuddo korcho poddttalo. (2 Kor. 12:7) Hea oddchonneank lagon tannem Jehovachi seva korchi soddun diunk na, punn Jehovacher patieun ravonk teo sondheo koxeo tannem polloileo. (2 Korintkarank 12:9, 10 vachat.) Paulun oxem chintop dovorlolean, Jehovan taka tachea soglea oddchonneancho fuddo korunk modot keli.

15. Ami Pauluchi dekh ghetat zalear, amkam kitem onnbhovunk mellttolem?

¹⁵ Amkam pasun amchea bhavartha pasot opman vo dhumallo sosunk poddot. Toxench, amchi bolaiki bori nasunk puro vo ami thokonk puro. Punn ami Pauluchi dekh ghetat zalear, heo dor ek oddchonneo ietat tednam, Jehovacho tenko onnbhovunk heo amkam asloleo sondheo mhunn ami lekhtolim.

16. Tumchi bolaiki bori na zalear pasun, tumi kitem korunk zata?

¹⁶ Duensak lagon tumi bosonk vo cholonk xokonant kai? Tumcheo dimbio oskot zaleat kai vo tumchi dixtt unni zalea kai? Hea poristhitint, tumi tornnattim ani bolaiki bori asloleam sangata dhanvonk xoktat kai? Hoi! Aiz zaitim zanttim ani oskot, jivitachea rostear dhanvot asat. Hem tim apleach bollan nhoi, punn Jehovachea xokten korunk pavtat. Tim Kristi mitting fonacher aikotat vo viddeo streaming-antlean mitting polloitat. Toxench, tim dotorank, nursink, ani soireank porgott korun xis korpachea kamant bhag ghetat. Oxem kelolean tankam Jehovachi xokti onnbhovunk melltta.

17. Kuddint oskot asat tanchea vixim Jehovak koxem bhogta?

¹⁷ Kuddint oskot aslolean Jehova pasot tumi korunk sodhtat tem tumi korunk xokonant tednam niraxi zainakat. Ani xevott poriant jivitachea dhanvddent, tumi dhanvonk xokchimnant mhunn chintinakat. Tumi tacher  bhavarth dovortat ani sosnikaien jivitachea dhanvddent dhanvot asat dekhun to tumcho mog korta. Tumkam poilim poros atam tachea modotichi chodd goroz asa, ani to tumkam kednanch sanddcho na. (St. 9:10) Tachea bodlek, To tumchea anik lagim sortolo. Duensak sampoddloli ek bhoinn oxem mhunntta: “Mhojim duensam vaddttat toxim, dusreank sot porgottchi sondhi unni zait voita. Punn hanv kortam ti thoddi seva pasun Jehova polloitana tachea kallzak khuxalkai haddtta tem ugddasak dovorlolean mhaka khuxalkai melltta.” Tumi nirax zatat tednam, tumi eksurim asat mhunn chintinakat. Pauluchea udharonnam vixim chintat, ani tannem sanglolim urbebhorit utram ugddasak haddat: “Hanv osokt mhonn, mhaka . . . porvach na . . . kiteak jitlo hanv osokt titlo hanv Kristache xoktin soktivont.”—2 Kor. 12:10.

18. Thoddeank koslea eka ekdom kotthin oddchonnecho fuddo korcho poddtta?

¹⁸ Jivitachea rostear dhanvtolea thoddeank anik eke oddchonnecho fuddo korcho poddtta. Tim oslea trasancho fuddo kortat jea trasam vixim dusreank ghoddie disona vo somzona. Udharonnak, thoddim niraxiponnant sarkim buddleant, vo chodduch usketat astolim. Jehovachea mogall sevokank hea oddchonnecho fuddo korunk itlem kotthin kiteak zata? Karonn, jednam ekleacho hat moddla, vo taka cholonk zaina tednam dusreank tem dixtti poddtta ani tim taka modot korunk fuddem sortat. Punn jim konn bhavnatmik vo mansik toren duent asat, tim sostat te tras dusreank bhailean dischem na. Tanchem tras hat vo pai moddlolea vo cholonk zaina toslea eka bhav-bhoinnichea trasa sarkech asat. Punn tankam ghoddie heram thaun goroz titlo mog ani kallji mellona.

19. Meribbaalachea udharonnantlean ami kitem xiktat?

¹⁹ Tumi oslea eka duensacho fuddo kortat zalear ani tumkam dusrim somzon ghenant oxem dista zalear, tumi Mephibosheth vo Meribbaalachea udharonnantlean urba melloun gheunk xoktat. (2 Sam. 4:4) To opong aslolean, taka trasancho fuddo korcho poddttalo, ani David Raza taka somzonk chuklo. Meribbaalan hem tras apleacher voddun haddunk naslole. Tori astana, to ragar zaunchea bodlek, aplea jivitant ghoddlolea borea vostuncher tannem dhean dilem. David adim tachea lagim doien vaglolo ani taka lagon to tacho upkari aslo. (2 Sam. 9:6-10) Tor jednam David taka somzonk chuklo, tednam oxem kiteak ghoddlem astolem hem Meribbaalan somzuncho proitn kelo. Davidan kel’le chukik lagon to tacher ragar zaunk na, ani Davidan jem kitem kel’lem taka lagon tannem Jehovacher arop ghatlo na. Jehovan vichun kaddlolea razak tenko diunk, Meribbaalan apleaxim zata tem kelem. (2 Sam. 16:1-4; 19:24-30) Ami Meribbaalachea borea udharonnantlean  xikonk zai dekhun Jehovan tachem udharonn Bible-ant boroun dovorlam.—Rom. 15:4.

20. Thoddeank chodduch uske zatat dekhun tancher koslo probhav poddtta, punn tannim kitem khatri dovrunk zata?

²⁰ Thoddea bhav-bhoinnank chodduch uske zatat dekhun tim chodduch ghabhortat ani her lokam modem astat tednam soglim zannam apnnacheruch dhean ditat oxem tankam bhogta. Tankam vhoddlea zomea modem mellon ieunk kotthin zaunk puro. Tori astana, tim sobhechea mittingek, zomatik, ani odhivexonak hajir zatat. Tankam onvollkhi lokam lagim ulounk pasun kotthin zaunk puro. Tori astana, tim porgottnnent dusream lagim uloitat. Tumkam-i oxem bhogta zalear, ugddas dovrat, tumi eksurim nant. Zaitea zannank tumchea sarkench bhogta. Tumi purnn kallzan kortat te proitn polloun Jehova khuxal zata mhunn ugddas dovrat. Tumi proitn korche soddun diunk nant dekhun, Jehova tumcher besanv ghalit asa ani to tumkam goroz ti xokti di-it asa mhunn kollon ieta. * (Filp. 4:6, 7; 1 Ped. 5:7) Tumchi bolaiki bori na zalear pasun, vo tumkam bhavnatmik toren ek duens sosunk poddlear pasun, tumi Jehovachi seva korit asa hem polloun to khuxal zata mhunn tumi khatri dovrunk zata.

21. Jehovachea modotin ami soglim kitem korunk pavtolim?

²¹ Paulu jea dhanvdde vixim uloilo, ti her dhanvdde sarki na mhunn borem zalem. Karonn, Bible kalla voilea dhanvddent, fokot ekleakuch inam mellttalo. Punn Kristi jivitachea dhanvddent sosnikaien xevott poriant dhanvtat tea sogleank sasnachea jivitacho inam mellttolo. (Juanv 3:16) Dhanvddent eka dhanvpeak bori bolaiki asonk zai asli; na zalear te dhanvpi jikonk xokonasle. Punn amchea dhanvddent, zaiteank bori bolaiki na, tori punn ami sosnikaien dhanvot asat. (2 Kor. 4:16) Jehovachea modotin, ami soglim dhanvodd dhanvon sompoitolim!