1. Ami mittingek kiteak zobab ditat?

 AMI mittingek kiteak hajir zatat? Mukhel karonn mhunnttlear, Jehovak vakhannʼnni diunk. (St. 26:12; 111:1) Toxench, hea kotthin vellar ami eka-mekak urba diunk pasun hajir zatat. (1 Tes. 5:11) Ani mittingek zobab diun ami heo donui vostu korunk pavtat.

2. Mittingechea khoinchea bhagamnim amkam zobab diunk sondhi melltta?

² Dor sumanak amkam mittingent zobab diunk sondhi melltta. Zoxem, sumanachea xevottache mittingek, Pahrogopur Obheasant amkam zobab diunk mellttat. Toxench, sumanachea modlea mittingek, Bible-antlim Motiam, Sobhecho Bible Obheas ani prosn aslolea her bhagamnim amkam zobab diunk sondhi melltta.

3. Zobab diunk amkam kosleo oddchonneo ieunk xoktat, ani Hebrevank 10:24, 25-antlean amkam koxi modot zata?

³ Ami soglim Jehovak vakhannʼnni diunk, ani bhav-bhoinnank urba diunk sodhtat. Mittingent zobab diun, oxem korunk amkam ek bori sondhi asa. Punn toxem korunk amkam oddchonneo ieunk xoktat. Tem mhunnttlear, amkam bhirant disonk xokta vo zobab diunk umed asa zalear pasun, amkam zai  title pavtti sondhi mellona astoli. Tor amkam koxi modot zaunk xokta? Apostl Paulun, Hebrevank boroilʼlea chittint tannem kitem sanglolem tem ami ugddas dovrunk zata. Ektthaim mellon ievop kitlem mhotvachem tea vixim sangtana ami ‘eka-mekak urba diunk vavrunk zai,’ oxem tannem mhunnttlem. (Hebrevank 10:24, 25 vachat.) Tor amchea sadea zobaba thaunui bhav-bhoinnank urba mellonk xokta mhunn ami ugddas dovortat tednam, ami hat ubarunk fattim sorchimnant. Toxench, amkam zai title pavtti zobab diunk sondhi mellona zalear pasun, dusreank sondhi mellʼlli mhunn ami khuxal astolim.—1 Ped. 3:8.

4. Hea lekhant ami khoinche tin mudʼdhe polloitolim?

⁴ Tor hea lekhant, zobab diunk thoddinch zannam aslolea lhan sobhent, toxench, zobab diunk zaitim zannam aslolea vhoddlea sobhent ami eka-mekak koxi urba diunk zata tem polloum-ia. Tea bhair, eka-mekak urba diunk ami kosle toreche zobab diunk zai tem-ui polloum-ia.

5. Eka lhan sobhent vo grupant ami eka-mekak koxi urba diunk zata?

⁵ Eka lhan sobhent vo grupant chodd zannam asonant. Ani thodde pavtti bhag kortolea bhavak, prosn vicharlea uprant matso vell ravonk poddot. Oslea vellar, mitting kabaruch zaina oxem ghoddie amkam disot. Tor ami kitem korunk zata? Ami zobab diunk zaite pavtti hat ubarunk zata. Oxem kelolean, dusreankui chodd pavtti zobab diunk urba mellonk xokta.

6-7. Amkam zobab diunk bhirant dista zalear ami kitem korunk zata?

⁶ Zobab diunchea vixim chintunuch tumkam gham suttʼtta kai? Zaitea bhav-bhoinnank oxench zata. Oslea vellar tumi kitem korunk zata? Tumi oxeo thoddeo vatto sodhunk zatat, jea vorvim tumchi bhirant unni zatoli ani tumi bhav-bhoinnank urba-i diunk pavtolim. Tem tumi koxem korunk zata?

⁷ Fattlea vorsamnim Pahrogopur-achea lekhamnim dilʼlea suchounneantlean tumkam faido zaunk xokta. b Udharonnak, bori toiari korat. (Mho. 21:5) Tumi vixoi jitle bore toren somzon ghetolim, titloch zobab diunk tumkam sompem zatolem. Toxench, lhan-lhan zobab diat. (Mho. 15:23; 17:27) Tumi thoddeach utrancho zobab ditat tednam, tumkam titli bhirant dischi na. Toxench, zaite mudʼde aslole vhodd-vhodd zobab diunchea bodlek, tumi lhan zobab dilolean, bhav-bhoinnakui te somzotole. Ani tumi kallzantlean zobab ditat tednam, tumi bori toiari kelea ani to vixoi bore toren somzoleant, mhunn sogleank kollon ietolem.

8. Tumi zobab diunk kortat to vavr Jehova koso lekhta?

⁸ Hantuntleo thoddeo suchounneo apnnailea uprant pasun, tumkam eka poros chodd zobab diunk bhirant dista zalear kitem? Tumi zobab diunk zo vavr kortat tacho Jehova valor korta mhunn tumi khatri dovrunk zata. (Luk. 21:1-4) Tumchea lagim zata tachea poros chodd korunk, Jehova opekxa korina. (Filp. 4:5) Tor tumi kitle zobab diunk xoktat tem zannam zaiat, toxem korunk dhei dovrat, ani uprant tumchi bhirant pois korunk Jehova Deva lagim magnnem korat. Survatek tumi fokot ek lhan zobab diunk dhei dovrunk zata.

9. Vhoddle sobhent kosli oddchonn ieunk xokta?

⁹ Sobhent zaitim porgottnnaram asat zalear, amkam ek veglli oddchonn asonk xokta. Chodd bhav-bhoinnam hat ubartat dekhun, amkam zobab diunk sondhich mellona astoli.  Oxench, Diana nanvache eke bhoinnik ghoddlem. c Tika zobab diunk khub avoddtta. To tiche bhoktecho ek bhag, tea vorvim ti dusreank urba diunk xokta, ani Bible-ant ti xikta tacher aplo bhavarth ghott korunk xokta, oxem ti manta. Punn ti eke vhoddle sobhecho bhag zali tednam, tika chodd pavtti zobab diunk mellonasle. Ani thodde pavtti, tika akʼkhe mittingek ekui zobab diunk mellonaslo. Ti sangta: “Hanv samkem bejar zalem. Hanvem ek vhoddlo sueog hogddailo oxem mhaka dislem. Ani hem porot-porot zata tednam, hem mudʼdom zata kai, oxem mhaka distalem.”

10. Zobab diunk sondhi mellonk ami kitem korunk zata?

¹⁰ Diana-k ghoddlam toxem tumkam-i kednam zalam kai? Hoi zalear, tumi anik hat ubarchimnant punn vogi boson mitting aikotolim, oxem tumchea monant ieit. Punn toxem korchea bodlek, zobab diunk proitn korit ravat. Tumkam sondhi mellonk tumi kitem korunk zata? Tumi dor eke mittingek zaite zobab diunk toiari korunk zata. Oxem kelolean, tumkam survatek sondhi mellona zalear pasun, tumkam uprant sondhi mellonk xokta. Toxench, tumi Pahrogopur Obheasa pasot toiari kortat zalear, dor ek peregraf, lekhachea vixoi-ak koso zuddlolo asa tacher tumi dhean diunk zata. Oxem kelolean, lekhacher bhasabhas zata tednam, tumi bore zobab diunk pavtolim. Tea bhair, Bible-antlim kholaiechim sotam sangleant, tea peregrafancher zobab diunk thoddea bhav-bhoinnank kotthin zait. Tor tumi osle zobab diunk toiari korunk zata. (1 Kor. 2:10) Punn hem soglem kelea uprant pasun, tumkam zobab diunk mellona zalear kitem? Tumi mittingechea poilim, bhag kortolea bhavak, tumi khoincho zobab diunk sodhtat tem sangonk zata.

11. Filipkarank 2:4-ant amkam kitem korunk urba dilea?

¹¹ Filipkarank 2:4 vachat. Devachea preronnan, apostl Paulun, Kristanvank, dusreank kitem faideak poddttolem tem pollounk urba dili. Ami ho solʼlo mittingent koso apnnaunk zata? Amchea bhaxen her bhav-bhoinnam pasun zobab diunk sodhtat mhunn ami ugddas dovrunk zai.

12. Mittingent herank urba diunk ek ekdom bori vatt kitem zaun asa? (Chitr pasun polloiat.)

 ¹² Hea vixim chintat. Tumi tumchea ixttam sangata uloitat tednam, tankam ulounk sondhi dinastana, soglea vellar tuminch uloitolim kai? Na nhoi? Teach bhaxen, mittingent pasun zata titlea bhav-bhoinnamnim zobab dilolo amkam zai. Khorem mhunnttlear, tankam urba diunk, tanchea patienni vixim ulounk tankam sondhi divop, ek ekdom bori vatt zaun asa. (1 Kor. 10:24) Ami hem koxem korunk zata tem polloum-ia.

13. Zobab diunk zaitea zannank sondhi mellonk ami kitem korunk zata?

¹³ Poilem mhunnttlear, zobab diunk zaitea zannank sondhi mellonk, ami lhan zobab diunk zatat. Hea vixim vhoddilamnim ani onubhov aslolea her porgottnnaramnim, dusreank ek dekh dovrunk zata. Ani dusrem mhunnttlear, ami ek lhan zobab ditat zalear pasun, ami zaitea mudʼdeam vixim sangchem nhoi. Peregrafant asa tem soglem ami sanglem zalear, dusreank sangonk chodd kainch urchem na. Udharonnak, hea peregrafant don mudʼdeam vixim sanglam. Te mhunnttlear, ami lhan zobab diunk zai ani chodd mudʼdeam vixim sangchem nhoi. Tor zobab diunk tumkam poilim sondhi mellʼlli zalear, fokot ekuch mudʼdea vixim sangat.

14. Ami kitle pavtti hat ubartolim tem tharaunk ami kitem korunk zai? (Chitr pasun polloiat.)

¹⁴ Ami zobab diunk kitle pavtti hat ubartolim tem tharaunk ami somjikai dakhounk zai. Ami porot-porot hat ubartat zalear, amchench nanv gheunk, bhag kortolea bhavacher ami dobhav ghalunk xoktat. Oxem kelear, her bhav-bhoinnank zobab diunk sondhi mellchi na. Ani tim niraxi zaun, hat ubarunk fattim sortolim.—Up. 3:7.

15. (a) Amkam zobab diunk sondhi mellona zalear ami kitem korchem nhoi? (b) Bhag kortolea bhavan kitem ugddas dovrunk zai? (“ Tum Bhag Korta Zalear” hem boks polloiat.)

¹⁵ Obheasa vellar, zaitim bhav-bhoinnam hat ubartat tednam, amkam zai title pavtti zobab diunk mellona. Vo ghoddie amkam ek zobab pasun diunk mellona. Oslea vellar amkam dukh zata tem khorem. Punn ami tem kallzak lavun gheunchem nhoi.—Up. 7:9.

16. Zobab ditat tea bhav-bhoinnank ami koxi urba diunk zata?

¹⁶ Amkam zai title pavtti zobab diunk sondhi mellona zalear, ami her bhav-bhoinnanche zobab dhean diun aikonk zatat, ani mittinge uprant tankam xabaski diunk zata. Amche zobab aikon tankam jitli urba mellttoli asli, titlich urba tankam xabaski diun mellonk xokta. (Mho. 10:21) Khorench, dusreank xabaski divop tankam urba diunk anik ek vatt zaun asa.

17. (a) Bhurgeank zobab diunk toiar kortana avoi-bapaimnim kitem ugddas dovrunk zai? (b) Video-nt dakhoilʼlea pormonnem, kitem kelolean bhurgeamnim boro zobab diunk zata? (Futtnott pasun polloiat.)

¹⁷ Ami mittingent eka-mekak anik koxe toren urba diunk zata? Tumi avoi-bapui zaun asat zalear, tumchea bhurgeank tanchea piraie pormonnem zobab diunk modot korat. (Mt. 21:16) Thodde pavtti gombhir vixoi, zoxem kazari jivitant ietat teo oddchonneo, vo noitik vixoi, hancher bhasabhas asta. Punn tea obheasant bhurgeamnim zobab diunk zatat, tosle-i ek vo don peregraf asonk xoktat. Toxench, tumchim bhurgim hat ubartat title-i pavtti tankam kiteak sondhi mellchina tem somzonk tankam modot korat. Oxem kelolean, tanchea bodlek dusreank sondhi melltta tednam, tim niraxi zaunchimnant.—1 Tim. 6:18. d

18. Zobab ditana amcheruch dhean haddchea bodlek ami kitem korunk zata? (Mhonnʼnneo 27:2)

¹⁸ Amkam sogleank, Jehovak mhoima melltta  ani bhav-bhoinnank urba ditat tosle zobab diunk ek bori sondhi asa. (Mho. 25:11) Ami kednam-i amcho onubhov sangtat tednam, amchea vixim ami chodd ulounchem nhoi. (Mhonnʼnneo 27:2 vachat; 2 Kor. 10:18) Tachea bodlek, Jehova Devacher, tachea Utracher ani amchea bhav-bhoinnancher dhean voita tosle zobab ami dium-ia. (Prok. 4:11) Punn peregrafantlo prosn amcho onubhov sangonk asa zalear, ami to sangonk zata. Zoxem, fuddlea peregrafacho (b) prosn osoch asa.

19. (a) Mittingek dusreank kitem faideak poddttolem tacher dhean dilolean kitem zaunk pavtolem? (Romkarank 1:11, 12) (b) Mittingek zobab diunchea vixim tumkam kitem chodd borem dista?

¹⁹ Ami kosle toreche zobab diunk zai tea vixim kaide nant tem khorem. Punn ami sogleamnim eka-mekak urba melltta tosle zobab diunk proitn korunk zai. Hacho orth, amkam thodde pavtti chodd zobab diunk poddot. Vo thodde pavtti amkam zobab diunk sondhi mellʼlli mhunn dhadoxi zaun, dusreank zobab diunk sondhi melltta mhunn ami khuxal asonk zai. Hea toren, mittingek dusreank kitem faideak poddttolem tacher ami dhean ditat tednam, ami “ekamekak dhir [“urba,” NW]” diunk pavtolim.—Romkarank 1:11, 12 vachat.