Soput ghevop mhunnttlear, “Devak sakxi manun utor divop vo bhas divop. Hem khub gombhir zaun asa.” Tem ami tonddan vo boroun diunk xoktat.

Thoddeank disonk puro ki ami soput divop sarkem nhoi. Karonn Jezun mhunnttlolem: “Soput diunchoch nhoi . . . Tumchem ulovop itlench zaum-di: hoi zalear hoi, nhoi zalear nhoi; hache-von ogllem tem vaittovea koddlem ieta.” (Mt. 5:33-37) Punn Somurti khala, thoddea Israelitkarank thoddea poristhitimnim soput diuncho poddttalo, ani Jehovachea visvaxi sevokamnim pasun soput dilʼlo mhunn Jezu zannam aslo. (Ut. 14:22, 23; Sutt. 22:10, 11) Toxench, Jehovan pasun soput dilʼlo mhunn taka khobor asli. (Heb. 6:13-17) Tor ami soput diunchoch nhoi oxem Jezu sangonk sodhinaslo. Punn tachea utrancho orth oso aslo ki, ami gorje bhair vo bexttem koslea-i karonnank lagon soput diuncho nhoi. Punn ami soput ditat tednam ami amchem utor samballunk zai. Karonn ami oxench kelʼlem Jehovak zai.

Tor tumkam konnem-i soput diunk lailo zalear tumi kitem korunk zai? Poilem mhunnttlear, tumkam diunk laila to soput tumi pallunk xoktolim mhunn khatri korun gheiat. Tumchean tem korunk zaunchem na oxem tumkam dista zalear, tumi to soput ghenant zalear odik borem zatolem. Karonn hache vixim Bible sangta: “Angvonn pallunk naslolea poros, korunkuch naslear odik borem.” (Up. 5:4) Dusrem mhunnttlear, tumkam diunk laila tea soputak Bible-antlim khoinchim totvam lagu zatat tem polloiat, ani uprant tumchea ontoskornna pormonnem nirnnoi gheiat. Oslim thoddim totvam atam ami polloum-ia.

Devachea khuxe pormonnem asat tosle soput. Hachem ek udharonn mhunnttlear, Jehovachim Sakxi kazar zatat tednam vhokol-novro eka-mekak ditat tem utor. Hem utor eke torecho soput zaun asa. Karonn vhokol ani novro, tim ‘jivim asom-sor’ eka-mekacho mog kortolim, opurbai kortolim, ani eka-mekak man ditolim mhunn Deva mukhar ani lokam mukhar utor ditat. (Jehovachim Sakxi nant tim kazar zatat tednam ghoddie hinch utram mhunnonant astolim, tori punn tim Deva mukhar ek soput ditat.) Uprant, tim ghov-bail zatat ani tannim jivitbhor kazarachea ekvottant jieunk zai. (Ut. 2:24; 1 Kor. 7:39) Tor kazaracho soput, Devache khuxe pormonnem asa.

Devachea khuxe add voitat tosle soput. Udharonnak, khorim Kristanvam thodde soput dinant. Zoxem, aplea desa pasot zhuzonk, vo aplo bhavarth soddun diunk tim soput diunchim nant. Tannim oxem kelem zalear tim Devachea kaidea add voitat. Karonn Kristanvam hea ‘sonvsarache bhag nhoi.’ Tor tim hea sonvsarachea kestanvamnim ani zhogddea-zhuzamnim bhag ghenant.—Juanv 15:19; Iz. 2:4; Jak. 1:27.

 Amchea ontoskornna adarit gheunk poddot tosle soput. Ami ek soput ditolim kai na, ho nirnnoi gheunchea poilim ami Jezuchea hea utrancher bariksannen niall korunk zai. Jezun mhunnttlolem: “Somrazachem Somrazak diat, ani Devachem tem Devak diat.”—Lukas 20:25.

Hem somzonk ek udharonn polloum-ia. Chintat ki eka bhavak passport korunk vo dusrea eka desacho nagrik zaunk thoinchea sorkarak soput diuncho poddtta. Punn to soput Devachea kaidea add voita zalear to bhav soput diuncho na. Karonn tannem oxem kelem zalear tachem ontoskornn taka uprant khatolem. Tor oxem zaina zaunk, tea desacho sorkar thodde pavtti tea soputant ghoddie bodlav korunk tea bhavak porvangi diunk xokta.

Hea toren bodlav kelolo soput tea bhavan ghetlo zalear to ghoddie, Romkarank 13:1-ant sanglolea totva pormonnem korunk xokta. Thoim mhunntta: “Sogllim monxam sorkari odhikariank khaltim ravchim.” Tor tea soputant Devachea kaidea add voita toslem kainch na zalear to soput ghevop chukicho nhoi mhunn to bhav ghoddie nirnnoi gheunk puro.

Punn ek soput ghetana eka Kristanvak kosli-i vost uzar korun vo koslo-i ixaro korun to soput diuncho poddtta zalear kitem? Toxem korop sarkem zatolem kai na tem tannem aplea ontoskornna pormonnem tharaunk zata. Adlea kallar, Romi ani Cytiani lok apli tolvar uzar korun soput ghetale. Karonn oxem korun te tanchea zhuzachea devak sakxi manun soput ditale mhunn te dakhoun ditale. Toxench, Grek lok soput ditale tednam te aplo hat sorgar ubartale. Oxem korun, te ditat to soput aikopi ek dev asa ani taka tannim hixob diunk zai hem te vollkhon ghetale mhunn te dakhoun ditale.

Hem mat khorem, ki Jehovacho ek sevok soput ditana raxttra sombondit, vo khotte bhokte sombondit kosli-i vost uzar korcho na. Punn korttant Bible-acher hat dovrun taka soput diunk lailo zalear kitem? Tannem ugddas dovrunk zata ki Jehovachea adlea visvaxi sevokamnim pasun soput ditana ixaro vo khunna kelʼli. (Ut. 24:2, 3, 9; 47:29-31) Tor Bible-acher hat dovrun soput divop hantunt kainch vaitt na mhunn ek Kristanv tharaunk puro. Punn oxem kortana, ami Devak sakxi manun sot uloitolim mhunn soput ditat mhunn ugddas dovrunk zai. Tor amkam koslo-i prosn vicharlear pasun ami sot ulounk toiar asonk zai.

Jehova sangata amchi ixttagot amkam ekdom moladik asa. Tor hea pasot, amkam kednam-i soput diuncho vo na hea vixim nirnnoi gheunk poddlo zalear, to Bible-antlea totvam add vochona ani tea vixim amchem ontoskornn uprant amkam khaunchem na mhunn ami khatri korun gheunk zai. Oxem korunk ami magnnem korunk zai ani tea vixim bariksannen chintunk zai. Ani ami soput gheunk nirnnoi ghetlo zalear ami to pallunkuch zai.—1 Ped. 2:12.