1. Amkam kosli khatri asa?

 AMI Jehovachim ixttam zalolean to amcho khub mog korta, ani ami ekdom borem jivit jielolim taka zai mhunn ami zannant. (Rom. 8:35-39) Toxench, Bible-antlim totvam apnnailolean amkam sodanch faido zata mhunn amkam khatri asa. (Iz. 48:17, 18) Punn ami chintunk nant toslea trasancho amkam fuddo korunk poddtta tednam, ami kitem korunk zata?

2. Amkam koslea oddchonneancho fuddo korcho poddot, ani tea vellar amchea monant kosle prosn ieunk xoktat?

² Jehovachea soglea sevokank oddchonneo astach. Udharonnak, familintlo konnui amkam nirax korta zait. Vo eka gombhir duensak lagon ami Jehovache sevent poilim poros chodd korunk xokonant astolim. Vo eka odruxttak lagon amkam ghoddie zaite tras sosunk poddttat astole. Vo amche patiennek lagon amkam dhumallo sosunk poddtta zait. Oxem ghoddtta tednam, amchea monant osle prosn ieunk xoktat: ‘Hem soglem mhaka kiteak zata? Hanvem kitem tori vaitt kelam kai? Jehova mhojer ragar asa kai?’ Tumkam-i kednam oxench dislam? Toxem zalear, niraxi zainakat. Jehovachea zaitea visvaxi sevokank pasun oxench bhoglam.—St. 22:1, 2; Hab. 1:2, 3.

3. Stotr 34:19-antlean ami kitem xiktat?

³ Stotr 34:19 vachat. Hea stotrant sanglolea don mukhel mudʼdeancher dhean diat: (1) Borea vo nitivont munxank tras sosunk poddttat. (2) Tancho fuddo korunk Jehova tankam modot  korta. Hem to koso korta? Ek vatt mhunnttlear, amchea jivitant voir-sokol zatolench mhunn ugddas dovrunk Jehova amkam modot korta. Apli seva korun amkam khuxalkai mellttoli mhunn Jehovan amkam bhas dilea tem khorem. Punn sodʼdheak amchem jivit uskeam mekllem astolem oxem tannem sangonk na. (Iz. 66:14) Tori astana, novea sonvsarant ami ek borem jivit jietolim mhunn ugddas dovrunk to amkam urba dita. (2 Kor. 4:16-18) Tea mhunnosor, ami bhorvonso soddinastana dor disa tachi seva korit ravonk to amkam modot korta.—Vil. 3:22-24.

4. Hea lekhant ami kitem polloitolim?

⁴ Tor atam ami, adlea kallar jielolea, toxench amchea kallar jietolea Jehovachea visvaxi sevokam thaun kitem xikonk zata tem polloum-ia. Ani ami polloitolim toxim, ghoddie amkam-i osleach oddchonneancho fuddo korunk poddot. Punn ami Jehovacher patieun ravlear, to amkam sodanch samballttolo. (St. 55:22) Hea udharonnancher dhean ditana, ami amkanch vicharunk zata: ‘Hanv tanchea zagear aslom zalear kitem kortolom aslo? Jehovacher mhozo visvas vaddounk tanchim udharonnam mhaka koxim modot kortat? Hanvem tanchi dekh koxi gheunk zata?’

5. Labanak lagon Jakobak kosle tras sosunk poddle? (Masikachem fuddlem chitr polloiat.)

⁵ Adlea kallar jietolea Jehovachea sevokank, chintunk nant tosle tras sosunk poddle. Ami Jakobachem udharonn pollounk zata. Tachea bapain taka, Jehovachi seva korpi tancho soiro, Labana sorxim vochonk sanglem, ani tachea dhuvam modlea eklea lagim kazar zaunk sanglem. Ani oxem kelear Jehova taka besanvam ditolo mhunn taka khatri dili. (Ut. 28:1-4) Jakoban toxench kelem. To Kanaanacho ganv soddun Labana lagim gelo. Labanak, Lea ani Rakel nanvacheo don dhuvo asleo. Jakob, Labanachi dhaktti dhuv, Rakelachea mogan poddlo. Ani tachea lagim kazar zaunk, sat vorsam poriant, Labana pasot kam korunk toiar zalo. (Ut. 29:18) Punn Jakoban chintlolem toxem zaunk na. Rakelak kazar korun diunchea bodlek, Labanan apli vhoddli dhuv, Leak Jakoba lagim kazar korun dili. Ani Jakoban anik sat vorsam aplea pasot kam kelem zalear, to taka eka sumana uprant, Rakela lagim kazar zaunk ditolo mhunn sanglem. (Ut. 29:25-27) Toxench, Jakoban Labana pasot kam kelem tea vellar, Labanan tachea sangata onʼneai kelo. Tannem soglim mellon 20 vorsam poriant Jakobak fottoilo!—Ut. 31:41, 42.

6. Jakobak anik koslea trasancho fuddo korunk poddlo?

⁶ Jakobak anikui trasancho fuddo korunk poddlo. Tachi ek vhodd famil asli. Punn tache put, eka-meka sangata xantin jienasle. Tannim tancho bhav, Juzek, chakor mhunn vikun dilo. Itlench nhoi, Jakobache don put, Simeonan ani Levin, Jakobachem nanv piddʼddear kelem, ani Jehovachea nanvak opman haddlo. Tea bhair, tachi mogall bail, Rakel, dusrea putak zolm ditana meli. Ani desant bhuk poddli tednam, Jakobak zanntte piraier Ejipt desant voichem poddlem.—Ut. 34:30; 35:16-19; 37:28; 45:9-11, 28.

7. Jakobak apli maniotai asa mhunn Jehovan koxem dakhoilem?

⁷ Itle sogle tras sosunui, Jehovacher ani tannem jeo bhas dilʼleo, tancher tacho visvas halonk na. Ani Jakobak apli maniotai asa mhunn Jehovan dakhoun dilem. Udharonnak, Laban taka fottoitalo tednam, Jehovan Jakobachi girestkai khub vaddoili. Ani itlo-i temp melo mhunn chintʼtalo to tacho put Juze, taka porot mellʼllo tednam, to Jehovak kitlo upkari zalo astolo nhoi! Jehova sangata Jakobachi ghott ixttagot asli dekhun to hea soglea oddchonneancho fuddo korunk pavlo. (Ut. 30:43; 32:9, 10; 46:28-30) Tor Jehova sangata amchi pasun ixttagot ghott asta tednam, koslea-i  oddchonneancho fuddo korunk amkam modot zata.

8. Raza Davidak kitem korunk khub itsa asli?

⁸ Raza David Jehova pasot jem korunk sodhtalo tem soglem korunk taka mellonk na. Udharonnak, Jehova pasot Devmondir bandunk taka khub itsa asli. Hea vixim tannem provadi Nathanak sanglem. Tednam Nathanan mhunnttlem: “Tujea monant asa tem sogllem kor, kiteak Sorvespor tuje sovem asa.” (1 It. 17:1, 2) Him utram aikon Davidak kitli urba mellʼlli astoli nhoi! Tea pasot, itlem vhoddlem kam korunk to ghoddie rokddoch toiari korunk laglo astolo.

9. Davidan chintunk na tosli khobor taka melltta tednam to kitem korta?

⁹ Punn rokddoch, Nathan Davidak tannem chintunk na tosli khobor dita. Karonn “tech rati,” Jehova Nathanak, David nhoi, punn tachea putam modlo eklo aplea pasot Devmondir bandtolo mhunn sangta. (1 It. 17:3, 4, 11, 12) Hem aikolea uprant David kitem korta? To Jehova pasot jem kam korcho aslo, tantunt bodlav korta. Tem mhunnttlear, tachea put Solomonak, Devmondir bandunk goroz poddttoleo teo vostu ani poixe ektthaim korunk to vavr korta.—1 It. 29:1-5.

10. Jehovan Davidak koslem besanv dilem?

¹⁰ David aplea pasot Devmondir bandchona mhunn sanglea uprant, Jehova rokddoch tachea sangata ek korar korta, ani tachea sonsti modlo eklo sodankal razvottki choloitolo mhunn taka bhas dita. (2 Sam. 7:16) Novea sonvsarant, Kristachea Ek Hozar Vorsanchea Razvottkechea Vellar, Jezu Krist, zo aplea sonsti modlo eklo, raj choloita mhunn Davidak kollttolem tednam, to kitlo khuxal zatolo tem ami chintunk zata. Tor Davidachea hea ghoddnnentlean amkam kollon ieta ki Jehovache sevent ami korunk sodhtat tem soglem amkam korunk mellona zalear pasun, ami chintunk na toslea her vattamnim Jehova amkam besanvam diunk xokta.

11. Poilea xekddeantlea Kristanvamnim chintololem toxem zaunk na zalear pasun, tankam koslim besanvam mellʼllim? (Itihas 6:7)

¹¹ Poilea xekddeantlea Kristanvank pasun chintunk nant toslea oddchonneancho fuddo korunk poddlo. Zoxem, tim Devachea Rajea pasot axeun ravtalim. Punn tem Raj kednam ietolem tem tankam khobor naslem. (D.I. 1:6, 7) Tor tannim kitem kelem? Tim porgottnnechem kam korit ravlim. Ani Jehova hea kamacher koso besanv ghalta tem tannim polloilem.—Itihas 6:7 vachat.

12. Akʼkhea sonvsaracher dukoll poddlo tednam poilea xekddeantlea Kristanvamnim kitem kelem?

¹² Ek pavtti “akʼkhea sonvsaracher” dukoll poddlo. (D.I. 11:28) Ani poilea xekddeantlea Kristanvank pasun tacho porinnam bhogunk poddlo. Tea vellar, tankam kitle tras sosunk poddle astole tea vixim chintat. Familichea vhoddilank, te tanchea familichem pott koxe bhortole tea vixim usko zalo astolo. Ani apli porgottnni vaddounk sodhtalim tea tornnatteancher koslo porinnam zalo zait? Ghoddie dukoll somplea uprant, tim porgottnnechea kamant chodd vavr kortolim mhunn tannim chintlem zait. Punn tanchi poristhiti koxi-i asum, tannim zata tea toren porgottnnechem kam kelem ani aplea lagim asloleo vostu Judeiantlea bhav-bhoinnam sangata vanttunk tim khuxal aslim.—D.I. 11:29, 30.

13. Dukollachea vellar, poilea xekddeantlea Kristanvank Jehovan koslim besanvam dilim?

¹³ Tor dukollachea vellar, hea Kristanvank koslim besanvam mellʼllim? Bhav-bhoinnam thaun gorjecheo vostu mellʼlleo tannim, Jehova tancho koso samball korta tem polloilem. (Mt. 6:31-33) Ani tankam modot kelʼli, tea bhav-bhoinnam sangata tanchem natem ghott zalem astolem. Toxench, denngim dilim vo her vattamnim modot keli tea bhav-bhoinnank, dusreank dilolean kitli khuxalkai melltta tem kollon ailem. (D.I. 20:35) Khorench, tannim aplea poristhiti pormonnem bodol  kelo dekhun, Jehovan tancher sogleancher besanv ghatlem.

14. Barnabasak ani apostl Pauluk kitem ghoddlem, ani tacho porinnam kitem zalo? (Itihas 14:21, 22)

¹⁴ Zaite pavtti, poilea xekddeantlea Kristanvank okosmat dhumallo sosunk poddlo. Apostl Paulu ani Barnabas, Listrant porgottnni kortale tednam kitem ghoddlem tea vixim chintat. Survatek, lokamnim tankam boro korun ieukar dilo, ani tanchem aikolem. Punn uprant, thodde virodhi aile, ani tannim “lokank aple vatten kele.” Tednam Paulu ani Barnabasachem aikolʼlem, tanchech modlea thoddea lokamnim Pauluk fatramnim marlo, ani to mela mhunn somzon taka voddun xarachea bhair vhelo. (D.I. 14:19) Tori astana, Paulu ani Barnabas dusrea eka zagear vochon porgottnni korit ravle. Oxem kelolean te “zaite xis” korunk pavle. Toxench, tanchea utram ani udharonna thaun bhav-bhoinnank urba mellʼlli. (Itihas 14:21, 22 vachat.) Tor dhumallo sosunk poddlear pasun tannim soddun diunk na dekhun, zaitea bhav-bhoinnank faido zalo. Ami pasun soddun dinastana Jehovan amkam dilʼlem kam korit ravtat tednam, to amkam besanvam ditolo.

15. Bhav A. H. Macmillan-achea onubhovantlean tumi kitem xiklim?

¹⁵ 1914 poilim, Jehovacho lok, kitem tori ghoddchem asa mhunn vatt polloit aslo. Hea vixim, ami bhav A. H. Macmillan-acho onubhov polloum-ia. Tea tempa voilea zaitea bhav-bhoinnam bhaxen, bhav Macmillan-ak pasun apunn rokddoch sorgar voitolo oxem distalem. Setembr 1914-nt eka bhaxonnant tannem oxem mhunnttlem: “Hem chodd korun mhojem nimannem jahir bhaxonn zaun asa.” Punn tem tachem nimannem bhaxonn asonk na. Karonn bhavan uprant oxem boroilem: “Amchea modlim thoddim zannam ghoddie, sorgar chodduch begin vochonk sodhtalim.” Tannem fuddem mhunnttlem: “Punn khorem mhunnttlear, ami porgottnnechea kamant bizi ravonk zai.” Ani bhavan toxench kelem. To urben porgottnni korit ravlo. Military-nt bhorti zaunk nant dekhun bondkhonnint ghatlolea zaitea bhavank urba diunk taka sondhi mellʼlli. Ani zanntte piraier pasun, to chukonastana mittingek voitalo. Jehovache sevent bizi ravlolean bhavak koxi modot zali? 1966-ant, morchea thoddea disam poilim tannem oxem boroilem: “Mhozo bhavarth poilim bhaxen azunui ghott asa.” Bhav Macmillan-an amchea pasot kitlem borem udharonn dovorlam nhoi! Amcheo oddchonneo, ami chintʼtalim tache poros chodd temp sosunk poddttat zalear pasun, ami bhav Macmillan-a bhaxen thir ravum-ia.—Heb. 13:7.

16. Bhav Herbert Jennings ani tache bailek okosmat koslea poristhiticho fuddo korunk poddlo? (Jakob 4:14)

¹⁶ Thodde pavtti, Jehovachea zaitea sevokanchi bholaiki okosmat bigoddtta. Oxench, bhav Herbert Jennings-ak b ghoddlem. Tache jivitache kannient, to ani tachi bail, Ghana desant khuxalkaien mixinori seva kortalim mhunn tannem sanglem. Punn ek dis okosmat taka ek gombhir mansik duens (mood disorder) asa mhunn taka kollon ailem. Bhavan Jakob 4:14-ntlea utrancho ulʼlekh kelo, ani hi tannem “kednam chintunkuch na tosli poristhiti asli” mhunn sanglem. (Vachat.) Tannem boroilem: “Kitem ghoddlolem tem ami manun ghetlem. Tea pasot, Ghana des, toxench amchea lagxilʼlea ixttank soddun, ami [ilaz korunk] porot Canada ailim.” Bhavak ani tache bailek khub tras sosunk poddle. Tori astana, Jehovan tankam visvaxiponnan apli seva korit ravonk modot keli.

17. Bhav Jennings-achea onubhovantlean bhav-bhoinnank koso faido zalo?

 ¹⁷ Bhav Jennings-an aple jivitache kannient jem boroilem, tea vorvim zaitea zannancher khub boro probhav poddlo. Udharonnak, eke bhoinnin oxem boroilem: “Ho lekh samko mhojea kallzak laglo . . . Bhav Jennings-ak tachea duensak lagon, taka aslolo sueog soddun diunk poddlo mhunn hanvem vachlem tednam, mhoje poristhiti vixim sarkem chintop dovrunk mhaka modot zali.” Toxench, eka vhoddilan oxem boroilem: “Hanv dha vorsam poriant vhoddil mhunn seva kortalom. Punn eka mansik duensak lagon mhaka mhoji zobabdari soddchi poddli. Hanv bhav-bhoinnancheo jivitacheo kanneo vachtalom tednam, mhaka itlem niraxiponn bhogtalem ki hanv kainch faideacho nhoi oxem mhaka distalem . . . Punn bhav Jennings-an koxe toren soddun diunk na tem hanvem vachlem tednam, mhaka-i urba mellʼlli.” Tor hantuntlean ami xiktat ki chintinant toslea oddchonneanchea vellar pasun, ami thir ravtat tednam, ami dusreank urba diunk pavtat. Ani amkam zai toxem zaina tednam pasun, ami amcho bhavarth ghott samballun ani soddun dinastana, dusreank ek bori dekh dovrunk zata.—1 Ped. 5:9.

18. Hea chitramnim dakhoilam toxem, Nigeria-ntle eke vidve bhoinni thaun tumi kitem xiklim?

¹⁸ COVID-19 pidde sarkea duensank lagon, amchea bhav-bhoinnank zaite tras sosunk poddleat. Udharonnak, Nigeria-nt ravpi eke vidve bhoinni lagim thoddexech poixe ani jevonn aslem. Ek sokallim, tanche lagim fokot ekuch map tandull urleat tem polloun, tichea dhuven tika, tea uprant tim kitem jevtolim kai mhunn vicharlem. Tednam bhoinnin taka, tanche lagim anik poixe ani jevonn uronk na, punn Zarefathachea vidve bhaxen, nimannem jevonn randun, tannim Jehovacher purnn visvas dovrunk zai mhunn sanglem. (1 Raz. 17:8-16) Tim donparam kitem jevtolim tea vixim chintchea poilinch, bhav-bhoinnamnim tankam jevnnacheo vostu haddun dileo. Ani tem tankam don sumanam poros chodd disam khatir puro aslem. Bhoinnin tichea dhuvek jem sanglolem tacher Jehova kitlea bariksannen dhean ditalo  tem tika kollʼllem mhunn tinnem sanglem. Khorench, chintunk nant toslea trasancho fuddo kortana ami Jehovacher patielim zalear, ami taka anik lagim soronk pavtolim.—1 Ped. 5:6, 7.

19. Bhav Aleksey Yershov-an koslo dhumallo soslo?

¹⁹ Halinchea vorsamnim amchea zaitea bhav-bhoinnank, tannim chintunk na toslea dhumalleacho fuddo korcho poddlo. Hea vixim Russia-nt ravtolea bhav Aleksey Yershov-acho amkam onubhov asa. Tannem 1994-nt bautizm ghetlo. Ani tea vellar tea desant Jehovachi bhokti korunk thoddi svotontrtai asli. Punn vorsam gelim toxim, poristhiti bodolʼli. 2020-ant odhikari bhavachea ghorant sodh korunk gusle, ani tachem zaitem saman tannim vhelem. Thoddea mhoineam uprant, sorkari odhikareamnim, bhav opradi mhunn tacher arop ghatle. He arop video rekorddingancher adarit asle, jim eka vorsa poros maiz, Bible obheas korta mhunn dhong korpi eka munxan bhavak kollonastana kaddlolim. Kitlo vhoddlo ghat aslo nhoi!

20. Bhav Yershov-an Jehova sangata apli ixttagot koxi ghott kelea?

²⁰ Punn bhav Yershov-ak sosunk poddlolea dhumallea thaun kitem tori borem zalem kai? Hoi. Jehova sangata tachi ixttagot anikui ghott zali. Bhav sangta: “Hanv ani mhoji bail sangata mellon anikui chodd pavtti magnnem kortat. Ani Jehovachi modot nastana hanv hea trasancho fuddo korunk pavchoch naslo mhunn mhaka kollon ailam.” To fuddem mhunntta: “Svotacho obheas kelolean niraxiponn pois korunk mhaka modot zata. Adlea visvaxi sevokanchea udharonnancher hanv niall kortam. Ani Bible-antlea zaitea ghoddnneam thaun, xant ravon Jehovacher visvas dovrop kitlem gorjechem tem hanv zannam zalam.”

21. Hea lekhant ami kitem xiklim?

²¹ Tor hea lekhant ami kitem xiklim? Hea sonvsarant thodde pavtti ami chintunk na tosli poristhiti amcher ieunk xokta. Punn oslea vellar ami Jehovacher bhorvonso dovorlear, to amkam sodanch modot kortolo. Ani hea lekhachea mukhel versant sanglam toxem, “borea monxak upodre-koxtt bharim oddchitat, punn tea soglleantlo Sorvespor taka nivarta.” (St. 34:19) Tor ami amchem dhean trasancher nhoi, punn Jehova amkam koso samballtta tacher dovrum-ia. Tednam ami apostl Paulu bhaxen oxem mhunnonk pavtolim: “Mhaka boll dita Tachea sangata hanv sogllem korunk xokta.”—Filp. 4:13, Povitr Pustok—Novo Korar.