1-2. Stotr 34:8-a pormonnem, Jehovachea boreponna vixim amkam kitem xikonk melltta?

CHINTAT tumi kednanch chakunk na toslem jevonn tumkam konnem tori randun haddlam. Tem jevonn ruchik asa kai na tem zannam zaunk, fokot tem polloilear, tacho vas ghetlear, tem koxem randlam tem zannam zalear vo tache vixim dusreank vicharlearuch puro nhoi. Punn tumi tem svota chakun pollounk zai!

² Teach bhaxen, ami Bible ani Bible-adarit prokaxonam vachun ani Jehovachi seva kortat tankam koslim besanvam mell’lleant tem tanche koddlean aikun, Jehovachea boreponna vixim thoddem zannam zaunk zata. Punn Jehova kitlo boro tem zannam zaunk ami svota tachem boreponn “chakun” pollounk zai. (Stotr 34:8 vachat) Hem ami koxem korunk zata tea vixim ek udharonn polloum-ia. Tumi purnn vellachi seva korunk sodhtat zalear tumi tumchem jivit sadem korchem poddttolem mhunn tumi zannant. Hem korunk tumi tumcho khorch unno korcho poddttolo vo tumche sirvisent thoddo bodlav korcho poddttolo. Toxench, Devachem Raj poilea zagear dovorlear, to tumcheo gorzo purnn kortolo hem-ui tumi zannant. (Mt. 6:33) Tor Jehovacher visvas dovrun ami purnn vellachi seva kortat tednam tachem boreponn amkam ‘chakunk’ mellttolem.

3. Stotr 31:19-a pormonnem, Jehova konnank boreponn dakhoita?

³ Jehova ‘somestank’, apleak vollkonant tankam pasun aplem boreponn dakhoita. (St. 145:9; Mt. 5:45) Ani khas korun, apleacho mog ani seva kortat tankam to boreponn dakhoita ani zaitim besanvam dita. (Stotr 31:19 vachat.) Jehovah amkam boreponn koso dakhoita tem atam ami polloum-ia.

4. Apleak lagim sortat tankam Jehova koso boreponn dakhoita?

⁴ Jehova xikoita tem ami amchea jivitant apnnaitat tednam amkam sogleank tachem boreponn pollounk melltta.  Udharonnak, ami tachea vixim xikonk laglim ani tacho mog korunk laglim tednam taka manvona tem pois korunk tannem amkam modot keli. (Kol. 1:21) Ani uprant, ami somorponn korun bautizm ghetlo tednam amkam ek nitoll ontoskornn mellonk ani aplea sangata ixttagott zoddunk vatt ukti korun, tannem amkam boreponn dakhoilem.—1 Ped. 3:21.

5. Ami porgottnni kortat tednam amkam Jehovachem boreponn koxem pollounk melltta?

⁵ Ami porgottnni kortat tednam pasun amkam Jehovachem boreponn pollounk melltta. Udharonnak, eka vellar ami ghor-ghoramnim vochon, onvollkhi lokam lagim Bible-a vixim ulounk lojetalim astolim. Punn Jehovachea modotin atam ami lojenastana porgottnni korunk xoktat. Toxench, porgottnnechea kamant ragixtt munis mellttat tednam xant ravonk, amcho sondex aikonk umed dakhoitoleank favo tem vers dakhounk ani lok aikonant toslea vattarant porgottnni korit ravonk Jehova amkam modot korta.—Jer. 20:7-9.

6. Jehova amkam dita tea proxikxonnantlean amkam tachem boreponn koxem dison ieta?

⁶ Jehova amkam anik ek vatten boreponn dakhoita. Tem mhunnttlear, ami porgottnnent koxem ulounk zai tea vixim to amkam proxikxonn dita. (Juanv 6:45) Zoxem, sumanantlea modle mittingent ulounk modot viddeo-ntlean, ami lokam lagim koxem ulounk zai tem ami xiktat. Toxench, her mittingeni ani odhivexonamnim porgottnnent noveo-noveo vatto uzar korunk amkam urba ditat. Amkam survatek heo vatto apnnaunk kottin zait vo amkam bhirant disot, punn ami teo vatto apnnaitat tednam lok amchem aikonk toiar asta ani hea kamant Jehova amcher besanv ghalta mhunn amkam kollon ieta. Amchi poristhiti kosli-i asum, ami Jehovacher patietat ani porgottnnent veg-veglleo vatto uzar korun taka amchem boreantlem borem ditat tednam amkam Jehovachem boreponn koxem melltta tem ami polloum-ia. Toxench, Jehovachi seva vaddounk ami kitem korunk zai tem pasun ami polloum-ia.

7. Ami Jehovache sevent anink chodd korunk vavurtat tednam tache thaun amkam koslem boreponn melltta?

⁷ Ami Jehovak anik lagim sortat. Atam ami bhav Samuel-achem udharonn polloum-ia. * To ek vhoddil zaun asa ani aplea baile sangata Colombia desant seva korta. Tim poilim aplea sobhent pioneer seva kortalim. Punn tannim porgottnnaranchi chodd goroz asa tea sobhent vochun seva korunk tharailem. Hem korunk tannim thodde teag korunk zai asle. Bhav Samuel mhunntta, “Ami Matev 6:33 apnnailo ani gorje bhair khorch korop bond kelem. Punn amchem ghor soddun eka dusrea zagear vochonk amkam sompem naslem. Karonn tem ghor amkam zai toxench aslem ani tacher amkam kaim rinn-ui farik korchem naslem.” Tori astana, tannim tharailea pormonnem, tim tea novea zagear vochunk toiar zalim. Ani thoim gelea uprant poilim poros atam tankam khub unno korch zaunk laglo. Bhav Samuel fuddem mhunntta, “Jehova amkam koso vatt dakhoita ani amchea magnneank koso zobab dita tem amkam pollounk mell’llem. Ani poilim poros chodd, atam Jehova amcho mog korta ani amkam polloun khuxal zata mhunn amkam kolltta.” Bhav Samuel-a bhaxen tumi Jehovache sevent anik chodd korunk xoktat kai? Oxem tumi kelem zalear tumi Jehovak anik lagim sortolim ani to tumchi kallji ghetolo mhunn tumi khatri dovrunk zata.—St. 18:25.

8. Ami Ivan ani Viktoria thaun kitem xikonk zata?

⁸ Jehovache sevent amkam chodd khuxalkai melltta. Hem somzonk ami Ivan ani Viktoria-chem udharonn polloum-ia. Hem zoddpem Kyrgyzstan-ant pioneer zaun seva korta. Ani tankam Jehovache sevent, zoxem  bandkamant chodd korunk zai aslem dekhun tannim tanchem jivit sadem dovorlem. Tor tankam osli seva korunk sondhi melltali tednam tankam koxem distalem? Ivan mhunntta: “Amkam dilolem kam ami purnn dhean-mon lavun kortalim. Disachea xevottak ami thoktalim, tori astana hem soglem ami Jehova pasot kortat mhunn zannam aslolean amkam khub khuxalkai bhogtali. Toxench, novim ixttam korun tanchea sangata Jehovachi seva korunk amkam sondhi mell’lli mhunn ami chodd khuxal zalim.”—Marku 10:29, 30.

9. Kotthin poristhiti aslear pasun eke bhoinnin apli seva koxi vaddoilea, ani hacho kitem porinnam zala?

⁹ Kotthin poristhiti aslear pasun Jehovachi seva kelear amkam khuxalkai melltta. Ami West Afrikent ravtolea bhoinn Mirreh-chem udharonn polloum-ia. Hi zanntti vidva bhoinn ek dotor asli. Tinnem retirement ghetlea uprant pioneer seva suru keli. Punn tika arthritis hem duens aslolean ti fokot ekuch vor ghor-ghoramnim porgottnni korunk xokta. Tor ti chodd vell jahir zagear porgottnni korta. Oxem kelolean tika zaiteo porot bhetto ani Bible obheas mell’lleat. Ani tantuntlea thoddeam lagim ti fon-a udexim uloita. Bhoinn Mirreh, Jehovachi itli seva kiteak korunk pavta? Ti mhunntta: “Hanv Jehovacho ani Jezucho khub mog kortam. Ani tachea sevent zata titlem chodd korunk mhaka modot kor mhunn hanv Jehova lagim sodanch magtam.”—Mt. 22:36, 37.

10. 1 Pedru 5:10-ant sanglolea bhaxen Jehovachi seva anik chodd korunk sodhtat tankam kitem melltta?

¹⁰ Jehova koddlean amkam anik proxikxonn melltta. Hem ami bhav Kenny-chea udharonnantlean pollounk zata, zo atam Mauritius desant ek pioneer mhunn seva korta. Taka sot mell’llem tednam tannem aplem xikop soddlem, bautizm ghetlo ani purnn vellachi seva suru keli. Kenny mhunntta: “Izaias provadian Jehovak, ‘Ho polle hanv asam, mhaka dhadd’ mhunn sanglolem toxem hanv-ui korunk sodhtalo.” (Iz. 6:8, 9) Hea pasot tannem songottnechea bandkamachea kamant vantto ghetlo ani toxench aplea mai-bhaxent zaitim Bible adarit prokaxonam bhaxantor korchem-i kam kelem. “Mhaka dilolem kam korunk mhaka proxikxonn mell’llem ani hea vorvim hanv noveo kola xiklom. Itlench nhoi, mhojeo oskotaio pasun mhaka kollon aileo. Ani Jehovacho boro sevok zaunk hanvem mhoje bhitor anikui gunn utpon korunk zai hem-ui hanv xiklom”, mhunn Kenny sangta. (1 Pedru 5:10 vachat.) Tor bhav Kenny bhaxen, tumi pasun tumchi poristhiti polloun Jehova koddlean anik proxikxonn gheunk zata.

11. Porgottnnent dor disak bhag gheupak Dokxinn Korea-ntlea tin bhoinnimnim kitem kelem, ani tacho porinnam kitem zalo? (Masikachem fuddlem chitr polloiat.)

¹¹ Khub vorsam thaun Jehovachi seva kortoleank pasun, eke nove toren seva korunk Jehova koddlean proxikxonn melltta tednam, tankam pasun faido zata. COVID-19 pidda suru zali tednam, Dokxinn Korea sobhentlea vhoddilamnim oxem sanglem: “Bholaikek lagon adim porgottnnent chodd korunk pavonaslim tim atam videoconference-a udexim porgottnnent chodd bhag gheunk pavtat. 80 vorsam poros chodd pirai asloleo tin bhoinno kompiuttor uzar korunk xiklim ani tim atam sodanch porgottnent bhag ghetat.” (St. 92:14, 15) Tumkam-i Jehovachem boreponn mellpak zai zalear tumi pasun Jehovachi anik seva korunk fuddem soronk zata. Hem tumi koxem korunk zata tem atam ami polloum-ia.

12. Apnnacher patieun ravtat tankam Jehova kitem utor dita?

¹² Jehovacher patieun ravonk xikat. Ami Jehovacher visvas dovortat ani taka amchem boreantlem borem ditat tednam to amkam besanvamnim bhortolo mhunn tannem amkam utor dilam. (Mal. 3:10) Jehova aplem utor koxem purnn korta tem amkam Colombia desant  ravpi bhoinn Fabiola-chea udharonnantlean kollon ieta. Ticho bautizm zalea uprant ti rokddich niemit pioneer mhunn seva korunk sodhtali. Punn tika oxem korunk mellonk na. Karonn tichea ghorabeant ti eklich zoddttali dekhun, tika aplea ghovachi ani tin bhurgeanchi kallji gheunchi poddttali. Tor tichea kama thaun tika retirement mell’llo tednam, apnnak pioneer seva korunk modot kor mhunn tinnem Jehova lagim khub magnnem kelem. Ti mhunntta: “Retirement zalea uprant pension-ache poixe mellonk chodd korun khub vell lagta punn mhaka mhojea pension-ache poixe ekuch mhoinea bhitor mellonk lagle. Hem polloun hanv khub ojap zalem!” Don mhoinea bhitor tinnem pioneer seva suru keli. Aiz bhoinn Fabiola-k, 70-a poros chodd vorsam asat. Ti 20-a poros chodd vorsam thaun pioneer seva korit asa ani tinnem att zannank bautizm gheunk modot kelea. Fuddem ti mhunntta: “Thodde pavtti mhoji bholaiki titli bori asona. Tori astana, mhoji pioneer seva korit ravonk Jehova mhaka modot korta.”

13-14. Jehovacher visvas dovrun amchi seva vaddounk amkam konnachim udharonnam modot korunk xoktat?

¹³ Jehovacher patieun ravlim tanchea udharonnantlean xikat. Jehovacher aslolo aplo visvas kornneamnim dakhoilea uprantuch besanvam mell’llolim zaitim udharonnam Bible-ant asat. Bible-ant amkam Jehovachea sevokanchim zaitim udharonnam mellttat, zannim poilim Jehovacher aslolo aplo bhavarth kornneamnim dakhoilo ani uprant Jehovan tancher besanv ghatlem. Udharonnak, apunn “khoim veta tem nokllo zaun-ui”, Abraham aplem ghor soddunk toiar zalo ani hea pasot, uprant Jehovan tacher besanv ghatlem. (Heb. 11:8) Toxench, Jakobanui devduta  sangata zhuz kelea uprantuch taka Jehova koddlean ek khas besanv mell’llem. (Ut. 32:24-30) Ani Israel raxttr, Bhasail’lea Desant bhitor sorchem aslem tednam, iadnikamnim aple paim Jordan nodint dovorlea uprantuch soglea lokank ti nodi par korunk mell’lli.—Josh. 3:14-16.

¹⁴ Teach bhaxen, aiz-ui amkam Jehovachea sevokanchim zaitim udharonnam asat zannim Jehovacher patieun apli seva vaddoilea. Zoxim bhav Payton ani tachi bail, Diana. Hea zoddpeak Jehovachi seva vaddoil’lea bhav-bhoinnanche onnbhov vachunk khub borem distalem. Payton mhunntta: “Ek munis ek ruchichem jevonn jevta tem ami polloit ravtat tednam tem jevonn amkam pasun jevunk koxem dista. Teach bhaxen, Jehovachi seva chodd kelolea bhav-bhoinnanche onnbhov ami jitlim chodd vachunk laglim titlench ‘Jehova kitlo boro tem chakun pollounk’ ami axeunk laglim.” Ani uprant, Payton ani Diana pasun porgottnnaranchi chodd goroz asa tea zagear seva korunk gelim. Tor tumi pasun jw.org website-icher aslole, They Offered Themselves Willingly * he lekh vachlear ani Witnessing in Isolated Territory—Australia ani Witnessing in Isolated Territory—Ireland, he viddeo polloilear tumchi seva vaddounk tumkam modot zatoli.

15. Jehovachi seva chodd kortat tosle ixtt aslolean amkam koxi modot zata?

¹⁵ Tumkam Jehovachi seva chodd korunk urba ditat tosle sangati vinchun kaddat. Ami kednanch chakonk na toslem jevonn jevunk ami ghoddie fatti sorot. Punn tem jevonn avoddtta toslea lokam sangata ami vell sartat tednam amkam-i tem jevonn avddonk lagtolem. Teach bhaxen, Jehovache sevek poilo zago ditat tanchea sangata ami chodd vell sartat tednam amkam pasun amchi seva anikui dusrea vattamnim vaddounk urba mellttoli. Kent ani Veronica nanvachea eka zoddpeak oxench ghoddlem. Bhav Kent mhunntta: “Amchea familin ani ixttamnim anikui dusrea-dusrea vattamnim Jehovachi seva korunk amkam urba dili. Hea toren, Jehovachem Raj poilea zagear dovortat tanchea sangata vell sarlolean ami amchi seva vaddounk pavlim.” Aiz Kent and Veronica, Serbia desant khas pioneer mhunn seva kortat.

16. Lukas 12:16-21-ant, Jezun sanglolea voparintlean, ami teag korpak kiteak toiar asonk zai mhunn amkam kolltta?

¹⁶ Jehova pasot teag korat. Jehovachi seva korop mhunnche amkam avoddtta tem soglem ami soddunk zai oxem nhoi. (Up. 5:18, 19) Punn dusre vatten amkam teag korunk poddttat mhunn ami Jehovachi seva korunk fatti sortat zalear, ami Jezun sanglolea voparintlea girest munxa bhaxen zaunk xoktat. Apleak ek susegad jivit mellonk tannem khub vavr kelo punn Deva khatir to vavrunk na. (Lukas 12:16-21 vachat.) Hea vixim amkam France-ant ravtolea Christian nanvachea eka bhavachem udharonn asa. To mhunntta: “Hanv Jehovak ani mhojea familik, mhojem boreantlem borem dinaslo.” Punn uprant, tannem ani tache bailen pioneer zauncho nirnnoi ghetlo. Hem korunk tannim aplem kam soddlem. Tim ghoram ani ofisam nitoll korchem kam korunk laglim ani aplea lagim asa tantunuch dhadoxi ravonk xiklim. Osle teag korun tankam faido zalo kai? Bhav Christian sangta, “Amche Bible videarthi ani porot bhetto Jehova vixim xiktat tem polloun, atam amkam amchea porgottnnent anik chodd khuxalkai melltta.”

17. Porgottnnent noveo vatto uzar korunk ami kiteak fatti soronk xoktat?

¹⁷ Porgottnni korunk noveo vatto uzar korat. (Itihas 17:16-18; 20:20, 21) United States-ant ravpi, Shirley nanvache eke pioneer bhoinnin hem koxem kelem tem ami polloum-ia.  COVID-19 pidda suru zali tednam he bhoinnik tichea sevent bodol korcho poddlo. Survatek, ti fon-a voilean porgottnni korunk fatti sortali. Punn sorkittachi dekhrekh korpi tichea sobhent ailo tednam, tannem fon-a voilean koxi porgottnni korpachi tem xikoilem. Tednam thaun bhoinn Shirley sodanch fon-a voilean porgottnni korta. Ti mhunntta: “Poilim-poilim, mhaka khub bhirant distali punn atam mhaka hea porgottnnent bhag gheunk khuxalkai melltta. Ami ghor-ghoramnim porgottnni kortalim tachea poros ami fon-a voilean anikui chodd lokank porgottunk xoktat.”

18. Amkam oddchonneo ietat tednam tancho fuddo korunk amkam kitem modot korunk xokta?

¹⁸ Ek dhei dovrat ani to melloun gheunk kam korat. Tumkam oddchonneo ietat tednam tancho fuddo korun tumcho dhei melloun gheunk, tumi kosle nirnnoi gheunk zatat tea vixim magnnem korun bariksannen chintat. (Mho. 3:21) Amkam Sonia nanvachea eka niemit pioneer-achem udharonn asa. Tem Europe-antlea, Romany bhas uloita tea eka grupa sangata seva korta. Tem mhunntta: “Hanv melloun gheunk sodhtam tem dhei eka kagdacher boroun, dixtti poddtta toslea eka zagear dovortam. Toxench mhojea mezar, ek rosto fuddem vochon tache don roste zatat toslem ek chitr asa. Tor mhaka ek nirnnoi gheuncho poddtta tednam, hanv hem chitr polloun, khoincho rosto vo khoincho nirnnoi ghetlear hanv mhozo dhei melloun gheunk pavtolem tea vixim chint’tam.” Hea toren oddchonneo ietat tednam pasun Sonia bore nirnnoi gheunk pavta. Tem fuddem mhunntta: “Mhojea jivitant ietat teo oddchonneo, eka vontti sarkeo vo eka pula sarkeo zaunk xoktat. Mhunnche teo mhaka addkholl korunk xoktat vo mhoje dhei melloun gheunk modot korunk xoktat. Tor ti oddchonn hanv kitem mhunn somzotam tem mhojer asa.”

19. Jehovak upkari asat mhunn dakhounk ami kitem korunk zata?

¹⁹ Jehova amkam zaitim besanvam dita. Ani tache upkari asat mhunn dakhounk ami tachi seva amchean zata title bore toren korunk vavrunk zai. (Heb. 13:15) Ani hem korunk ami noveo-noveo vatto apnnaun amchi seva vaddounk zata. Oxem kel’lean Jehova amkam anikui besanvam ditolo. Tor dor disak ‘Jehova kitlo boro tem chakun pollounk’ ami vavrum-ia. Ami oxem kelear ami Jezu bhaxen mhunnonk pavtolim. Tannem mhunnttlem, “Zannem Mhaka pattoila Tachi khuxi korunk ani Tachem kam sompadunk, hench Mhojem khann-jevonn.”—Juanv 4:34.