1. Porgottnni korchea vixim thoddea bhav-bhoinnank koxem dista? (Chitr pasun polloiat.)

 AMI AMCHEA sorginchea Bapacho khub mog kortat ani dusreank tachi vollokh diunk sodhtat dekhun ami porgottnni kortat. Zaitea bhav-bhoinnank porgottnni korunk khub avoddtta. Punn thoddea zannank toxem korunk kotthin dista. Kiteak? Thoddim loztat ani apunn borim xikoupi nhoi oxem tim chintʼtat. Thoddeank apounnem nastana dusreanchea darar vochonk borem disona. Thoddim aiknnaro tancher bejar zait vo ragar zait mhunn bhietat. Thoddim ‘gorje bhair dusreank rag kiteak haddcho’ oxem chintʼtat. Him bhav-bhoinnam Jehovacho khub mog kortat zalear pasun, onvollkhi munxank bori khobor sangonk tankam kotthin zata. Tori astana, porgottnnechem kam ekdom mhotvachem mhunn tim zannant. Tea pasot, tim chukonastana tantunt bhag ghetat. Hem polloun Jehova khub khuxal zata mhunn kainch dubhav na!

2. Tumkam porgottnni korunk kotthin zata zalear tumi kiteak niraxi zaunchem nhoi?

² Tor tumkam-i hantuntlea koslea-i tori bhavnank lagon porgottnni korunk kotthin zata kai? Toxem zalear, niraxi zainakat. Ami soglim lokam lagim ulounk fatti-fuddem zatat. Karonn ami gorje bhair tankam rag haddunk sodhinant, vo tanchem dhean amcher voddun haddunk sodhinant. Ami tor lokanchea boreak lagon tankam porgottʼttat dekhun tim amcher bejar zalʼlim amkam naka. Tor tumkam koxem bhogta tem tumcho mogall sorgincho Bap ekdom bore bhaxen zannam ani to tumkam goroz ti modot diunk sodhta. (Iz. 41:13) Tor hea lekhant, oslea bhavnancho fuddo korunk ami khoinchim panch panvlam gheunk zatat ani porgottnnent khuxalkai koxi vaddounk zata tem ami polloitolim.

 DEVACHEA UTRA VORVIM GHOTTAI MELLOUN GHEIAT

3. Jeremiasak porgottnni korunk koxi modot zali?

³ Adlea kallar pasun, Jehovachea thoddea sevokank tankam dilʼli zobabdari purnn korunk kotthin zalem. Udharonnak, Jehovan Jeremiasak porgott korunk sanglem. Punn toxem korunk to fatti-fuddem sortalo. Tannem mhunnttlem: “Hanv ulounk nokllom: hanv ek lhan bhurgo.” (Jer. 1:6) Tor apli bhirant pois korunk Jeremiasak koxi modot zali? Jehovan taka jem sanglolem, tea vorvim taka hem kam korunk ghottai mellʼlli. Ani tannem mhunnttlem: “Mhojea horddeant uzo pettla ani to mhojea haddamnim porian rigla mhonn diso. Taka domaun domaun mhaka puro zalem.” (Jer. 20:8, 9) Tor lok Jeremiasachem aikonk toiar nasle zalear pasun, Jehovan taka zo sondex porgottunk lailʼlo tea vorvim taka tem kam korunk ghottai mellʼlli.

4. Devachem Utor vachun tacher niall kelʼlean kitem zata? (Koloskarank 1:9, 10)

⁴ Bible-ant aslolim Jehovachim utram vachlolean Kristanvank goroz ti ghottai mellonk xokta. Kolosantlea sobhek boroitana, Paulun sanglem ki Jehovak kitem zai tea vixim anik xiklolean, ‘dor ek borem kam korun foll utpon korunk’ bhav-bhoinnank modot zatoli asli, jea vorvim tim “Jehovachea sevokank sobta toxem” vagonk pavtolim aslim. (Koloskarank 1:9, 10 vachat.) Hea borea kamant bori khobor porgottpachem kam mellon asa. Tor ami Devachem Utor vachtat ani tacher niall kortat tednam, Jehovacher amcho bhavarth ghott zata ani porgottnnechem kam kiteak itlem mhotvachem tem ami somzonk pavtat.

5. Devachea Utrantlean purnn toren faido melloun gheunk tumi kitem korunk zata?

⁵ Devachea Utrantlean purnn toren faido melloun gheunk tem vachtana, obheas kortana ani niallttana, goddbodd korinakat, punn vell gheiat. Bible vachtana tumkam ek umkench vers somzona zalear, tem thoinch soddun fuddem vochonakat. Punn Watch Tower Publications Index vo Research Guide for Jehovah’s Witnesses uzar korun, tea versa vixim anik zannam zaiat. Hea toren Bible obheas kortana tumi vell ghetlo zalear, Devachea Utrant asa tem soglem sot mhunn tumchi khatri vaddttoli. (1 Tes. 5:21) Ani jitli chodd tumchi khatri vaddttoli, titlich chodd tumi xikleant tea vixim dusreank sangonk tumkam khuxalkai mellttoli.

PORGOTTNNE PASOT BORI TOIARI KORAT

6. Porgottnne pasot ami kiteak bori toiari korunk zai?

⁶ Tumi porgottnne pasot bori toiari kelear, tumi bhienastana ani bore bhaxen porgottnni korunk pavtolim. Jezun pasun aplea xisank  porgottnnent dhaddchea poilim, tankam toiari korunk modot kelʼli. (Luk. 10:1-11) Jezun sanglem tem xisamnim apnnailem dekhun, tankam boro porinnam mellʼllo ani te khub khuxal zale.—Luk. 10:17.

7. Tumi porgottnne pasot koxi toiari korunk zata? (Chitr pasun polloiat.)

⁷ Tor tumi porgottnne pasot koxi toiari korunk zata? Lokam lagim tumi kitem uloitolim ani tem tumi tumchea utramnim koxim sangtolim tachi poilinch toiari korat. Toxench, lok tumkam kitem mhunnonk xokta vo vicharunk xokta ani tancho zobab tumi kitem ditolim, tea vixim adinch chintlolean tumkam modot zaunk xokta. Tor hea toren bori toiari kelea uprant, tumi porgottnnent voitat tednam bhienakat. Tumchem tondd hanstem dovrat, ani bore bhaxen uloiat.

8. Kristanvam eka orthan apostl Paulun sanglolea matiechea aidonam sarkim koxim asat?

⁸ Ami kortat tea porgottnnechea kama vixim apostl Paulun oxem mhunnttlem: “Amchea lagim ho thevo matiechea aidonamnim asa.” (2 Kor. 4:7) Ho thevo mhunnttlear kitem? Devachea Rajeachi bori khobor, jea vorvim dusreancho jiv salvar zaunk xokta. (2 Kor. 4:1) Ani matiechim aidonam mhunnttlear kitem? Bori khobor porgottʼttat tim Devachim sevokam. Pauluchea disamnim mhotvacheo vostu, zoxem jevonn, soro ani poixe eka zagear thaun dusrea zagear vhoronk, veapari matiechim aidonam uzar kortale. Teach bhaxen, bori khobor porgottpachi mhotvachi zobabdari Jehovan amkam dilea. Ani tachea modotin ami porgottnnechem kam bore toren korit ravonk pavtolim.

DHIRA PASOT MAGNNEM KORAT

9. Lok amchem aikochona vo amkam dhumallo di-it mhunn amkam asloli bhirant ami koxi pois korunk zata? (Chitr pasun polloiat.)

⁹ Lok tumchem aikochona vo tumkam dhumallo di-it mhunn bhieun porgottnni korunk thodde pavtti tumi fatti-fuddem zait. Hea vellar, apostlam sovem kitem ghoddlem tacher dhean diat. Porgottnni bond korunk tankam hukum dilʼlo. Punn bhieun te fatti soronk nant. Tachea bodlek, ‘Devachem utor bhienastana sangot ravonk dhir di’ mhunn tannim Jehova lagim magnnem kelem. Ani Jehovan rokddoch tanchea magnneacho zobab dilo. (D.I. 4:18, 29, 31) Tumkam pasun thodde pavtti porgottnni korunk kotthin zata zalear, Jehova lagim magnnem korat ani lokam pasot tumcho mog vaddounk tache lagim modot magat. Oxem  kelʼlean, tumi bhienastana dusreank bori khobor porgottunk pavtolim.

10. Dhiran porgottnnechem kam korunk Jehova amkam koso modot korta? (Izaias 43:10-12)

¹⁰ Jehovan amkam aplim Sakxidaram mhunn nemleant, ani dhirvont zaunk to amkam modot kortolo mhunn tannem bhas dilea. (Izaias 43:10-12 vachat.) To zaitea vattamnim amkam modot korta. Poili, porgottnni kortana, Jezu amchea sangata asta. (Mt. 28:18-20) Dusri, porgottnnechea kamant amkam modot korunk Jehovan devdutank nemleat. (Prok. 14:6) Tisri, ami xikleant tem porot ugddas korunk Jehova amkam ek modot korpi, mhunnche povitr xokti dita. (Ju. 14:25, 26) Ani chovti, amkam tenko diunk Jehovan amkam bhav-bhoinnam dileant. Tor Jehovachea modotin ani bhav-bhoinnanchea adaran ami dhiran porgottnni korit ravonk pavtat.

LOKANCHEA GORZAM PORMONNEM BODOL KORAT ANI SARKEM CHINTOP DOVRAT

11. Porgottnni kortana zaito lok mellonk ami kitem korunk zata? (Chitr pasun polloiat.)

¹¹ Ghor-ghoramnim porgottnni kortana, tumkam lok mellona tednam tumi niraxi zatat kai? Hoi zalear, tumkanch vicharat: ‘Hanv porgottnni kortam tea vattarantle lok atam khoim asat?’ (D.I. 16:13) ‘Tim kamak vo bazar korunk geleant kai?’ Toxem zalear, tumi vatter choltolea lokank porgottnni korunk zata kai? Oxem kelʼlean tumkam zaite lok mellonk xoktat. Hea vixim bhav Joshua sangta: “Bazarant, shopping mall-ant ani lok apli gaddi park kortat toslea zageancher porgottnni kelʼlean, zaitea lokam lagim ulounk mhaka sondhi melltta.” Toxench, sanjechem ani Aitara donparchem porgottnni kelʼlean, taka ani tachi bail Bridget-ak, zaite lok ghora mellʼlleat.—Ef. 5:15, 16.

12. Lok kitem patietat vo tankam koslo usko asa tem tumi koxim zannam zaunk xoktat?

¹² Tumi porgottnni kortana, lok aikonk titli umed dakhoinant tednam, tumi kitem korunk zata? Tim kitem patietat ani tankam koslo usko asa tem zannam zauncho proitn korat. Oxem korunk, Joshua ani Bridget, ttrekttachea fuddlea panar aslolo prosn uzar kortat. Udharonnak, Bible-a Vixim Tum Kitem Chintʼta? hem ttrektt uzar korun tim oxem mhunnttat: “Thoddo lok, Bible hem Devachem Utor mhunn mantat. Punn thoddim maninant. Tumkam hea vixim kitem dista?” Hea toren tim ulovop suru korunk pavtat.

13. Lok amchem aikonant tednam pasun ami bore toren porgottnnechem kam kelam oxem ami kiteak mhunnonk zata? (Mhonnʼnneo 27:11)

 ¹³ Porgottnni kortana lok amchem aikom vo na aikom, ami bore toren tem kam kelam, oxem ami mhunnonk zata. Karonn Jehovak ani Jezuk zai tem ami kelam, mhunnche ami dusreank tanchea vixim sakx dilea. (D.I. 10:42) Tor lok amkam ghora mellona vo tim amchem aikonant zalear pasun, ami porgottnnechea kama vixim sarkem chintop dovrun tea kamant khuxalkai melloun gheunk zata. Karonn ami amchea sorginchea Bapachem kalliz khuxal kortat mhunn ami zannant.—Mhonnʼnneo 27:11 vachat.

14. Dusrea eka porgottnnarak, aikonk umed dakhoita toslo ek munis mellʼllo zalear ami sogleamnim kiteak khuxal zaunk zata?

¹⁴ Porgottnni kortana dusrea eka porgottnnarak, aikonk umed dakhoita toslo ek munis mellʼllear ami soglim khuxal zatat. Eka Pahrogopur-ant amchea porgottnnechea kamak, eka sanddlolea bhurgeak sodhpachea kamak sor kelam. Ek bhurgem sanddtta tednam, zaitim zannam taka sodhunk veg-vegllea vattaramnim voitat. Ani tem bhurgem mellʼllea uprant, fokot tem bhurgem mellʼllem toch nhoi, punn soglim khuxal zatat. Teach bhaxen, aiz zata tea porgottnnechea kamant soglea bhav-bhoinnancho vavr mellon asa. Karonn soglim veg-vegllea vattaramnim porgottnni korunk voitat. Tor eklo munis pasun mittingek ieunk suru korta tednam ami soglim khuxal zatat.

JEHOVA PASOT ANI LOKAM PASOT MOG VADDOIAT

15. Matev 22:37-39 apnnailʼlean, porgottnnechea kamant amkam anikui khuxalkai koxi mellttoli? (pasun polloiat.)

¹⁵ Jehova pasot ani lokam pasot ami mog vaddoitat tednam, porgottnnent amkam anik khuxalkai melltta. (Matev 22:37-39 vachat.) Ami porgottnni kortat tem polloun Jehova kitlo khuxal zata tem ami chintunk zata. Toxench, lok Bible xikonk lagta tednam tankam kitli khuxalkai mellttoli tem ami chintunk zata. Itlench nhoi, bori khobor aikon Jehovachi seva korunk suru kortat, tancho jiv salvar zaunk xokta mhunn ami ugddas dovrunk zai.—Ju. 6:40; 1 Tim. 4:16.

16. Koslea-i karonnak lagon tumi ghorantlean bhair soronk xokonant zalear, porgottnni korun tumi khuxalkai koxi melloun gheunk zata? Ek udharonn diat.

¹⁶ Tumi koslea-i karonnak lagon ghorantlean bhair soronk ani porgottnnechea kamant bhag gheunk xokonant kai? Toxem zalear, niraxi  zainakat. Punn Jehova pasot ani lokam pasot mog koso vaddounk zata tem chintat. Ani oxench, Samuel ani Dania-n kelem. COVID-19 piddek lagon, ghorantlean bhair soron porgottnni korunk mellonasli tednam, tannim fona udexim ani chitteo boroun porgottnni keli. Toxench, tim Zoom-acher Bible obheas gheunk laglim. Tea bhair, bhav cancer-ak lagon ilaz korunk dotora lagim voitalo tednam, thoim aslolea lokank sakx ditalo. To sangta: “Amcher oddchonneo ietat tednam ami usketat, thoktat ani amchea bhavarthachi porikxa zata. Tori astana, hea poristhitint pasun, Jehovache sevent ami khuxalkai melloun gheunk xoktat.” Titlench nhoi, bhoinn Dania sokol poddon tin mhoine hantrunnar urli ani uprant ti sov mhoine wheelchair-ar asli. Ti sangta: “Mhojea poristhiti pormonnem hanv jem kitem korunk xoktali tem soglem korunk hanvem proitn kelo. Mhoji kallji ghetali tea nurse-ik hanvem sakx dili, ani amchea ghora vostu diunk ietalim tea lokam lagim hanv uloili. Toxench, eke medical company-int kam kortole eke baile lagim fonar uloitana tika porgottnni korunk mhaka sondhi mellʼlli.” Samuel ani Dania, adim kortalim tem tim korunk xokonaslim tem khorem. Punn tanche lagim zata tem soglem tannim kelem. Ani oxem korun tankam khuxalkai mellʼlli.

17. Hea lekhant jea panvlam vixim sanglam tantuntlean faido mellonk ami kitem korunk zai?

¹⁷ Chintat, jevonn randtana ami tantunt veg-veglle mosale ghaltat ani tednanch tem jevonn ruchik zata. Hea lekhant sanglolim panchui panvlam tea mosalea sarkim zaun asat. Tor tim soglim panvlam ami sangata apnnailear, porgottnnechea kamant amkam ji bhirant dista ti ami pois korunk pavtolim ani porgottnnent amkam anik chodd khuxalkai mellttoli.