1. Tumchea avoi-bapain Jehova vixim tumkam kitem xikoilam?

TUMI lhanponnim thaun Jehovachim Sakxim zal’lean, tumchea avoi-bapain Jehova amcho Rochnnar, taka bore gunn asat, ani to hi prithum ek sobit bag korcho asa mhunn tumkam xikoilam astolem.—Ut. 1:1; D.I. 17:24-27.

2. Rochnnar asa mhunn patietat tanchea vixim thoddo lok kitem chint’ta?

² Aiz zaite lok, Dev asa mhunn vo tannem hem soglem rochlam mhunn maninant. Punn, thoddea vostum thaun jiv ailo ani tea jiva thaun sovkas-sovkas apxinch sogli rochnna aili oxem te patietat. Tor vidneana pormonnem Bible sarko na mhunn te sangtat. Ani oxem patietat tim chodd korun, chodd xiklolim asat dekhun Rochnnaracher patietat tim unnem xikop aslolim vo zannvai naslolim mhunn tankam dista.

3. Ami amcho bhavarth kiteak ghott korit ravonk zai?

³ Tor oslea lokanchem chintop apnnaun Jehovacher ami amcho bhavarth halonk ditolim kai? Oxem zaina zaunk, ami amkanch he prosn vicharunk zai: Jehova Devuch Rochnnar zaun asa mhunn hanv kiteak patietam? Fokot dusreamnim mhaka sanglam mhunn vo hanvem svota tachi khatri korun ghetlea mhunn? (1 Kor. 3:12-15) Ami khatri korun ghetlea zalear ami amcho bhavarth ghott korit ravonk zai. Ani oxem ami kortat tednam ami monxanchea “polkea xanneponnan” foschim nant. (Kol. 2:8; Heb. 11:6) Tor hea lekhant ami (1) zaito lok Rochnnar asa mhunn kiteak patienant, (2) Jehova amcho Rochnnar mhunn ami amcho bhavarth koso ghott korunk zata, ani (3) to bhavarth sodanch ghott uronk ami kitem korunk zai tem ami polloitolim.

4. Hebrevank 11:1-a pormonnem, khoro bhavarth kiteacher adarit asa?

⁴ Thoddea lokank dista ki bhavarth mhunnche dolle bond  korun visvas dovrop. Punn Bible sangta ki khoro bhavarth puraveancher adarit asa. (Hebrevank 11:1 vachat.) Udharonnak, Jehova, Jezu, Devachem Raj hem soglem ami pollounk xokonant. Punn tem asa mhunn ami patietat. Karonn amchea lagim khatreche purave asat. (Heb. 11:3) Ek vidneanik zo atam Jehovacho Sakxi zaun asa, to mhunntta: “Jehovache Sakxi dolle bond korun kiteacheruch visvas dovrinant. Te purave kitem asat tem zannam zatat. Ani hantunt vidneanik ditat te purave pasun mellon asat.”

5. Aiz zaito lok Rochnnar asa mhunn kiteak patienant?

⁵ Rochnnar asa mhunn amkam zaite purave asat. Tori astana aiz zaito lok Devan hem soglem rochlam mhunn kiteak patienant? Ek karonn mhunnttlear, tannim te purave pollounk vell gheunk na. Hea vixim bhav Robert-achem udharonn asa. To mhunntta: “Ek rochnnar asa mhunn iskolant amkam kednanch xikounk naslem. Taka lagon hanv tem maninaslo. Hanv 22 vorsancho zalo tednam mhaka Jehovache Sakxi mell’lle. Tannim mhaka Rochnnar asa mhunn Bible-antlean purave dakhoile ani tednam mhaka Rochnnar asa mhunn khatri zali.” *—“ Avoi-Bapaink Ek Mhotvacho Sondex,” hem boks polloiat.

6. Rochnnar na mhunn patieunk thoddo lok anik kitem karonn ditat?

⁶ Rochnnar na mhunn sangonk thoddo lok anik ek karonn ditat. Te mhunnttat ki jeo vostu te pollounk xokonant tancher te visvas dovrinant. Punn, khorem mhunnttlear, zaiteo dixtti poddonant teo vostu pasun asat mhunn te patietat. Zoxem varem, jem asa mhunn  manunk purave asat. Ani Bible pasun “amkam dixtti poddonant teo vostu khorench asat” mhunn purave dita. (Heb. 11:1) Ani he purave sarke asat mhunn khatri korun gheunk amkam vell ghalunk ani proitn korunk poddtta. Punn lok oxem korunk sodhinant. Ani hea pasot te Dev na mhunn sangtat.

7. Soglech xiklole lok Rochnnar na mhunn sangtat kai? Somzaiat.

⁷ Punn puraveancher dhean dilolean, zaitea vidneanikank pasun ek Rochnnar asa mhunn kollon ailam. Ani tachea vixim zannam zaun te tacho mog korunk pavleat. * Udharonnak, Robert zache vixim ami poilim uloilolim, taka Rochnnara vixim xikounk na dekhun to Rochnnar na mhunn chint’talo. Punn  uprant tachem chintop bodol’lem. Tor heach bhaxen, ami kitlim-i xiklolim aslear pasun, ami Devacher amcho bhavarth ghott korunk proitn korit ravonk zai. Karonn dusrim amchea pasot hem korunk xokonant.

8-9. (a) Atam ami khoinchea prosnancho zobab polloitolim? (b) Rochnne vixim xikot ravlear tumkam koso faido zatolo?

⁸ Rochnnar asa mhunn tumi tumcho bhavarth koso ghott korunk zata? Ami char vatto polloum-ia.

⁹ Poili vatt zaun asa rochnne thaun xikop. Tumchea bhonvtonnim aslolim zonvaram, zhaddam ani noketram polloitat ani tancher niall kortat tednam Rochnnar asa mhunn tumkam khatri zatoli. (St. 19:1; Iz. 40:26) Teach bhaxen, rochnne vixim zannam zaunk amchea lagim zaitim prokaxonam ani lekh asat. Tea bhair, pradexik odhivexonamnim dakhoil’le viddeo amkam jw.org website-icher pollounk mellttat. Tor, tumkam somzonk kotthin zata zalear pasun tem vach’chem ani pollounchem bond korinakat!

10. Rochnnar asa mhunn rochnne thaun amkam koso puravo melltta? Ek udharonn diat. (Romkarank 1:20)

¹⁰ Tor, rochnne vixim xiktat tednam Rochnnar asa mhunn khatri ditat tea puraveancher bariksannen dhean diat. (Romkarank 1:20 vachat.) Udharonnak, suria vixim chintat. Suria amkam goroz ti gormi ani uzvadd dita. Punn dusrea vatten, amkam mal poddonk xoktat toslim ultraviolet kirnnam pasun suria thaun ietat. Punn hea kirnnam thaun amkam rakhonn mellonk amchea prithume bhonvtonnim ek gas asa zaka ozone layer mhunnttat. Suria thaun ieupi him kirnnam jitlim chodd porzollttat titloch ho gas vaddot voita. Ani hea vorvim amkam tea kirnnam thaun rakhonn melltta. Tor hem soglem apxinch zalam? Vo eka mogall ani zannvaiechea Rochnnaran tem rochlam mhunn tumkam dista?

11. Rochnnar asa mhunn purave ditat tosli mahiti amkam khoim mellonk xokta? (“ Rochnnaracher Tumchi Patienni Ghott Korunk Modot,” hem boks polloiat.)

¹¹ Rochnnar asa mhunn purave ditat tosle lekh ani viddeo pollounk, tumi jw.org-cher, “Library” hantunt sodh korunk zata. Toxench, “Was It Designed?” (Inglez bhaxen) hantunt aslole lekh ani lhan-lhan viddeo polloilear tumkam zonvaram ani her rochnne vixim ojapachi mahiti mellttoli. Tea bhair, tumi Watch Tower Publications Index (Inglez bhaxen) hantunt pasun sodh korunk zata.

12. Bible-acho obheas kortana tumi kitea vixim bariksannen xikonk zata?

¹² Dusri vatt zaun asa Bible-acho obheas korop. Peregraf 4-ant sanglolo vidneanik, survatek Rochnnar asa mhunn patienaslo. Punn uprant to patieunk laglo. To oso mhunntta: “Mhozo bhavarth fokot vidnean xikonuch nhoi, punn Bible-acho bariksannen obheas kelolean vaddlo.” Tumi Bible-antleo zaiteo xikounneo zannant astolim. Torui, Rochnnaracher tumcho bhavarth vaddounk sodanch Bible obheas korop gorjechem. (Josh. 1:8; St. 119:97) Udharonnak, Bible adim ghoddlolea ghoddnneam vixim kitlea bariksannen sangta, Bible-ant sangloleo bhasaunneo koxe toren sarkeo purnn zaleat ani Bible veg-vegllea munxamnim boroila, tori astana tantunt ekvottkai koxi asa, hacher bariksannen obheas korat. Tumi oxem kortat tednam, ek mogall ani zannvaiecho Rochnnar asa mhunn ani tannem tumkam Bible dila mhunn tumcho bhavarth ghott zatolo. *—2 Tim. 3:14; 2 Ped. 1:21.

13. Bible-ant diloli xittkaunni faideachi asa mhunn dakhounk ek udharonn diat.

 ¹³ Bible-acho obheas kortana tantunt dilole sol’le amkam kitle faideache asat tem pasun tumkam kollttolem. Udharonnak, poixeancho mog korop dhokeachem zaun asa ani oxem kelear amkam “sobar koxtt-dogd” bhogunk poddttat mhunn Bible-ant adim fuddench xittkailolem asa. (1 Tim. 6:9, 10; Mho. 28:20; Mt. 6:24) Hi xittkaunni amkam aiz pasun faideak poddtta mhunn ami kiteak mhunnonk zata? The Narcissism Epidemic hem pustok, munxanchea sobhava vixim oxem sangta: “Girestkaiechi axa aslole lok, chodd korun khuxal asonant vo khub niraxi astat. Toxench, tankam monachi xanti asona ani hea pasot tanchi bholaiki pasun bigoddtta.” Tor poixeancho mog korchea vixim Bible-ant diloli xittkaunni amkam kitli faideachi asa nhoi? Heach toren, amkam Bible-ant anik zaite sol’le mellttat, je ami apnnaitat tednam te kitle faideache tem amkam kollon ietolem ani ami sodanch khuxal astolim. (Iz. 48:17, 18) Ani hantuntlean, fokot Rochnnaruch amkam kitem borem asa tem sangonk xokta mhunn amchi khatri ghott zatoli.—Jak. 1:5.

14. Bible-acho obheas kelolean tumkam Jehova vixim kitem kollon ietolem?

¹⁴ Tisri vatt zaun asa Bible-acho obheas kortat tednam Jehovak bore toren zannam zauncho hetu dovrop. (Juanv 17:3) Oxem tumi kortat tednam, Jehova koslo Dev ani taka kosle gunn asat tem tumkam kollon ietolem. Ani hech gunn tumi rochnna polloun xiklolim mhunn tumkam ugddas ietolo. Hea vorvim, Dev khoreanich asa mhunn tumchi khatri ghott zatoli. (Sutt. 34:6, 7; St. 145:8, 9) Jitlim tumi Jehovak zannam zatolim, titlo tachea pasot aslolo tumcho mog, bhavarth, ani ixttagot ghott zatoli.

15. Jehova vixim tumi xikleant tem dusreank sanglolean tumkam koso faido zatolo?

¹⁵ Chouthi vatt zaun asa Jehova vixim tumi xiktat tem dusreankui sangop. Oxem tumi kortat tednam, tumcho-i bhavarth ghott zatolo. Udharonnak, Dev asa mhunn patiena toslo ek munis tumkam melltta mhunn chintat. Ani taka kitem zobab diuncho tem tumkam somzona. Tednam tumi kitem kortolim? Amchea prokaxonamnim Bible kitem zobab dita tea vixim tumi sodh korunk zata. (1 Ped. 3:15) Vo onnbhov aslolea eka bhava vo bhoinni lagim modot magonk zata. Ani oxem kelolean tea munxak zobab diunk tumkam sompem zatolem. To tumchem aikona zalear niraxi zainakat. Karonn tumi kelolo vavr nirfoll zaunk na. Punn portench, tumcho bhavarth anikui ghott zaunk pavtolo. Hea vorvim, Rochnnar na mhunn patietat toslea lokank zobab diunk tumi sodanch toiar astolim.

16. Ami amcho bhavarth kiteak ghott korit ravonk zai?

¹⁶ Ami khub vorsam thaun Jehovachi seva kortat zalear pasun, ami amcho bhavarth ghott korit ravonk zai. Karonn ami chotur nant zalear amcho bhavarth unno zaunk xokta. Oxem ami kiteak mhunnonk zata? Ami ugddas dovrunk zai ki bhavarth mhunnche dixtti poddonant teo vostu pasun khorench asat mhunn puraveam udexim visvas dovrop. Punn jem amkam dixtti poddona, tem ami sompeponnim visronk xoktat. Ani bhavarth unno zavop, amkam ‘sompeponnim veddo ghalta vo guspaita toslem ek patok’ zaun asa mhunn Paulun sanglem. (Heb. 12:1, Povitr Pustok - Novo Korar) Tor amcho bhavarth ghott dovrunk ami kitem korunk zai?—2 Tes. 1:3.

17. Tumcho bhavarth ghott korunk tumi kitem korunk zai?

 ¹⁷ Tumcho bhavarth ghott korunk tumi poilim, Jehovachi povitr xokti magot ravonk zai. Karonn, bhavarth povitr xoktechea follacho ek bhag zaun asa. (Gal. 5:22, 23) Povitr xoktecho adar nastana ami amcho bhavarth ghott korunk xokonant. Tumi Jehovachi povitr xokti magot ravlim zalear, to tumkam ti ditoloch. (Lukas 11:13) Tor tumi khas korun, Jehova lagim “amcho bhavarth vaddoi” mhunn magonk zata.—Lukas 17:5.

18. Stotr 1:2, 3-a pormonnem, amchea lagim aiz koslem dennem asa?

¹⁸ Ani dusrem, tumi chukoinastana tumcho svotacho Bible obheas korit ravonk zai. (Stotr 1:2, 3 vachat.) Hem stotr boroilolem tednam, fokot thoddeach Israelitkaram lagim ani raza ani iadnikam lagim Devachea ak’khea Somurtiche kovlle asle. Ani dor satvea vorsa, “sogllea dadleank, bailank, bhurgeank,” toxench ganvant jietolea porkea lokank ektthaim korun ti Somurt vachpachi manddavoll kel’li. (D.S. 31:10-12) Jezuchea disamnim pasun, fokot thoddeach lokam lagim vo devsthanamnim Devachea Utrache kovlle astale. Punn aiz sonvsarbhor choddxea lokam lagim ak’kho Bible asa vo tache thodde bhag pasun asat. Tor hea dennea pasot ami upkari asat mhunn ami koxem dakhounk zata?

19. Ami amcho bhavarth ghott korunk kitem korunk zai?

¹⁹ Ami sodanch Bible vachunk ani tacher obheas korunk vell kaddttat tednam ami tea dennea pasot upkari asat mhunn dakhoitolim. Tor vell aslearuch ami obheas kortolim oxem ami chintchem nhoi, punn ami chukoinastana to kortat tednam amcho bhavarth ghott zaunk pavtolo.

20. Ami kitem korunk nichov korum-ia?

²⁰ Ami hea sonvsarantlea ‘xanneam ani zannaram’ bhaxen nhoi. Karonn amcho bhavarth Devachea Utrantlea puraveancher adarit asa. (Mt. 11:25, 26) Ani Bible-acho obheas korun, sonvsarachi poristhiti kiteak vaitt zait asa ani amcho Rochnnar tea vixim kitem kortolo tem amkam kollon ailam. Tor amchea Rochnnara vixim zata titlea lokank sangonk ani tacher amcho bhavarth ghott korit ravonk ami nichov korum-ia. (1 Tim. 2:3, 4) Ani fuddarak, ami oslea vellachi vatt polloit ravum-ia jednam hea prithumer jietole sogle lok, Prokasovnni 4:11-ant aslolim him utram mhunnttolim: ‘Sorvespora, amchea Deva, soglleamnim Tuka mhoima ani bhovman diunk favo . . . karonn sogllea vostuncho Rochnnar Tum.’