Jezun morchea poilim Stotr 22:1-ant Davidan mhunnttlolea utrancho kiteak ul’lekh kelo?

Jezun morchea poilim mhunnttlolea utram modem tannem oxem mhunnttlolem tem amkam Matev 27:46-ant vachunk melltta: “Deva Mhojea, Deva Mhojea, kiteak Tunvem Mhaka sanddloi?” Him utram mhunnon, Jezun Stotrkar Davidan Stotr 22:1-ant sanglolim utram purnn kelim. (Marku 15:34) Punn Jezu nirax zalo, vo tacho bhavarth hal’lo dekhun tannem oxem mhunnttlolem mhunn sangop chukichem. Karonn apunn kiteak morta tem Jezuk khobor asli, ani to moronk toiar aslo. (Mt. 16:21; 20:28) Tea bhair, to morta tednam Jehova tachem bhonvtonnim ek “voi” ghalun dovorcho na mhunn pasun taka khobor asli. (Job 1:10) Oxem kelolean soglea poristhitinim Jezu apnnank visvaxi ravtolo mhunn dakhounk Jehovan taka ek sondhi dili.​—Marku 14:35, 36.

Tor Jezun Stotr 22:1-antlim utram kiteak ul’lekh keli? Kiteak mhunnttlem mhunn amkam sarkem khobor na, punn oxem mhunnonk thoddim karonnam polloum-ia. *

Him utram mhunnon, apnnacher ieunchem asa tea mornna thaun Jehova apnnak vattauncho na mhunn Jezu ghoddie sangonk sodhtalo. Jehovachi modot nastana, Jezuk soddvonnechem mol farik korunk zai aslem. To ek munis zaun ailo, ani tannem “ek-eklea monxa khatir” moronk zai aslem.”​—Heb. 2:9.

 Hea eka stotrachim thoddim utram mhunnon, Jezu ghoddie Judevanchea monant tem ak’khem stotr ugddasak haddunk sodhtalo. Jezuchea disamnim Judev lokank zaitim stotram tonddpatt korchi sonvoim asli. Tor hea eka stotrachi thoddim utram mhunnttlolean, tem ak’khem stotr tanchea monant ieunk xoktalem. Hea karonnak lagon Jezun him utram mhunnttlolim zalear, tachea Judev pattlanvdarank hea stotrant aplea mornna vixim aslolim zaitim bhakitam ugddasak ailim astolim. (St. 22:7, 8, 15, 16, 18, 24) Tea bhair, tea stotrachea nimannea versamnim Jehovak vakhann’nni dilea ani ak’khea prithumecho Raza, to zaun asa mhunn sanglam.​—St. 22:27-31.

Him utram mhunnon, apunn guneanvkari naslo mhunn Jezu ghoddie sangonk sodhtalo. Jezun Devachem nanv pidd’ddear kelam mhunn tacher khotto arop ghalun Mha-dhormsobhen kaidea bhair vochon tachi zoddtti kel’li. (Mt. 26:65, 66) Karonn Mha-dhormsobhen ratik mellon ieun ani goddbodd korun nirnnoi ghetlolo. (Mt. 26:59; Marku 14:56-59) Tor Jezun him utram mhunnon, apleak hea torechi xikxa favo nasli mhunn to ghoddie dakhoun diunk sodhtalo.

Him utram mhunnon, Davida bhaxen apnnak pasun Devachi maniotai asa mhunn Jezu ghoddie sangonk sodhtalo. Stotr boroupi Davidacher tras aile tednam Jehovan te addaunk nant. Hacho orth, taka Devachi maniotai nasli vo Davidak Devacher bhavarth naslo oxem nhoi. Karonn Davidan Stotr 22:1-antlim utram mhunnttlea uprant, tachea fuddlea utramnim Jehova apnnank salvar korunk xokta mhunn taka asloli khatri dison ieta. Toxench, Jehovachem besanv tacher sodanch aslem. (St. 22:23, 24, 27) Teach bhaxen, ‘Davidacho Put’ Jezu, khambear tras sosle, hacho orth taka Devachi maniotai nasli oxem nhoi.​—Mt. 21:9.

Apunn Devak visvaxi asa mhunn Jezu dakhoitolo zalear Jehovan taka rakhonn diunk zainasli. Hea vixim chintun, apnnak zal’lem dukh dakhounk tannem ghoddie him utram mhunnttlim astolim. Aplea Putan tras sosun moronk zai mhunn Jehovacho ud’dhex naslo. Punn Adanv ani Eve, Devachea add gelea uprant oxem korchem poddlem. Karonn Jezun kainch chuk korunk nasli zalear pasun to tras sosun melolean Soitanan ubarlolea prosnank to zobab diunk xoktalo ani munxank patka ani mornna thaun soddounk xoktalo. (Marku 8:31; 1 Ped. 2:21-24) Punn oxem zatolem zalear, thoddea vella pasot, Jehovan tachi rakhonn korunk zainasli. Poilea pavtti Jehovan hea toren tachi rakhonn korunk na.

Him utram mhunnon, Jehovan apnnacher hea torechem moronn kiteak ieunk dilem tem zannam zaunk Jezu aplea xisank ghoddie modot kortalo. * Eka guneanvkareak sosunk poddttalem toslem moronn apnnak sosunk poddlem dekhun zaiteancho bhavarth halonk xoktalo mhunn Jezu zannam aslo. (1 Kor. 1:23) Jezuk moronk mukhel karonn kitem aslem, tacher tachea xisamnim dhean dovorlem zalear te taka ek gunneanvkari nhoi, punn ek soddvonnar mhunn manta asle.​—Gal. 3:13, 14.

Stotr 22:1-ant aslolim utram mhunnonk, Jezuk koslem-i karonn asonk puro. Punn apunn khambear melolean apnnem Jehovachi khuxi purnn keli mhunn to zannam aslo. Tim utram mhunnttlea uprant Jezun mhunnttlem: “Sompadlem!” (Juanv 19:30; Lukas 22:37) Jehovan tea thoddea vellak tachi rakhonn korunk na dekhun, Jezuk hea prithumer jem kitem korunk dhaddlolem tem to purnn korunk pavlo. Toxench, ‘Moizesachi Somurt, Provadi ani Stotramnim’ tachea vixim jem kitem boroilolem, tem to purnn korunk xoklo.​—Lukas 24:44.