1. Poilea xekddeant Jehovache lok manddavollin koxe kam kortale?

 JEHOVA aplea lokank koslem-i kam dita tednam, tannim tem manddavollin kelʼlem taka zai. (1 Kor. 14:33) Udharonnak, tannem aplea sevokank sonvsarbhor bori khobor porgottpachem kam dilam. (Mt. 24:14) Ani hea kamachi dekhrekh korunk tannem Jezuk nemla. Tor hem kam manddavollin zata mhunn Jezu bore bhaxen khatri korun gheta. Poilea xekddeant, Jeruzalemant aslolea apostlancho ani vhoddilancho ek lhan zomo soglea sobham pasot mhotvache nirnnoi ghetalo. (D.I. 15:2; 16:4) Ani veg-vegllea zagear sobha stapon zait gelʼleo toxeo, tea sobhamnim vhoddil mhunn nemlole bhav, bhav-bhoinnank tea nirnnoi-am vixim sangtale. (D.I. 14:23) Bhav-bhoinnamnim hem nirdexon apnnailʼlean, “sobhencho bhavarth ghott zait gelo ani disan-dis xisancho ankddo vaddot gelo.”—D.I. 16:5.

2. 1919-a thaun Jehova aplea lokank margdorxon koso di-it asa?

² Jehova aizui aplea lokank songottit korit asa. Udharonnak, 1919-a thaun Jezun, makhlolea bhavanchea eka lhanxea zomeak porgottnnechea kamachi manddavoll korunk ani sarkea vellar aplea pattlavdarank Devachea Utrantlem nirdexon diunk uzar kele. a (Luk. 12:42) Ani Jehova tanchea kamacher besanv ghalit asa mhunn amkam dison ieta.—Iz. 60:22; 65:13, 14.

3-4. (a) Songottit aslolean kitem faido zata tachem ek udharonn diat. (b) Hea lekhant ami kitem polloitolim?

³ Ami songottit naslim zalear, Jezun dilʼlem kam ami korunk  pavchim naslim. (Mt. 28:19, 20) Udharonnak, ami khoinchea vattarant porgottnni korunk zai tachi bhavamnim manddavoll korunk nasli zalear, konnui khoinsorui porgottnni kortolo aslo. Oxem zalʼlean, ami umkeach vattarant chodduch porgottnni kortolim aslim ani urlole vattar porgottnni korinastana toxech urtole asle. Khorench, manddavollin kam kelʼlean kitlo faido zaunk xokta nhoi! Tumi anikui faideam vixim chintunk xoktat kai?

⁴ Jezun aplea xisank tannim koxe toren manddavollin kam korunk zai tem xikoilem. Ani aiz Jehovachem songotton teach toren kam korit asa. Tor hea lekhant, Jezun koxe toren songottit ritin kam kelem ani Jehovachem songotton tachi dekh koxi gheta tem ami polloitolim. Toxench, Jehovachea songottnnecher amkam purnn visvas asa mhunn ami koxem dakhounk zata tem-ui polloitolim.

AMCHEM SONGOTTON JEZUCHI DEKH GHETA

5. Jehovachem songotton Jezuchi dekh gheta ti ek vatt khoinchi? (Juanv 8:28)

⁵ Jezun jem kitem kelem ani xikoilem, tem soglem, to aplo Bap Jehova koddlean xiklolo. Tor tachi dekh gheun Jehovachem songotton pasun aiz jem kitem xikoita ani jem kitem margdorxon dita tem soglem, Devachem Utor Bible-achea adarit asa. (Juanv 8:28 vachat; 2 Tim. 3:16, 17) Ani Devachem Utor vachunk ani tantunt boroilʼlem asa tem apnnaunk, songotton amkam porot-porot urba dita. Tor oxem kelʼlean amkam koso faido zata?

6. Bible-acho obheas kelʼlean amkam khoinche eke mhotvache vatten faido zata?

⁶ Ami Bible adarit prokaxonam udexim Bible-acho obheas kortat tednam, amkam khub faido zata. Udharonnak, songotton amkam jem nirdexon dita ani Bible amkam jem sangta, tem ami sor korun pollounk xoktat. Ani songotton dita tem margdorxon Bible-achea adarit asa mhunn ami polloitat tednam, songottnnecher amcho visvas anikui ghott zata.—Rom. 12:2.

7. Jezun kitem porgottlem, ani Jehovachem songotton tachi dekh koxi gheta?

⁷ Jezun “Devachea Rajeachi bori khobor” porgott keli. (Luk. 4:43, 44) Ani toxem korunk, tannem aplea xisankui adnea dili. (Luk. 9:1, 2; 10:8, 9) Aiz Jehovache songottnnent aslolim soglim zannam, tim khoinsorui ravom vo tankam kosleo-i zobabdari asum, tim Devachea Rajeachi bori khobor porgottʼttat.

8. Amkam koslo vhodd sueog asa?

⁸ Devachea Rajea vixim porgottunk amkam ek vhodd sueog asa. Ho sueog sogleankuch na. Udharonnak, Jezu hea prithumer ailo tednam, tannem noxttea dutank aplea vixim porgottunk diunk na. (Luk. 4:41) Aiz pasun konnui Jehovachea Sakxeam sangata porgottnni kortolo zalear, tannem purto asonk zai. Khorench, amkam aslolo porgottnni korcho sueog khub moladik asa! Tor hacho ami valor kortat mhunn dakhounk, kednam-i ani khoinsorui porgottnni korunk ami toiar ravom-ia. Ami Jezuchi dekh gheunk sodhtat dekhun, dusreank sot porgottunk ani xikounk amchean zata tem soglem ami korunk sodhtat.—Mt. 13:3, 23; 1 Kor. 3:6.

9. Jehovachem songotton Devachem nanv koxem kolloita?

⁹ Jezun Devachem nanv kolloilem. Aplea sorginchea Bapa lagim magnnem kortana Jezun oxem mhunnttlem: “Hanvem tankam tujem nanv kolloilam.” (Ju. 17:26) Jezuchi dekh gheun, aiz Jehovachem songotton pasun dusreank Devachem nanv kollounk apleachean zata tem soglem korta. Zoxem, New World Translation of the Holy Scriptures hea Bible-achea bhaxantorant, Devachem nanv jea-jea zagear aslem, thoim tem porot ghatlolem asa. Ani atam meren, hea Bible-acho akʼkho vo thoddo bhag 270-am poros chodd bhasamnim vachunk melltta. Hantunt aslolem Appendix A4 ani A5 polloilear, Devachem nanv Bible-ant porot kiteak ghatlolem asa tea vixim amkam bariksannechi mahiti melltta. Ani Study Bible-ant, Appendix C  polloilear, Grik Bhaxent Boroilʼlea Pustokamnim Devachem nanv 237 pavtti kiteak asonk zai tea vixim amkam zaite purave mellttat.

10. Myanmar-ant ravtolea eke bailechea utrantlean ami kitem xiktat?

¹⁰ Jezu bhaxen, ami zata titlea lokank Devachem nanv kollounk sodhtat. Myanmar-ant ravpi 67 vorsanche bailek Devachem nanv kollʼllem tednam tichea dolleant dukham ailim, ani aplo Bible obheas ghetoleak tinnem oxem mhunnttlem: “Devachem nanv Jehova mhunn hanvem poilech pavtti aikolem . . . Tunvem mhaka sogleam-von gorjechem asa tem xikoilem.” Tor khaltea kallzachea lokank Devachem nanv kollon ieta tednam, tanchea jivitacher ekdom boro porinnam zata mhunn hea onnbhovantlean kolltta.

TUMKAM SONGOTTNNECHER VISVAS ASA MHUNN DAKHOIT RAVAT

11. Jehovachea songottnne thaun melltta tea margdorxonacher vhoddilank visvas asa mhunn tannim koxem dakhounk zata? (Chitr pasun polloiat.)

¹¹ Jehovachea songottnne thaun melltta tea margdorxonacher vhoddilank visvas asa mhunn tannim koxem dakhounk zata? Ek vatt mhunnttlear, margdorxon melltta tednam tannim tem bariksannen vachunk zai ani tem apnnaunk tanchean zata tem soglem korunk zai. Udharonnak, mittingeche bhag ani magnnem koxem korchem heach vixim nhoi, punn Kristachea xellianchi koxi kallji gheunchi, hea vixim pasun tankam margdorxon melltta. Tor songottnne thaun melltta tem soglem margdorxon apnnaunk vhoddil vavr kortat tednam, Jehova aplo mog korta ani apli kallji gheta mhunn bhav-bhoinnam onnbhovunk pavtat.

12. (a) Fuddakar ghetat tanchem nirdexon ami ap-khuxen kiteak apnnaunk zai? (Hebrevank 13:7, 17) (b) Fuddakar ghetat tanchea borea gunnancher ami kiteak dhean diunk zai?

¹² Vhoddil amkam nirdexon ditat tednam ami tem ap-khuxen pallunk zai. Oxem kelʼlean, tanchi zobabdari samballunk tankam sompem zatolem. Toxench, fuddakar ghetat tanchem aikonk ani tanche adhin ravonk Bible pasun amkam urba dita. (Hebrevank 13:7, 17 vachat.) Punn te bhav opurnn asat mhunnttoch thodde pavtti tanchem aikonk amkam kotthin zaunk xokta. Punn ami tanchea borea gunnancher dhean diunchea bodlek, tanchea vaitt gunnancher dhean ditat zalear, ami eka orthan amchea dusmanank tenko ditat oxem zatolem. Koxem? Amkam margdorxon diunk Jehova khorench aplem songotton uzar korta kai na mhunn ami dubhavlolim amchea dusmanank zai. Tor ami vhoddilam vixim vaitt chintunk laglim zalear, ami sovkas-sovkas korun songottnne vixim pasun vaitt chintunk lagtolim ani amcho visvas haltolo. Tor dusmanancheo fotti vollkhonk ani teo nakarunk ami kitem korunk zata?

SONGOTTNNECHER TUMCHO VISVAS HALONK DIUM NAKAT

13. Devache dusman amchea songottnnechem nanv koxem piddʼddear kortat?

¹³ Devache dusman songottnne vixim asloleo boreo vostu vaitt mhunn sangtat. Udharonnak, ami amchi kudd ani vagnnuk nitoll dovorloli ani taka manvota tea ritin tachi bhokti kelʼli Jehovak zai mhunn ami Bible-antlean xikleant. Punn ek munis gombhir patok adarta ani apli vaitt vagnnuk bodlunk toiar na zalear, taka sobhentlean bhair kaddcho mhunn Bible-ant sanglam. (1 Kor. 5:11-13; 6:9, 10) Tor ami Jehovachi hi adnea pallttat dekhun, ami lokancho mog korinant, dusreanchi nit kortat ani amchea poros vegllim asat tankam sosun ghenant mhunn amche virodhi amcher arop ghaltat.

14. Jehovachea songottnne vixim fotti posraupi konn zaun asa?

¹⁴ Khoro dusman konn tem vollkhon gheiat. Soitan “fottincho bapui” zaun asa. (Ju. 8:44; Ut. 3:1-5) Ani toch amchea songottnne vixim  fotti posraita. Tor oxem korunk to amchea virodheank uzar kortolo mhunn ami opekxa korunk zata. Ani oxench tannem poilea xekddeant pasun kelem.

15. Jezu ani tachea pattlavdaram vixim dhormik fuddareamnim kosleo fotti posraileo?

¹⁵ Jezu poripurnn aslo ani Jehovache xokten vizmitam kortalo. Punn Soitanan thoddeank uzar korun tache vixim zaiteo fotti posraileo. Udharonnak Jezu kortalo tim vizmitam, to “noxttea dutanchea razachea” modotin korta oxem dhormik fuddari sangtale. (Mk. 3:22) Toxench Jezuchi kes choltali tednam, tannem Devachea nanvacho opman kela mhunn tannim arop ghatlo, ani lokankui Jezuk jivexim marunk uksaile. (Mt. 27:20) Tea bhair Jezuche pattlavdar porgottnnechem kam kortale tednam, tanchea virodheamnim tancher dhumallo haddunk “lokank uksaile ani . . . tanchea monant koddsann bhorli.” (D.I. 14:2, 19) Itihas 14:2 hea versa vixim Dezembr 1, 1998-achea Pahrogopur-ant oxem sanglam: “Soitanak tenko ditalim tea munxamnim, Kristanvam porgottʼttalim ti khobor nakarli. Toxench lokamnim tanchem aikona zaunk ani tancho dves korunk, tannim Kristanvam vixim zaiteo fotti posraileo.”

16. Jehovache songottnne vixim fotti aikonk mellttat tednam tumi kitem ugddas dovrunk zai?

¹⁶ Soitanan poilea xekddeant kelʼlem tea bhaxen, to aiz pasun fotti sangot asa, jea vorvim to “akʼkhea prithumer ravtolea lokank fosoita.” (Prok. 12:9) Tor songottnne vixim vo fuddakar ghetolea bhavam vixim tumkam vaitt khobro aikonk mellʼlleo zalear tumi kitem korunk zai? Jezu ani poilea xekddeantlea Kristanvam sangata Devache dusman koxe vagle tem ugddas korat. Jehovachi bhokti kortat tankam dhumallo sosunk poddttolo ani lok tanche vixim fotti posraitole mhunn Jezun sanglolem. Ani aiz toxench zata. (Mt. 5:11, 12) Tor Jehovachea  songottnne vixim tumkam fotti aikonk mellttat tednam, teo fotti konn posraita tem ugddas dovrat ani teo pois korunk rokddinch goroz tim panvlam gheiat. Hem tumi koxem korunk zata?

17. Fotti aikon fosona zaunk ami kitem korunk zai? (2 Timotak 1:13) (“ Khotteo Khobro Aikonk Mellttat Tednam Kitem Korchem?” hem boks pasun polloiat.)

¹⁷ Fotti nakarat. Jehovachea songottnne vixim fotti aikonk mellttat tednam ami kitem korchem, tem apostl Paulun spoxttponnim sanglem. Tannem Timotak, ‘khottea kanneancher dhean diunchem nhoi mhunn thoddea zannank adnea diunk’ sangli. Toxench “Devachea add asat teo khotteo kanneo nakar” mhunn sangonk lailem. (1 Tim. 1:3, 4; 4:7) Ami hea vixim chintunk zata: Ek ballok zomnir asloli kosli-i mhelli vost tonddant ghalunk xokta. Punn ek vaddlolo munis toxem kednanch korchona. Karonn oxem korop taka mal poddonk xokta mhunn to zannam. Tor ami pasun sotacheo “boreo xikounneo” apnnaunk zai ani fotti nakarunk zai. Karonn teo konn posraita tem ami bore bhaxen zannant.—2 Timotak 1:13 vachat.

18. Jehovache songottnnecher amkam purnn visvas asa mhunn ami koxem dakhounk zata?

¹⁸ Amchem songotton Jezuchi dekh koxi gheta tacheo fokot tin vatto ami hea lekhant polloileo. Oxeo anikui zaiteo vatto asat. Tor ami Bible-acho obheas kortana tacher dhean dium-ia. Toxench, songottnnecher visvas vaddounk ami bhav-bhoinnank modot korum-ia. Tea bhair visvaxiponnan Jehovachi seva korun, ani apli khuxi purnn korunk to uzar korta tea songottnnek chittkon ravon, amkam tea songottnnecher visvas asa mhunn dakhoit ravom-ia. (St. 37:28) Khorench, Jehovacho mog kortat ani taka visvaxi asat toslea bhav-bhoinnam sangata tachi seva korunk amkam ek vhodd sueog asa. Tor hea sueoga pasot ami sodanch upkari ravom-ia!