1. Ami kednam chodd khuxal zatat?

 AMI khuxal aslolim Jehovak zai. Oxem ami kiteak mhunnonk zata? Karonn povitr xoktecho ek gunn mhunnttlear khuxalkai. (Gal. 5:22) Toxench, gheunchea poros dusreank ditat tednam amkam chodd khuxalkai melltta mhunn ami zannant. Tor hea pasot, porgottnnent ani bhav-bhoinnank modot korunk ami chodd vavurtat tednam amkam khub khuxalkai bhogta.—Itihas 20:35.

2-3. (a) Galasiekarank 6:4-a pormonnem, Jehovachi seva khuxalkaien korit ravonk amkam khoincheo don vostu modot kortoleo? (b) Hea lekhant ami kitem polloitolim?

² Galasiekarank 6:4-ant apostl Paulun, ami koxim khuxal ravonk xoktat tea don vostum vixim sanglam. (Vachat.) Poilem mhunnttlear, ami Jehovak amchem boreantlem-borem diunk zai. Ani ami oxem kelem zalear ami khuxal astolim. (Mt. 22:36-38) Dusrem mhunnttlear, dusream sangata amkam sor korchea bodlek amchi bholaiki, amkam melltta tem proxikxonn vo amkam aslolea tankek lagon ami Jehovak upkari asonk zai. Karonn hem soglem Jehovanuch amkam dilam. Toxench, amchim bhav-bhoinnam amchea poros bore toren porgottnni kortat zalear tim dusream poros apunn borim asat mhunn dakhounk vo aplea faideak lagon oxem kortat mhunn ami chintchem nhoi. Punn Jehovan tankam dilʼlim dennim tim tachi vakhannʼnni korunk uzar kortat mhunn ami khuxal zaunk zai. Tor, tanchea poros ami odik borim asat mhunn dakhounk proitn korchea bodlek ami tanchea koddlean xikonk zai.

³ Tor hea lekhant, Jehovache sevent ami korunk sodhtat tem ami korunk xokonant mhunn niraxi zaina zaunk, amkam koxi modot zaunk xokta tem ami polloitolim. Tea bhair, Jehovan amkam dilʼlim dennim ami bore toren koxim  uzar korunk zatat, ani toxench ami dusreanchea udharonnantlean kitem xikonk zata tem pasun ami polloitolim.

4. Ami kednam niraxi zaunk xoktat? Ek udharonn diat.

⁴ Amche piraiek vo bholaikek lagon Jehovache sevent ami korunk sodhtat tem ghoddie ami korunk xokonant astolim. Ani hea pasot ami niraxi zatat. Oxench bhoinn Carol-ak ghoddlem. Ti porgottnnaranchi chodd goroz asli tea zagear seva kortali. Tea vellar tika 35 Bible obheas asle. Ani tinnem zaiteank somorponn korun bautizm gheunk modot kelʼli. Tor Carol-achi porgottnni ekdom bori choltali mhunn ami mhunnonk zata. Punn uprant ti duent zali ani tea duensank lagon tika chodd vell ghorantuch ravchem poddttalem. Ti mhunntta: “Mhojea bholaikek lagon dusrim kortat tem hanv korunk xokona mhunn hanv zannam. Punn dusrim visvaxiponnan seva kortat toxem hanv korina oxem mhaka dista. Jehovache sevent mhaka korunk zai tem soglem hanv korunk xokona hem polloun hanv ekdom niraxi zata.” Tor tichi bholaiki bori na zalear pasun, apnnachean zata te bhaxen Carol Jehovachi seva korta. Hem polloun amcho doia-maia dakhoupi Dev Jehova kitlo khuxal zata astolo!

5. (a) Jehovache sevent amkam korunk zai titlem ami korunk xokonant mhunn niraxi zatat zalear ami kitem ugddas dovrunk zai? (b) Chitrant dakhoilʼlea bhavan sodanch Jehovak aplem boreantlem-borem dilam mhunn ami kiteak mhunnonk zata?

⁵ Tor tumche poristhitik lagon, tumi Jehovache sevent poilim kortalim titlem korunk xokonant mhunn niraxi asat zalear, tumi tumkanch vicharunk zata: ‘Jehovak hanvem kitem kelʼlem zai?’ Tumi sodʼdheak asat te poristhitint tumchem boreantlem-borem Jehovak dilolem taka zai. Hea vixim chintat: 80 vorsanchi ek bhoinn, ti 40 vorsanche piraier porgottnni kortali teach toren atam korunk xokona mhunn niraxi zata. Ti Jehovak aplem boreantlem-borem dita zalear pasun Jehovak tem manvona oxem tika dista. Punn Jehovak koxem dista? Ti bhoinn 40 vorsanche piraier aplem boreantlem-borem ditali. Ani atam 80 vorsanche piraier pasun ti aplem boreantlem-borem Jehovak dita. Tor Jehovak kitem manvota tem toch tharaita mhunn ami ugddas dovrunk zai. Tea pasot, ami Jehovache sevent kitem korunk xoktat vo xokonant tem chintun niraxi zaunchem nhoi. Karonn ami amchem boreantlem-borem Jehovak ditat tednam to khuxal zaun eke ritin amkam, “Xabas!” oxem mhunnttolo.—Matev 25:20-23 sor korat.

6. Maria-chea udharonna thaun ami kitem xiktat?

⁶ Tea bhair, amchean kitem korunk zaina tacher nhoi punn kitem korunk zata tacher ami dhean ditat tednam ami Jehovache sevent sodanch khuxal ravonk xoktat. Maria nanvache eke bhoinnichem udharonn polloum-ia. Tika aslolea eka umkeach duensak lagon ti chodd porgottnni korunk xokonasli. Taka lagon ti niraxi zali ani apunn kainch faideachi nhoi oxem tika dislem. Punn uprant tichea sobhent cholonk-bhonvonk zaina tosle eke bhoinnik tinnem modot korunk chintlem. Maria sangta: “Hanvem te bhoinni sangata chitti boroun ani fon-a udexim porgottnni keli. Ani dor ek pavtt hanv tiche sangata seva kortali tednam tika hanv modot korunk pavli mhunn chintun khuxal zatali.” Hantuntlean amkam kollon ieta ki amchean kitem zaina tacher nhoi, punn kitem zata tacher ami dhean ditat zalear ami sodanch khuxal ravonk xoktolim. Punn tumi Jehovachi seva chodd korunk xoktat zalear kitem? Tumi kitem korunk zata tem polloum-ia.

7. Apostl Pedrun bhav-bhoinnank kitem korunk sanglem?

⁷ Jehovan tankam dilʼlim dennim eka-mekak urba diunk uzar kor mhunn apostl Pedrun aple poile chittint bhav-bhoinnank sanglem. Tannem mhunnttlem: “Zonn-ekleak Devan ek kherit vorgunn dilʼlo asa; tor bore karbhari koxe hea vorgunnancho upeog korun ekamekachi chakri  korat.” (1 Ped. 4:10) Tor amkam polloun dusreank amchi nattkai zatoli, vo dusrim niraxi zatolim oxem chintun Jehovan amkam dilʼlim dennim uzar korunk ami fatti ravchem nhoi. Karonn ami oxem kelem zalear ami Jehovak amchem boreantlem-borem diunk pavchimnant.

8. 1 Korintkarank 4:6, 7-a pormonnem, amkam aslolim dennim vo tanke vixim ami kiteak boddai marchi nhoi?

⁸ Hem khorem ki amkam aslolim dennim vo tank, amchean zata title bore toren ami uzar korunk zai. Punn oxem kortana ami boddai marchi nhoi. (1 Korintkarank 4:6, 7 vachat.) Udharonnak, ami ghoddie nove-nove Bible obheas suru korunk borim asot. Tor hi tank ami zata title bore toren uzar korunk zai. Punn tea vixim boddai marina zaunk ami chotrai dovrunk zai. Chintat, tumi ek Bible obheas koso suru kela tea vixim tumche lagim ek boro onubhov asa, ani tem tumi tumchea bhav-bhoinnank sangonk sodhtat. Punn tumchea porgottnni grupa sangata tumi mellon ietat tednam, thoim ek bhoinn tinnem porgottnnent eka munxak masik koxem dilem tea vixim aplo onubhov sangta. Tea vellar tumi tumcho onubhov sangot zalear tea bhoinnik koxem distolem? Tumi ek Bible obheas suru korunk pavlim. Punn apunn fokot ek masik diunk pavli mhunn chintun, tichi urba ghoddie unni zaunk xokta. Tor tea bhoinnicho tumkam mog asa zalear tumi tumcho onubhov dusre pavtti sangtolim. Tor hantuntlean ami kitem xiktat? Ami boddai marchi nhoi punn amkam asloli tank ami zata title bore toren uzar korunk fatti sorchem nhoi.

9. Amkam asa ti tank vo dennim ami koxim uzar korunk zai?

⁹ Amkam asa ti tank Jehova koddlean ek dennem zaun asa mhunn ami ugddas dovrunk zai. Tor amchi tank ami dusream poros borim asat mhunn dakhounk nhoi, punn sobhechi vaddavoll zaunk uzar korunk zai. (Filp. 2:3) Ani hea toren amkam asat tim dennim vo tank Jehovachi khuxi korunk ami uzar kortat tednam Jehovak vakhannʼnni mellttoli ani ami pasun khuxal astolim.

10. Ami amkanch dusream sangata sor korun tim valorachim nhoi mhunn kiteak chintchem nhoi?

¹⁰ Punn ami chotur nant zalear, ami kiteant borim asat ani dusrim kiteant borim nant tache modem ami sor korunk puro, ani tim valorachim nant oxem ami chintunk puro. Udharonnak, ek bhav ghoddie bore toren jahir bhaxonnam dita astolo. Tor jahir bhaxonnam diunk titlo boro na toslea eka bhava poros apunn chodd boro asa oxem taka disonk puro. Punn to dusro bhav ghoddie her vattamnim zoxem, dusreancho poramos korunk, aplea bhurgeank bore toren proxikxonn diunk, vo urben porgottnni korunk boro asa zait. Tor ami dusream poros borim asat mhunn chintchea bodlek, dusreank koslim dennim  vo tank asa, ani tim tem Jehovachi seva korunk ani herank modot korunk koxim uzar kortat tacher ami dhean diunk zai. Ani hea bhav-bhoinnam pasot ami upkari asonk zai.

11. Ami Jezuchi dekh kiteak gheunk zai?

¹¹ Ami amkanch dusream sangata sor korunk zaina tem khorem. Punn Jehovachea visvaxi sevokam thaun ami zaitem xikonk zata. Ek ekdom borem udharonn mhunnttlear, Jezuchem. Ami Jezu bhaxen poripurnn nant tem khorem. Tori astana, tache bore gunn ani tannem kelʼlea borea kamam thaun ami zaitem xikonk zata. (1 Ped. 2:21) Tor Jezuchi dekh gheunk ami amchean zata tem soglem kortat tednam ami Jehovachi seva ani amchi porgottnni anik bore toren korunk pavtolim.

12-13. Raza Davidachea udharonnantlean ami kitem xikonk zata?

¹² Bible-ant amkam Jehovachea anikui visvaxi sevokanchim udharonnam mellttat. Tim opurnn aslim. Tori astana, tannim amkam ek bori dekh dovorlea. (Heb. 6:12) Ek udharonn mhunnttlear, Raza Davidachem. To opurnn aslo ani tannem zaitim gombhir patkam kelʼlim. Tori astana Jehovan, “Mhojea Kallza sarko Mhaka David” vo anik ek Bible bhaxantor sangta te bhaxen, “Mhaka sogleam poros chodd manvota toslo munis,” oxem Davida vixim mhunnttlolem. (Itihas 13:22) Tor David amkam ek borem udharonn zaun asa mhunn ami kiteak mhunnonk zata? Karonn taka solʼlo mellʼllo tednam tannem nimitam diunk nant punn to solʼlo manun ghetlo ani khoreanich poschatap kelo. Ani hea pasot Jehovan taka bhogxilo.—St. 51:3, 4, 10-12.

¹³ Davidachea udharonnacher niall kortana ami amkanch he prosn vicharunk zatat: ‘Mhaka solʼlo melltta tednam hanv kitem kortam? Hanv rokddich mhoji chuk manun ghetam vo hanv nimitam ditam? Hanvem kelʼle chukik lagon hanv dusreancher boglantt ghaltam kai? Hanvem kelʼli chuk porot korina zaunk hanv khub vavr kortam kai?’ Bible-ant sanglolea her visvaxi munxank pasun amcheach sarkea oddchonneancho fuddo korunk poddlo astolo. Tor tea vellar, tannim kosle bore gunn dakhoile tacher niall kortana ami amkanch vicharunk zata, ‘Hanv Jehovachea hea visvaxi sevoka sarko koso zaunk xoktam?’

14. Ami amchea sobhentlea bhav-bhoinnam thaun kitem xikonk zata?

¹⁴ Toxench, aiz amchea sobhent aslolea zanntteam ani tornnatteam bhav-bhoinnam koddlean pasun ami zaitem xikonk zata. Udharonnak, tumchea sobhent ghoddie thoddea bhav-bhoinnank sangateancho dobhav, vo famili thaun virodh sosunk poddtta zait vo tanchi bholaiki bori na astoli. Tori astana tim visvaxiponnan Jehovachi seva kortat. Tor tankam aslolea  borea gunnanchi tumi dekh gheunk zata kai? Vo tim tankam asat tea oddchoneancho koso fuddo kortat tachea thaun, tumkam ietat tea oddchoneancho fuddo korunk tumi xikonk xoktat kai? Tor Jehovak visvaxi ravonk borim udharonnam zaun aslolea hea bhav-bhoinnam pasot ami kitlim upkari asat!—Heb. 13:7; Jak. 1:2, 3.

15. Paulun dilʼlo khoincho solʼlo amkam khuxalkaien Jehovachi seva korit ravonk modot korunk xokta?

¹⁵ Ami soglim amchem boreantlem-borem ditat tednam ami sobhent xanti ani ekvott samballunk modot kortat. Poilea xekddeantlea Kristanvam vixim polloum-ia. Tankam veg-vegllim dennim ani zobabdareo asleo. (1 Kor. 12:4, 7-11) Punn haka lagon tannim eka-meka poros borim asat mhunn dakhounk vo sobhent futt poddonk diunk zainaslem. Punn dor eklean ap-aplem kam korit ravon “Kristachi Kudd bandun haddunk” Paulun tankam urba dili. Paulun Efezkarank oxem mhunnttlem: “Oxem ek-ek sandho ap-aplem kam korunk pavta ani Kuddichi ghottai vaddoita. He porim akʼkhi Kudd choddot-vaddot moga vorvim sarki bandon ieta.” (Ef. 4:1-3, 11, 12, 16) Tor Pauluchim utram aikolim, tim sobhent xanti ani ekvott samballunk pavlim. Ani hench aiz ami amchea sobhamnim pasun polloitat.

16. Ami kitem korunk nichov korunk zai? (Hebrevank 6:10)

¹⁶ Tor tumi tumkanch dusream sangata sor korina zaunk nichov korat. Tachea bodlek, Jezu thaun xikat ani tache gunn apnnaunk proitn korat. Toxench, Bible-ant aslolea visvaxi munxanchim ani bori dekh dovorlea tea bhav-bhoinnanchi dekh gheiat. Tor Jehovache sevent tumi tumchem boreantlem-borem korunk vavurtat tednam, ‘Dev onit korina ani soglem tumi kelam tem tachean visronk zaina’ mhunn ugddas dovrat. (Hebrevank 6:10 vachat.) Toxench, tumi Jehovachi seva korunk tumchean zata tem soglem kortat mhunn to polloita tednam to khub khuxal zata mhunn khatri dovrat. Ani khuxalkaien Jehovachi seva korit ravat!