TUMKAM kednam-i kitea-i vixim chodduch usko zala kai, vo tumchean tem anik sosunkuch zaunchem na oxem tumkam dislam kai? Amchea modlim zaitim zannam veg-vegllea karonnank lagon usketat, niraxi zatat vo amchean tem anik sosunk zaunchem na oxem amkam dista. Udharonnak, amchea familint konnui duent asa ani tachi ami kallji ghetat astolim. Vo amcho mogacho konnui bhair poddla astolo, vo amkam eka odruxttacho fuddo korunk poddla zait. Hea karonnank lagon amkam ekdom chodd usko zaunk puro, ami niraxi zaunk puro, vo ami hem anik sosunkuch xokonant oxem amkam disonk puro. Khorench, usko amchea mathear dovorlolem ek zhodd vojem koxem zaunk xokta. (Mho. 12:25) Tor amkam usko zata tednam xanti ani khuxalkai mellonk ami kitem korunk zata? a

Amkam Raza Davidachea udharonnantlean modot mellonk xokta. Karonn tannem pasun aplea jivitant zaitea kotthin poristhitincho fuddo kelo. Ani thodde pavtti tacho jiv pasun dhokheant aslo. (1 Sam. 17:34, 35; 18:10, 11) Tor Davidak usko zalo tednam xanti ani khuxalkai mellonk tannem kitem kelem, ani ami tachi dekh koxi gheunk zata?

Davidak ekuch borabor zaitea trasancho fuddo korcho poddlo. Udharonnak, Raza Saulu Davidacho jiv kaddunk sodhtalo dekhun David tachea thaun pollon voitalo tednam kitem ghoddlem tea vixim chintat. David ani tache munis Ziklag-ant ghora portole tednam tanchea dusmanamnim tancheo vostu chorun vheleo, tanchim ghoram lasun uddoilim, ani tanchea familink bondi korun vhelim tem polloun David ani tache munis ekdom niraxi zale. ‘David ani tachea borabor aslolea munxamnim aplo tallo ubarlo ani roddle. Te itle roddle ki tanchea bhitor roddpachi anik xokti uronk na.’ Uprant Davidache munis tacher itle ragar zale ki te ‘taka fatraunk sodhtale.’ (1 Sam. 30:1-6) Hea pasot David anikui niraxi zalo. Tor Davidak ekuch borabor tin vhoddlea trasancho fuddo korcho poddlo. Tache familicho jiv dhokeant aslo, tache munis tacho jiv kaddunk sodhtale ani Raza Saulu pasun tache fattik laglolo. Tor Davidak hea vellar kitlo usko zalo astolo tea vixim chintat.

Punn Davidan kitem kelem? Tannem rokddench “Sorvespora Aplea Deva koddlean boll magun ghetlem.” Koxem? Davidak sodanch Jehova lagim magnneant modot magpachi ani Jehovan taka adim koxi modot kelea tea vixim niall korpachi sonvoim asli. (1 Sam. 17:37; St. 18:2, 6) Hea pasot, kitem korchem tea vixim tannem Jehovachem margdorxon maglem. Ani Jehovachem margdorxon mellʼllea uprant tannem rokddench tacher kam kelem. Taka lagon Jehovan Davidacher ani tachea munxancher besanv ghatlem. Ani hea pasot te tanchea familink vanchounk pavle ani tancheo vostu tankam porot mellʼlleo. (1 Sam. 30:7-10, 18, 19) Tor Davidan khoincheo tin vostu keleo? Tannem magnnem korun Jehovachi modot magli, Jehovan taka adim koxi modot kelʼli tea vixim tannem niall kelo ani Jehovachea margdorxona pormonnem tannem kam kelem. Tor ami Davidachi dekh koxi gheunk zata? Ami tin vatto polloum-ia.

1. Magnnem korat. Amkam usko zata tednam ami magnnem korun Jehova lagim modot ani zannvai magonk zata. Ami magnnem korun amchea kallzant aslolea soglea uskeancho bhar Jehovacher ghaltat tednam amchea jivak borem disonk xokta. Punn amche poristhitik lagon kednam-kednam khub vell porian ami magnnem korunk xokonant zalear ami amchea monant ek lhan magnnem korunk zata. Ani oxem korun, dor ek pavtt ami magnnem kortat tednam Davida bhaxen Jehovacher amkam visvas asa mhunn ami dakhounk zai. Davidan mhunnttlolem: “Sorvespor mhojem Khoddop, mhojem Kottʼtt; mhozo Soddvonnar mhollear mhozo Devuch! To mhojem Khoddop: hanv Taka xeronna ietam.” (St. 18:2) Punn magnnem  kelolean faido zaunk xokta kai? Kahlia nanvachi ek pioneer bhoinn oxem sangta: “Magnnem kelea uprant mhaka monachi xanti melltta. Toxench, Jehova chintʼta tea toren chintunk mhaka modot zata. Ani Jehovacher mhozo visvas anikui vaddtta.” Khorench, magnneank khub xokti asa ani tem Jehova Devan amkam dilʼlem ek dennem, jea udexim usko zata tednam xanti ani khuxalkai mellonk amkam modot zata.

2. Niall korat. Adim tumkam kosle-i oddchonnean-cho fuddo korunk poddlo tednam Jehovan tumkam koxi modot kelʼli tea vixim niall korat. Karonn aiz porian Jehovan tumkam koxe porim modot kelea, ani adim tannem aplea sevokank koxi modot kelʼli tea vixim niall kelolean tumkam tumchea uskeancho fuddo korunk boll mellttolem ani Jehovacher tumcho visvas anik vaddttolo. (St. 18:17-19) Hea vixim Joshua nanvacho ek vhoddil sangta: “Jehovan mhojea khoinchea-khoinchea magnneancho zobab dila tachem hanvem ek list kelʼlem asa. Oxem kelolean, mhaka goroz aslolea umkeach vixoi-a vixim hanvem Jehova lagim magnnem kelem tednam, tannem mhaka koxi modot kelʼli tem ugddas korunk mhaka adar zata.” Khorench, Jehovan amkam adim koxi modot kelʼli tea vixim ami ugddas kortat tednam amkam boll melltta ani usko zata tednam xanti ani khuxalkai melltta.

3. Kam korat. Tumkam usko zata tednam bore nirnnoi gheunk margdorxon mellonk Devachea Utrant sodh korat. (St. 19:7, 11) Zaitea zannank eka umkeach versacher sodh kelea uprant, tem aplea jivitant tannim koxem lagu korunk zata tem anik bore toren somzonk modot zali. Hea vixim Jarrod nanvacho ek vhoddil sangta: “Sodh kelolean eka umkeach versa vixim anik somzonni mellonk ani tantuntlean Jehova mhaka kitem sangonk sodhta tem somzonk mhaka modot zata. Toxench, hanv vachtam tem sot mhunn manun gheunk ani tea pormonnem kam korunk mhaka adar zata.” Tor Jehovachem margdorxon mellonk ami tachea Utrant sodh korunk zai ani tea pormonnem kam korunk zai. Oxem kelear, usko zata tednam amkam xanti ani khuxalkai mellonk xokta.

Davidak usko zatalo tednam xanti ani khuxalkai mellonk taka Jehovache modotichi goroz asli mhunn tannem vollkhon ghetlem. Ani Jehovache modotik lagon to upkari aslo mhunn to oxem mhunnonk pavlo: “Mhozo Dev aslear, khoinchea-i kottʼttachim durgam hanv choddon. Devan mhojea penkttak Aplech ghottaiecho pottʼtto dilo.” (St. 18:29, 32) Amkam zatat te uske vo tras thodde pavtti choddonk zainant toslea vhodd kottʼttanchea durgam sarke disonk puro. Ani hancho amchean fuddo korunk zaunchench na oxem amkam disot. Punn tea vellar Jehovache modotin ami khoinchea-i trasancho fuddo korunk xoktat mhunn ami ugddas dovrunk zai. Tor ami magnnem korun Jehovachi modot magtat, tannem amkam adim koxi modot kelea tea vixim niall kortat, ani tachea margdorxona pormonnem kam kortat zalear Jehova amkam boll ani zannvai ditolo, ani toxench amkam usko zata tednam xanti ani khuxalkai mellonk modot kortolo mhunn ami khatri dovrunk zata!