1-2. Novo sonvsar ieta mhunnosor ami kitem korit ravonk zai?

 JEHOVAN hea noxttea sonvsaracho nas korun ek novo sonvsar haddttolo mhunn bhas dilea. Haka lagon ami tache khub upkari asat. (2 Ped. 3:13) Hem to kednam kortolo mhunn amkam khobor na. Punn atanchi poristhiti polloilear amkam kollon ieta ki to dis pois na.—Mt. 24:32-34, 36; D.I. 1:7.

² Tori astana, ami sotant kitlim-i vorsam aslear pasun, to dis ieta mhunnosor ami amcho bhavarth anikui ghott korit ravonk zai. Na zalear, Devan ji bhas dilea tacher amcho bhavarth unno zatolo. Ani apostl Paulun bhavarth unno zavop ‘amkam sompeponnim veddo ghalta toslem ek patok’ zaun asa mhunn sanglem. (Heb. 12:1, Povitr Pustok—Novo Korar) Tor amcho bhavarth ghott samballunk, novo sonvsar ietoloch mhunn je purave asat tancher ami sodanch bariksannen chintunk zai.—Heb. 11:1.

3. Hea lekhant ami kitem polloitolim?

³ Tor hea lekhant, novo sonvsar ietoloch mhunn Jehovan ji bhas dilea, tacher ami khoinchea tin vattamnim amcho bhavarth ghott korunk zata tem ami polloitolim. Teo mhunnttlear: (1) soddvonne vixim niall korun, (2) Jehovak kitli xokti asa tea vixim chintun, ani (3) Jehova sangata amchi ixttagot ghott kortat toslim kamam korun. Toxench, Jehovan Habakukak zo sondex dilʼlo, tea vorvim aiz amcho bhavarth koso ghott zata, tem pasun ami polloitolim. Punn poilim, aiz amkam fuddo korunk poddttat tea khoinchea poristhitimnim ami amcho bhavarth ghott korunk zai tem polloum-ia.

 AMKAM KHOINCHEA PORISTHITIMNIM GHOTT BHAVARTH ASONK ZAI?

4. Ami kosle nirnnoi ghetana amkam ghott bhavarth asonk zai?

⁴ Dor disa, ghott bhavarth asonk zai tosle zaite nirnnoi amkam gheunk poddttat. Zoxem, ixttam, monoronjon, xikxonn, kazar, bhurgim ani kama vixim. Tor ami amkanch vicharunk zata: ‘Hanv ghetam tea nirnnoi-antlean, hea noxttea sonvsaracho beginuch nas zaun novo sonvsar ietolo, hachi mhaka khatri asa mhunn dison ieta kai? Vo aiz mouza korum-ia, faleam konnem polloila, oslem chintop aslolea lokam bhaxen mhoje nirnnoi asat kai?’ (Mt. 6:19, 20; Luk. 12:16-21) Novo sonvsar beginuch ietolo mhunn amkam ghott bhavarth asa zalear, ami ekdom bore nirnnoi ghetolim.

5-6. Oddchonnechea vellar amkam ghott bhavarth kiteak asonk zai? Ek udharonn diat.

⁵ Tech bhaxen, amkam oslea oddchonneancho pasun fuddo korunk poddtta, jea vellar amkam ghott bhavarthachi goroz asta. Zoxem, dhumalle, gombhir duens, vo amkam niraxi kortat tosleo her oddchonneo sosunk poddot. Poilim ghoddie amchean tem sosunk zatolem oxem amkam disot. Punn choddxe pavtti zata toxem, ti oddchonn khub temp porian urta tednam, thir ravonk ani Jehovachi seva khuxalkaien korit ravonk amkam ghott bhavarthachi goroz asa.—Rom. 12:12; 1 Ped. 1:6, 7.

⁶ Ami ek oddchonn sostat tednam, novo sonvsar begin ieuncho na oxem amkam disonk xokta. Punn hacho orth, amcho bhavarth oskot asa, oxem nhoi. Oxem ami kiteak mhunnonk zata? Hea udharonnacher dhean dium-ia. Gimachea disamnim ekdom chodd gormi zata tednam, pavsallo begin ieuncho na, oxem amkam disonk xokta. Punn to ietoloch mhunn ami zannant. Teach bhaxen, ami ekdom niraxi astat tednam, novo sonvsar begin ieuncho na oxem amkam disonk xokta. Punn amkam ghott bhavarth asa zalear, to ietoloch mhunn amkam khobor astoli. (St. 94:3, 14, 15; Heb. 6:17-19) Ani amkam hi khatri asa zalear, ami Jehovak amchea jivitant sodanch poilo zago diunk pavtolim.

7. Ami kiteacher dubhavchem nhoi?

⁷ Amkam porgottnnechem kam korunk pasun ghott bhavarthachi goroz asa. Karonn Devachea novea sonvsara vixim asloli “bori khobor” ami porgottʼttat tednam, toxem kednanch zaunchem na oxem zaito lok mhunnttat. (Mt. 24:14; Ez. 33:32) Punn ami tanchea bhaxen kednanch dubhavchem nhoi. Hea pasot ami amcho bhavarth vaddoit ravonk zai. Hem ami koxem korunk zata tacheo tin vatto polloum-ia.

SODDVONNECHER NIALL KORAT

8-9. Soddvonne vixim niall kelolean amcho bhavarth koso ghott zaunk xokta?

⁸ Amcho bhavarth ghott korunk ek vatt mhunnttlear, soddvonne vixim niall korop. Soddvonn ek guarantee zaun asa ki Jehovan dilʼleo sogleo bhas to purnn kortolo. Jehovan soddvonnechi manddavoll kiteak keli, ani oxem korunk tannem kitem kelem, tea vixim ami bariksannen niall kortat tednam, novea sonvsara vixim tannem dilʼli bhas purnn zatolich mhunn amcho bhavarth vaddtta. Oxem ami kiteak mhunnonk zata?

⁹ Soddvonnechi manddavoll korunk, Jehovan kitem soglem kelem, tea vixim chintat. Jehovan aplea ekleach opurbaiechea Putak, zo taka sogleam-von chodd lagxilʼlo aslo, taka ek poripurnn munxachea rupan sorgar thaun prithumer dhaddlo. Jezun hea prithumer sogle toreche tras sosle. Ani uprant khub vollvolle sosun to melo. Munxank thoddeach vellachem borem jivit diunk amcho mogall Bap aplea Putak itle tras sosun moronk ditolo aslo kai? Na.  (Ju. 3:16; 1 Ped. 1:18, 19) Tor Jehovan itlem vhoddlem mol farik kelem dekhun, to novea sonvsarant munxank sodankal jieunk ditolo mhunn amkam khatri melltta.

JEHOVAK KITLI XOKTI ASA TEA VIXIM CHINTAT

10. Efezkarank 3:20-a pormonnem, Jehovak kitem-kitem korunk xokti asa?

¹⁰ Amcho bhavarth vaddounk anik ek vatt mhunnttlear, Jehovak kitli xokti asa tacher niall korop. Tache lagim itli xokti asa ki to apleo sogleo bhas purnn korunk xokta. Hem khorem, ki Jehovan novea sonvsarant sasnak jivit jieunchi ji bhas dilea ti kednanch zaunchi na mhunn zaitea lokank dista. Punn Jehova zaite pavtti munxam kednanch korunk xokchimnant tosleo bhas dita mhunn ami ugddas dovrunk zai. Karonn to Sorvpodvedar Dev zaun asa. (Job 42:2; Mk. 10:27) Tor Jehova pokeo bhas kortolo, oxem tumkam dista?—Efezkarank 3:20 vachat.

11. Jehovan purnn kelʼli ek osli bhas sangat, ji munxachea nodren zaunkunch xokona oxem distalem. (“ Chintunk Nant Tosleo Bhas Purnn Zaleo,” hem boks polloiat.)

¹¹ Adlea kallar Jehovan aplea sevokank dilʼleo bhas, jeo munxanche nodren zaunkuch xokonasleo teo koxeo purnn keleo tea vixim chintat. Tannem Abrahamak ani Sarak, tanche zanntte piraier tankam ek put zolmotolo mhunn sanglem. (Ut. 17:15-17) Toxench, tannem Abrahamak tachi sonsot Kanaan desant voitoli mhunn pasun sanglem. Abrahamachi sonsot zaun aslolim Israelitkaram zaitim vorsam Ejiptant koidi aslim tednam, Jehovan dilʼli bhas purnn zaunchich na oxem ghoddie dislem zait. Punn Jehovan sanglolem toxench zalem. Uprant, Jehovan zanntte Elizabetak, tika ek bhurgo zolmotolo mhunn sanglem. Tea bhair, tannem ankvar Mariek, ti aplea Putak zolm ditoli mhunn sanglem, jea udexim tannem Eden bagent hozaramnim vorsam poilim dilʼli bhas purnn zatoli asli!—Ut. 3:15.

12. Jehova kitlo xoktivont asa, tem amkam Joshua 23:14 ani Izaias 55:10, 11-ntlean koxem kollon ieta?

¹² Jehovan kosleo bhas dileo ani tannem teo koxeo purnn keleo, tea vixim ami chintʼtat tednam, Jehovak khub xokti asa mhunn amkam kollon ieta. Ani Jehovan novea sonvsara vixim kelʼli bhas purnn zatoli mhunn amcho bhavarth anik ghott zata. (Joshua 23:14; Izaias 55:10, 11 vachat.) Hea vorvim, ti bhas purnn zatolich mhunn somzon gheunk ami herankui modot korunk pavtolim. Novo sorg ani nove prithume vixim Jehovan svota zaun oxi bhas dilea: “Him utram khatrechim ani sotachim.”—Prok. 21:1, 5.

JEHOVA SANGATA IXTTAGOT GHOTT KORTAT TOSLIM KAMAM KORAT

13. Mittinge udexim amcho bhavarth koso ghott zata? Somzaiat.

¹³ Amcho bhavarth ghott korunk tisri vatt mhunnttlear, Jehova sangata amchi ixttagot ghott kortat toslim kamam korop. Udharonnak, mittinge udexim amkam koso faido zata tem chintat. Hea vixim amkam Anna nanvache eke bhoinnicho onubhov asa. Ti zaitea vorsam thaun veg-vegllea torechi purnn vellachi seva korta. Ti mhunntta: “Mittinge udexim mhozo bhavarth ghott samballunk modot zata. Manchier thaun uloita to bhav, titlo boro xikoupi nhoi, vo to novem kaim sangona zalear pasun, choddxe pavtti hanv jem aikotam tantuntlean mhaka Bible-achi anik bori somzonni melltta. Ani hea vorvim mhozo bhavarth ghott zata.” b Toxench, amcho bhavarth ghott kortat toslea bhav-bhoinnanche zobab ami aikotat tednam ami khub khuxal zatat.—Rom. 1:11, 12; 10:17.

14. Porgottnni kelolean amcho bhavarth koso ghott zata?

¹⁴ Ami porgottnni kortat tednam pasun amcho bhavarth ghott zata.  (Heb. 10:23) 70-am poros chodd vorsam thaun Jehovachi seva korpi bhoinn, Barbara, oxem mhunntta: “Hanvem sodanch polloilam ki porgottnnechem kam kelolean mhozo bhavarth vaddtta. Fuddarak Jehova kitem kortolo tea vixim hanv dusreank sangtam title-i pavtti mhozo bhavarth anikui ghott zata.”

15. Svotacho obheas kelolean amcho bhavarth koso ghott zata? (Chitram pasun polloiat.)

¹⁵ Tea bhair, ami svotacho obheas kortat tednam amcho bhavarth ghott zata. Susan nanvache eke bhoinnik ti kednam obheas kortoli tea vixim vell tharailolean tika modot zalea mhunn ti sangta. Ti mhunntta: “Hanv Aitarak, fuddlea sumanachea Pahrogopur Obheasachi toiari kortam. Somar ani Mongllarak, hanv sumanache modle mittinge pasot toiari kortam. Ani urlole dis hanv her vixoi-ancher obheas kortam.” Tor ti chukonastana tharailolea vellar obheas korta dekhun ticho bhavarth ghott korit ravonk tika modot zalea. Toxench, Irene nanvachi ek bhoinn sangta ki Bible-antlea bhasaunneancher obheas kelolean ticho bhavarth ghott zala. Tinnem zaitim vorsam mukhel ofisant seva kelea. Ti mhunntta: “Jehovan sanglolea bhasaunneantli bariksannechi mahiti pasun koxe toren ghoddon ailea tem hanv polloitam tednam hanv ojap zatam.” c

‘TEM PURNN ZATOLENCH’

16. Jehovan Habakukak sanglolim utram aiz amkam-i lagu zatat mhunn ami kiteak khatri dovrunk zata? (Hebrevank 10:36, 37)

¹⁶ Thoddim Jehovachim sevokam khub vorsam thaun hea noxttea sonvsaracho kednam nas zatolo kai mhunn vatt polloit asat. Munxanche nodren Jehovachi hi bhas purnn zaunk chodd vell lagta oxem disot. Punn aplea sevokank koxem bhogta tem Jehova ekdom bore bhaxen zannam. Tea pasot, tannem provadi Habakukak oxi khatri dili. “Hem dorxon aplea nemlolea kallak: tem xarthi pavtolench ani tem fottounchem na; kallav korun iet zalear, tori tachi vatt polleit rav, kiteak chodd lambai korinastana tem ietolench.”  (Hab. 2:3) Tor fokot Habakukak faido mellonk Devan hi khatri dilʼli kai? Na. Tim utram aiz amkam-i lagu zatat. Karonn novea sonvsarachi vatt polloitat tea Kristanvank pasun tim lagu zatat mhunn, Jehova Devan apostl Pauluk borounk prerit kelo. (Hebrevank 10:36, 37 vachat.) Tea pasot, Jehovan bhasailʼlo novo sonvsar ieunk chodd vell lagta oxem amkam dista zalear pasun, ‘chodd lambai korinastana to ietoloch’ mhunn ami khatri dovrunk zata.

17. Jehovan Habakukak dilʼlo solʼlo eke bhoinnin koso apnnailo?

¹⁷ Jehovachim zaitim sevokam, tannem Habakukak dilʼlo solʼlo apnnaun, novea sonvsarachi “vatt polleit” asat. Ani thoddim zannam, khub vorsam thaun oxem kortat. Udharonnak, Louise nanvachi ek bhoinn 1939-ant, Jehovachi seva korunk lagli. Ti mhunntta: “Tea vellar, mhojea iskolantlem xikop sompchea poilinch Armageddon ietolem oxem mhaka distalem. Punn toxem zaunk na. Vorsam gelim toxim, Jehovan dilʼlem utor purnn zatolench mhunn tachi vatt polloit aslim tim Bible-antlim udharonnam vachlolean, novea sonvsarachi vatt polloit ravonk mhaka modot zali. Hanvem Noah, Abraham, Juze, ani her visvaxi sevokanchim udharonnam vachlim. Jehovan tankam dilʼlem utor purnn zata meren tankam khub vorsam ravonk poddlem. Tor Jehova dita tem utor purnn zatolench mhunn bhavarth dovorlolean, mhaka ani herank, novo sonvsar ekdom lagim pavla mhunn khatri zalea.” Khub vorsam thaun Jehovachi seva korpi zaitea Sakxeank oxench dista.

18. Rochnna polloun novo sonvsar ietoloch mhunn amcho bhavarth ami koso vaddounk zata?

¹⁸ Azun porian novo sonvsar ieunk na tem khorem. Punn hea vixim chintat. Eka vellar akʼkhea vixvant kainch naslem. Punn Jehova Devan zaiteo vostu rochleo. Zoxem noketram, zhaddam, zonvaram, ani munxam. (Ut. 1:1, 26, 27) Teach bhaxen, novo sonvsar ietoloch mhunn Jehova Devan bhas dilea. Ani hi bhas to purnn kortoloch. Tea vellar sogleank bori bholaiki astoli ani soglim sasnak jietolim. Tor amchea bhonvtonnim aiz ami Jehovachi rochnna polloitat tea bhaxen, tannem tharailʼlea vellar to haddttolo to novo sonvsar ami polloitolim mhunn ami khatri dovrunk zata.—Iz. 65:17; Prok. 21:3, 4.

19. Ami amcho bhavarth koso vaddounk zata?

¹⁹ Tea mhunnosor, amkam melltta ti dor ek sondhi uzar korun ami amcho bhavarth vaddoum-ia. Soddvonne pasot sodanch upkari ravum-ia. Jehova kitlo xoktivont asa tacher niall korum-ia. Ani Jehova sangata amchi ixttagot ghott kortat toslim kamam korit ravum-ia. Oxem kelolean, ami tea munxam modlim ek astolim, jim “aplea bhavarthan ani thiraien Devan bhasailʼlem daiz zoddunk” pavtolim.—Heb. 6:11, 12; Rom. 5:5.