1. Jezun aplem poilem vizmit kelem tednam kitem ghoddlem tem sangat.

 29 K.X.-achea xevottak, Jezun apli porgottnni suru keli tednam kitem ghoddlem tem polloum-ia. Ek dis Jezuk, tachi avoi Mariek, ani tachea thoddea xisank, Nazaretachea utʼtore vatten aslolea Kana ganvant eka kazarak apounnem melltta. Kazar zata tea familichi, Marie ixtt aslolean, kazarak ailoleank modot korunk ti hat-bott ghalta. Punn okosmat thoim soro kabar zata. b Ghoddie lok chodd ailʼlo dekhun oxem zalem astolem. Ani hea vixim dusreank kollʼllem zalear vhokol-novro ani tanche familik khub loz zatoli asli. Tor Marie soddsoddit vochon aplea putak oxem sangta: “Tancho drakxancho soro somplo.” (Ju. 2:1-3) Tea vellar Jezu kitem korta? To ek vizmit korun udkacho “boro drakxancho soro” korta.—Ju. 2:9, 10.

2-3. (a) Jezun koslim vizmitam kelim? (b) Jezun kelʼlea vizmitam vixim hea lekhant ami kitem polloitolim?

² Jezun porgottnni keli tednam tannem zaitim vizmitam korun hozaramnim lokank modot keli. c Zoxem, don pavtti vizmitam korun tannem 5,000 dadleank ani uprant 4,000 dadleank jevonn dilem. Ani tea vellar thoim ailolea tanchea bail-bhurgeank mezlear, Jezun 27,000-am poros chodd lokank jevonn dilem. (Mt. 14:15-21; 15:32-38) Toxench, Jezun tankam  piddentlim pasun borim kelim. (Mt. 14:14; 15:30, 31) Tor Jezun kelʼlim vizmitam polloun to lok kitlo ojap zalo astolo tea vixim chintat.

³ Jezun kelʼlea vizmitam thaun amkam zaitem xikonk melltta. Tor amcho bhavarth ghott kortat toslim thoddim lisanvam ami hea lekhant polloitolim. Toxench, Jezun vizmitam kelim tednam tannem dakhoilʼli doia-maia ani khaltikaiechi dekh ami koxi gheunk zata tem-ui ami polloitolim.

4. Jezuchea vizmitantlean amkam konna vixim xikonk melltta?

⁴ Jezun kelʼlea vizmitantlean amkam fokot tachech vixim nhoi, punn tachea Bapa vixim pasun kollon ieta. Khorem mhunnttlear, vizmitam korunk Jezuk Jehovanuch xokti dili. Tea pasot, Itihas 10:38-ant oxem mhunnttlam: “Devan taka povitr xokten makhlo ani taka boll dilem, ani to akʼkhea desant borem kam korit ravlo ani Soitan sotaitalo tankam bore korit ravlo, hem tumi aikolam, karonn Dev tachea sangata aslo.” Toxench, Jezun jem kitem mhunnttlem ani kelem tantuntlean Jehova kitem chintʼta ani taka koxem bhogta, tem Jezun ekdom bore toren dakhoun dilem mhunn ami ugddas dovrunk zai. Tantunt tannem kelʼlim vizmitam pasun mellon asat. (Ju. 14:9) Tor tachea vizmitantlean ami xikonk zata tim tin lisanvam atam polloum-ia.

5. Jezun vizmitam kiteak kelim? (Matev 20:30-34)

⁵ Poilem mhunnttlear, Jehova ani Jezu amcho khub mog kortat. Hea prithumer astana, lokank aslole dukh-tras kaddun uddounk apli xokti uzar korun, Jezuk tancho kitlo mog asa tem tannem dakhoun dilem. Eka vellar, don kuddʼddeamnim bob marun Jezu lagim modot magli. (Matev 20:30-34 vachat.) Tea uprant kitem zalem tacher dhean diat. Jezuk tanche “churchure disle,” ani uprant tannem tankam bore kele. “Churchure disle” hea utrak uzar kelʼlea Grik utracho orth mhunnttlear, kallzantlean doia-maia disop. Jezuk dusreancho mog aslo dekhun taka osli doia-maia asli. Ani heach pasot, tannem bhukelʼleank jevonn dilem ani eka koddkarak pasun boro kelo. (Mt. 15:32; Mk. 1:41) Khorench, ‘doia-maia’ aslolo amcho Jehova Dev ani tacho Put amcho khub mog kortat. Toxench, amkam tras zatat tednam tankam dukh zata mhunn ami khatri dovrunk zata. (Luk. 1:78; 1 Ped. 5:7) Ani heach pasot munxakullache sogle tras kaddun uddounk te axeun ravleat!

6. Jehovan Jezuk kitem korunk xokti dilea?

⁶ Dusrem mhunnttlear, munxakullache sogle tras kaddun uddounk, Jehovan Jezuk xokti dilea. Ami amchea bollan zoit vhoronk xokonant toslea soglea oddchonneancher zoit vhoronk Jezuk xokti asa, mhunn tannem kelʼlea vizmitantlean kollon ieta. Zoxem, munxakullachea trasanchem mull karonn, tem mhunnttlear patok, ani patkak lagon amkam bhogunk poddtta to porinnam, mhunnche duensam ani moronn, hem kaddun uddounk Jezuk xokti asa. (Mt. 9:1-6; Rom. 5:12, 18, 19) Tor tannem kelʼlea vizmitantlean, to “soglea torechim” duensam kaddun uddounk xokta ani meloleank pasun jivont korunk xokta mhunn amkam khatri melltta. (Mt. 9:35; Ju. 11:43, 44) Tea bhair, taka vadollam xant korunk ani lokam voile noxtte dut bhair kaddunk pasun xokti asa. (Mk. 4:37-39; Luk. 8:2) Tor Jehovan aplea Putak itli xokti dilea mhunn zannam zaun, amkam khub bhuzvonn melltta nhoi!

7-8. (a) Jezun kelʼlea vizmitam thaun amkam kosli khatri melltta? (b) Novea sonvsarant tumi khas korun khoinchem vizmit pollounk axetat?

⁷ Tisrem mhunnttlear, Devachea Rajea udexim fuddarak amkam zaitim besanvam mellttolinch mhunn ami khatri dovrunk zata. Jezu hea prithumer aslo tednam tannem zaitim  vizmitam kelim. Hantuntlean, fuddarak pasun Devachea Rajeacho sorgincho Raza zalolean to hea akʼkhea prithumer vizmitam kortolo mhunn amkam xikonk melltta. Tor Jezuche razvottke khala ami kitem onubhovtolim? Amkam sogleank bori bholaiki astoli. Karonn, Jezu sogle torechim duensam kaddun uddoitolo ani opurnn munxank borim kortolo. (Iz. 33:24; 35:5, 6; Prok. 21:3, 4) Toxench, bhuk vo odruxttank lagon amkam kednanch tras sosunk poddche nant. (Iz. 25:6; Mk. 4:41) Tea bhair, “fonddamnim asat” tim amchim soglim mogachim jivont zatolim tednam tankam porot mellon ami kitlim khuxal zatolim nhoi! (Ju. 5:28, 29) Tor novea sonvsarant tumi khas korun khoinchem vizmit pollounk axetat?

⁸ Jezun vizmitam kelim tednam tannem khaltikai ani doia-maia dakhoili. Ami pasun hea gunnanchi dekh gheunk zai. Tor atam ami Jezun kelʼlim don vizmitam polloum-ia. Poilim ami, Jezun Kana ganvant kazara vellar kelʼlea vizmitacher dhean dium-ia.

9. Jezun koslea karonnak lagon Kana ganvant zalʼlea kazarak vizmit kelem? (Juanv 2:6-10)

⁹ Juanv 2:6-10 vachat. Kazarak soro kabar zalo tednam, Jezun kitem tori korunkuch zai aslem kai? Na. Bible-ant, Mesias ojapache ritin soro kortolo mhunn khoinch bhasaunni korunk na. Punn hea vixim chintat. Tumchea kazarak, jevnna-khannache manddavollint kitem tori unnem zalem zalear, tumkam koxem distolem aslem? Kazar zata tea vhokol-novreak ani tanche familik loz zalʼli Jezuk naka asli. Ani taka tanchi doia-maia disli. Tea pasot, ami  survatek polloilʼlem toxem, tannem ek vizmit kelem. Tannem sumar 390 liter udkacho, ekdom boro soro kelo. Ghoddie urlolo soro, tankam fuddarak uzar korunk vo to soro vikun tankam poixeanche ritin modot zaunk, Jezun udarponnan itlo soro kelo astolo. Jezun oxem korunk karonn kitem-i asum, punn hea pasot tem novem kazari zoddpem ekdom upkari aslem!

10. Juanv odheai 2-ant amkam kosli mhotvachi mahiti dilea? (Chitr pasun polloiat.)

¹⁰ Juanv pustokachea odheai 2-ant, hea vizmita vixim dilole thodde mhotvache mahiticher dhean diat. Sogleanchem dhean apleacher oddun haddunk, Jezun svota zaun tea udkachea moddkeamnim udok bhorunk na. Tachea bodlek, tannem sevokank toxem korunk sanglem. (Versam 6, 7) Ani udkacho soro kelea uprant, Jezun svota zaun to soro vhoron jevnnachea dekhrekh korpeak diunk na. Tachea bodlek, tannem toxem korunk sevokank sanglem. (Vers 8) Kazarak ailʼlea sogleam mukhar soreachem kop hatant dhorun, Jezun vorʼran oxem mhunnonk na: “Hanvem atanch kelʼlo soro chakun polloiat.”

11. Jezuchea vizmitantlean ami kitem xiktat?

¹¹ Jezun kelʼlea vizmitantlean ami khaltikaie vixim ekdom mhotvachem lisanv xiktat. Tannem kelʼlea vizmita vixim ani khorem mhunnttlear tannem kelʼlea khoinchea-i vostu vixim, tannem kednanch svotachi vhoddvik korunk na. Tachea bodlek, tannem khaltikaien sodanch aplea Bapak sogli mhoima dili. (Ju. 5:19, 30; 8:28) Ami Jezuchi dekh ghetat zalear, ami khaltim astolim ani kednanch svotachi vhoddvik korchimnant. Ami Jehovache sevent kitem-i korum, ami sodanch amkam seva korunk sueog mellʼlla tea Devachi vhoddvik korum-ia ani sogli mhoima taka dium-ia. (Jer. 9:22, 23) Karonn Jehovachi modot nastana, ami kitem mhunn korunk xoktolim aslim?—1 Kor. 1:26-31.

12. Ami anik koxe toren Jezuchea khaltikaiechi dekh gheunk zata? Ek udharonn diun somzaiat.

¹² Ami anik koxe toren Jezuchea khaltikaiechi dekh gheunk zata? Hea vixim chintat. Ek vhoddil, eka tornnattea sobhechea sevokak, tachem poilem jahir bhaxonn toiar korunk khub modot korta. Hea pasot to tornnatto bhav, ek urbebhorit bhaxonn diunk pavta. Ani tachem bhaxonn aikon bhav-bhoinnam khub khuxal zatat. Tor mitting zalea uprant, konn tori tea vhoddilak oxem sangta: ‘Tea bhavan ekdom borem bhaxonn dilem nhoi!’ Tea vellar, tea vhoddilan oxem mhunnchi goroz asa kai: ‘Hoi, punn taka modot korunk hanvem khub vavr kelo’? Vo tannem khaltikaien oxem mhunnonk zata kai: ‘Hoi khorench, hanv tachea pasot khub khuxal’? Ami khaltim astat tednam, ami dusream pasot kelʼlea borea kamank lagon svotachi vhoddvik korchimnant. Punn Jehova soglem polloita ani amchea vavracho valor korta hem zannam zalolean ami dhadoxi astolim. (Mt. 6:2-4; Heb. 13:16 sor korat.) Khorench, Jezuchi dekh gheun ami khaltim astat tednam ami Jehovak manvololim zatat.—1 Ped. 5:6.

13. Nain xara lagim pavtoch Jezun kitem polloilem, ani tannem kitem kelem? (Lukas 7:11-15)

¹³ Lukas 7:11-15 vachat. Jezun porgottnni suru korun dedd vorsa uprant ghoddlole eke ghoddnne vixim chintat. Jezu Nain xarant gelʼlo. Tem Galiliechem xar, Shunem xara thaun chodd pois naslem. Ani Shunem xarant, provadi Elishan 900 vorsam poilim, eke bailechea putak jivont kelʼlo. (2 Raz. 4:32-37) Jezu xarachea darvonttea lagim pavlo tednam, eka melʼlea munxak purunk vhortale tem tannem polloilem. To ekdom dukhacho vell aslo. Karonn eke vidvecho ekloch opurbaiecho put bhair poddlolo. Punn tem moddem vhortana ti vidva ekttich nasli. Tiche sangata xarantlo zaito lok aslo. Tednam Jezun kitem kelem? Jezun  tankam thamboilim ani te vidve pasot ekdom ojapachem kitem tori kelem. Tannem tichea putak jivont kelo. Xubhvortomanamnim sanglolea Jezun kelʼlea tin jivontponnam modem, suttavem korun sanglolem hem poilem jivontponn zaun asa.

14. Lukas odheai 7-ant, amkam kosli mhotvachi mahiti dilea? (Chitr pasun polloiat.)

¹⁴ Hea ghoddnne vixim Lukas odheai 7-ant dilʼle thodde mhotvache mahiti vixim chintat. Khontint aslole te avoicher Jezuchi ‘nodor poddli’ ani uprant “taka tiche churchure disle” hacher tumi dhean dilam kai? (Vers 13) Ghoddie ti avoi tea moddea mukhar choltana khub roddttali tem polloun Jezuchem kalliz bhoron ailem ani taka tichi doia-maia disli astoli. Jezuk fokot tiche churchure disonk nant, punn taka tichi kitli doia-maia asli tem tannem dakhoilem. To tichea sangata mogan uloilo ani tika mhunnttlem: “Roddonaka.” Tea uprant tannem tika modot korunk kitem tori kelem. Tem mhunnttlear, Jezun tichea putak jivont kelo ani “taka tachea avoik dilo.”—Versam 14, 15.

15. Jezun vidvechea putak jivont kelʼlea vizmitantlean ami kitem xiktat?

¹⁵ Jezun vidvechea putak jivont kelʼlea vizmitantlean ami kitem xiktat? Aplea mogachea meloleam pasot dukh kortat tankam doia-maia dakhovop kitlem gorjechem tem ami xiktat. Jezu bhaxen ami meloleank jivont korunk xokonant tem khorem. Punn aplea meloleanchem dukh kortat tancher bariksannen dhean diun ami tankam doia-maia dakhounk zata. Oxem korunk ami poilem panvl gheun, amchea utramnim ani kornneamnim tankam modot korunk ani bhuzvonn diunk, amchean zata tem soglem korunk zata. d (Mho. 17:17; 2 Kor. 1:3, 4; 1 Ped. 3:8) Ami doiallaien kelʼleo lhan kornneo pasun tankam khub urba ani bhuzvonn diunk xoktat.

16. Chitrant dakhoilam toxem, aple dhuvek mornnant sanddlolea eke avoichea onubhovantlean tumi kitem xiktat?

¹⁶ Hea vixim ek onubhov polloum-ia. Thoddea vorsam poilim, sobhent git gaitana, laginch asloli ek avoi roddtta tem eke bhoinnin polloilem. Tem git jivontponnachea bhorvonxea vixim aslem. Ani thoddeach disam poilim, tea avoichi lhan dhuv bhair poddloli. Hem tea  bhoinnik khobor aslem. Tor ti tea avoi lagim geli, tichea khandar hat dovorlo ani urlolem git tichea sangata gailem. Tea vellacho ugddas korun ti avoi oxem sangta: “Bhav-bhoinnam pasot mhozo mog khub vaddlo.” Ti tea disa mittingek geli mhunn khub upkari asli. Ti mhunntta: “Raj-ghorantuch amkam modot melltta.” Tor aplim mogachim meleant mhunn zanchem “mon kollvollta vollvollta” tankam doia-maia dakhounk ami lhanxem kitem kelear pasun, Jehova tem polloita ani tacho valor korta mhunn ami khatri dovrunk zata.—St. 34:18.

17. Hea lekhantlean ami kitem zannam zalim?

¹⁷ Bible-ant, Jezun kelʼlea vizmitam vixim sanglolea ghoddnneancher ami obheas kortat tednam, amkam khub urba mellonk xokta. Karonn tantuntlean, Jehova ani Jezu amcho khub mog kortat, munxakullache sogle tras kaddun uddounk Jezuk xokti asa, toxench Devachem Raj hea prithumer raj choloitolem tednam, fuddarak sanglolim besanvam amkam mellttolinch mhunn ami zannam zatat. Tor hea vizmitam vixim bariksannen chintʼtana, ami Jezuche gunn koxe apnnaunk zatat tacher niall korum-ia. Tumi ghoddie tumchea svotachea obheasant vo Kuttumbik Bhokte vellar, Jezun kelʼlea anikui vizmitam vixim xikonk dhei dovrunk zata. Tantuntlean tumi koslim lisanvam xiktat tacher dhean diat. Ani uprant, tumi xikleant tem herankui sangat. Oxem kelolean, tumkam kitli urba mellttoli ani tumi dusreankui kitli urba diunk pavtolim tea vixim chintat!—Rom. 1:11, 12.

18. Ami fuddlea lekhant kitem polloitolim?

¹⁸ Jezuchea porgottnnechea xevottak, tannem tisrem jivontponn kelem. Ani hem Bible-ant sanglolem, tannem kelʼlem nimannem jivontponn zaun asa. Punn hem jivontponn vegllem aslem. Karonn, moron char dis zaun gelʼlea tachea lagxilʼlea ixttak Jezun jivont kelo. Tor Xubhvortomanant boroilʼlea hea vizmita thaun ami kitem xiktat? Ani jivontponnachea bhorvonxeacher ami amcho bhavarth koso ghott korunk zata? Hea prosnanche zobab ami fuddlea lekhant polloitolim.