1-2. Hea lekhant ami kitem xiktolim?

CHINTAT, tumkam ek parsel ieupachem asa. Punn tem tumkam zai tea vellar ieunk na dekhun tumi niraxi zaunk xoktat. Punn tem ieupak kiteak vell laglo tem tumkam kolltta zalear tumi pasiensan vatt polloit ravonk toiar astolim.

² Tor hea lekhant, ami Bible-antlim thoddim totvam polloitolim jim amkam “Sorvesporacher dolle lavun dovrunk” ani pasiensan tacher patieun ravonk modot kortolim. (Mik. 7:7) Toxench, pasiens dakhounk amkam kednam kotthin zaunk xokta tem ami polloitolim. Tea bhair, pasiens dakhoilolean amkam koslim besanvam mellttolim tem pasun ami zannam zatolim.

3. Mhonn’nneo 13:11-ant sanglolea totvant amkam kitem xikonk melltta?

³ Pasiens kiteak gorjechem tem zannam zaunk, Mhonn’nneo 13:11-ant aslolem ek totv ami polloum-ia. Thoim sangta, “Okosmat mell’lloli dovlot sovkas-sovkas komi zait vetoli, thoddem-thoddem ektthavop hoch girestkaiecho rosto.” Tor hanga amkam xikonk melltta ki ami khoinchem-i kam pasiensan kelear tacho porinnam boro zatolo.

4. Mhonn’nneo 4:18-ant dil’lea totvantlean amkam kitem kollon ieta?

⁴ Anik ek totv amkam Mhonn’nneo 4:18-ant dil’lem asa. Thoim mhunntta, “Promannikacho rosto fanteavelea  noketra sarko, Tacho uzvadd suriachea kirnna porim vaddta.” Tor hea versant, Jehova aplea lokank aplo ud’dhex sovkas-sovkas kolloita mhunn amkam kolltta. Toxench, hea versant dil’lea totvantlean amkam hem-ui kollon ieta ki ek munis sot xikta tednam to sovkas-sovkas korun aplea jivitant goroz te bodlav korunk lagta ani Devak lagim sorta. To bariksannen Devachea Utracho obheas korit ravta ani tachea songottnne thaun ieta tem margdorxon apnnaita. Oxem korun to sovkas-sovkas, Jehovak anik bore toren vollkhonk pavta ani Jezun dakhoil’le gunn apnnaunk pavta. Hem somzonk Jezun amkam ek borem udharonn dilam, tem ami polloum-ia.

5. Eka munxak jivitant bodlav korunk vell lagta tem somzaunk Jezun koslem udharonn dilem?

⁵ Jezun sanglem, “Rat ani dis, to nhidlolo asum vo zago asum, bim kirlota ani vaddta; hem koxem tem to kaich nokllo. Zomin apnna osttongim foll dita, poilim palo, magir konnos ani xekim konnsant gulgulit gotto.” (Marku 4:27, 28) Hanga sanglam tem bim mhunnttlear, Devachea Rajeachi bori khobor zaun asa. Jezu hanga sangtalo ki ek bim kirlonk ani vaddonk vell lagta. Toxench, eka munxak sot xikonk ani aplea jivitant bodlav korpak vell lagta. Udharonnak, ek Bible videarthi Jehovacho mog korunk lagta tednam to sovkas-sovkas aplea jivitant bodlav korta. (Ef. 4:22-24) Punn ami ugddas dovrunk zai ki hem bim vaddoupi, fokot Jehova zaun asa.—1 Kor. 3:7.

6-7. Jehovan jea toren prithum rochli, tantuntlean amkam kitem xikonk melltta?

⁶ Koslem-i kam kortana, Jehova Dev tem pasiensan ani vell gheun purnn korta. Oxem kelolean, tachea nanvak mhoima melltta ani dusreankui tacho faido zata. Hem tannem prithum rochtana koxem kelem tem ami polloum-ia.

⁷ Bible sangta ki Jehova Devan prithum rochtana tacher “mezpachi pott’tti” patllaili, tachea “khambeank” mullak samballun dovorle ani taka “kon’xeacho fator” bosoilo. (Job 38:5, 6) Ani apnnem jem kitem rochlolem tem pollounk Jehovan vell ghetlo.  Ani hem soglem tannem polloilem tednam tem “ekdom borem aslem” mhunn tannem mhunnttlem. (Ut. 1:10, 12, 31) Toxench, Jehova Dev aple rochnnek sovkas-sovkas korun koso akar dita tem polloun devdut ekdom khuxalbhorit zaun taka ‘zoizoikar’ korunk lagle. (Job 38:7) Tor Jehova Deva koddlean amkam kitem xikonk melltta? Hi prithum, noketram ani jive pranni rochtana, Jehova Devak hozaramnim vorsam laglim hem khorem. Punn tem soglem tannem pasiensan ani vell gheun kelolean, tem ekdom borem zalem.

8. Atam ami kitem polloitolim?

⁸ Atam meren ami Bible-antlim zaitim totvam polloilim. Ani hea totvantlean ami pasiens dakhovop kiteak gorjechem tem amkam kollon ailem. Atam ami, pasiens dakhounk amkam kednam kotthin zaunk xokta tem polloum-ia.

9. Amkam kednam pasiens dakhounk poddot?

⁹ Poilem, amchea magnneank rokddoch zobab mellona tednam. Ek oddchonnecho fuddo korunk amkam boll di mhunn vo ek vaitt sonvoim soddun diunk amkam modot kor mhunn ami Jehova lagim magtat astolim. Punn Jehova amchea magnneancho zobab diunk khub vell gheta oxem amkam disonk puro. Tor Jehova amchea soglea magnneancho zobab rokddoch kiteak dina?

10. Amchea magnneancho zobab mellona tednam ami kitem korunk zai?

¹⁰ Jehova amchim soglim magnnim dhean diun aikota. (St. 65:2) Amchea magnneantlean amkam tacher kitlo bhavarth asa tem to polloita. (Heb. 11:6) Ani ami amchea magnneam pormonnem kam korunk ani tachi khuxi korunk vavurtat kai na hem-ui to polloita. (1 Juanv 3:22) Tor Jehovak manvona tem korina zaunk ami magnneant tachi modot magtat tednam, ami pasiens dakhounk zai ani ti vaitt sonvoim soddunk zata titlo proitn korunk zai. Thodde pavtti amchea magnneank rokddoch zobab mellona. Tea pasot Jezun oxem mhunnttlem: “Magat ani tumkam melltolem; sodat ani tumkam gavtolem; darar marat ani tem tumkam ugoddtolem; kiteak magtat tankam mellta, sodtat tankam gavta; ani darar martat tankam tem ugoddtolem.” (Mt. 7:7, 8) Tor Jezuchim him utram ugddas dovrun ami ‘magnneant thir ravtat’ tednam Jehova amchea magnneancho zobab ditoloch mhunn ami khatri dovrunk zata.—Kol. 4:2.

11. Jehova amchea magnneancho zobab rokddoch dina oxem amkam dista tednam Hebrevank 4:16 amkam kitem khatri dita?

¹¹ Jehova amchea magnneancho zobab rokddoch dina oxem amkam dista tednam ami tacher ragar zaunk zaina. Karonn to amkam ‘goroz tednam vo sarkea vellar’ tea magnneancho zobab ditolo mhunn tannem amkam khatri dilea. (Hebrevank 4:16 vachat.) Udharonnak, Jezun amkam Devachem Raj ieum mhunn magonk xikoilem. Ani aiz pasun tem Raj ieunk ani vaittponnacho xevott zaunk ami magot asat. (Mt. 6:10) Punn amkam zai tednam xevott ieunk na mhunn ami niraxi zaun bhavarth soddun dilo zalear tem kitlem pixemponn zatolem nhoi! (Hab. 2:3; Mt. 24:44) Tor ami pasiensan ani bhavarthan Jehova lagim magot ravonk zai, karonn tannem to ‘dis ani ghoddi’ adim fuddench tharailea ani to dis sarkea vellar ietolo.—Mt. 24:36; 2 Ped. 3:15.

12. Amkam anik kednam pasiens dakhounk poddot?

¹² Dusrem, amkam rokddoch neai mellona tednam. Aiz sonvsarant lokancher on’neai  zata. Karonn tanchi bhas, kull, ling vo des vegllo asa. Toxench eklo opong asa zalear vo mansik ritin duent asa zalear lok tachea sangata bore toren vagonant. Tea bhair, amchea patiennek lagon, lok amchea sangata vaitt toren vagonk puro. Tor oslea vellar, ami Jezuchim him utram ugddas dovrunk zai: “Xevottak porian thir ravtit tankam Dev taronn ditolo.” (Mt. 24:13) Punn sobhent rokddoch neai zaina oxem amkam dista tednam ami kitem kortolim? Chintat, sobhent konnem tori ek vhodd patok kelam ani tem amkam koll’llem mhunn ami vochon vhoddilank sangtat. Tor te vhoddil Devachea Utra pormonnem neai kortole mhunn ami khatri dovrun pasiens dakhoitolim kai? Oxem korop kiteak gorjechem tem ami polloum-ia.

13. Sobhent konnui gombir patok korta tednam vhoddil Jehovachem margdorxon koxem apnnaitat?

¹³ Sobhent konnui, ek gombir patok korta tednam vhoddil kitem kortat tem ami zannam zaum-ia. Poilem mhunnttlear, tea vixim Jehova kitem chint’ta tem zannam zaunk te ‘tachi zannvai’ magtat. (Jak. 3:17) Karonn te ‘patkiak portun sarkea vatten haddunk’ sodhtat. (Jak. 5:19, 20) Toxench, te sobha nitoll dovrunk vavurtat ani on’neai zala taka buzvonn ditat. (2 Kor. 1:3, 4) Tor konnem-i gombir patok kelam mhunn vhoddilank kolltta tednam, sogleant poilim khorench kitem ghoddlem tem te zannam zaun ghetat. Ani oxem korunk tankam vell lagonk puro. Uprant te magnnem kortat, chuk kelea taka Bible-antlean sol’lo ditat ani taka “favo titlich” xist laitat. (Jer. 30:11) Tor hem soglem korunk te khub vell gheinant tem khorem, punn tem begin-begin korunk te goddbodd-ui korinant. Hea toren, vhoddil Jehovachem margdorxon apnnaitat tednam sobhent aslolea sogleank faido zata. Punn hem soglem zaisor, on’neai zala taka aplem dukh sonxit ravonk poddot. Tumkam oxem ghoddlam zalear hem dukh unnem korunk tumi kitem korunk zata?

14. Sobhent tumkam on’neai zala zalear Bible-antlea khoinchea udharonnantlean tumkam buzvonn mellonk xokta?

¹⁴ Sobhent tumkam kednam-i on’neai zala kai? Oslea vellar, amkam modot zaunk Bible-ant zaitim udharonnam dileant. Him udharonnam, Jehova soglem sarkem kortolo mhunn tacher patieun ravonk amkam modot kortat. Tantuntlem ek udharonn mhunnttlear,  Juzechem. Tachea svotachea bhavamnim tacher on’neai kel’lo. Tori punn to tancher ragar zaunk na. Tachea bodlek, tannem Jehovachea sevecher aplem dhean dovorlem. (Ut. 39:21) Tannem aplea bhavank pasun bhogxile. Ani Jehovan taka tachea pasiensak ani sosnikaiek lagon khub besanvam dilim tem tannem polloilem. (Ut. 45:5) Tor Juze bhaxen, ami pasiensan Jehova sarkea vellar neai kortolo mhunn patieun taka lagim sortat tednam amkam buzvonn melltta.—St. 7:17; 73:28.

15. Eke bhoinnik apleak zal’lo on’neai pasiesan sosunk koxi modot zali?

¹⁵ Ami sogleamnim, Juze sarkoch on’neai sosunk na zait. Punn amchim bhav-bhoinnam vo her konnui amkam dukhoitat tednam amkam khub vaitt dista. Hea vellar, ami Bible-antlim totvam apnnailear amkam faido zatolo. (Filp. 2:3,4) Hea vixim, ami eke bhoinnichem udharonn polloum-ia. Tichea sangata kam korpi eke bailen tichea vixim dusreank vaitt ani khotteo khobro sangleo. Hem bhoinnik koll’llem tednam tika khub dukh zalem. Punn rokddich ragar zaunchea bodlek tinnem Jezuchea udharonnacher niall kelo. Apleak opman kortat tankam Jezun opman korunk na. (1 Ped. 2:21, 23) Hem monant dovrun, jem kitem zal’lem tem polloun ti vogich ravli. Uprant tika kollon ailem ki tea bailek ek gombir duens aslem ani tea pasot tika monachi xanti nasli. Hea karonnak lagon tinnem toxem kelem astolem mhunn hi bhoinn somzonk pavli. Tor tinnem pasiens dakhoun hem soglem soslem mhunn ti khuxal zali ani tika monachi xanti mell’lli.

16. Ami kitem ugddas dovorlolean amkam buzvonn mellonk xokta? (1 Pedru 3:12)

¹⁶ Tumkam on’neai zala vo anik koslea-i karonnak lagon tumi dukh sostat zalear Jehova ‘dukhovloleank khontovloleank’ sodanch lagim asa mhunn ugddas dovrat. (St. 34:18) Toxench, tumi pasiens dakhoitat ani tumche sogle uske tacher ghaltat mhunn to tumcho khub mog korta. (St. 55:22) Jehova ak’khea prithumecho Neai Korpi zaun asa ani to soglem polloita. (1 Pedru 3:12 vachat.) Tor tumchean suttaveo korunk zainant tosleo oddchonneo tumi sostat zalear, Jehova soglem sarkem kortolo mhunn tumi tacher patieun ravtolim kai?

17. Izaias 30:18-ant, Jehova amkam kosli khatri dita?

¹⁷ Izaias 30:18 mhunntta: “Punn Sorvespor tumkam proson’n zaunk ravta; Zo Xrextt-Vorto, To tumchi doia korunk veta. Karonn Sorvespor nitivont Dev, Tachi vatt polleun asat tim sogllim subhagi!” Tor pasiens dakhoun Jehovacher patieun ravtat tankam to atam-i besanvam dita, ani fuddarak eka novea sonvsarant aplea Rajea udexim anikui zaitim besanvam ditolo.

18. Novea sonvsarant amkam koslim besanvam mellttolim?

¹⁸ Devachea novea sonvsarant, aiz amkam sosunk poddttat teo oddchonneo, on’neai ani dukh aschem na. (Prok. 21:4) Amkam goroz tem soglem thoim astolem. Tor amkam uske kaddunk poddche nant. (St. 72:16; Iz. 54:13) Thoim jivit khub borem astolem!

19. Jehova amkam atam kitea pasot toiar korit asa?

¹⁹ Jehovan bhasailolea novea sonvsarant jieunk, Jehova amkam atanch toiar korta. Taka manvota tosle gunn amchea bhitor vaddounk to amkam modot korta. Tor niraxi zaun Jehovachi seva korop soddun dium nakat. Karonn tannem amkam fuddarak ek ekdom borem jivit dovorlam. Tea mhunnosor, ami Jehovacher patieun khuxalkaien tachi seva korit ravum-ia!