OBHEASACHO LEKH 33
Jehovachi Nodor Aplea Sevokancher Asa
“Sorvesporachi konn bhokti kortat . . . toslea monxancher Tachi nodor boslea.”—ST. 33:18.
GIT 4 “Jehovah Is My Shepherd”
KITEM XIKTOLIM *
1. Jezun Jehova Deva lagim aplea xisanchi rakhonn kor mhunn kiteak maglem?
JEZUN morchea adle rati Jehova Deva lagim magnnem kelem. Ani tea magnneant tannem khas korun, Jehova Devak aplea xisanchi rakhonn kor mhunn sanglem. (Juanv 17:15, 20) Punn Jehova Dev aplea sevokanchi rakhonn korta ani tanchi kallji gheta mhunn Jezuk khobor asli. Tori astana tannem oxem kiteak maglem? Karonn Soitan aplea xisancho khub virodh kortolo ani hacho fuddo korunk tankam Jehovache modotichi goroz poddttoli mhunn Jezu zannam aslo.
2. Stotr 33:18-20-a pormonnem, amcher tras ietat tednam amkam bhieupachi kiteak goroz na?
2 Soitanachea tabeant aslolea hea sonvsarant, aiz khorea Kristanvank khub tras sosche poddttat. Ani hea pasot ami niraxi zaunk puro, ani Jehova Devak visvaxi ravonk amkam kotthin zaunk puro. Punn oxem zata tednam amkam bhieupachi koslich goroz na. Karonn hea lekhant ami polloitolim toxem, Jehova amcher nodor dovorta. Tem mhunnttlear, amcher ietat te tras Jehova polloita ani to amkam modot korunk sodhta. Tor ‘apli bhokti kortoleancher Jehova koxi nodor dovorta,’ tea vixim Bible-antlim don udharonnam ami polloum-ia.—Stotr 33:18-20 vachat.
AMI EKSURIM ASAT OXEM AMKAM DISTA TEDNAM
3. Ami eksurim asat oxem amkam kednam disonk xokta?
3 Amche sobhent zaitim bhav-bhoinnam asat zalear pasun, thodde pavtti ami eksurim asat oxem amkam disonk puro. Udharonnak, bhurgeank vo tornnatteank, iskolantlea her bhurgeam mukhar tanchea bhavartha vixim sangonk poddtta tednam, tankam modot korunk konnuch na oxem tankam disot. Vo tim eke nove sobhent voitat tednam tankam eksurponn bhogonk puro. Toxench, thodde pavtti amchea modlim thoddim zannam khub niraxi zaunk puro ani amkam eksurponn bhogonk puro. Ani oxem zata tednam ami dusream lagim ulounk pasun fattim soronk xoktat. Karonn amkam koxem bhogta tem dusreank somzochem na, vo konnakuch amchem kainch poddlolem na oxem amkam disonk xokta. Toxench, amkam eksurponn bhogta tednam amkam khub usko zaunk puro ani ami kainch valorachim nant oxem amkam disonk xokta. Punn amkam oxem bhoglolem Jehova Devak kednanch naka. Oxem ami kiteak mhunnonk zata?
4. “Ekloch jivo urla to hanv,” oxem provadi Elijan kiteak mhunnttlem?
4 Amkam Jehovacho visvaxi provadi, Elijachem udharonn asa. Apunn Elijak jivexim martoli mhunn Jezebelan soput ghetlolo. Ani hea pasot, 40-am poros chodd dis porian Elija aplo jiv vanchounk pollon dhanvtalo. (1 Raz. 19:1-9) Uprant, to ekttoch ek dholint lipon aslo tednam tannem roddon Jehovak oxem mhunnttlem: “Ekloch jivo urla to hanv.” (1 Raz. 19:10) Punn khorem mhunnttlear, thoim anikui provadi asle. Karonn Obadian 100 provadeank Jezebela thaun vattailʼle. (1 Raz. 18:7, 13) Tor apunn eksuro asa oxem Elijak kiteak dislem astolem? Obadian vattailʼle sogle provadi tednam meren moron gele oxem ghoddie Elijak dislem astolem. Vo Karmel Dongrar, Jehovan apunn khoro Dev mhunn dakhoun dilea uprant pasun, tachi seva korunk konnench apnnak sangat diunk na dekhun ghoddie Elijan oxem chintlem astolem. Vo aplo jiv kitlo dhokeant asa tem konnakuch khobor na, vo konnakuch mhojem poddlolem na oxem ghoddie Elijak dislem astolem. Elijak khorench koxem bhoglem tea vixim Bible amkam sangona. Punn Elijak eksurponn kiteak bhoglem ani taka koxi modot korchi tem Jehova ekdom bore toren zannam aslo mhunn amkam khatri asa.
Amkam eksurponn bhogta tednam Jehovan Elijak koxi modot keli tantuntlean ami kitem xikonk zata? (Peregraf 5-6 polloiat)
5. Elija eksuro na mhunn Jehovan taka koxi khatri dili?
5 Elija eksuro na mhunn taka khatri diunk, Jehovan taka zaitea vattamnim modot keli. Jehovan Elijak don pavtti, “Tum hangasor kitem kortai?” mhunn vicharlem, ani taka ulounk urba dili. (1 Raz. 19:9, 13) Ani dor ek pavtt Elijan apleak koxem bhogta tem Jehovak sanglem tednam, Jehovan kan diun tachem aikolem. Toxench, taka modot korunk apunn tachea sangata asa, ani apleak kitli xokti asa tem Jehovan Elijak dakhoun dilem. Tea bhair, zaite Israelitkar azun porian apli seva kortat mhunn Jehovan Elijak khatri dili. (1 Raz. 19:11, 12, 18) Tor aplea kallzant kitem asa tem Jehovak sanglea uprant, ani Jehovachim bhuzvonnechim utram aikolea uprant, Elijak khub borem dislem astolem. Magir Jehovan taka anikui mhotvacheo zobabdareo dileo. Zoxem Jehovan taka, Hazaelak Siriecho raza, Jehuk Israelacho raza, ani Elishak ek provadi mhunn makhunk sanglem. (1 Raz. 19:15, 16) Tor heo zobabdareo diun, ani Elisha oslo ek boro ixtt diun, Jehovan Elijak borea vostuncher dhean diunk modot keli. Elija bhaxen ami eksurim asat oxem amkam dista tednam Jehova amkam koxi modot korta?
6. Tumi eksurim asat oxem tumkam dista tednam tumi kitea vixim magnnem korunk zata? (Stotr 62:8)
6 Tumkam kosle tras sosunk poddttat tem Jehova ekdom bore bhaxen zannam ani tea vixim tumi tache lagim ukteponnim uloilʼlim taka zai. Toxench, tumi khoinchea-i vellar tache lagim magnnem kelear to tumchem aikonk toiar asa mhunn to tumkam khatri dita. (1 Tes. 5:17) Aplea bhoktanchem magnnem aikonk taka ekdom borem dista. (Mho. 15:8) Tor tumi eksurim asat oxem tumkam dista tednam tumi kitea vixim magnnem korunk zata? Elija bhaxen tumchea kallzache uske ani tumkam koxem bhogta tem Jehovak ukteponnim sangat, ani tumchem eksurponn pois korunk tache lagim modot magat. (Stotr 62:8 vachat.) Udharonnak, tumchea iskolantlim bhurgim, tumche patienni vixim tumkam prosn vichartat tednam tankam zobab diunk tumkam bhirant dista, vo tumi eksurim asat oxem tumkam dista zalear Jehova lagim dhir magat. Toxench, tankam dukhoina tea toren somzaunk Jehova lagim zannvai magat. (Lukas 21:14, 15) Vo tumi niraxi asat zalear tumkam koxem bhogta tea vixim onubhov aslolea eka bhava vo bhoinni lagim ulounk Jehova lagim modot magat. Toxench, tea bhavak vo bhoinnik tumkam somzon gheunk modot kor mhunn tumi Jehova lagim magonk zata. Tor hea toren, tumi ukteponnim Jehova lagim uloitat, to koso tumchea magnneancho zobab dita tem polloitat, ani dusreanchi modot ghetat tednam, tumi tumchem eksurponn pois korunk pavtolim.
Tumi dusream sangata porgottnni korunk ani porgottnnent chodd vell sarunk vatto sodhtat kai? (Peregraf 7 polloiat)
7. Mauricio-chea onubhovantlean tumi kitem xiklim?
7 Tumchem niraxiponn pois korunk tumkam anik koxi modot zaunk xokta? Jehovan amkam sogleank khuxalkaiechem kam dilam mhunn ami ugddas dovrunk zai. Ani sevent toxench sobhent, amkam melltta tem kam korunk amchean zatat tem soglem ami kortat tednam Jehova tacher dhean dita ani taka tem manvota mhunn ami khatri dovrunk zata. (St. 110:3, NW) Hea vixim, amkam Mauricio * nanvachea eka tornnattea bhavacho onubhov asa. Mauricio-n bautizm gheun thoddeach vella uprant, tacho ek lagxilʼlo ixtt sovkas-sovkas korun Jehovak soddun gelo. Mauricio sangta: “To koxe toren Jehovak soddun gelo tem polloun, hanvem Jehovak dilʼli bhas hanv pallunk xoktolo kai, ani sodankal tache familicho bhag zaun ravonk xoktolo kai, mhunn hanv dubhavunk laglo. Mhaka khub eksurponn bhogonk laglem ani konnuch mhaka somzocho na oxem mhaka disonk laglem.” Punn uprant, eksurponn pois korunk Mauricio-n kitem kelem tea vixim to oxem sangta: “Hanv porgottnnent chodd vell ghalunk laglo. Oxem kelolean, soglem dhean mhojeruch, vo mhaka koxem bhogta tacher dovorna zaunk mhaka modot zali. Toxench, bhav-bhoinnam sangata mellon porgottnni kelolean hanv mhojem eksurponn pois korunk pavlo ani mhaka khuxalkai mellʼlli.” Amkam eksurponn bhogta tednam ami pasun oxench korunk zata. Ami bhav-bhoinnam sangata mellon porgottnni korunk xokonant tednam pasun, tanchea sangata chitti boroun ani fon-a udexim porgottnni kelolean amkam khuxalkai mellonk xokta. Bhav Mauricio-k anik koxe toren modot zali tea vixim to oxem sangta: “Hanv sobhent anik chodd vavr korunk laglo. Mhaka mellttale te vidʼdheartheache bhag ekdom bore toren toiar korunk hanv mhojean zata tem soglem kortalo. Hea vorvim, sobhentlim bhav-bhoinnam ani Jehova Dev mhozo khub valor kortat oxem mhaka distalem.”
AMCHER IETAT TEA TRASANK LAGON AMI NIRAXI ZATAT TEDNAM
8. Amkam trasancho fuddo korunk poddtta tednam amkam koxem disonk puro?
8 Hea nimannea disamnim amkam trasancho fuddo korunk poddttolo mhunn ami zannant. (2 Tim. 3:1) Punn amkam ghoddie okosmat, ani ami chintunkuch na toslea trasancho fuddo korunk poddot. Zoxem, amkam poixeanchi oddchonn ieunk xokta. Vo amkam ek gombhir duens zalam mhunn dotor amkam sangonk xokta. Vo amcho mogacho konnui bhair poddonk xokta. Oxem zata tednam, ani chodd korun, he tras eka-fattlean-ek, vo sogle ekuch borabor ietat tednam ami ekdom niraxi zaunk puro, ani amchean tem anik sosunk zaina oxem amkam disonk puro. Tea vellar, Jehova amchi porisithiti zannam, ani hea trasancho dhiran fuddo korunk to amkam modot kortolo mhunn ami ugddas dovrunk zai.
9. Jobak koslea trasancho fuddo korunk poddlo tea vixim sangat.
9 Jehova Devan, aplo visvaxi sevok Jobak koxi modot keli tea vixim chintat. Jobak ekuch borabor zaitea trasancho fuddo korunk poddlo. Ani he tras sosop taka ekdom kotthin aslem. Ekuch disa bhitor, tachea thoddea zonvarank chorun vhelim ani thoddea zonvarank marun uddoilim. Toxench, tachea sevokancho ani rakhnneancho jiv gelo. Tea bhair, eka vadollak lagon tachim opurbaiechim soglim bhurgim moron gelim mhunn taka kollon ailem. (Job 1:13-19) Ani hem dukh Job sostalo tednanch to khub duent zalo. Tea duensak lagon, to khub vollvollttalo ani tachea akʼkhea angak fodd ailʼle. (Job 2:7) Jobachi poristhiti itli vaitt asli ki tannem oxem mhunnttlem: “Mhaka mhojea jivachi vitt ailea; mhaka anik jieunkuch naka.”—Job 7:16, NW.
Apunn tacho mog korta ani kallji gheta mhunn Jobak khatri diunk, apunn koxe toren aplea rochnnechi kallji gheta tea vixim Jehova Joba lagim uloita (Peregraf 10 polloiat)
10. Jobacher ailʼle tras sosunk Jehovan taka koxi modot keli? (Masikachem fuddlem chitr polloiat.)
10 Jehova Jobacho khub mog kortalo dekhun tannem Jobacher apli nodor dovorli, ani tacher ailʼle tras sosunk ani visvaxi ravonk goroz tem soglem taka dilem. Jehova Joba lagim uloilo tea vellar, apleak kitli zannvai asa, aplea rochnnecho apunn kitlo mog korta ani koxi kallji gheta, tem tannem Jobachea ugddasak haddlem. Zaitea ojapvont zonvaram vixim to Joba lagim uloilo. (Job 38:1, 2; 39:9, 13, 19, 27; 40:15; 40:25, 26) Toxench, Jobak bhuzvonn ani ghottai diunk Jehovan Elihu nanvachea eka tornnatteak uzar kelo. Kitle-i tras ailear pasun visvaxi ravon te sostat, tea aplea sevokank Jehova besanvam dita mhunn Elihun Jobak khatri dili. Tea bhair, Jehovan Elihu udexim Jobak mogan solʼlo dilo. Hea akʼkhea vixvachea Rochnnara mukhar ami kainch nhoi mhunn ugddasak haddun, apleach vixim chodd chintina zaunk, Elihun Jobak modot keli. (Job 37:14) Toxench, Jehovan Jobak ek kam dilem. Tem mhunnttlear, aplea add patok adarlolea Jobachea tin ixttam pasot Jehovan taka magnnem korunk sanglem. (Job 42:8-10) Tor Joba bhaxen aiz amkam trasancho fuddo korunk poddtta tednam Jehova amkam koso modot korta?
11. Amcher ietat tea trasancho fuddo korunk Jehova aplea Utrantlean amkam koxi modot korta?
11 Jehova aiz, to Joba lagim uloilo toso amche lagim uloina punn aplea Utra udexim uloita. (Rom. 15:4) To amkam fuddara pasot ek boro bhorvonso diun bhuzvonn dita. Ani aplea Utra udexim amcher ietat te tras sosunk to amkam modot korta. Zoxem, amkam kosle-i tras sosunk poddlear pasun, konnacheanuch vo kiteacheanuch ‘koxech bhaxen Jehovachea moga koddsun amkam toddun kaddunk zaunchem na’ mhunn to amkam khatri dita. (Rom. 8:38, 39) Toxench, ‘apnnak ulo martolea sogleank apunn sodanch lagim asa’ mhunn Jehova amkam khatri dita. (St. 145:18) Tea bhair, amcher kosle-i tras ieum, Jehovacher patieun ravlear ami te khuxalkaien sosunk pavtolim mhunn Jehova amkam sangta. (1 Kor. 10:13; Jak. 1:2, 12) Toxench, Jehova amkam fuddarak ditolo tea besanvam vixim chintlear, atam amkam sosunk poddttat te tras thoddeach vellache mhunn aplea Utrantlean to amchea ugddasak haddtta. (2 Kor. 4:16-18) Ani beginuch, amkam sosunk poddttat tea trasanchem mukhel karonn, to mhunnttlear Soitan ani tachi dekh ghetat tea sogleank, Jehova sasnak nas korun uddoitolo mhunn to amkam bhas dita. (St. 37:10) Tor fuddarak tumcher ietolea trasancho fuddo korunk, tumkam modot kortolim toslim Bible-antlim versam tumi tonddpatt keleant kai?
12. Aplea Utrantlean amkam faido zaunk ami kitem kelʼlem Jehovak zai?
12 Ami sodanch Bible vachunk ani kitem vachlam tacher niall korunk vell kaddlolo Jehovak zai. Ani oxem korun ami xikleant tem ami apnnaitat tednam amcho bhavarth vaddtta, ani amchea mogall Sorginchea Bapak ami lagim soronk pavtat. Hea vorvim, amcher ietat tea trasancho dhiran fuddo korunk amkam modot zata. Tea bhair, aplea Utracher patietat tankam Jehova apli povitr xokti dita. Ani Jehova dita tea povitr xoktechea ‘vorte podve’ udexim ami kosle-i tras sosunk pavtat.—2 Kor. 4:7-10.
13. ‘Visvaxi ani xannea chakra’ udexim melltta ti Bible-achi xikounn amkam tras sosunk koxi modot korta?
13 Jehovache modotin, “visvaxi ani xanno chakor” zaite lekh, video ani songit toiar korta. Hea vorvim, amkam amcho bhavarth ani Jehova sangata asloli ixttagot anik ghott korunk modot zata. (Mt. 24:45) Oxem korunk, Jehova, visvaxi ani xannea chakra udexim dita tea sogleacho ami zata titlo faido gheunk zai. Halinch, United States-ant ravpi eke bhoinnin, visvaxi ani xannea chakra udexim ieta tea Bible-ache xikounnek lagon ti kitli upkari asa tem sanglem. Ti mhunntta: “Hanv 40 vorsam thaun Jehovachi seva korta. Ani hea vorsamnim zaite pavtti mhojea bhavarthachi porikxa zali.” Hea bhoinnik khub trasancho fuddo korunk poddlo. Pieun gaddi choloupi eka munxak lagon tichea ajeacho jiv gelo. Tichim avoi-bapui khub duent zalim ani uprant tim bhair poddlim. Toxench, hea bhoinnik don pavtti cancer zalo. Hea soglea trasancho fuddo korunk tika koxi modot zali? Bhoinn sangta: “Jehovan sodanch mhoji kallji ghetlea. Aplea visvaxi ani xannea chakra udexim to dita tea Bible-ache xikounnek lagon mhojer ailole tras sosunk mhaka modot zali. Jehova dita tea soglea pasot, hanv Joba bhaxen oxem mhunnonk xokta: ‘Moro porian mhojem [“visvaxiponn,” NW] kednanch soddun diunchi na!’”—Job 27:5.
Ami sobhentlea bhav-bhoinnank koxi modot korunk zata? (Peregraf 14 polloiat)
14. Trasanchea vellar amkam modot korunk Jehova amchea bhav-bhoinnank koso uzar korta? (1 Tesalonikekarank 4:9)
14 Jehovan aplea lokank trasanchea vellar eka-mekak mog koso dakhouncho ani bhuzvonn koxi diunchi tem xikoilam. (2 Kor. 1:3, 4; 1 Tesalonikekarank 4:9 vachat.) Tor Elihu bhaxen, amchim bhav-bhoinnam trasanchea vellar amcho bhavarth ghott samballunk modot korunk fuddem sortat. (Itihas 14:22) Udharonnak, Diane nanvachea eke bhoinnichea ghovak, gombhir duens zalʼlem tednam tichea sobhentlea bhav-bhoinnamnim tika urba dili ani Jehova sangata tichi ixttagot ghott korunk modot keli. Ti mhunntta: “Amkam hem sosunk khub kotthin aslem. Punn hea kotthin vellar, Jehova amkam koso mog dakhoita ani koxi kallji gheta tem ami polloilem. Amchea sobhentlea bhav-bhoinnamnim amkam khub modot keli. Tannim amkam fon kele, amkam mellonk ailim, ani amkam veng marun urba dili. Hea vorvim, amcher ailole tras ami sosunk pavlim. Ani mhaka gaddi cholounk kollonaslem dekhun bhav-bhoinnam mhaka mittingek ani porgottnnent vhoron haddttalim.” Khorench, amche sobhent aslolea hea mogall bhav-bhoinnam pasot ami khub upkari asat!
JEHOVA MOGAN AMCHI KALLJI GHETA MHUNN AMI UPKARI
15. Amcher ietat tea trasancho ami fuddo korunk pavtolinch mhunn ami kiteak khatri dovrunk zata?
15 Amkam sogleank koslea-na-koslea trasancho fuddo korunk poddttoloch. Punn ami hea lekhant polloilem toxem, oslea vellar ami ekttinch aschim nant. Karonn eka mogall Bapai bhaxen, Jehovachi nodor amcher asa, to sodanch amkam lagim asa, amchea uleak to kan dita ani amkam modot korunk sodanch toiar asa. (Iz. 43:2) Tor Jehova amkam koxe toren modot korta? Tannem amkam aplea lagim magnnem korchi sondhi dilea, aplem Utor Bible dila, ani visvaxi ani xannea chakra udexim to amkam Bible-acher adarit margdorxon dita. Toxench, amkam trasanchea vellar modot korunk tannem amkam mogall bhav-bhoinnam dileant. Tor amcher ietat tea trasancho fuddo korunk, Jehovan amkam udarponnan goroz tem soglem dilam mhunnttoch, ami tancho fuddo korunk pavtolinch mhunn ami khatri dovrunk zata.
16. Jehovan sodanch amchi kallji gheunk zai zalear ami kitem korunk zai?
16 Jehova eka mogall Bapai bhaxen amcher nodor dovrit asa mhunn ami kitlim upkari asat nhoi! “Tachech sovem kallzak sontos bhogta.” (St. 33:21) Amkam modot korunk Jehova dita tea sogleacho zata titlo faido gheun, ami tachea moga pasot kitlim upkari asat tem dakhounk zata. Punn Jehovan sodanch amchi kallji gheunk zai zalear ami pasun kitem tori korunk zai. Tem mhunnttlear, Jehovache nodren sarkem asa tem korunk ani tachem Utor pallunk amche lagim zata tem soglem ami korit ravonk zai. Ami oxem kelearuch, Jehova sodanch amcher nodor dovortolo!—1 Ped. 3:12.
GIT 30 My Father, My God and Friend
^ Aiz amkam sogleank zaiteo oddchonneo asat. Ani tea oddchonneancho fuddo korunk amkam Jehovachi modot zai. Hea lekhant, Jehova aplea sevokancher dhean dita ani tanchi kallji gheta mhunn amkam khatri melltta. Amchea modlea dor ekleak kosleo oddchonneo asat tem Jehova polloita ani amkam modot korunk to fuddem sorta.
^ Thoddim nanvam bodolʼleant.