1. Eka cheddean jivontponnachea bhorvonxeacher taka ghott visvas asa mhunn koxem dakhoun dilem?

 MATTHEW nanvachea eka cheddeak ek gombhir duens aslem, ani tea pasot taka zaitim operation-am kelʼlim. Sat vorsancho astana, to aplea famili borabor dor mhoineak ieta ti JW Broadcasting^® kariavoll polloitalo. Kariavollichea xevottak, novea sonvsarant jivont zaloleank ieukar ditolim, tea vixim aslolo songit video tannim polloilo. b Tea uprant, Matthew-an aplea avoi-bapaiche hat dhorun oxem mhunnttlem: “Polloilem mummy-daddy, hanv melom zalear pasun Jehova mhaka jivont kortolo. Tor tumi mhoji vatt pollounk zata; hanv tumkam porot mellttolom.” Aplea cheddeak jivontponnachea bhorvonxeacher kitlo ghott visvas asa tem polloun, tachea avoi-bapaik koxem bhoglem astolem tem tumi chintunk zata?

2-3. Fuddarak melolim jivont zatolim mhunn Bible-ant dilʼli bhas ami vella-vellar ugddasak haddop kiteak mhotvachem?

² Fuddarak melolim jivont zatolim mhunn Bible-ant dilʼli bhas ami vella-vellar ugddasak haddunk zai. (Ju. 5:28, 29) Karonn poristhiti kednam-i bodlonk xokta. Amkam ghoddie ek gombhir duens zaunk xokta, vo amcho mogacho konnui bhair poddonk xokta. (Up. 9:11; Jak. 4:13, 14) Oxem ghoddlem zalear, jivontponnacho bhorvonso amkam tea oddchonneancho fuddo korunk modot kortolo. (1 Tes. 4:13) Toxench, Jehova Dev amkam ekdom bore bhaxen vollkhota ani to amcho khub mog korta mhunn Bible-antlean amkam khatri melltta. (Luk. 12:7) Tor hea vixim chintat. Ami melim zalear, jivontponnachea vellar amkam aslolo dor ek gunn ani iadi, Jehova amkam porot diunk xokta. Oxem korunk, Jehovan amkam kitlea bariksannen zannam zaunk zai nhoi! Khorench, Jehova amcho khub mog korta ani tannem amkam sasnak jieunchi sondhi dilea. Tor ami melim zalear pasun, to amkam jivont kortolo.

³ Tor hea lekhant, ami jivontponnachea bhorvonxeacher kiteak  patieunk zata tem ami polloitolim. Toxench, amcho bhavarth ghott korta toslea eke ghoddnne vixim ami Bible-antlean zannam zatolim. Ani hea lekhachem mukhel vers tea ghoddnnek lagu zata, zoim sanglam: “Tuzo bhav jivont zatolo.” (Ju. 11:23) Tea bhair, ami jivontponnachea bhorvonxeacher amcho bhavarth anik ghott koso korunk zata tem-ui ami zannam zatolim.

4. Konnem-i tumkam dilʼlem utor to pallttoloch mhunn patieunk, tumkam kosli khatri asonk zai? Ek udharonn diun somzaiat.

⁴ Konnui munis apnnem dilʼlem utor purnn kortoloch mhunn ami patietolim zalear, tea munxak tem korunk itsa ani xokti vo tank asa mhunn amkam khatri asonk zai. Hem somzonk ami ek udharonn polloum-ia. Eka vadollak lagon tumchem ghor sarkem moddon gelam mhunn chintat. Tea vellar, tumcho ek ixtt ieun tumkam oxem utor dita: ‘Bhieupachi kainch goroz na. Hanv tuka tujem ghor porot bandun ditolom.’ Tuzo ixtt patieupa sarko, ani taka khoreanich tuka modot korunk itsa asa mhunn tuka khatri asa. Toxench, to kola aslolo bandpi zalear, ani tachea lagim goroz tim sadhonam asat zalear, tachea lagim tem korunk tank pasun asa mhunn tuka kollon ieta. Tor tannem dilʼli bhas to purnn kortoloch mhunn tumi patietat. Toxem zalear, Devan dilʼlea jivontponnachea bhorvonxeacher tumi patieunk zata kai? Toxem korunk tache lagim khoreanich xokti ani itsa asa kai?

5-6. Meloleank jivont korunk Jehovak itsa asa mhunn ami kiteak khatri dovrunk zata?

⁵ Meloleank jivont korunk Jehovak itsa asa kai? Hoi, hantunt kainch dubhav na. Tea pasot, to fuddarak meloleank jivont kortolo hi bhas Bible-ant boroun dovrunk, tannem zaitea Bible boroupeank prerit kele. (Iz. 26:19; Hos. 13:14; Prok. 20:11-13) Ani Jehova bhas dita tednam, to sodanch ti purnn korta. (Josh. 23:14) Khorench, to meloleank jivont korunk axeun ravla. Oxem ami kiteak mhunnonk zata?

⁶ Joban kitem mhunnttlolem tea vixim chintat. Apunn melo zalear pasun Jehova apleak jivont korunk axetolo mhunn taka khatri asli. (Job 14:14, 15) Joba bhaxen, moron gelʼlea aplea soglea visvaxi sevokank jivont korun, tankam bori bholaiki ani ek khuxalkaiechem jivit diunk Jehova axeun ravla. Toxench, morchea poilim apleachi vollokh mellonk na tea koroddamnim lokank pasun amcho mogall Dev jivont korunk sodhta. (D.I. 24:15) Karonn tankam aplim ixttam zaunk ani sasnak jieunk, sondhi mellʼlloli taka zai. (Ju. 3:16) Khorench, meloleank jivont korunk Jehovak khub itsa asa mhunn amkam kollon ieta.

7-8. Meloleank jivont korunk Jehovak xokti asa mhunn ami kiteak khatri dovrunk zata?

⁷ Itlench nhoi, meleant tankam jivont korunk Jehovak xokti pasun asa. Karonn to “Sorvpodvedar” zaun asa. (Prok. 1:8) Ani to khoinchea-i dusmanancho, tem mhunnttlear, mornnacho pasun nas korunk xokta. (1 Kor. 15:26) Hem zannam zalolean amkam bhuzvonn ani ghottai melltta. Hea vixim amkam bhoinn Emma Arnold-acho onubhov asa. Dusrea Vixv Zhuza vellar, tichea ani tichea familichea bhavarthachi porikxa zali. Nazichea hukuma khala, bondkhonnint aslolim tanchim mogachim bhair poddlim. Tea vellar, aple dhuvek bhuzvonn diunk tinnem oxem mhunnttlem: “Meleant tim jivont zaunk xokonaslim zalear, moronn Deva poros chodd bollixtt astolem aslem. Punn toxem zaunk xokona nhoi?” Khorench, Jehova poros chodd bollixtt kainch na! Tor ami melim zalear pasun, amkam jivit dilam tea amchea Sorvpodvedar Devak amkam jivont korunk xokti asa.

⁸ Tea bhair, Jehova soglem ugddas dovrunk xokta. Tor dor eka noketrak tachea nanvan ulo korta. (Iz. 40:26) Toxench, meleant tankam to aplea ugddasant samballun dovorta. (Job 14:13; Luk. 20:37, 38) Tor to tankam jivont kortolo tednam, tanchea vixim ek-ek bariksannechi mahiti, zoxem tim koxim distalim, tancho sobhav koso aslo, tanche onubhov ani tancheo iadi to sompeponnim ugddasak haddunk xokta.

9. Jehova fuddarak meloleank jivont kortolo mhunn tumi kiteak patietat?

 ⁹ Khorench, Jehova fuddarak meloleank jivont kortoloch mhunn ami patieunk zata. Karonn oxem korunk taka itsa toxench xokti asa. Jehovacher patieunk anik ek karonn mhunnttlear, tannem adlea kallar, meloleank jivont korun dakhoilim. Tannem aplea thoddea visvaxi sevokank, toxench Jezuk pasun meloleank jivont korunk xokti dilʼli. Tor atam ami Juanv odheai 11-nt boroilʼlea eke ghoddnnecher dhean dium-ia, zoim Jezun eka melolea munxak jivont kelo mhunn sanglam.

10. Jezu Jordanachea poltoddi porgottnni kortalo tednam kitem zata, ani to kitem korta? (Juanv 11:1-3)

¹⁰ Juanv 11:1-3 vachat. 32 K.X.-achea xevottak, Bethania ganvant kitem zalem tea vixim chintat. Thoim, Lazar ani tacheo don bhoinno, Marie ani Martha, him Jezuchim lagxilʼlim ixttam ravtalim. (Luk. 10:38-42) Lazar ekdom chodd duent poddlo, ani tea vixim tachea bhoinnank khub usko zalo. Hi khobor tannim eka munxa udexim Jezuk kolloili. Tea vellar Jezu Jordanachea poltoddi aslo, ani Bethania thaun thoim cholon vochonk don dis lagtale. (Ju. 10:40) Dukhachem mhunnttlear, Jezuk hi khobor pavli tednam Lazar bhair poddlo. Aplo lagxilʼlo ixtt melo mhunn khobor asonui, Jezu anik don dis to aslo thoinch ravlo, ani uprant Bethaniak vochonk bhair sorlo. Tor Jezu Bethaniak pavta mhunnttlear, Lazar moron char dis zale. Punn tea vellar, aplea ixttank faido zatolo ani Devak mhoima mellttoli oxem kitem tori Jezu korcho aslo.—Ju. 11:4, 6, 11, 17.

11. Hea ghoddnnentlean ami ixttagoti vixim koslem lisanv xiktat?

¹¹ Hea ghoddnnentlean ami ixttagoti vixim ek ekdom mhotvachem lisanv xiktat. Ami hea vixim chintunk zata. Martha ani Marien, aplea bhava vixim Jezuk khobor dhaddli tednam, tannim taka Bethanient ieo mhunn sangonk na, punn fokot tacho mogacho ixtt duent asa mhunn sanglem. (Ju. 11:3) Toxench, Jezuk zai aslem zalear, to aslo thoinch thaun Lazarak jivont korunk xoktalo. Punn hea dukhachea vellar to tachea ixttank, Marie ani Marthak bhuzvonn diunk tanchea sangata ravonk sodhtalo dekhun, to Bethanient gelo. Tor modot magonastana tumkam modot korunk toiar asa, toslo ixtt tumkam asa kai? Toxem zalear, “oddchonniche gorje khatir” tumi tacher patieunk zata mhunn tumkam khatri astoli. (Mho. 17:17) Jezu bhaxen ami soglim oslinch ixttam zaunk vavrum-ia! Tor atam ami porot te ghoddnnecher dhean dium-ia, ani uprant kitem zata tem polloum-ia.

12. Jezun Marthak kitem bhas dili, ani tachea utrancher Marthan kiteak patieunk zatalem? (Juanv 11:23-26)

¹² Juanv 11:23-26 vachat. Jezu Bethania ganvant pavcho aslo mhunn Marthak kollʼllem tednam, ti dhanvon Jezuk mellonk geli ani oxem mhunnttlem: “Somia, tum hanga aslo zalear mhozo bhav morcho naslo.” (Ju. 11:21) Hem khorem, ki Jezu thoim aslo zalear to Lazarak boro korunk xoktaslo. Punn Jezu hachea poros kitem ojapachem korunk sodhtalo. Tea pasot, tannem Marthak oxi bhas dili: “Tuzo bhav jivont zatolo.” Ani tachea utrancher anikui visvas dovrunk tannem fuddem mhunnttlem: “Meloleank jivont korpi ani tankam jivit diupi hanvuch.” Tor meloleank jivont korunk, Jehovan Jezuk xokti dilea. Hache poilim, Jezun eka lhan cheddvak  tem moron thoddeach vella uprant jivont kelʼlem. Toxench, ek tornnatto munis melo tednam, ghoddie teach disak Jezun taka jivont kelo. (Luk. 7:11-15; 8:49-55) Punn Lazar moron char dis zalʼle, ani tachi kudd kusonk lagloli. Tor Jezu taka jivont korunk xoktolo aslo kai?

13. Juanv 11:32-35-a pormonnem, Marie ani tichea borabor aslolim roddttat tem polloun Jezuk koxem bhoglem? (Chitr pasun polloiat.)

¹³ Juanv 11:32-35 vachat. Uprant kitem zalem tea vixim chintat. Lazarachi dusri bhoinn Marie, Jezuk mellonk geli. Ani Marthan mhunnttlolim tinch utram tinnem Jezuk mhunnttlim: “Somia, tum hanga aslo zalear mhozo bhav morcho naslo.” Ti ani tichea borabor aslolim dukhant asat ani roddttat tem polloun Jezuchem kalliz bhoron ailem. Taka aplea ixttanche itle churchure disle ki tachea dolleamnim dukham ailim. Tor mogacho konnui morta tednam kitlem dukh zata tem Jezu bore bhaxen zannam. Tea pasot to aplea ixttanchem dukh pois korunk axeta.

14. Marie roddtta tem polloun Jezuk koxem bhoglem tantuntlean, ami Jehova vixim kitem xiktat?

¹⁴ Marie roddtta tem polloun Jezuk koxem bhoglem, tantuntlean Jehova ek doia-maia aslolo Dev mhunn amkam kollon ieta. Koxem? Ami fattlea lekhant polloilʼlem toxem, Jehovachem chintop koxem asa, ani taka koxem bhogta tem Jezun ekdom bore toren dakhoilem. (Ju. 12:45) Tor aplim ixttam roddttat tem polloun, Jezuk pasun roddonk ailem mhunn ami vachtat tednam, amchem dukh polloun Jehovak pasun khub dukh zata mhunn amkam kollon ieta. (St. 56:8) Hem zannam zalolean, doia-maia aslolea amchea Devak anik lagim soronk tumkam urba mellona kai?

15. Juanv 11:41-44-a pormonnem, Lazarak dovorlolo tea dholi lagim kitem zata tem sangat. (Chitr pasun polloiat.)

¹⁵ Juanv 11:41-44 vachat. Jezu, Lazarak dovorlolo tea dholi lagim ailo ani tachea darar aslolo fator kuxin kaddunk sanglem. Punn Lazarak moron char dis zalʼle dekhun, taka atam vas martolo mhunn Marthan Jezuk sanglem. Tednam Jezun oxem mhunnttlem: “Tunvem Devacher bhavarth dovorlo zalear tum Devachi mhoima polloitoli mhunn hanvem tuka sangonk na?” (Ju. 11:39, 40) Uprant, Jezun dolle voir ubarun, sogleam hujir Jehova lagim magnnem kelem. Karonn to fuddem jem kitem korcho aslo, tea pasot to Jehovak mhoima diunk sodhtalo. Magir tannem oxem mhunntlem: “Lazar, bhair ieo!” Ani Lazar bhair ailo. Tor lokamnim  sopnant pasun chintunk na, tem Jezun korun dakhoilem.—Juanv 11:17-cher aslolo study note polloiat.

16. Juanv odheai 11-nt sangloli ghoddnni jivontponnachea bhorvonxeacher amcho visvas koso ghott korta?

¹⁶ Juanv 11-nt sangloli hi ghoddnni jivontponnachea bhorvonxeacher amcho bhavarth ghott korta. Tem koxem? Jezun Marthak kitem utor dilʼlem tem ugddas korat. Tannem mhunnttlolem: “Tuzo bhav jivont zatolo.” (Ju. 11:23) Tor aplea Bapai bhaxen, Jezuk pasun meloleank jivont korunk, xokti ani itsa asa. Jezun dukham golloilim tantuntlean kollon ieta ki meloleank jivont korunk, ani mornna udexim jem dukh lokank sosunk poddtta tem kaddun uddounk, to axeun asa. Ani Lazar dholintlean bhair sorlo tem dakhoun dita ki Jezuk meloleank jivont korunk xokti asa. Toxench, Jezun Marthak kitea vixim ugddas kelo tea vixim chintat. Tannem mhunnttlolem: “Tunvem Devacher bhavarth dovorlo zalear tum Devachi mhoima polloitoli mhunn hanvem tuka sangonk na?” (Ju. 11:40) Tor fuddarak melolim jivont zatolim, hi Devan dilʼli bhas purnn zatolich mhunn visvas dovrunk, amkam borim karonnam asat. Punn jivontponnachea bhorvonxeacher amcho visvas anikui ghott korunk ami kitem korunk zata?

17. Bible-ant sanglolea jivontponnachea ghoddnneam vixim obheas kortana ami kitem ugddas dovrunk zata?

¹⁷ Bible-ant sangloleo jivontponnacheo ghoddnneo vachat ani tancher niall korat. Hea prithumer jivont zalolea att munxam vixim Bible-ant sanglam. c Tor ami tea vixim bariksannen obheas korunk zai. Oxem kortana, te dadle, bailo ani bhurgim khoreponnim jielʼlim mhunn ami ugddas dovrunk zata. Toxench, tea ghoddnneantlean ami koslim lisanvam xiktat tacher ami dhean diunk zata. Tea bhair, tea dor eke ghoddnnentlean, meloleank jivont korunk Jehovak itsa ani xokti asa mhunn koxem kollon ieta tea vixim ami chintunk zata. Ani khas korun, ami Jezuchea jivontponna vixim obheas korunk zata. Karonn,  tem sogleam-von mhotvachem jivontponn aslem. Jezu jivont zalo tednam paixim poros chodd zannamnim taka polloilo. Hea vorvim to khorench jivont zalo mhunn bhavarth dovrunk amkam ek borem karonn melltta.—1 Kor. 15:3-6, 20-22.

18. Songottnnen jivontponnachea bhorvonxea vixim toiar kelʼlea gitam thaun faido zaunk ami kitem korunk zai? (Futtnott pasun polloiat.)

¹⁸ Songottnnen jivontponnachea bhorvonxea vixim toiar kelʼlim gitam aikat, gaiat ani tea vixim chintat. d (Ef. 5:19) Hea gitam vorvim meloleanchem jivontponn ek sopon nhoi mhunn amkam kollon ieta. Toxench, hea moladik bhorvonxeacher amcho bhavarth anikui ghott korunk amkam modot zata. Tor kuttumbik bhokte vellar ami him gitam aikom-ia, practice korum-ia ani tantuntlea utrancho orth somzon gheum-ia. Him utram amchea kallzant ani monant kantoun dovrum-ia. Oxem kelolean, amcho jiv dhokeant asa zalear vo amchea mogacheank ami mornnant hogddailim zalear, Jehova Dev tache povitr xokte vorvim amkam him gitam ugddas korunk modot kortolo. Ani tantuntlean amkam bhuzvonn ani ghottai mellttoli.

19. Jivontponnachea vella vixim chintunk, Devan dilʼli chintpachi tank aiz ami koxi uzar korunk zata? (“ Tumi Tankam Kosle Prosn Vichartolim?” hem boks polloiat.)

¹⁹ Novea sonvsarant tumi kitem kortolim tea vixim chintat. Novea sonvsarant ami kitem kortolim tea vixim chintunk, Jehovan amkam tank dilea. Ek bhoinn mhunntta: “Novea sonvsara vixim chintunk hanv itlo vell sartam ki hanv thoinchea fulancho porian vas gheunk xoktam, oxem mhaka dista.” Toxench, tumi adlea kallar jielolea visvaxi munxank mellttat mhunn chintat. Tumi konnak mellonk axetat? Tea munxak tumi kosle prosn vicharunk sodhtat? Tea bhair, mornnant sanddlolea tumchea mogacheank tumi mellttolim tea vella vixim chintat. Tumi survatek tanche lagim kitem uloitolim, tankam koxim veng martolim ani tankam polloun kitlim khuxal zatolim, tem chintat.

20. Ami kitem korunk nichov korum-ia?

²⁰ Melolim jivont zatolim mhunn Jehovan amkam bhas dilea dekhun, ami tache kitlim upkari asat nhoi! Hem khoreanich ghoddttolem mhunn ami khatri dovrunk zata. Karonn toxem korunk, Jehovak itsa toxench xokti asa. Tor hea moladik bhorvonxeacher amcho bhavarth ghott korunk nichov korum-ia. Oxem kelolean ami Devak anikui lagim soronk pavtolim, zannem amkam dor ekleak oxi bhas dilea: ‘Tumchim mogachim jivont zatolim!’