1. Munxank uloupachi tank konnem dilea?

 AMCHI uloupachi tank Jehova Devan amkam dilʼlem ek moladik dennem zaun asa. Tor Jehovan poilea munxak, Adanvank rochlo tednam, to aplea mogall sorginchea Bapa lagim ulounk xoktalo. Ani taka dilole tankek lagon to novim-novim utram ghoddounk xoklo ani soglea zonvarank nanvam diunk xoklo. (Ut. 2:19) Toxench, Jehovan tachea sobit bailek, Evek rochli tednam, poilech pavtti tiche lagim uloun Adanv ekdom khuxal zalo astolo!—Ut. 2:22, 23.

2. Devan dilʼlea denneacho adim ani atam koso vaitt toren uzar zata?

² Punn Devan dilʼlem hem moladik dennem rokddench vaitt toren uzar zaunk laglem. Udharonnak, Soitanan Evek fott marli, ani hea pasot soglim munxam patki ani opurnn zalim. (Ut. 3:1-4) Toxench, Adanvan apnnem kelʼle chukik lagon Evecher ani Jehovacher pasun boglantt ghatlem. (Ut. 3:12) Ani Kainan aplea bhav Abelak jivexim marlea uprant tea vixim Jehovak fott marli. (Ut. 4:9) Toxench, Kainachea sonstintlean ailʼlea Lamekan pasun tachea kallar jietolea hinvsen bhorlolea lokam vixim ek kovita boroilʼli. (Ut. 4:23, 24) Aiz amchea disam vixim kitem? Rajki fuddari lokam hujir fotti ulounk vo burxim utram ulounk fatti soronant tem ami polloitat. Toxench, choddxea pichʼcheramnim gallio martat ani burxim utram uloitat. Tea bhair, iskolant ani kamachea zagear pasun lok gallio martat. Tor vaitt ulovop itlem posorlam tem ami polloitat tednam ho sonvsar kitlo vaitt zala tem amkam kolltta.

3. Ami kitea vixim chotur asonk zai, ani ami hea lekhant kitem polloitolim?

³ Ami chotur nant zalear lok martat teo gallio ani burxim utram aikon ami-i tanchech bhaxen ulounk xoktat. Punn  ami Jehovak manvota tem korunk sodhtat dekhun ami toxem korchimnant. Punn itlench kelear puro kai? Ami amchi uloupachi tank bore toren uzar korunk zai. Tem mhunnttlear Jehovak vakhannʼnni haddunk. Tor hea lekhant (1) porgottnni kortana, (2) mittingek hajir zatat tednam ani (3) her vellar dusream lagim uloitana ami hem koxem korunk zata tem ami polloitolim. Punn tache poilim, ami amchi uloupachi tank bore toren uzar keloli Jehovak kiteak zai tem ami zannam zaum-ia.

4. Malaki 3:16 pormonnem, ami amchi uloupachi tank bore toren uzar keloli Jehovak kiteak zai?

⁴ Malaki 3:16 vachat. Hea versant, jim munxam aplea uloupantlean tim Jehovachi bhirant dovortat ani tachea nanvak man ditat mhunn dakhoitat, tanchim nanvam to ‘ugddasachea pustokar’ boroun dovorta mhunn sanglam. Tor Jehova oxem kiteak korta? Karonn amchea uloupantlean amchea kallzant kitem asa tem kollon ieta. Jezun pasun oxem mhunnttlem: “Kallzantlem bhoron otʼta tench tonddantlea utramnim vhanvta.” (Mt. 12:34) Tor amchea uloupantlean ami Jehovacho kitlo mog kortat tem kollon ieta. Ani aplo mog kortat tim sasnak khuxalkaien novea sonvsarant jielolim Jehovak zai.

5. (a) Amchem ulovop ani Jehovachi bhokti, hanche modem kitem sombond asa? (b) Chitrant dakhoilʼlea pormonnem amchea uloupa vixim ami kitem zannam zaunk zai?

⁵ Jehovak amchi bhokti manvotoli kai na tem pasun amchea uloupacher adarit asa. (Jak. 1:26) Jehovacho mog korinant te lok, dusream lagim ragan uloitat, boddai martat ani dusreank moipas dakhoinant. (2 Tim. 3:1-5) Punn ami Jehovak manvota tem korunk sodhtat dekhun ami tanchea bhaxen zaunk sodhinant. Tor ami fokot porgottnnent ani sobhentuch nhoi, punn dusrim amkam pollounk xokonant tednam pasun, tem mhunnttlear, amchea familichea sodoxiam lagim uloitana pasun ragan nhoi, punn mogan ulounk zai. Tednanch Jehovak amchi bhokti manvotoli.—1 Ped. 3:7.

6. Kimberly-n apli uloupachi tank bore toren uzar keli mhunn kitem zaunk pavlem?

⁶ Ami amchi uloupachi tank bore toren uzar kortat tednam ami Jehovache sevok zaun asat mhunn ami dakhoitat. Toxench amchea bhonvtonnim aslolea lokank pasun “Devachi seva korta ani Tachi seva korina tea monxa modem  ontor” pollounk modot zata. (Mal. 3:18) Ami Kimberly nanvache eke bhoinnichem udharonn polloum-ia. b Tache tticherin taka class-intlea eka dusrea cheddva sangata eka project-acher kam korunk sanglem. Tea project-acher kam kortana tea cheddvan, Kimberly her bhurgeam poros vegllem asa mhunn polloilem. Karonn Kimberly dusreancheo chaddio korinaslem, burxim utram uzar korinaslem punn doiall toren uloitalem. Ani hem polloun tem cheddum ojap zalem. Ani uprant tem Kimberly sangata Bible xikonk laglem. Tor amchem borem ulovop polloun dusrim sotant ietat tednam Jehova khub khuxal zata!

7. Jehovan dilʼlem uloupache dennem tumi koxe toren uzar korunk sodhtat?

⁷ Amkam sogleank amchem ulovop Jehovak man haddtta toxem ani bhav-bhoinnam sangata amchi ixttagot ghott korunk modot zata toxem aslolem zai. Tor ami dusreank amchea “ulovpan . . . bori dekh” koxi dovrunk zata tea vixim thoddeo vatto atam ami polloum-ia.

8. Porgottnni kortana tachea uloupant Jezun amkam ek bori dekh koxi dovorlea?

⁸ Dusrim tumkam rag haddttat zalear pasun doiall toren uloiat ani tankam man diat. Jezu hea prithumer aslo tednam lokamnim tacher zaite khotte arop ghatle. Zoxem, to jevnnak ani soreak lobdolʼlo asa, to Devchara pasot kam korta, Sabatacho dis pallina ani Devak pasun man dina oxem te mhunnttale. (Mt. 11:19; 26:65; Lukas 11:15; Juanv 9:16) Tori astana, Jezun tankam ragan zobab diunk na. Tor aiz pasun amchea sangata konnui ragan uloita zalear ami Jezu bhaxen zaunk zai ani tanchea sangata ragan ulounchem nhoi. (1 Ped. 2:21-23) Punn hem korop sompem na. (Jak. 3:2) Tor amkam koxi modot zaunk xokta?

9. Porgottnni kortana ragan uloina zaunk amkam koxi modot zaunk xokta?

⁹ Porgottnni kortana aiknnaro amcher ragar zata zalear taka ragan zobab dina zaunk ami kitem korunk zata? Sam nanvacho ek bhav mhunntta, “Tea munxan sot zannam zaunchi kitli goroz asa ani to bodlonk xokta, hacher dhean diunk hanv proitn korta.” Thodde pavtti, ulounk to vell sarko naslo mhunn ghoddie aiknnaro ragar zaunk puro. Tor amkam oxem ghoddtta tednam, ami bhoinn Lucia-chi dekh gheunk zata. Ami Jehovak ek lhan magnnem korunk zata ani amkam xant ravonk vo dusreank ragan zobab dina zaunk modot magonk zata.

10. 1 Timotak 4:13-nt sanglolea pormonnem ami kitem korunk zai?

¹⁰ Tumchi xikoupachi kola vaddoiat. Timot ek boro xikoupi aslo. Tori astana, tannem pasun apli xikounchi kola vaddounchi goroz asli. (1 Timotak 4:13 vachat.) Tor ami pasun amchi xikoupachi kola koxi vaddounk zata? Ami adim  fuddench bore toren toiari korunk zata. Oxem kelolean ami bhienastana ani dhiran xikounk pavtolim. Ani oxem korunk amkam zaitim sadhonam asat. Udharonnak, Vachunk ani Xikovnn Diunk Lokx Di hea pustikentlean, toxench Amchem Kristi Jivit ani Porgottnni—Mittingechi Pustika, hantunt aslolea “Porgottnnechea Kamant Uzar Korum-ia” hea bhagantlean, amchi xikoupachi kola vaddounk amkam modot zatoli. Tor hea sadhonancho tumi boro faido ghetat kai?

11. Thoddim bhav-bhoinnam apli xikoupachi kola koxi vaddounk pavleant?

¹¹ Toxench, amchi xikoupachi kola vaddounk ami sobhent aslolea bhav-bhoinnam koddlean xikonk zata. Ami poilim uloilʼlim to Sam nanvacho bhav, borim xikoupi aslolim bhav-bhoinnam koxe toren xikoitat tacher dhean dita, ani uprant apunnui toxench korunk proitn korta. Toxench, Talia nanvachi ek bhoinn, jahir bhaxonnam diunk onubhov aslole bhav eka vixoi-acher koxe toren bhaxonnam ditat tacher bariksannen dhean dita. Oxem kelolean, porgottnnent lok vichartat tea vixoi-ancher tanche lagim ulounk ani tankam bore toren somzaunk tika modot zata.

12. Thoddeank kitem korunk kotthin zata?

¹² Gitam gaun, ani adim fuddench bore toren toiar kelʼle zobab diun ami sogleamnim mittingent bhag gheunk zata. (St. 22:22) Punn oxem korunk thoddeank kotthin zata. Tumkam-i oxench zata kai? Toxem zalear, dusreank gitam gaunk ani zobab diunk koxi modot zalea tem zannam zalolean tumkam-i modot zaunk xokta.

13. Mittingek kallzantlean gitam gaunk tumkam koxi modot zaunk xokta?

¹³ Kallzantlean gitam gaiat. Mittingek gitam gaunk ek mhotvachem karonn mhunnttlear, ami Jehovak mhoima diunk sodhtat. Sara nanvache eke bhoinnik apunn titli bori gavpi nhoi oxem dista. Tori astana, ti gitam gaun Jehovak mhoima diunk sodhta. Hea pasot, ti mittingechea her bhaganchi toiari korta tednam ti gitam gaunk pasun adim fuddench toiari korta. Oxem kortana gitantlim utram mittingechea bhagank koxim zuddlolim asat tem zannam zaunk ti proitn korta. Ti mhunntta, “Oxem kelolean, hanv koxem gaitam tacher nhoi, punn gitantlea utrancher dhean diunk mhaka modot zata.”

14. Tumkam mittingek zobab diunk kotthin zata zalear tumi kitem korunk zata?

¹⁴ Sodanch mittingek zobab diat. Oxem korunk thoddeank khub kotthin zata. Ami poilim uloilʼlim ti Talia nanvachi bhoinn mhunntta, “Dusreank ghoddie khobor na zait, punn dusream hujir ulounk mhaka khub bhirant dista. Ani hea pasot mittingek zobab diunk mhaka khub kotthin zata.” Tori astana, ti mittingek zobab diunk fatti sorona. Oxem korunk, adim fuddench mittingenchi toiari kortana ti ugddas dovorta, ki eka prosnacho poilo zobab lhan ani spoxtt asonk zai. Ti mhunntta, “Mhozo zobab lhan, sadho ani mukhel vixoi-ak zuddlolo asa  zalear tantunt kainch vaitt na. Karonn to bhag korta tea bhavak pasun tosloch zobab aikonk zai.”

15. Mittingek zobab diunchea vixim ami kitem ugddas dovrunk zai?

¹⁵ Punn thodde pavtti dusream hujir ulounk bhienant vo lojenant tim bhav-bhoinnam pasun mittingek zobab diunk fatti soronk puro. Hachem karonn kitem zaunk xokta? Juliet nanvachi ek bhoinn sangta, “Mhozo zobab titlo boro na vo to ekdom sadho asa oxem mhaka dista dekhun thodde pavtti mittingek zobab diunk hanv fatti sortam.” Punn ami ugddas dovrunk zai ki mittingek zobab diunk amchean zata tem soglem ami kelolem Jehovak zai. c Tor thodde pavtti dusream hujir ulounk ami bhietat vo lojetat zalear pasun ami zobab diunk amchean zata titlo proitn kortat tednam Jehova ekdom khuxal zata!

16. Ami kosle torechem ulovop pois korunk zai?

¹⁶ ‘Chaddio vo sogle torechem vaitt ulovop’ pois korat. (Ef. 4:31, Povitr Pustok - Novo Korar) Ami poilim polloilʼlem toxem, eka Kristavan burxim utram kednanch ulounchim nhoi. Punn thodde pavtti amchem ulovop dusreank dukhounk xokta. Udharonnak, ami chotur nant zalear dusri sonskruti, kull vo raxttrantlea lokam vixim ami ghoddie vaitt ulounk xoktat, ani amchea utramnim ami dusreank dukhounk xoktat. Hea vixim ek bhav mhunntta: “Thodde pavtti dusream lagim uloitana hanv fokannam kortalom oxem mhaka distalem. Punn khorem mhunnttlear, mhojea uloupantlean hanv dusreank dukhoitalom. Itlim vorsam porian, mhojea uloupant bodlav korunk mhojea bailen mhaka khub modot kelea. Hanv dusreank dukhoita tea ritin uloitalom tednam hanv ekloch astana ti mhaka bore toren somzaitali.”

17. Dusreank urba melltta tea toren ulounk ami kitem korunk zai?

¹⁷ Dusreank urba melltta tea toren uloiat. Dusreancheo khoddi kaddchea bodlek vo gunngunnchea bodlek ami dusreank xabaski diunk fuddem soronk zai. (Efezkarank 4:29 vachat.) Israelitkaram vixim chintat. Jehovak upkari asonk tankam zaitim karonnam aslim. Tori astana, tim choddxe pavtti gunngunnttalim. Hachem karonn kitem zaunk xokta? Kaleb ani Joshua sangata gelʼlea dha bhediamnim, apunn vochon polloilʼlea desachi khotti khobor dili tednam kitem zalem tem ugddas korat. ‘Akʼkhi Israel porza Moizesacher gunngunnunk lagli.’ (Lok. 13:31–14:4) Tor amkam pasun sodanch gunngunnchi sonvoim asa zalear dusrim pasun toxench korunk lagtolim. Punn dusre vatten gunngunnchea bodlek, ami dusreank xabaski ditat zalear ami tankam urba diunk pavtolim. Jefthahche dhuve vixim chintat. Dor vorsak Israelacheo  dhuvo tika urba diunk voitaleo dekhun Jefthahche dhuvek Jehovachi seva korit ravonk modot zali mhunn ami khatren sangonk zata. (Fudd. 11:40) Sara, zache vixim ami poilim uloilʼlim tem mhunntta: “Ami dusreank xabaski ditat tednam Jehova Dev toxench sobhentlim her bhav-bhoinnam, tancho mog kortat hem zannam zaunk ami tankam modot kortat.” Tor dusreank kallzantlean xabaski diunk ami sondhi sodhunk zai.

18. Stotr 15:1, 2-a pormonnem ami sot kiteak ulounk zai, ani sot ulovop mhunnttlear kitem?

¹⁸ Sot uloiat. Ami Jehovak manvota tem korunk sodhtat zalear ami sot ulounk zai. Karonn Jehova sogle torechea fottincho dves korta. (Mho. 6:16, 17) Aiz zaitea lokank fott marop hantunt kainch vaitt na oxem dista. Punn fott marop sarkem nhoi mhunn Jehova amkam sangta dekhun ami fott marinant. (Stotr 15:1, 2 vachat.) Tor ami fott marop sarkench pois kortat. Toxench dusreank fottounk ami thoddi mahiti pasun lipoinant.

19. Ami uloitana anik kitea vixim chotrai dovrunk zai?

¹⁹ Dusreancheo chaddio korinakat. (Mho. 25:23, NW; 2 Tes. 3:11) Dusrim herancheo chaddio kortat tednam apleacher koso porinnam zata tea vixim Juliet, zache vixim ami poilim polloilʼlem tem oxem sangta: “Dusrim herancheo chaddio kortat tem aikonk mhaka borem disona. Toxench, chaddio korta tea munxacher visvas dovrunk mhaka khub kotthin zata. Karonn aiz tim dusream vixim chaddio kortat. Punn faliam ghoddie tim mhojea vixim chaddio korunk puro.” Tor tumi dusream sangata uloitat tednam dusrim heram vixim chaddio korunk lagtat zalear tem ulovop thoinch bond korun urba dita toslea vixoi-acher ulovop suru korat.—Kol. 4:6.

20. Tumchem ulovop koxem asonk tumi nichov kela?

²⁰ Aiz ami ravtat tea sonvsarant choddso lok vaitt vo pozddim utram uzar kortat. Hea pasot, amchem ulovop Jehova Devak manvota toxem asonk ami khub vavr korunk zai. Tor amchem ulovop Jehova Deva koddlean ek dennem zaun asa, ani hem dennem ami koxem uzar kortat tacher to dhean dita mhunn ami ugddas dovrunk zai. Ami porgottnni kortana, mittingek hajir zatat tednam ani her vellar dusream sangata uloitana Jehovak mhoima melltta tea ritin uloilim zalear to amcher besanv ghaltolo. Beginuch Jehova hea vaitt sonvsaracho nas korcho asa. Ani tea uprant, taka man melltta tea ritin ulounk amkam anikui sompem zatolem. (Judas 15) Tea meren, amchea “tonddantlim utram” taka manvotat toxim asonk ami nichov korum-ia.”—St. 19:14.