1. Jehova aplea lokancher dhean dita tednam to kitem polloita?

JEHOVA ‘aplea lokancho mog korta.’ (St. 149:4) Hem zannam zaun amkam kitlem borem dista nhoi! To amche bore gunn polloita, ami koslim munxam zaunk xoktat tem to chinta, ani amkam aple ixtt zaunk modot korta. Tea bhair, ami taka visvaxi ravlear, to sodanch amcho ixtt zaun astolo!​—Juanv 6:44.

2. Jehova aplo mog korina mhunn thoddeank kiteak disonk puro?

² Punn thoddim ghoddie chintit, ‘Jehova aplea lokancho mog korta mhunn hanv zannam, punn to mhozo mog korta kai?’ Oslem chintop thoddeanchea monant kiteak ieunk xokta? Oksanak * aplea bhurgeaponnar khub vaitt soschem poddlem. Tem mhunntta: “Hanvem bautizm gheun pioneering suru kelem tednam hanv khub khuxal aslem. Punn 15 vorsam uprant, mhojea bhurgeaponnacheo vaitt iadim mhojea monant ieunk lagleo. Ani Jehova mhaka polloun khuxal na, ani tacho mog mellonk hanv favo na mhunn mhaka disonk laglem.” Yua nanvachea eka pioneer bhoinnik pasun aplea bhurgeaponnar khub vaitt poristhitincho fuddo korcho poddlo. Tem mhunntta: “Hanv Jehovak khuxal korunk sodhtalem dekhun, hanvem mhojem jivit taka somorponn kelem. Punn to mhozo mog kednanch korcho na mhunn mhaka dislem.”

3. Hea lekhant ami kitem xiktolim?

³ Hea Kristanvam sarkim tumi pasun Jehovacho mog kortat. Punn to tumcho mog korta kai, mhunn tumi ghoddie dubhavunk xoktat. Tor Jehovak tumchi kallji asa mhunn tumkam kiteak khatri asonk zai? Ani Jehova tumcho mog  korina mhunn tumkam dista zalear, hem chukichem chintop kaddunk tumkam koxi modot zaunk xokta? Ami hea prosnanche zobab polloum-ia.

4. Jehova amcho mog korina oxem chintop kiteak dhokeachem zaun asa?

⁴ Jehova amcho mog korta mhunn amkam khatri aslear, kotthin poristhitint pasun ami tachi seva zata titlea bore toren kortolim. Punn Jehova amcho mog korina mhunn ami chintat zalear, amchem “boll vo xokti unni zatoli.” (Mho. 24:10) Ani ami nirax zaun Soitanacho virodh korunk pavchimnant.​—Ef. 6:16.

5. Jehova aplo mog korina mhunn chintalim tea bhav-bhoinnank kitem ghoddlem?

⁵ Jehova aplo mog korina mhunn thoddea bhav-bhoinnamnim chintlam dekhun tancho bhavarth unno zala. James nanvacho ek vhoddil mhunntta: “Hanv Bethel-ant seva kortalom ani dusri bhas uloita tea eka sobhe sangata porgottnni korun khuxal aslo. Punn hanv korta ti seva Jehovak avoddtta kai ani Jehova mhoji magnnim aikota kai mhunn hanv dubhavunk laglom.” Purnn vellachi seva korpi bhoinn Eva mhunntta: “Jehova aplo mog korina mhunn chintop dhokeachem. Karonn Jehova pasot tum jem kitem korta tacher tacho porinnam poddtta ani Jehovachea sevent tum tuji khuxalkai hogddaita.” Ek vhoddil ani niemit pioneer mhunn seva korpi Michael oso mhunntta: “Jehova tumchi kallji gheina mhunn tumi chintat zalear, tumi tachea thaun pois sortolim.”

6. Jehova amcho mog korta kai mhunn dubhavtat zalear ami kitem korunk zai?

⁶ Tor Jehova amcho mog korina mhunn ami chintat zalear, amcho bhavarth halonk xokta mhunn hea udharonnantlean amkam kollon ieta. Tor tea vellar ami kitem korunk zai? ‘Oslim chintnam’ rokddinch mona thaun kaddunk ani ‘tumchim kallzam ani monam rakhta toslea Devachi xanti diunk’ Jehova lagim magat. (St. 139:23; Filp. 4:6, 7) Tea bhair, oslim chintnam tumkanch nhoi, punn zaitea visvaxi bhav-bhoinnank pasun ietat mhunn ugddas dovrat. Hoi, Devachea thoddea adlea sevokank pasun oslim bhavnam ailim, ani tannim tancho fuddo kelo. Toslo ek sevok, apostl Paulu aslo. Tor tachea thaun ami kitem xikonk zata tem polloum-ia.

7. Pauluk koslea oddchonneancho fuddo korcho poddlo?

⁷ Tumkam zaiteo zobabdareo asat dekhun, teo samballunk tumkam kotthin zata kai? Toxem zalear, Paulu vixim chintat. Taka fokot ekach sobhechi nhoi, punn ‘soglea sobhanchi’ kallji asli. (2 Kor. 11:23-28) Tumchea duvensak lagon tumchi khuxalkai unni zalea kai? ‘Aplea angant ek kantto romblolo asa’ mhunn Paulun sanglem. Hem ghoddie tachem ek duens asonk puro, zachea thaun to boro zaunk sodhtalo. (2 Kor. 12:7-10) Tumchea unnemponnank lagon tumi nirax zaleant kai? Pauluk pasun thodde pavtti toxench dislem. Sarkem tem korunk apnnank zhuzot ravchem poddlem mhunn to apnnank “nirbhagi monis” mhunntta.​—Rom. 7:21-24.

8. Pauluk aplea oddchonneancho fuddo korunk koxi modot zali?

⁸ Pauluk zaiteo oddchonneo aslear pasun, Jehovachi seva korunk taka koxi modot zali? Taka zaitim unneponnam aslim tem khorem, punn taka Jezuchea soddvonnecher ghott bhavarth aslo. ‘Tacher [Jezucher] bhavarth tthevta tea dor-eka munxak sasnik jivit mellttolem’ mhunn to zannam aslo. (Juanv 3:16; Rom. 6:23) Tor eka munxan gombhir patok kelem zalear pasun, to Jezuchea soddvonnecher bhavarth dovorta zalear, Jehova taka bhogxitolo mhunn Pauluk khatri asli.​—St. 86:5.

9. Galasiekarank 2:20-ant Paulun sanglolea utrantlean ami kitem xiktat?

⁹ Devan tachea Putak aplea pasot moronk dilo mhunn Paulun ugddas dovorlo. Taka lagon to Devachea mogacher dubhavunk na. Galasiekarank 2:20-achea (vachat) xevottak Paulun oxem mhunnttlem: “Devachea Putan mhozo mog kela, ani mhoje khatir apnnankuch somorponn kela.” Punn Paulun oxem chintunk na: ‘Jehova mhojea bhavancho mog korta mhunn hanv zannam. Punn to mhozo mog kortolo mhunn mhaka disona.’ Karonn tannem Romkarank oxem boroilem: “Ami ozun patki asleanv tednam, Krist amche pasot melo.” (Rom. 5:8) Tor amcho mog korunk Jehovak kainch addaunk xokona!

10. Romkarank 8:38, 39-a thaun ami kitem xiktat?

¹⁰ Romkarank 8:38, 39 vachat. Jehova aplo khub mog korta mhunn Pauluk purnn khatri asli. Tor, ‘Devachea moga koddsun amkam kitench toddun kaddunk zaunchem na’ mhunn Paulun boroilem. Jehova Israel lokam sangata ani aplea sangata koso doien vaglo, tem to zannam aslo. Tor Paulu oxem  mhunnonk sodhtalo, ‘Mhojea pasot aplea Putak moronk dilo zalear, Jehova mhozo mog korta kai mhunn hanvem kiteak dubhavunk zai?’​—Rom. 8:32.

11. 1 Timotak 1:12-15-ant sanglolim patkam Paulun kel’lim zalear pasun, Dev aplo mog korta kai mhunn to kiteak dubhavunk na?

¹¹ 1 Timotak 1:12-15 vachat. Kristanv zaunchea poilim tannem kel’lea patkam vixim chintun Pauluk khub vaitt dislem astolem. Taka lagon tannem aplea vixim oxem mhunnttlem: “Patkiantlo poilo patki hanv.” Paulun sot zannam zaunchea poilim eka xara thaun dusrea xarant vochon thoddea Kristanvank bondkhonnint ghatlim, ani herank jivexim marunk apli maniotai dil’li. (Itihas 26:10, 11) Chintat, Paulu oslea eka sobhek voita, zoim to eka tornnattea Kristanvak melltta, zachea avoi-bapaik jivexim marunk tannem adim maniotai dil’li. Tea vellar taka kitlem vaitt dislem astolem nhoi? Punn tannem adim kel’lem tem atam bodlunk zaina mhunn to zannam aslo. Tor Jezu aplea pasot melo mhunn ugddas dovrun to khatren oxem mhunnonk pavlo: “Devachea funkeachea dennean, hanv khoro dhormdut.” (1 Kor. 15:3, 10) Tor tumi Paulu thaun kitem xiktat? Jezu tumchea pasot melo, ani tachea udexim Jehova sangata ek ghott ixttagot zoddunk tannem vatt ukti kelea mhunn ugddas dovrat. (Itihas 3:19) Tor tumi adim, mhunnche Jehovache Sakxi zaunchea poilim vo uprant kel’lea patkancher nhoi, punn tumi atam ani fuddarak kitem kortolim tacher Jehova dhean dita.​—Iz. 1:18.

12. Ami valorachi nant ani Dev amcho mog korina, oxem amkam dista zalear 1 Juanv 3:19, 20 amkam koso modot korta?

¹² Punn Jezu tumchea pasot melo tea vixim tumi chintat tednam, ‘tem dennem mhaka favo na’ oxem tumkam ghoddie disot. Kiteak? Karonn ami opurnn zal’lean ami valorachim  nant ani Dev amcho mog korina toslem chintop amkam ieunk xokta. (1 Juanv 3:19, 20.) Tor toslea vellar “amchea ontoskornna poros Devachem kalliz odik doiall-movall” mhunn ami ugddas dovrunk zai. Hacho orth, amkam koxem-i disom, Jehova amcho mog korta ani to amkam bhogxitolo mhunn ami khatri dovrunk zata. Punn Jehovachea mogacher amchi khatri vaddounk ami sodanch tachea Utracho obheas korunk zai, zaite pavtti magnnem korunk zai, ani chukoinastana tachi seva kortolea lokam sangata mellon ieunk zai. Hem kiteak gorjechem tem polloum-ia.

13. Devachea Utracho obheas kelolean tumkam koso faido zaunk xokta? (“ Devachea Utra Thaun Tankam Koxi Modot Zalea” hem boks pasun polloiat.)

¹³ Dor disa Devachea Utracho obheas korat. Oxem kelolean, Jehovachea gunnam vixim, ani to tumcho kitlo mog korta tem tumi zannam zaunk pavtolim. Tor dor disa Devachea Utracher niall kelolean tumchem chintop ‘nittaier haddunk vo sarkem toren chintunk’ tumkam modot zatoli. (2 Tim. 3:16) Kevin nanvachea eka vhoddilak apunn purto na oxem distalem. Punn to mhunntta: “Stotr 103 vachun tacher niall kelolean, Jehovak mhojea vixim koxem dista, tem mhaka kollon ailem.” Eva, zachea vixim ami poilim uloilolim, tem mhunntta: “Dor disachea xevottak Devachea Utracher niall kelolean mhaka monachim xanti melltta, ani mhozo bhavarth ghott zata.”

14. Magnnem kelolean amkam koso faido zata?

¹⁴ Sodanch magnnem korat. (1 Tes. 5:17) Tumi konnam-i lagim sodanch uloitat zalear, ani tumi tumchim bhavnam tankam sangtat zalear to tumcho ghott ixtt zaunk pavtolo. Teach bhaxen, ami Jehovak amchim bhavnam, chintnam ani uske sangtat tednam to amcho ghott ixtt zaunk pavtolo. Tea bhair, tumi oxem kortat tednam Jehovachea mogacher tumkam khatri asa mhunn dakhoun ditolim. (St. 94:17-19; 1 Juanv 5:14, 15) Yua, zachea vixim ami poilim uloilolim, tem mhunntta: “Hanv Jehova lagim magnnem korta tednam, hanvem dis-bhor kitem kelem titlench sangona, punn mhaka koxem bhogta, tem pasun sangta. Oxem kelolean, Jehova eka komponichea patranva sarko nhoi, punn aplo mog korta toslea Bapai sarko mhunn mhaka dista.”​—“ Tumi Tem Vachlam?” hem boks polloiat.

15. Jehova amcho mog korta mhunn koso dakhoita?

¹⁵ Visvaxi ixttam sangata sodanch vell sarat. Amchea sorginchea Bapan, bhav-bhoinnank amkam ek dennem koxem diun, to amcho mog korta mhunn dakhoita. (Jak. 1:17) Him bhav-bhoinnam amcho “soglea vellar mog” kortat. (Mho. 17:17) Koloskarank boroilolea  chittient, Paulu apleak “khub adar dilolea” Kristanvam vixim boroita. (Kol. 4:10, 11) Jezu Kristan pasun aplea ixttam koddlean adar ghetlo. Zoxem xisamnim ani ainzamnim taka adar dilo.​—Lukas 22:28, 43.

16. Jehovachea lagim soronk, visvaxi ixttam amkam koxim modot korunk xoktat?

¹⁶ Jehovan dil’lea hea dennea thaun tumi faido melloun ghetat kai? Ami amchea somosia vixim Jehova sangata ghott ixttagot aslolea eka Kristanvak sangtat zalear amcho bhavarth unno asa oxem nhoi. Tachea bodlek, oxem kelolean amkam modot zatoli. James, zachea vixim ami poilim uloilolim, to mhunntta: “Oslea borea lokam lagim ixttagot aslolean mhaka khub modot zali. Mhojea monant chukichim chintnam ietat tednam tim mhojem pasiensan aikotat ani tim mhozo mog kortat mhunn khatri ditat. Ani tanchea udexim Jehova mhozo mog korta ani taka mhoji kallji asa mhunn mhaka kollon ieta.” Tor Jehova sangata ghott ixttagot asloleam lagim ixttagot korun ti samballop kitlem gorjechem!

17-18. Ami konnachem aikonk zai, ani kiteak?

¹⁷ Ami sarkem tem korop soddun dilolem Soitanak zai. Jehova amcho mog korina, ani ami salvar zaunk purtim nant oxem ami chintlolem Soitanak zai. Punn hem khorem nhoi mhunn ami hea lekhant polloilem.

¹⁸ Jehova tumcho mog korta. Tachea nodren tumi khub valorachim asat. Ani tachem Utor tumi pallttat zalear, Jezu bhaxen tumi tachea “mogant ravtoleat”. (Juanv 15:10) Tor Jehova tumcho mog korina mhunn tumkam dista zalear, toslem chintop mona thaun kaddat. Tachea bodlek, tumchea borea gunnancher dhean ditolea Jehova Devachem aikat. Ani to ‘aplea porjecho,’ hoi, to tumcho mog korta mhunn khatri dovrat!