1. Ami kosle dhei dovrunk zatat?

 KHORIM Kristanvam zalolean ami Jehovacho khub mog kortat. Hea pasot ami tachea sevent amchem boreantlem-borem diunk sodhtat. Tor ami oxem kortolim zalear ami tache sevent dhei dovrunk zai. Zoxem, Kristi gunn vaddovop, faideak poddttat tosleo kola xikop ani dusreanchi seva korunk anik vatto sodhop.

2. Ami Jehovache sevent vaddavoll korop vo dhei dovrop kiteak gorjechem?

² Tor ami Jehovache sevent vaddavoll korop vo dhei dovrop kiteak gorjechem? Mukhel zaun, ami amchea sorginchea Bapak, Jehovak khuxal korunk sodhtat. Karonn ami amchi tank ani kola tache sevent uzar kortat tednam Jehova khuxal zata. Tea bhair, ami Jehovache sevent anik vaddavoll kortat tednam ami amchea bhav-bhoinnank anik chodd modot korunk pavtat. (1 Tes. 4:9, 10) Tor ami zaitea vorsam thaun sotant asum vo sotant novim asum, ami sogleamnim Jehovache sevent vaddavoll korunk zata. Tor hem ami koxem korunk zata tem polloum-ia.

3. 1 Timotak 4:12-16 pormonnem, apostl Paulun Timotak kitem korunk urba dili?

³ Apostl Paulun Timotak poili chitt boroili tednam Timot zaitim vorsam thaun ek vhoddil mhunn seva kortalo. Tori astana, Paulun taka Jehovachi seva anik bore toren korunk urba dili. (1 Timotak 4:12-16 vachat.) Oxem korunk apostl Paulun taka don vixoi-ancher dhean diunk sanglem. Poilem mhunnttlear, tannem Timotak thodde Kristi gunn zoxe mog, bhavarth ani aplem jivit nirmoll dovrunk urba dili. Ani dusrem mhunnttlear, tannem Timotak vachunk, updesunk ani xikounn diunchi kola vaddounk urba dili. Tor Timota bhaxen  ami pasun Jehovachi seva anik bore toren korunk kosle dhei dovrunk zatat, ani amchi seva vaddounk ami kitem korunk zata tem ami polloitolim.

4. Filipkarank 2:19-22-a pormonnem, Timot bore toren Jehovachi seva kiteak korunk pavlo?

⁴ Timotak ekdom bore Kristi gunn asle dekhun to bore toren Jehovachi seva korunk pavlo. (Filipkarank 2:19-22 vachat.) Paulun Timota vixim jem kitem sanglem tantuntlean, Timot ek khalto, visvaxi, apleak dilolem kam bore toren korpi ani patieupa sarko munis aslo mhunn amkam kollon ieta. Toxench, Timotak bhav-bhoinnanchi kallji asli ani tancho to khub mog kortalo. Tor Timotachea hea borea gunnank lagon, Paulun samballunk kotthin asleo tosleo anikui vhoddleo zobabdareo taka dileo. (1 Kor. 4:17) Timota bhaxen ami pasun Jehovak manvota tosle gunn vaddoitat tednam Jehova amcho anikui mog korunk pavtolo ani ami amchea bhav-bhoinnank anikui chodd modot korunk pavtolim.—St. 25:9; 138:6.

5. (a) Tumi khoincho gunn vaddounk zai tem zannam zaunk tumi kitem korunk zata? (b) Chitrant dakhoilea ti bhoinn dusreanchi poristhiti anik bore toren somzonk, tinnem dovorlolea dhei-acher kam korta mhunn koxem dakhoita?

⁵ Tumi melloun gheunk sodhtat toslo ek umkoch dhei dovrat. Tumi khoincho gunn vaddounk sodhtat tea vixim magnnem korat ani bariksannen chintat. Udharonnak, tumi ghoddie dusreanchi poristhiti anik bore toren somzonk proitn kortat astolim vo tumchea bhav-bhoinnank modot korunk tumchi itsa vaddounk sodhtat astolim. Vo tumi xanti samballpi zaunk proitn kortat astolim vo dusreank bhogsunk sodhtat astolim. Tumi osle gunn koxe vaddounk zatat tea vixim tumchea eka ghott ixttak vicharlear tumkam modot zaunk xokta.—Mho. 27:6.

6. Tumi ek gunn vaddounk sodhtat zalear tumi kitem korunk zata?

⁶ Tumi dovorlolo dhei melloun gheunk vavr korat. Tumkam dusreank bhogsunk kotthin zata mhunn chintat. Tor dusreank bhogsunk tumkam sompem zaunk, tumi hea gunnam vixim bariksannen obheas korunk zata. Tumi Bible-antlea khoinchea munxamnim ho gunn dakhoilo vo dakhounk na tea vixim vachun tacher niall korunk zata. Jezu vixim chintat. To dusreank udarponnan bhogxitalo. (Lukas 7:47, 48) To dusreanchea chukincher nhoi punn tim kitem borem korunk xoktat tacher dhean ditalo. Punn Jezuchea tempa voile Farizev ‘herank lekhinasle vo herank kainch nhoi koxe lekhtale.’ (Lukas 18:9) Hea udharonnacher niall kelea  uprant, tumi tumkanch vicharunk zata: ‘Hanv dusreank koso lekhtam? Dusreanchea borea gunnancher hanv dhean ditam kai?’ Tor tumkam konnakui bhogsunk kotthin zata zalear tea munxachea soglea borea gunnanchem tumi ek list korunk zata. Ani uprant tumkanch vicharunk zata: ‘Jezu hea munxak koso lekhtolo aslo? To taka bhogxitolo aslo kai?’ Oxem kelolean tumchem chintop bodlunk tumkam modot zaunk xokta. Tor poilim-poilim dusreank bhogsunk tumkam ghoddie kotthin zait. Punn tumi tacher kam korit ravlim zalear toxem korunk tumkam sompem zatolem.

7. Mhonnʼnneo 22:29-a pormonnem, kola aslolea bhav-bhoinnank aiz Jehova Dev koso uzar korta?

⁷ Tumi faideak poddttat tosleo kola xikonk dhei dovrunk zata. Bethel-a sombondit bandkamam, Zomatichim Holam ani Raj-ghoram bandunk kitlea bhav-bhoinnanchi goroz asa tea vixim chintat. Zaitim bhav-bhoinnam hi kola xikonk, bandkamacho onubhov aslolea bhav-bhoinnam sangata kam kortat. Hea chitrant dakhoilam toxem, fokot bhavuch nhoi punn bhoinno pasun Zomatichim Holam ani Raj-ghorancho samball korunk goroz ti kola xiktat. Tor amcho ‘kallam-iugancho Rai’ Jehova Dev, ani “razancho Raza” Jezu Krist, oslea ani anikui zaitea vattamnim hea kola aslolea bhav-bhoinnank vhodd-vhodd kamam korunk uzar kortat. (1 Tim. 1:17; 6:15,16; Mhonnʼnneo 22:29 vachat.) Tor ami pasun, amkam nhoi punn Jehovak mhoima diunk, amkam asloli kola uzar korun vavr korunk sodhtat.—Juanv 8:54.

8. Tumi khoinchi kola xikonk zata tea vixim zannam zaunk tumi kitem korunk zata?

⁸ Tumi melloun gheunk sodhtat toslo ek umkoch dhei dovrat. Tumi khoinchi kola xikonk zata tea vixim tumchea sobhentlea vhoddilank vo ghoddie sorkittachi dekhrekh korpiak kitem dista tem tumi taka vicharunk zata. Tannim tumkam tumchi ulounchi ani xikounchi kola tumi vaddounk zai mhunn sanglem zalear, tumi khoinchea eka umkeach mudʼdheacher kam korunk zata tea vixim tankam vicharat ani uprant toxem korunk vavrat. Tor hem tumi koxem korunk zata?

9. Tumi ek novi kola xikonk dovorlolo dhei melloun gheunk kitem korunk zata?

⁹ Tumi dovorlolo dhei melloun gheunk vavr korat. Tumi borim xikoupi zaunk sodhtat mhunn chintat. Oxem korunk tumi kitem korunk zata? Vachunk ani Xikovnn Diunk Lokx Di, hea pustikecho tumi bariksannen obheas korunk zata. Ani tumkam sumanache modle mittingek bhag melltta tednam tumi adim fuddench tachi toiari korunk zata. Uprant, tumi eka onubhov aslolea bhavak, tumi toiar kelʼlo bhag aikonk ani tumi khoim sudharnni korunk zata tem vicharunk zata. Tor hea toren, tumi adim fuddench toiari kortat tednam tumi khub vavr kortat ani patieupa sarkim asat mhunn dusreank kollon ietolem.—Mho. 21:5; 2 Kor. 8:22.

10. Ek kola xikonk amkam kotthin zata zalear ami kitem korunk zata tea vixim ek udharonn diat.

¹⁰ Punn tumkam ek kola xikonk kotthin zata zalear kitem? Tacher kam korop soddun dium nakat. Hea vixim, amkam Garry nanvachea eka bhavachem udharonn asa. Taka vachunk khub kotthin zatalem. Ani mittingek taka sogleam hujir vhoddlean vachunk poddttalem tednam taka kitli loz bhogtali tem taka azun porian ugddas asa. Punn to vavr korit ravlo. Ani onubhov aslolea bhavam koddlean, ani prokaxonantlean mellʼllolea proxikxonnak lagon to aiz sobhent, sorkitt zomatimnim ani odhivexonamnim bhaxonnam diunk xokta mhunn to sangta.

11. Timota bhaxen Jehovachi seva vaddounk amkam koxi modot zatoli?

 ¹¹ Timot ekdom boro uloupi vo xikoupi zalo kai? Hea vixim Bible amkam kainch sangona. Punn apostl Paulucho solʼlo apnnailolean taka dilʼleo zobabdareo to anik bore toren samballunk pavlo mhunn ami zannant. (2 Tim. 3:10) Teach bhaxen, ami amcheo kola vaddoileo zalear, Jehovachi seva ami vaddounk pavtolim.

12. Tumkam dusream thaun koxi modot mellʼllea?

¹² Amchim bhav-bhoinnam amkam zaitea vattamnim modot kortat. Udharonnak, hea vixim chintat. Ami hospital-ant asat tednam Hospital Liaison Somiti (HLC) vo Patient Visitation Group-ant kam korpi vhoddil amkam bhett diunk puro. Toxench, ami oddchonneancho fuddo kortat tednam ek vhoddil vell kaddun amchem aikon amkam bhuzvonn diunk puro. Tea bhair, amchea Bible obheasak, amchea sangata onubhov aslolo ek pioneer ieunk puro ani ami khoim sudharnni korunk zai tea vixim amkam sangonk puro. Tor him bhav-bhoinnam amkam modot kortat tednam amkam koxem dista? Ami khub khuxal zatat! Tor hich khuxalkai ami dusreank diunk sodhtat zalear, ami pasun fuddem soron dusreank modot korunk zata. Karonn Jezun mhunnttlolem, “Dusream koddchem gheunche poros dusreank divop odik vhodd bhag.” (Itihas 20:35) Tor tumi hea toren vo her khoinchea-i vattamnim tumchi seva vaddounk sodhtat zalear tumi kitem korunk zata?

13. Dhei dovortana ami kitem ugddas dovrunk zai?

¹³ Umkoch dhei dovrat. Udharonnak, tumi ghoddie sobhent anik vavr korunk sodhtat astolim. Punn toxem korunk tumi umkoch dhei dovornant zalear, tumi hem koxem korunk xoktat vo tumi oxem korunk pavleant kai na tem tumkam kollchem na. Tor hea pasot, ek umkoch dhei vinchun kaddat ani tumi to koso melloun ghetolim tem boroun dovrat.

14. Ami dovorlolo dhei bodlunk kiteak toiar asonk zai?

¹⁴ Punn thodde pavtti amchi poristhiti bodolta. Tor ami dovorlolo dhei amkam ghoddie bodlunk poddot. Apostl Pauluk kitem ghoddlem tea vixim chintat. Tannem Tesalonikent ek novich sobha ghoddoun haddunk modot kelʼli. Ani thoim ravon tea bhav-bhoinnank modot korunk tannem dhei dovorlolo astolo. Punn uprant dhumallo ailo dekhun taka tem xar soddun vochonk poddlem. (Itihas 17:1-5, 10) Karonn Paulu thoinch ravlʼlo zalear tachea bhav-bhoinnancho jiv to dhokeant ghaltolo aslo. Tor Pauluchi poristhiti bodolʼli tednam tannem aplea dhei-ant bodol kelo. Punn aplea bhav-bhoinnank modot korunk to proitn korit ravlo. Karonn uprant, sotant novim aslolea tea Tesalonikentlea bhav-bhoinnancho bhavarth ghott korunk tannem Timotak tea sobhent dhaddlo. (1 Tes. 3:1-3) Ani Timot goroz asa thoim vochon seva korunk toiar aslo mhunn tim bhav-bhoinnam kitlim khuxal zalim astolim!

15. Amchi poristhiti bodolta tednam amche dhei koxe bodoltat tem somzaunk ek udharonn diat.

 ¹⁵ Apostl Pauluchea udharonna thaun ami pasun xikonk zata. Ami ek umkoch dhei dovrunk puro. Punn thodde pavtti ghoddie amchi poristhiti bodolta dekhun ami to dhei melloun gheunk xokonant astolim. (Up. 9:11) Tor tea vellar, ami melloun gheunk zata toslo dhei dovrunk zai. Oxench Ted ani Heidi nanvachea eka zoddpean kelem. Tanchea modlea ekleachi bholaiki bigoddli dekhun tankam Bethel soddchem poddlem. Tori astana, tim Jehovacho khub mog kortalim dekhun tannim dusream vattamnim apli seva vaddoili. Zoxem, poilim tim niemit pioneer mhunn seva korunk laglim. Uprant tankam khas pioneer mhunn nemlim. Toxench, sorkittachi dekhrekh korpi, bhett korunk pavona tea sobhamnim bhett diunk bhav Ted-ak proxikxonn mellʼllem. Punn uprant, tanche piraiek lagon tim hi seva korunk purtim naslim mhunn tankam kollon ailem. Tea vellar tim niraxi zalim tem khorem. Tori astana, Jehovachi seva korunk anikui zaiteo vatto asat mhunn tankam kollon ailem. Ted sangta, “Jehovachi seva korunk amkam anikui zaiteo vatto asat mhunn ami xikonk pavlim.”

16. Galasiekarank 6:4–antlean ami kitem xiktat?

¹⁶ Tor thodde pavtti, amchea jivitant kitem ghoddtta tem amchea hatant asona. Tea pasot, ami fokot amkam aslolea zobabdarenk vo sueogank lagon Jehovak valorachim asat oxem ami chintunk zaina. Toxench, ami amkanch dusream sangata sor korunk zaina. Karonn bhoinn Heidi sangta, “Ami amkanch dusream sangata sor kortat tednam ami amchi khuxalkai hogddaitat.” (Galasiekarank 6:4 vachat.) Tor ami khoinchea vattamnim Jehovachi seva korunk xoktat ani dusreank modot korunk xoktat tacher ami dhean divop gorjechem. b

17. Jehovache sevent anikui vaddavoll korunk tumi kitem korunk zata?

¹⁷ Ami amchem jivit sadem dovortat zalear ani rinn kaddinant zalear Jehovachi seva ami vaddounk pavtolim. Toxench, atam ami lhan-lhan dhei dovorle zalear ami dovorlole vhoddle dhei melloun gheunk fuddarak amkam modot zatoli. Udharonnak, tumi ek niemit pioneer zaunk dhei dovorla mhunn chintat. Tor ho dhei melloun gheunk, tumi atanch thaun dor mhoineak sahaiok pioneer mhunn seva korunk zata. Vo tumi sobhecho sevok zaunk dhei dovorla mhunn chintat. Tor to dhei melloun gheunk tumi atanch thaun porgottnnent chodd vavr korunk zata ani tumchea sobhent duent asloleank ani zantteam bhav-bhoinnank bhett diunk zata. Tor dhei dovrun, tumkam onubhov melltta toso tumi Jehovache sevent anikui vaddavoll korunk pavtolim. Tor tumi Jehovachea sevent kortat tem khoinchem-i kam tumchean zata title bore bhaxen korunk nichov korat.—Rom. 12:11, NW.

18. Chitrant dakhoilam toxem, bhoinn Beverley-chea udharonnantlean tumi kitem xiktat?

 ¹⁸ Punn tumche piraiek lagon, tumi dhei dovrunk ani te melloun gheunk xokonant oxem chintinakat. Hea vixim, 75 vorsanchi bhoinn Beverley-chem amkam udharonn asa. Tichi bholaiki bori na. Ani hea pasot tika cholonk khub kotthin zata. Tori astana, Ugddas Disachea thoddea sumanam poilim zata tea khas porgottnnent tika bhag gheunk itsa asli. Tor tinnem umkech dhei dovorle ani te dhei ti melloun gheunk pavli tednam ti khub khuxal zali. Toxench, ti porgottnnent kitlo vavr korta tem polloun herankui tanche porgottnnent anikui chodd vavr korunk urba mellʼlli. Tor amchim zannttim bhav-bhoinnam tanche poristhitik lagon Jehovache sevent chodd korunk xokonant astolim. Tori astana, tim tache sevent jem kitem kortat tea soglea vavracho Jehova valor korta.—St. 71:17, 18.

19. Tumi dovorleat te dhei melloun gheunk tumi kitem korunk zata?

¹⁹ Tor tumi melloun gheunk zatat tosle dhei dovrat. Jehovak manvota tosle gunn vaddoiat. Faideak poddttat tosleo kola xikat. Oxem kelolean tumi Jehovak ani tache songottnnek anik modot korunk pavtolim. Toxench, tumchea bhav-bhoinnanchi seva korunk anik vatto sodhat. c Tumi oxem kelem zalear, Timota bhaxen Jehovachem besanv tumcher astolem ani “tuzo vikas sogllea lokak uktim dixtti poddtolo.”—1 Tim. 4:15.